Mabaka a Mahlano a go Boifa Modimo e Sego Batho

LESOGANA le be le maketše kudu. Le be le tloga le sa letela go bona seo se sa tšwago go direga. Le ithutile selo se sefsa poledišanong ya lona le Dihlatse tše pedi tša Jehofa. Ka nywaga e mentši le be le dutše le ipotšiša lebaka leo ka lona Modimo a dumelelago tlaišego, eupša ga bjale le arabilwe ka mo go kwagalago go tšwa Beibeleng. Le be le sa tsebe gore Beibele e na le tsebišo ya bohlokwa gakaakaa le e homotšago.

Metsotso e sego kae ka morago ga gore baeng ba lona ba sepele, mosadi yo e lego mong wa lefelo leo lesogana le le dulago go lona o tsena ka phapošing ya lona gomme o le botšiša a galefile gore, “Batho bale ke bomang?”

Le maketše, lesogana leo le ile la palelwa ke go araba.

Mosadi yoo o goeletša ka gore, “ke a tseba gore ke bomang gomme ge e ba ba ka tsena ka mo gape, o ntšwele motse gomme o nyake madulo felo-tsoko!”

O ile a bethaganya lebati gomme a sepela.

Balatedi ba Kgonthe ba Kriste ba Letetše Kganetšo

Seo se diragaletšego lesogana le se tlwaelegile. Lentšu la Modimo e lego Beibele le hlalosa gore: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Timotheo 3:12) Ka kakaretšo, Bakriste ba therešo ga ba ratege e bile ga se ba ka ba ratega. Ka baka la’ng? Moapostola Johane o boditše Bakriste-gotee le yena gore: “Re tseba gore re tšwa go Modimo, eupša lefase ka moka le rapaletše matleng a yo kgopo.” Sathane Diabolo o hlaloswa  gape e le ‘tau e rorago yeo e nyakago go metša yo mongwe.’ (1 Johane 5:19; 1 Petro 5:8) Go boifa batho ke se sengwe sa dibetša tše di atlegago kudu tša Sathane.

Gaešita le Jesu Kriste, yo a ilego a hola batho kudu gomme a se dire sebe, o ile a kwerwa le go tlaišwa. O itše: “Ba ntlhoile ka ntle le lebaka.” (Johane 15:25) Bošegong bja pele ga lehu la gagwe, o ile a hlamela balatedi ba gagwe go lebeletšana le boemo bjoo ka mantšu a a rego: “Ge e ba lefase le le hloya, le tsebe gore le ntlhoile pele ga ge le hloya lena. Gopolang lentšu le ke le boditšego lona ka re, Mohlanka ga a fete mong wa gagwe. Ge e ba ba ntlhomere, le lena ba tla le hlomara.”—Johane 15:18, 20.

Ka baka la temošo ye, ba bantši ba ile ba dika-dika go ema ka lehlakoreng la borapedi bja therešo. Ge e bolela ka bao ba bego ba tsoma Jesu tiragalong e nngwe, Beibele e re: “Go ba gona, go be go se yo a bego a ka bolela phatlalatša ka yena, ka baka la go boifa Bajuda.” (Johane 7:13; 12:42) Baetapele ba bodumedi ba mehleng yeo ba be ba tšhošetša ka gore ba tla leleka motho le ge e le ofe yo a bontšhago tumelo go Kriste sinagogeng. Ka go rialo, go boifa batho go ile gwa thibela ba bantši go ba Bakriste.—Ditiro 5:13.

Ka morago ga ge phuthego ya Bokriste e šetše e theilwe, re bala ka “tlaišo e kgolo” kgahlanong le phuthego kua Jerusalema. (Ditiro 8:1) Ge e le gabotse, Bakriste ba ile ba lebeletšana le tlaišo Mmušong wa Roma ka moka. Banna ba hlompšhago kua Roma ba ile ba botša moapostola Paulo gore: “Ge e le mabapi le sehlotswana se sa bokgelogi re a tseba gore kae le kae se bolelwa gampe.” (Ditiro 28:22) Ee, Bakriste ba therešo ba be ba ganetšwa kae le kae.

Gaešita le lehono, Sathane o sa dutše a diriša go boifa batho e le sebetša sa go thibela ba bantši go ba balatedi ba therešo ba Kriste. Batho ba nago le dipelo tše dibotse bao ba ithutago Beibele le Dihlatse tša Jehofa ba lebeletšana le kganetšo goba go kwerwa sekolong, mošomong, motseng wa gabo bona goba go tšwa go bagwera ba bona. Ba ka boifa gore ba ka se sa hlompšha, ba tla lahlegelwa ke bagwera goba ba ka se sa hwetša dilo tša boiphedišo. Metseng e mengwe ya magaeng, balemi ba boifa gore baagišani ba bona ba ka gana go ba thuša go buna goba go šireletša mehlape ya bona. Lega go le bjalo, go sa šetšwe dipoifo tše bjalo, batho ba dimilione ba dirile phetho ya go bota Modimo le go phela ka go dumelelana le Lentšu la Modimo ba ekiša Jesu Kriste. Jehofa o ba šegofaditše ka baka la go dira bjalo.

Lebaka Leo ka Lona re Swanetšego go Boifa Modimo e Sego Batho

Beibele e re kgothaletša go boifa Modimo e sego batho. E re: “Xo boifa Morêna ké mathômô a bohlale.” (Psalme 111:10) Ye ga se poifo e feteletšego, eupša ke go tshwenyega ka tsela e swanetšego mabapi le go se kgahliše Monei-bophelo. Ke polelwana yeo e sepedišanago le lerato. Ka gona, ke ka baka la’ng re swanetše go boifa Modimo e sego batho? Anke re ahla-ahleng mabaka a mahlano.

1 Jehofa o Phagame. Jehofa o matla kudu go feta motho le ge e le ofe. Ka go boifa Modimo, re ema ka lehlakoreng la Yo-matla-ohle yoo go yena “dithšaba di [lego] byalo ka lerotholodi le le šaletšexo kxamelong!” (Jesaya 40:15) Ka ge Modimo e le Ra-matla-ohle, o na le matla a go fenya “marumô ka moka a rulêlwaxo xo lwa” le bao ba mmotegelago. (Jesaya 54:17) Le gona, ka ge a dira phetho ya gore ke mang yo a swanelwago ke go amogela bophelo bjo bo sa felego, re dira ka bohlale ge e ba re sa dumelele selo se re šitiša go ithuta ka yena le go dira thato ya gagwe.—Kutollo 14:6, 7.

2 Modimo o tla re thuša le go re šireletša. Go Diema 29:25 Beibele e re: “Xo boifa batho xo wetša moreong; xo pholoxa e a bôʹtaxo Morêna.” Go boifa batho ke moreo ka gobane go ka re thibela go bontšha gore re na le tumelo go Modimo. Modimo o re kgonthišetša gore o tla re phološa ka gore: “O se boifê xobane ke na le wene. O se kê wa thšoxa, xobane Modimo wa xaxo ké Nna. Ke a Xo tiiša; ke a Xo thuša; ke Xo hlêka ka letsôxô la-ka le letona le-ya-ka-tokô.”—Jesaya 41:10.

3 Modimo o rata bao ba batamelago kgaufsi le yena. Moapostola Paulo o ngwadile mantšu a a kgomago: “Ke kgodišegile gore le ge e le lehu goba bophelo goba barongwa goba mebušo goba dilo tšeo di lego gona gona bjale goba dilo tše di tlago go tla goba matla goba bophagamo goba go iša goba sebopiwa le ge e le  sefe se sengwe di ka se kgone go re aroganya le lerato la Modimo leo le lego go Kriste Jesu Morena wa rena.” (Baroma 8:37-39) Ge e ba re ithuta go bota Modimo le go mo kwa, re ka thabela lerato le le sa felego la Mmuši wa Legohle. Ruri yeo ke tšhegofatšo e kgolo!

4 Re tšeela godimo dilo ka moka tšeo Modimo a re diretšego tšona. Jehofa ke Mmopi wa rena, ke yena a dirilego gore bophelo bo be gona. Go tlaleletša moo, ga se a re nea feela dilo tšeo re di nyakago e le gore re phele eupša gape o re neile dilo tšeo di dirago gore re thabele bophelo. Ka kgonthe, ke Mothopo wa mpho e nngwe le e nngwe e botse. (Jakobo 1:17) Dafida e lego monna yo a botegago yo a bego a tšeela godimo botho bja Modimo bjo lerato, o ngwadile gore: “Tše Wêna Morêna Modimo wa rena O re diretšexo tšôna ké tše ntši, ké mehlôlô, ké xo re setša . . . Xe nka re ke a di bolêla, ka di anêxêla batho, di mpalêla xo di bala.”—Psalme 40:5.

5 Batho ba bangwe bao ba re ganetšago ba ka fetoga. O ka thuša bao ba go ganetšago ka gore o se ke wa kwanantšha, eupša o swarelele ka go tia go boifeng ga gago Modimo le go mo rata. Nagana ka ba leloko labo Jesu. Mathomong, ga se ba ka ba mo dumela eupša ba itše: “O hlakane hlogo.” (Mareka 3:21; Johane 7:5) Ka morago ga lehu la Jesu le tsogo ya gagwe, bontši bja bona ba ile ba fetoga badumedi. Bana babo Jesu ka motswadi o tee e lego Jakobo le Juda ba ile ba ba ba ngwala dipuku tša Beibele. E bile go be go e-na le motlaiši yo a bego a fišegela thoko e lego Saulo, yo a ilego a fetoga Paulo. Ba bangwe bao ga bjale ba re bakelago mathata ba ka lemoga gore re swere therešo e tšwago Beibeleng ka baka la go dula ga rena re botega ka sebete.—1 Timotheo 1:13.

Ka mohlala, Aberash e lego mosadi wa Afrika, o be a dutše a rapelela gore a hwetše therešo. Ka morago ga gore a thome go ithuta Beibele le Dihlatse tša Jehofa, o ile a lebeletšana le kganetšo e šoro go tšwa go ditho tša lapa labo le baetapele ba bodumedi bja gagwe. Ba bangwe ba leloko labo, bao le bona ba bego ba thomile go ithuta Beibele, ba ile ba ineela poifong ya batho. Eupša o ile a lopa Modimo gore a mo nee matla le sebete gomme o ile a kolobetšwa bjalo ka yo mongwe wa Dihlatse tša Jehofa. Mafelelo e bile afe? Ditho tša leloko labo tše seswai di ile tša rapa sebete, tša thomološa go ithuta Beibele gomme di dira tšwelopele e botse ya moya.

O ka Fenya go Boifa Batho

E le gore o pheme go wela molabeng wa go boifa batho, dira sohle seo o ka se kgonago go matlafatša lerato la gago go Modimo. O ka dira se ka go ithuta Beibele le go naganišiša ka ditemana tše bjalo ka Baheberu 13:6 e rego: “Jehofa ke mothuši wa-ka; nka se boife. Motho a ka ntira’ng?” O se ke wa lebala mabaka ao ka ona go boifa Modimo go e na le go boifa batho e lego selo se se swanetšego le se bohlale seo o ka se dirago.

Le gona, dula o gopola ditšhegofatšo tše dintši tšeo di tlišwago ke go diriša seo o ithutago sona Beibeleng. O ka hwetša dikarabo tše di kgotsofatšago tša dipotšišo tše bohlokwa bophelong. O ka hwetša bohlale bjo bo šomago e le gore o lebeletšane le mathata a bophelo. O ka thabela kholofelo e kgahlišago go sa šetšwe maemo a lehono a gateletšago. Le gona, o ka batamela Modimo yo-matla-ohle ka nako le ge e le efe ka thapelo.

Moapostola Johane o ngwadile gore: “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Johane 2:17) Ga bjale ke nako ya gore re eme re tiile gomme re boife Modimo. Go e na le go ineela poifong ya batho, o ka kgetha go arabela kgothatšong ya Modimo e rego: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” (Diema 27:11) Ruri yeo ke tšhegofatšo e kgolo!

Gopola gore ga go na motho yo a ka go neago seo Modimo a tla se neago bao ba mmoifago, o re: “Boikokobetšô le xo boifa Morêna, moputsô ké lehumô, le xo rêtwa, le xo phela.”—Diema 22:4.

[Seswantšho go letlakala 14]

Ka baka la go ba ga gagwe le sebete, ditho tša leloko labo Aberash di tšwela pele go thabela dithuto tša Beibele