Batamela Kgaufsi le Modimo

“Modimo wa Khomotšo Yohle”

2 Bakorinthe 1:3, 4

DILO tše dintši bophelong—tlaišego, go nyamišwa ke motho yo mongwe le go lewa ke bodutu—di ka baka bohloko le go hloka kholofelo. Dinakong tše bjalo o ka ipotšiša gore, ‘Ke kae moo nka hwetšago thušo?’ Mantšu a moapostola Paulo ao a hwetšwago go 2 Bakorinthe 1:3, 4 a bolela ka mothopo o sa palelwego wa khomotšo—Jehofa Modimo.

Go temana 3, Modimo o bitšwa “Tate wa dikgaugelo tše bonolo.” Seo se bolela’ng? Lentšu la Segerika leo le fetoletšwego e le “dikgaugelo tše bonolo” le ka fetiša kgopolo ya go kwa bohloko ka baka la ditlaišego tša ba bangwe. * Puku e nngwe yeo e hlalosago mantšu a Beibele e re polelwana ye e ka fetolelwa e le “yo a šokelago” goba “yo a tlogago a e-na le taba.” Na go tseba karolo ye ya semelo sa Modimo ga go dire gore re nyake go batamela kgaufsi le yena?

Le gona, Paulo o bolela ka Jehofa e le “Modimo wa khomotšo yohle.” Paulo mo o diriša lentšu leo le akaretšago “kgopolo ya go homotša motho yo a lego mathateng goba manyaming le ya go nea thušo ya kgonthe goba kgothatšo.” The Interpreter’s Bible e hlalosa gore: “Re homotša motho yo a tlaišegago ge re mo nea sebete sa go kgotlelela bohloko bja gagwe.”

Mohlomongwe o ka botšiša gore, ‘Modimo o re homotša ka tsela efe le go re nea sebete sa go kgotlelela bohloko bja rena?’ Seo o se dira ka mo go kgethegilego ka Lentšu la gagwe, Beibele, le ka mpho ya thapelo. Paulo o re botša gore Modimo ka lerato o re nea Lentšu la Gagwe e le gore “ka khomotšo e tšwago Mangwalong re be le kholofelo.” Go oketša moo, ka thapelo e tšwago pelong re ka kgona go ba le “khutšo ya Modimo ye e fetago kgopolo yohle.”—Baroma 15:4; Bafilipi 4:7.

Jehofa o homotša batho ba gagwe go fihla bokgoleng bofe? Paulo o re Modimo o re ‘homotša ditlaišegong tša rena tšohle.’ (2 Bakorinthe 1:4) Go sa šetšwe kgateletšo, bohloko goba tlaišego le ge e le efe yeo re ka lebeletšanago le yona, Modimo a ka re nea sebete seo se nyakegago le matla e le gore re kgotlelele. Na seo ga se re kgothatše?

Khomotšo yeo Modimo a e neago ga e felele feela go yoo a e amogelago. Paulo o tšwela pele go bolela gore Modimo o a re homotša e le gore “re kgone go homotša bao ba lego ditlaišegong tša mohuta le ge e le ofe ka khomotšo yeo le rena re homotšwago ke Modimo ka yona.” Ka ge re homoditšwe ditlaišegong tša rena, re thušwa gore re kwele ba bangwe bohloko gomme re tutueletšega go thuša bao ba nyakago thušo.

Bjalo ka “Modimo wa khomotšo yohle,” Jehofa ga a dire gore mathata goba bohloko bja rena bo hwelele. Lega go le bjalo, re ka kgonthišega ka se: Ge e-ba re lebelela go yena bakeng sa khomotšo, a ka re matlafatša gore re lebeletšane le manyami goba mathata le ge e le afe ao bophelo bo ka re tlišetšago ona. Ruri Modimo yo bjalo wa kwelobohloko o swanelwa ke gore re mo rapele le go mo tumiša.

[Mongwalo wa tlase]