Kamoo Lehu la Jesu le ka go Hlakodišago ka Gona

MO E ka bago nywaga e 2 000 e fetilego, ka Paseka ya Bajuda ya ngwaga wa 33 C.E., monna yo a se nago molato o ile a hwa e le gore batho ba bangwe ba ka phela. Monna yoo e be e le mang? E be e le Jesu wa Natsaretha. Ke bomang bao ba ka holwago ke tiro yeo e hlomphegago? Moloko ka moka wa batho. Temana e tsebjago kudu ya Beibele e akaretša ka boripana sehlabelo seo se phološago bophelo ka gore: “Gobane Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

Gaešita le ge batho ba bantši ba tlwaelane le lengwalo leo, ke ba mmalwa feela bao ba tlogago ba kwešiša seo le se bolelago. Ba ipotšiša gore: ‘Ke ka baka la’ng re hloka sehlabelo sa Kriste? Ke bjang lehu la motho o tee le ka hlakodišago moloko wa batho lehung la ka mo go sa felego?’ Beibele e re nea dikarabo tše di kwagalago le tše di kgotsofatšago tša dipotšišo tše.

Kamoo Lehu le Ilego la Thoma go Buša Moloko wa Batho

Ba bangwe ba dumela gore batho ba be ba bopetšwe go phela ka nako e nyenyane mo lefaseng, ba be le mathata, ba thabe ke moka mafelelong ba hwe gomme ba fetele lefelong le lekaone. Go ya ka seo ba se naganago, lehu ke karolo ya morero wa Modimo bakeng sa batho. Lega go le bjalo, Beibele e bontšha gore lehu le tlaiša batho ka lebaka le le fapanego. E re: “Ka motho o tee sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.” (Baroma 5:12) Temana ye e bontšha gore batho ba hwa ka baka la sebe. Lega go le bjalo, ke mang “motho o tee” yoo ka yena ditla-morago tše bolayago tša sebe di fetetšego molokong wa batho ka moka?

The World Book Encyclopedia e re bo-rathutamahlale ba bantši ba dumela gore batho ka moka ba tšwa mothopong o tee, gomme Beibele e hlalosa ka mo go kwagalago gore mothopo woo o tee ke mang—“motho o tee.” Go Genesi 1:27 re bala gore: “Ké mo Modimo a bopilexo motho, a mmopa ka xo ithswanthša, a mmopa ka xo swanthša ka Yêna Modimo; a ba bopa monna le mosadi.” Ka gona Beibele e bolela gore batho ba pele ba babedi e be e le tlholo e phagamego kudu ya Modimo Ramatla-ohle.

Pego ya Genesi e re nea ditlhaloso tše di oketšegilego tša bophelo bja motho ka morago ga gore  Jehofa Modimo a bope motho wa pele. Sa bohlokwa kudu, pegong yeo ka moka, Modimo ga a bolele ka lehu ka ntle le ge a be a bolela ka lona e le ditla-morago tša go se kwe. (Genesi 2:16, 17) O be a nyaka gore batho ba phele lefaseng le le botse la paradeise, ba thabile, ba phetše gabotse mmeleng gomme ba phele ka mo go sa felego. O be a sa nyake gore ba tlaišwe ke ditla-morago tša botšofadi gomme mafelelong ba hwe. Ka gona, go tlile bjang gore lehu e be mmuši wa batho?

Genesi kgaolo 3 e bolela kamoo batho ba pele ba ilego ba dira phetho ya ka boomo ya go se kwe Monei-bophelo wa bona, Jehofa Modimo. Ka baka leo, Modimo o ile a phethagatša kahlolo yeo a bego a ba boditše yona e sa le pele. O ile a botša monna gore: “O lerole; ’me sa xaxo ké xo boêla leroleng.” (Genesi 3:19) E le go phethagatša lentšu la Modimo, mafelelong batho ba babedi bao ba sa kwego ba ile ba hwa.

Lega go le bjalo, tshenyo yeo batho ba pele ba babedi ba e bakilego ga se ya kgoma bona feela. Go se kwe ga bona go ile gwa senya tebelelo ya bophelo bjo bo phethagetšego yeo bana ba bona ba ka bego ba ile ba e thabela. Jehofa o akareditše batho bao ba bego ba se ba hlwa ba belegwa morerong wa gagwe ge a be a botša Adama le Efa gore: “Tswalang Le atê, tlalang lefase, Le le fenyê Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.” (Genesi 1:28) Ge nako e dutše e e-ya, batho ba be ba tla tlala lefase gomme ba thabela bophelo bjo bo thabišago kudu ba sa hwe. Eupša rakgolo-khukhu wa bona Adama—“motho o tee”—o ile a ba rekiša sebeng e le makgoba, ba letetšwe ke mafelelo a sa phemegego a lehu. Moapostola Paulo, e lego setlogolwana sa motho wa pele, o ngwadile gore: “Nna ke wa nama, ke rekišitšwe tlase ga sebe.”—Baroma 7:14.

Go etša ge morago bjale disenyi di ile tša senya diswantšho tša bokgabo tša theko e phagamego, ka go dira ga gagwe sebe, Adama o sentše tlholo ya Modimo e botse kudu—moloko wa batho. Bana ba Adama ba ile ba ba le bana, ke moka ba ba le ditlogolo, bjalo bjalo. Moloko o mongwe le o mongwe o ile wa belegwa, wa gola, wa ba le bana gomme wa hwa. Ke ka baka la’ng ka moka ba ile ba hwa? Ka gobane ka moka ba tšwa go Adama. Beibele e re: “Ka karogo ya motho o tee go hwile ba bantši.” (Baroma 5:15) Bolwetši, botšofadi, tshekamelo ya go dira dilo tše di fošagetšego gotee le lehu ka bolona ke ditla-morago tša go eka ga Adama lapa la gagwe. Lapa leo le akaretša rena ka moka.

Lengwalong la gagwe le le yago go Bakriste ba kua Roma, moapostola Paulo o ngwadile mabapi le boemo bjo bo kwešago bohloko bja batho ba sa  phethagalago, go akaretša le yena, gotee le ntwa e ferekanyago ya go lwa le mafelelo a sebe. O goeleditše ka gore: “Ke motho yo a hlomolago pelo gakaakang! Ke mang yo a tlago go ntlhakodiša mmeleng wo o hwago lehu le?” Potšišo ye ke ya bohlokwa, na ga go bjalo? Ke mang yo a bego a ka hlakodiša Paulo—le batho ka moka bao ba hlologetšwego go hlakodišwa—bokgobeng bja sebe le lehu? Paulo ka boyena o arabile ka gore: “A go lebogwe Modimo ka Jesu Kriste Morena wa rena!” (Baroma 7:14-25) Ee, Mmopi wa rena o dirile tokišetšo ya go re hlakodiša ka Morwa wa gagwe, Jesu Kriste.

Karolo ya Jesu go Hlakodišeng ga Modimo Batho

Jesu o hlalositše karolo ya gagwe go hlakodišeng batho bokgobeng bjo bo bolayago bja sebe. O itše: ‘Morwa wa motho o tletše go neela bophelo bja gagwe gore e be topollo bakeng sa ba bantši.’ (Mateo 20:28, bapiša le Beibele ya Sepedi.) Bophelo bja Jesu ke topollo ka tsela efe? Lehu la gagwe le re hola bjang?

Beibele e hlalosa Jesu e le ‘yo a se nago sebe’ le “yo a arogilego go badiradibe.” (Baheberu 4:15; 7:26) Bophelong bja gagwe ka moka, Jesu o ile a kwa molao wa Modimo ka mo go phethagetšego. (Baheberu 4:15; 7:26) Ka gona, lehu la Jesu e be e se mafelelo a sebe le go se kwe go etša ge go bile bjalo ka lehu la Adama. (Hesekiele 18:4) Go e na le moo, Jesu o ile a amogela lehu leo le bego le sa mo swanela e le gore a phethagatše thato ya Tatagwe ya go hlakodiša batho sebeng le lehung. Bjalo ka ge go boletšwe ka mo godimo, Jesu o tlile ka go rata gore a tle go “neêla bophelô bya xaxwe xore e bê topollô.” Ka lerato leo go se nago le le swanago le lona historing, ka go rata Jesu o ile a ‘kwa lehu ka baka la motho yo mongwe le yo mongwe.’—Baheberu 2:9.

Bophelo bjoo Jesu a bo gafilego bo be bo lekana tlwaa le bjoo Adama a bo lahlilego ge a be a dira sebe. Mafelelo a lehu la Jesu e bile afe? Jehofa o amogetše sehlabelo seo e le “topollo e lekanago bakeng sa bohle.” (1 Timotheo 2:6) Ge e le gabotse, Modimo o dirišitše mohola wa bophelo bja Jesu go reka goba go lopolla moloko wa batho bokgobeng bja sebe le lehu.

Beibele e bolela leboelela ka pontšho ye e kgolo ya lerato leo le bontšhitšwego ke Mmopi wa batho. Paulo o ile a gopotša Bakriste gore ba “rekilwe ka theko.” (1 Bakorinthe 6:20; 7:23) Petro o ngwadile gore Modimo o dirišitše madi a Morwa wa gagwe go hlakodiša Bakriste tseleng ya bona e bolayago ya bophelo, e sego gauta goba silifera. (1 Petro 1:18, 19) Ka sehlabelo sa Kriste sa topollo, Jehofa o ile a rulaganya gore a hlakodiše batho lehung la ka mo go sa felego.

Na o tla Holwa ke Topollo ya Kriste?

Mabapi le mehola e mentši ya topollo ya Kriste, moapostola Johane o ngwadile gore: “[Jesu Kriste] ke sehlabelo sa poelanyo bakeng sa dibe tša rena, fela e sego bakeng sa tša rena feela, eupša le bakeng sa tša lefase ka moka.” (1 Johane 2:2) Ee, topollo ya Kriste e ka hwetšwa ke batho bohle. Na seo se bolela gore go tla fo itiragalela gore yo mongwe le yo mongwe a holwe ke tokišetšo  ye ya theko e phagamego? Aowa. Gopola tlhakodišo yeo go boletšwego ka yona sehlogong se se fetilego. Batho bao ba bego ba leka go hlakodiša baepi bao ba bego ba kgakgetšwe ka moepong ba ile ba theošetša serobe go bona, eupša yo mongwe le yo mongwe wa banna bao ba kgakgetšwego o be a swanetše go tsena ka gare ga sona. Ka tsela e swanago, bao ba nyakago go holwa ke sehlabelo sa Kriste sa topollo ga se ba swanela go fo letela tšhegofatšo ya Modimo. Ba swanetše go gata mogato.

Modimo o nyaka gore ba gate mogato ofe? Johane 3:36 e re botša gore: “Yo a dumelago go Morwa o na le bophelo bjo bo sa felego; yo a sa kwego Morwa a ka se ke a bona bophelo, eupša kgalefo ya Modimo e dula e le go yena.” Modimo o nyaka gore re be le tumelo sehlabelong sa Kriste. Le gona, go na le senyakwa se sengwe gape. “Ka se re tseba gore re a mo tseba [Jesu], ke gore, ge e ba re tšwela pele re boloka ditaelo tša gagwe.” (1 Johane 2:3) Ka gona, go molaleng gore tsela ya gore re hlakodišwe sebeng le lehung ke go ba le tumelo topollong ya Kriste le go kwa ditaelo tša Kriste.

Tsela e nngwe ya bohlokwa ya go bontšha tumelo topollong ya Jesu ke go bontšha tebogo bakeng sa lehu la gagwe ka go le gopola, go etša ge a laetše. Pele a e-hwa, Jesu o ile a thea sejo sa seswantšhetšo le baapostola ba gagwe ba botegago, ke moka a ba botša gore: “Dulang le dira se e le go nkgopola.” (Luka 22:19) Dihlatse tša Jehofa di tloga di tšeela godimo segwera sa tšona le Morwa wa Modimo gomme di kwa taelo yeo. Lenyaga, Segopotšo sa lehu la Jesu Kriste se tla ba ka Mokibelo, March 22, ka morago ga ge letšatši le sobetše. Re go laletša ka borutho gore o be gona tiragalong yeo e kgethegilego e le go bontšha gore o kwa taelo ya Jesu. Dihlatse tša Jehofa tša lefelong la geno di tla go botša nako le lefelo la tiragalo yeo. Ge o le moo Segopotšong, o tla ithuta mo gontši ka seo o swanetšego go se dira e le gore topollo ya Kriste e ka go lokolla ditla-moragong tše bolayago tša sebe sa Adama.

Ke batho ba sego kae lehono bao ba tlogago ba kwešiša boikgafo bjo bogolo bjoo Mmopi wa bona le Morwa wa gagwe ba bo dirilego e le gore ba ba hlakodiše tshenyegong. Bao ba bontšhago tumelo go bjona ba hwetša mothopo o kgethegilego wa lethabo. Moapostola Petro o ngwadile mabapi le Bakriste-gotee le yena gore: “Le bontšha tumelo go [Jesu] gomme le thaba kudu ka lethabo le sa bolelegego le leo le tagafaditšwego, ge le dutše le amogela mafelelo a tumelo ya lena, e lego phološo ya meoya ya lena.” (1 Petro 1:8, 9) Ka go hlagolela lerato go Jesu le tumelo sehlabelong sa gagwe sa topollo, o ka tlatša bophelo bja gago ka lethabo gona bjale gomme wa letela go hlakodišwa sebeng le lehung nakong e tlago.

[Seswantšho go letlakala 6]

Jesu o neetše bophelo bja gagwe gore a lefelele ditla-morago tša sebe sa Adama

[Seswantšho go letlakala 7]

Segopotšo sa lehu la Jesu Kriste se tla ba ka Mokibelo, March 22, 2008, ka morago ga ge letšatši le sobetše