NGWAGA e be e le wa 49 C.E. Petro, Jakobo le Johane, e lego “bao ba bego ba bonagala e le dikokwane tša phuthego,” ba ile ba nea moapostola Paulo le mošomigotee le yena Baranaba taelo. Ba be ba swanetše go dula ba gopola Bakriste ba badiidi ge ba dutše ba botša ba ditšhaba ditaba tše dibotse. (Bagal. 2:9, 10) Boikarabelo bjo bo be bo tla phethagatšwa bjang?

Mangwalo a Paulo a utolla maikemišetšo ao a ilego a ba le ona tabeng ye. Ka mohlala, ge a ngwalela Bakriste ba Korinthe o itše: “Mabapi le go kgobokeletša bakgethwa tšhelete, le latele ditaelo tšeo ke di neilego diphuthego tša Galatia. Letšatšing la pele la beke e nngwe le e nngwe yo mongwe le yo mongwe wa lena a boloke se sengwe ka thoko kamoo a kgonago, e le gore ge ke fihla go se kgoboketšwe tšhelete. Eupša ge ke fihla moo ke tla roma banna bao le ba bolelelago ka mangwalo gore ba iše mpho ya lena e botho Jerusalema.”—1 Bakor. 16:1-3.

Lengwalong la gagwe la bobedi leo le buduletšwego leo a le ngwaletšego Bakorinthe, Paulo o ile a bušeletša lebaka la gagwe la go kgoboketša tšhelete yeo. E be e le gore “ka go lekalekanya, tše di le tlaletšego gona bjale di tlatše mo ba hlaelelwago.”—2 Bakor. 8:12-15.

Ge Paulo a be a ngwalela Bakriste ba kua Roma moo e ka bago ka 56 C.E., go kgoboketšwa ga tšhelete go be go le kgauswi le go fela. O itše: “Ke tla tloga ke tšea leeto la go ya Jerusalema go yo hlankela bakgethwa. Gobane bao ba lego Matsedonia le Akaya ba thabetše go aba dilo tša bona ka moneelo go badiidi ba ba lego gare ga bakgethwa Jerusalema.” (Baroma 15:25, 26) Paulo o ile a phethagatša thomo ya gagwe gateetee ka morago ga moo, gobane ge a boa Jerusalema gomme a swarwa moo, o ile a botša Mmuši wa Roma Felikisi gore: “Ke ile ka tla ke tliša dimpho tša kgaugelo setšhabeng sa gešo gotee le go neela dibego.”—Dit. 24:17.

Moya woo o bontšhitšwego ke Bakriste ba lekgolong la pele la nywaga o bonagetše gabotse go seo Paulo a se boditšego Bamatsedonia. O bontšhitše gore ba be ba “dula ba re kgopela ka go lopa mo gogolo bakeng sa tokelo ya go nea ka botho.” Moapostola o kgothaleditše Bakorinthe go latela mohlala wo. O itše: “Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.” Ke eng seo se šušumeleditšego diphuthego go ba le seatla se se bulegilego gakaaka? Kganyogo ya tšona e be e se feela “go aba ka boati dinyakwa tša bakgethwa, eupša gape [e be e le] go huma ka dipontšho tše dintši tša go leboga Modimo.” (2 Bakor. 8:4; 9:7, 12) Go ba ga rena le seatla se se bulegilego go swanetše go šušumetšwa ke mabaka a swanago. Jehofa Modimo ka kgonthe o tla šegofatša moya o bjalo o mobotse le wo o se nago boithati—e bile tšhegofatšo ya gagwe ruri e humiša motho.—Die. 10:22.

Go swana le mehleng ya moapostola Paulo, ba bantši lehono ba “boloka se sengwe ka thoko,” e lego tšhelete, gomme ba e tsenya lepokising leo le ngwadilwego “Modiro wa Lefase ka Bophara.” (1 Bakor. 16:2) Kgwedi le kgwedi, diphuthego di romela meneelo ye ofising ya Dihlatse tša Jehofa yeo e hlankelago naga ya gabo tšona. E bile go a kgonega gore le wena o romele meneelo ka go lebanya mokgatlong wa molao woo o dirišwago ke Dihlatse tša Jehofa nageng ya geno. E le gore o tsebe leina la mokgatlo woo wa molao woo o dirišwago ke Dihlatse tša Jehofa nageng ya geno, hle ikgokaganye le ofisi ya lekala yeo e hlankelago naga ya geno. Aterese ya ofisi yeo ya lekala e ka hwetšwa go www.isa4310.com. Mekgwa yeo o ka neelago ka yona ka go lebanya še:

MENEELO E LEBANYAGO

• Meneelo ya tšhelete, mabenyabje goba dilo tše dingwe tša bohlokwa tša motho ka noši.
• Akaretša le lengwalo leo le bontšhago gore tšhelete yeo goba dilo tšeo ke moneelo wa go lebanya.

MENEELO YEO E RULAGANTŠWEGO

Go tlaleletša go dimpho tša tšhelete le dilo tša bohlokwa tša motho ka noši, go na le mekgwa e mengwe ya go ntšha meneelo ya go thekga tirelo ya Mmušo lefaseng ka bophara. Mekgwa ye e bontšhwa ka mo tlase. Go sa šetšwe mokgwa goba mekgwa yeo o ratago go e diriša, hle ikgokaganye le ofisi ya lekala yeo e hlankelago naga ya geno go bona ge e ba mekgwa ye ya ka mo tlase e gona nageng ya geno. Ka ge dinyakwa tša molao le melao ya lekgetho e fapana, ke gabohlokwa gore o ikgokaganye le moeletši yo a swanelegago wa lekgetho le molao pele o kgetha tsela e kaone ya go neela.

Phemelo (Inšuranse): Moneelo wo o dirwago ka go bontšha gore ke mokgatlo ofe woo o dirišwago ke Dihlatse tša Jehofa woo motho a o kgethago go ba mojabohwa wa phemelo ya bophelo goba thulaganyo ya go rola modiro/phenšene.

Diakhaonto tša Panka: Diakhaonto tša panka, mangwalo a panka a bontšhago gore o neela mokgatlo bokae goba diakhaonto tša ge motho a rola modiro di ka neelwa gore ge motho a ehwa di hlokomelwe goba di lefše mokgatlo woo o dirišwago ke Dihlatse tša Jehofa ka go dumelelana le dinyakwa tša panka yeo.

Di-Stock le Di-Bond: Di-Stock le di-bond tšeo di neelwago mokgatlo woo o dirišwago ke Dihlatse tša Jehofa e le mpho ya go lebanya, goba di neelwe ka morago ga lehu la mong wa tšona.

Mafelo ao e Lego Dithoto: Mafelo ao e lego dithoto tšeo di ka rekišwago a ka neelwa e le mpho e neelwago ka go lebanya go mokgatlo woo o dirišwago ke Dihlatse tša Jehofa goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela.

Dikeno le Di-Trust: Dithoto goba tšhelete di ka tlogelelwa mokgatlo woo o dirišwago ke Dihlatse tša Jehofa ka go dira keno ya semolao goba ka go bolela gore mokgatlo woo ke mojabohwa wa tumelelano yeo ya go aba bohwa. Tumelelano e bjalo e ka ba le mehola e itšego tabeng ya lekgetho.

Bakeng sa tsebišo e oketšegilego, o ka ikgokaganya le Accounting Office, e ka ba ka go ngwala goba ka mogala, atereseng e lokeleditšwego ka mo tlase, goba o ka ikgokaganya le ofisi ya lekala yeo e hlankelago naga ya geno.