Dipotšišo tše Tšwago go Babadi

Na go a kgonega go tseba nako e lebanyago yeo Jesu Kriste a kokotetšwego ka yona koteng?

Potšišo ye e rotoga ka baka la ditaba tšeo di bonagalago di sa dumelelane tša dipego tše di buduletšwego tša lehu la Jesu tšeo di begilwego ke bangwadi ba Diebangedi e lego Mareka le moapostola Johane. Mareka o bega gore: “Bjale e be e le iri ya boraro gomme [bahlabani] ba mo kokotela koteng.” (Mar. 15:25) Go ya ka Johane “e be e le mo e ka bago ka iri ya botshelela” ge Pilato a be a gafela Jesu go Bajuda gore ba mo kokotele koteng. (Joh. 19:14-16) Bahlalosi ba Beibele ba ile ba nea ditlhaloso tše di fapafapanego ka maiteko a go rarolla dipego tše tšeo di bonagalago di thulana. Lega go le bjalo, ga go na tsebišo e lekanego ka Mangwalong yeo e hlalosago phapano magareng ga dipego tše tše pedi. Eupša, go hlahloba tsela yeo batho ba bego ba bala nako ka yona mehleng yeo ya bona go ka thuša.

Lekgolong la pele la nywaga la Mehla ya Rena, Bajuda ba be ba arogantše mosegare ka diiri tše 12, gomme ba di bala go tloga ge letšatši le hlaba. (Joh. 11:9) Ka gona, “iri ya boraro” e be e thoma ka iri ya seswai gomme e fela ka iri ya senyane mesong, ke moka “iri ya botshelela” e be e fela mo e ka bago mosegare wa sekgalela. Go ba gona, letšatši le be le hlaba le go dikela ka dinako tše di sa swanego mo ngwageng. Ka gona, botelele bja letšatši bo be bo fapafapana go ya ka dihla. Go oketša moo, iri ya mosegare e be e balwa ka go lebelela boemo bja letšatši. Ka baka leo, tsela yeo batho ba bego ba bala nako ka yona e be e akanyetšwa. Mangwalo a Bakriste a Segerika gantši a bolela gore ditiragalo di direga ka iri ya boraro, ya botshelela le ya senyane—e lego seo se bolelago gore gantši di diregile moo e ka bago ka nako yeo. (Mat. 20:3, 5; Dit. 10:3, 9, 30) Mo go boletšwego ka nako e itšego ka go lebanya, bjalo ka “iri ya bošupa,” go dirilwe seo feela ge nako yeo e be e le bohlokwa pegong yeo e anegwago.—Joh. 4:52.

Dipego tša Diebangedi di a dumelelana ge e le ka nako ya ditiragalo tša letšatšing la mafelelo la bophelo bja Jesu. Ka bone bja tšona di bontšha gore baperisita le banna ba bagolo ba ile ba kopana ge letšatši le hlaba gomme ba iša Jesu go Mmuši wa Moroma e lego Pontio Pilato. (Mat. 27:1; Mar. 15:1; Luka 22:66; Joh. 18:28) Mateo, Mareka le Luka ba bega gore go tloga ka iri ya botshelela, ge Jesu a be a šetše a kokotetšwe koteng, leswiswi le ile la aparela naga ka moka “go ba go fihla ka iri ya senyane.”—Mat. 27:45, 46; Mar. 15:33, 34; Luka 23:44.

Ntlha e nngwe e bohlokwa yeo e ka thušago tabeng ya go tseba nako ya go kokotelwa ga Jesu še: Go otla goba go itia ka sefepi e be e le karolo ya go kokotelwa koteng. Ka nako e nngwe go otlwa mo go be go le šoro moo e lego gore mootliwa o be a ehwa. Mo tabeng ya go otlwa ga Jesu, a ka ba a be a kwele bohloko kudu moo e lego gore go be go nyakega gore motho yo mongwe a mo rwalele kota ya tlhokofatšo ka morago ga ge mathomong a be a e ithwaletše yona. (Luka 23:26; Joh. 19:17) Ge e ba go otlwa go be go lebelelwa e le mogato wa pele wa go kokotelwa koteng, go be go swanetše go feta nako pele ga ge Jesu a ka kokotelwa ka dipikiri koteng ya tlhokofatšo. Ka gona, batho ba ka nea dinako tše di fapanego ka go kokotelwa ga Jesu koteng, go ithekgile ka tsela yeo bona ka kakaretšo ba lebelelago nako ya ditiragalo tšeo.

Moapostola Johane o ngwadile pego ya gagwe nywagasome ka morago ga bangwadi ba bangwe ba Diebangedi. Ka gona, o kgonne go bala dipego tša bona. Ke therešo gore Johane o akareditše nako yeo e bonagalago e fapane le yeo e boletšwego ke Mareka. Lega go le bjalo, se se nea bohlatse bjo bo lego molaleng bja gore Johane ga se a fo kopolla pego ya Mareka. Johane le Mareka ba be ba buduletšwe ke Modimo. Le ge go se na tsebišo e lekanego ya Mangwalo yeo e hlalosago phapano ye, re ka bota dipego tša Diebangedi.