Ruta Bana ba Gago Tlhompho

SEEMA sa Sejeremane se re: “Ge monna a rola kefa, o hlompšha ke batho ka moka.” Ditšong tše dintši go rola ga monna kefa ge a tsena ka legaeng la batho goba ge a dumediša go lebelelwa e le go bontšha mekgwa e mebotse yeo e dirago gore le yena a hlompšhe. Ka gona, seema se se bolela gore ge motho a na le mekgwa e mebotse, batho ba bangwe le bona ba mo swara ka botho le go mo rata.

Ruri go a thabiša ge bana ba itshwere gabotse! Molebeledi yo mongwe wa tikologo wa kua Honduras yo a tlwaetšego go sepela le bagoeledi ba nywaga e sa swanego go ya modirong wa boebangedi wa ntlo le ntlo o re: “Gantši ke lemogile gore beng ba dintlo ba kgahlwa kudu ke ngwana yo a godišitšwego gabotse le yo a nago le tlhompho go feta seo ke ba botšago sona.”

Mehleng ye moo go se be le tlhompho go oketšegago, go tseba mekgwa e mebotse ya go swara ba bangwe go na le meputso. Go feta moo, Mangwalo a re eletša gore re ‘itshware ka mokgwa o swanelago ditaba tše dibotse ka Kriste.’ (Bafil. 1:27; 2 Tim. 3:1-5) Go bohlokwa gore re rute bana ba rena go hlompha batho ba bangwe. Re ka ba ruta bjang gore ba se ke ba fo bonala e le ba ba itshwerego gabotse eupša e be bao ba hlomphago e le ka kgonthe? *

Go Ruta Bana Mekgwa e Mebotse ka go ba Beela Mohlala

Mmala wa kgomo o gola namaneng. Ka gona tsela e bohlokwa yeo batswadi ba ka rutago bana go ba le mekgwa e mebotse ke ka gore bona ba be le mekgwa e mebotse. (Doit. 6:6, 7) Go botša ngwana wa gago gore a itshware gabotse go bohlokwa, eupša ga se gwa swanela go felela moo. Ga se ba swanela go fo gopotšwa eupša ba swanetše go beelwa mohlala o mobotse.

Ela hloko mohlala wa Paula, * yo a godišitšwego ke motswadi wa Mokriste yo a se nago molekane. O be a hlompha batho ka moka. Ka baka la’ng? O araba ka gore: “Mma o beetše rena bana ba gagwe mohlala o mobotse, ka gona re be re tlwaetše go hlompha batho ba bangwe.” Mokriste yo mongwe yo a bitšwago Walter o rutile barwa ba gagwe go hlompha mmago bona yo e sego modumedi. O re: “Ke be ke nyaka go ruta barwa ba ka go hlompha mmago bona ka gore ba ekiše mohlala wa ka, le ka mohla ke be ke sa bolele ka mosadi wa ka  gampe.” Walter o tšwetše pele go hlahla barwa ba gagwe ka Lentšu la Modimo le go rapelela thušo ya Jehofa. Yo mongwe wa bona o hlankela ofising ya lekala ya Dihlatse tša Jehofa gomme yo mongwe ke mmulamadibogo. Barwa ba gagwe ba rata le go hlompha batswadi ba bona ka bobedi.

Beibele e re: “Modimo ga se Modimo wa tlhakatlhakano eupša ke wa khutšo.” (1 Bakor. 14:33) Jehofa o dira dilo ka moka ka thulaganyo. Bakriste ba swanetše go katanela go ekiša seka se sa Modimo gomme ba boloke malapa a bona a hlwekile. Batswadi ba bangwe ba rutile bana ba bona gore ba alole malao letšatši le letšatši pele ba eya sekolong, ba phuthe diaparo tša bona gomme ba thuše medirong e mengwe ya ka gae. Ge bana ba lemoga bothakga le bohlweki bja ka gae, ba tla boloka diphapoši tša bona le dilo tša bona di le boemong bjo bobotse.

Bana ba gago ba ikwa bjang ka seo ba ithutago sona sekolong? Na ba leboga seo barutiši ba bona ba ba direlago sona? Na wena bjalo ka motswadi o a se leboga? Bana ba gago ba tla thoma go lebelela mošomo wa bona wa sekolo le barutiši ba bona ka tsela yeo le wena o ba lebelelago ka yona. Ke ka baka la’ng o sa ba kgothaletše gore ba itlwaetše go leboga barutiši ba bona? Go leboga selo seo ba se direlwago ke tsela e botse ya go bontšha tlhompho, e ka ba e le go morutiši, ngaka, morekiši goba motho le ge e le ofe. (Luka 17:15, 16) Bana ba Bakriste bao ba fapanego le bao ba tsenago le bona sekolo ka mekgwa le boitshwaro bja bona bjo bobotse ba swanetše go retwa.

Ditho tša phuthego ya Bokriste di swanetše go bea mohlala o mobotse ge go tliwa tabeng ya mekgwa. Ruri go a thabiša go bona bafsa ba ka phuthegong ba bontšha mekgwa e mebotse go bao ba dirišanago le bona ka gore ba fele ba re “ke a kgopela” le “ke a leboga”! Ge batho ba bagolo ba hlompha Jehofa ka go theetša tlhahlo yeo e newago dibokeng, bana ba tutueletšega go ba ekiša. Bana ba ka ithuta go hlompha baagišani ge ba bona mehlala e mebotse ya boitshwaro Holong ya Mmušo. Ka mohlala, Andrew wa nywaga e mene o šetše a ithutile gore “tshwarelo hle” ge a nyaka go feta mo go nago le batho ba bagolo.

Ke’ng se sengwe seo batswadi ba ka se rutago bana ba bona mabapi le tsela yeo ba swanetšego go itshwara ka yona? Batswadi ba swanetše go ipha nako ya go ruta bana ba bona ka mehlala e mentši yeo e hwetšwago ka Lentšung la Modimo.—Baroma 15:4.

Ba Rute ka Mehlala ya ka Beibeleng

Ga go pelaelo gore mmago Samuele o rutile morwa wa gagwe gore a iname pele ga Moperisita yo a Phagamego, Eli. Mohlomongwe Samuele o be a na le nywaga e meraro goba e mene ge mmagwe a be a mo iša taberenakeleng. (1 Sam. 1:28) Na o ka tlwaetša ngwana wa gago yo monyenyane ditumedišo tše bjalo ka “dumelang,” “tama,” “re a lotšha” goba tumedišo le ge e le efe e tlwaelegilego moo o dulago gona? Go swana le Samuele yo monyenyane, bana ba gago le bona ba ka “ratwa kudu ke Jehofa le batho.”—1 Sam. 2:26.

Le re’ng le sa diriše dipego tša Beibele go bontšha phapano magareng ga tlhompho le lenyatšo?  Ka mohlala, ge Kgoši e sa botegego ya Isiraele e lego Ahasia a be a nyaka go bona moporofeta Eliya, o ile a roma ‘molaodi wa ba masomehlano a na le banna ba gagwe ba masomehlano’ gore ba mmiletše yena. Mohlankedi o ile a gapeletša gore moporofeta a sepele le yena. Se e be e le go nyatša moemedi wa Modimo. Eliya o ile a araba bjang? O itše: “Ge e ba ke le monna wa Modimo, gona anke mollo o theoge magodimong o tšhume wena le banna ba gago ba masomehlano.” Go ile gwa ba bjalo. “Mollo wa theoga magodimong wa tšhuma molaodi yoo le banna ba gagwe ba masomehlano.”—2 Dikg. 1:9, 10.

Molaodi yo mongwe wa ba 50 o ile a rongwa gore a bitše Eliya. Le yena o ile a gapeletša Eliya gore a sepele le yena. Le mo nakong ye, go ile gwa theoga mollo magodimong. Eupša go ile gwa buša gwa rongwa molaodi wa boraro wa ba 50 go Eliya. Monna yo o ile a bontšha tlhompho. Go e na le go gapeletša Eliya gore a sepele le yena, o ile a khunama gomme a mo kgopela ka gore: “Wena monna wa Modimo wa therešo, hle anke moya wa ka le meoya ya bahlanka ba ba gago ba masomehlano e be bohlokwa mahlong a gago. Mollo o theogile magodimong wa tšhuma balaodi ba babedi bao ba tlilego pele le banna ba bona ba dihlopha tša ba masomehlano, eupša bjale anke moya wa ka o be bohlokwa mahlong a gago.” Na moporofeta wa Modimo o be a tla bitša mollo gore o tle o tšhume motho yo a bego a boifa eupša a hlompha ka tsela ye? Le gatee! Go e na le moo, morongwa wa Jehofa o ile a botša Eliya gore a sepele le monna yoo. (2 Dikg. 1:11-15) Na se ga se bontšhe gore tlhompho e bohlokwa?

Ge bahlabani ba Roma ba be ba iša moapostola Paulo kgolegong tempeleng, ga se a fo phetha ka gore o na le tshwanelo ya go ipolelela. Ka tlhompho o ile a botšiša mohlankedi gore: “Na nka bolela se sengwe le wena?” Ka baka leo, Paulo o ile a newa sebaka sa go ipolelela.—Dit. 21:37-40.

Jesu o ile a phasolwa ge a be a le tshekong. Lega go le bjalo, o be a tseba tsela e kaone ya go ipelaetša, o itše: “Ge e ba ke boletše se se fošagetšego, hlatsela phošo yeo; eupša ge e ba ke boletše therešo, gona o ntitiela’ng?” Ga go le o tee yo a ilego a sola seo Jesu a se boletšego.—Joh. 18:22, 23.

Le gona, Lentšu la Modimo le bontšha mehlala ya kamoo re ka arabago ka gona ge e ba re phošollwa le kamoo ka tlhompho re ka lemogago diphošo goba go se šetše mo re go di dirilego nakong e fetilego. (Gen. 41:9-13; Dit. 8:20-24) Ka mohlala, Abigaile o ile a kgopela tshwarelo ge monna wa gagwe, Nabala, a be a swere Dafida makgwakgwa. Ge a dutše a kgopela tshwarelo o ile a ba a ntšha le mpho e kgolo. Dafida o be a kgahlilwe kudu ke seo Abigaile a se dirilego moo a ilego a mo nyala ka morago ga ge Nabala a hwile.—1 Sam. 25:23-41.

Ruta bana ba gago tlhompho, go sa šetšwe gore ba e bontšha maemong a lekago goba e le feela taba ya go bontšha mekgwa e mebotse. ‘Go bonega seetša sa rena pele ga batho’ ka tsela ye ‘go nea Tatago rena yo a lego magodimong letago.’—Mat. 5:16.

[Mengwalo ya tlase]