Rata Toko ka Pelo ya Gago ka Moka
Rata Toko ka Pelo ya Gago ka Moka
“Wena o ratile toko.”—PS. 45:7.
1. Ke’ng seo se tla re thušago gore re sepele “ditseleng tša toko”?
JEHOFA o diriša Lentšu la gagwe le moya wa gagwe o mokgethwa go hlahla batho ba gagwe “ditseleng tša toko.” (Ps. 23:3) Lega go le bjalo, ka ge re sa phethagala, gantši re a aroga tseleng yeo. Go nyakega maiteko a magolo gore re dire se se lokilego gape. Re tla thušwa ke’ng gore re atlege? Ka go swana le Jesu, re swanetše go rata go dira se se lokilego.—Bala Psalme 45:7.
2. ‘Ditsela tša toko’ ke’ng?
2 ‘Ditsela tša toko’ ke’ng? Tsela ke moo re sepelago gona ka maoto. ‘Ditsela’ tše di theilwe ditekanyetšong tša Jehofa tša go loka. Ka Seheberu le ka Segerika, “toko” ke selo se se “nepagetšego,” e lego go kgomarela ka go tia melaong ya motheo ya boitshwaro. Ka ge Jehofa e le “bodulo bja toko,” barapedi ba gagwe ba letetše gore a ba bontšhe tsela e nepagetšego ya boitshwaro yeo ba swanetšego go e latela.—Jer. 50:7.
3. Re ka kgona bjang go ithuta mo go oketšegilego ka toko ya Modimo?
3 Re tla kgahla Modimo ge feela re ka katana ka dipelo tša rena ka moka gore re latele ditekanyetšo tša gagwe tša go loka. (Doit. 32:4) Seo se thoma ka go ithuta dilo ka moka tšeo re ka kgonago go ithuta tšona ka Jehofa Modimo go tšwa Lentšung la gagwe, Beibele. Ge re dutše re ithuta ka yena gomme re mmatamela letšatši le letšatši, ke moo re tlago go tšwela pele re rata toko ya gagwe. (Jak. 4:8) Le gona, re swanetše go latela tlhahlo ya Lentšu la Modimo le le buduletšwego ge re dira diphetho tše dikgolo.
Tsoma Toko ya Modimo
4. Go tsoma toko ya Modimo go akaretša’ng?
4 Bala Mateo 6:33. Go tsoma toko ya Modimo ga se go fo fetša nako re bolela ditaba tše dibotse tša Mmušo. Boitshwaro bja rena bja letšatši le letšatši bo swanetše go dumelelana le ditekanyetšo tša Jehofa tše di phagamego gore a amogele tirelo ya rena e kgethwa. Batho ka moka bao ba tsomago toko ya Jehofa ba swanetše go dira’ng? Ba swanetše go ‘apara semelo se sefsa seo se bopilwego go ya ka thato ya Modimo tokong ya therešo le potegong.’—Baef. 4:24.
5. Ke’ng seo se tla re thušago go fenya manyami?
5 Ka dinako tše dingwe, mafokodi a rena a ka re nyamiša ge re dutše re katanela go phela ka go dumelelana le ditekanyetšo tša Modimo tša go loka. Ke’ng seo se ka re thušago gore re pheme go dula re hlobaetšwa ke manyami gomme re ithute go rata le go dira dilo tša go loka? (Die. 24:10) Re swanetše go dula re batamela Jehofa ka thapelo “ka dipelo tše di rerešago le ka tumelo e feletšego.” (Baheb. 10:19-22) Go sa šetšwe gore re Bakriste ba ba tloditšwego goba re na le kholofelo ya go phela lefaseng, ka moka re dumela sehlabelong sa Jesu Kriste sa topollo le ditirelong tša gagwe bjalo ka Moperisita wa rena yo a Phagamego. (Baroma 5:8; Baheb. 4:14-16) Tokollo ya mathomothomo ya makasine wo e ile ya hlalosa mohola wa madi a Jesu ao a tšholotšwego. (1 Joh. 1:6, 7) Sehlogo sa gona se itše: “Ke therešo e makatšago gore ge selo sa mmala o mohwibiduhwibidu se ka lebantšhwa le seetša gomme sa lebelelwa ka galase e khwibidu, se tla bonagala e le se sešweu, ka gona, le ge dibe tša rena e ka ba tše dihwibiduhwibidu, ge Modimo a di lebelela a diriša madi a Kriste, di bonagala e le tše ditšhweu.” (July 1879, letl. 6) Ruri Jehofa o re diretše selo se se kgahlišago kudu ka sehlabelo sa topollo sa Morwa wa gagwe yo a rategago!—Jes. 1:18.
Lekola Ditlhamo tša Gago tša Moya
6. Ke ka baka la’ng go le bohlokwa go lekola ditlhamo tša rena tša moya?
6 Re swanetše go dula re apere “sephemelasefega sa toko,” ka ge e le karolo e bohlokwa ya ditlhamo tša moya tše di tšwago go Modimo. (Baef. 6:11, 14) Go sa šetšwe gore re sa tšwa go ineela go Jehofa goba re na le nywaga e mentši re mo direla tirelo e kgethwa, ke gabohlokwa gore ka mehla re lekole ditlhamo tša rena tša moya. Ka baka la’ng? Ka gobane Diabolo le batemona ba gagwe ba lahletšwe lefaseng. (Kut. 12:7-12) Sathane o galefile kudu e bile o a tseba gore nako ya gagwe ke e kopana. Ka baka leo, o galefetše batho ba Modimo kudu. Na re a lemoga gore go bohlokwa go ba le “sephemelasefega sa toko”?
7. Ge e ba re lemoga gore re hloka “sephemelasefega sa toko,” re tla itshwara bjang?
7 Sephemelasefega se šireletša pelo. Ka baka la ge re sa phethagala, gantši dipelo tša rena tša seswantšhetšo di tlala boradia le bokgopo. (Jer. 17:9) Go bohlokwa gore re tlwaetše le go laya dipelo tša rena ka ge di sekametše go direng dilo tše mpe. (Gen. 8:21) Ge e ba re lemoga gore re hloka “sephemelasefega sa toko,” gona re ka se se beele ka thoko ka nakwana ka go kgetha go kgahlwa ke dilo tšeo Modimo a di hloilego; e bile re ka se nyake go hlwa re naganišiša ka go dira phošo e itšego. Re ka se senye nako ya rena e ntši e bohlokwa re bogetše thelebišene. Go e na le moo, re tla dula re katanela go dira se se kgahlago Jehofa. Gaešita le ge re be re ka kgopša ka nakwana ka go ineela dikgopolong tša nama, Jehofa a ka re thuša go emelela.—Bala Diema 24:16.
8. Ke ka baka la’ng re swanetše go ba le “kotse e kgolo ya tumelo”?
8 “Kotse e kgolo ya tumelo” ke se sengwe sa ditlhamo tša moya. E re thuša “go tima mesebe ka moka e tukago ya yo kgopo.” (Baef. 6:16) Ka lehlakoreng le lengwe, tumelo le go rata Jehofa ka pelo ka moka di re thuša go dira tša toko gomme re dule re le tseleng ya go ya bophelong bjo bo sa felego. Ge re dutše re ithuta go rata Jehofa, ke moo re tlago go tšeela godimo toko ya gagwe. Eupša go thwe’ng ka matswalo a rena? A re thuša bjang ge re dutše re katanela go rata toko?
Dula o na le Letswalo le Lebotse
9. Go dula re na le letswalo le lebotse go re hola ka’ng?
9 Ge re be re kolobetšwa, re ile ra kgopela Jehofa gore a re fe “letswalo le lebotse.” (1 Pet. 3:21) Ka ge re dumela sehlabelong sa topollo, madi a Jesu a bipa dibe tša rena gomme ka go re’alo ra dula re hlwekile pele ga Modimo. Lega go le bjalo, re swanetše go dula re na le letswalo le lebotse gore re dule re hlwekile. Ge e ba ka dinako tše dingwe matswalo a rena a re kgala le go re lemoša, re swanetše go thabela gore a sa dutše a šoma. Ditemošo tše bjalo di re bontšha gore matswalo a rena ga se a retela ge go tliwa ditseleng tša Jehofa tša go loka. (1 Tim. 4:2) Eupša letswalo le ka kgatha tema e nngwe gape go bao ba ratago toko.
10, 11. (a) Laodiša phihlelo yeo e bontšhago gore ke ka baka la eng re swanetše go kwa matswalo a rena ao a tlwaeditšwego ka Beibele. (b) Ke ka baka la’ng go rata toko go ka re thabiša kudu?
10 Ge re dira se se fošagetšego, matswalo a rena a ka re latofatša goba go re tlaiša. Mofsa yo mongwe o ile a thoma go aroga “ditseleng tša toko.” O ile a lemalela mokgwa wa go bogela diswantšho tše di kgothaletšago bootswa gomme a thoma go kgoga patše. O be a dula a jewa ke letswalo ge a eya dibokeng gomme a ikwa a le bjalo ka moikaketši ge a le tšhemong, ka gona o ile a kgaotša go dira mediro ya Bokriste. O itše: “Eupša ke be ke sa tsebe gore letswalo la ka le tla ntshwenya ka baka la dilo tše ke di dirilego.” O okeditše ka gore: “Ke phetše bophelo bjoo bja bošilo ka nywaga e ka bago e mene.” Ke moka o ile a thoma go nagana ka go boela therešong. Gaešita le ge a be a nagana gore Jehofa a ka se kwe dithapelo tša gagwe, o ile a fo rapela a kgopela tebalelo. Ka morago ga metsotso ya ka tlase ga e lesome, mmagwe o ile a mo etela gomme a mo kgothaletša gore a ye dibokeng. O ile a ya Holong ya Mmušo gomme a kgopela mogolo gore a mmalele. Ge nako e dutše e eya, o ile a kolobetšwa gomme o leboga Jehofa ge a ile a phološa bophelo bja gagwe.
11 Na rena ga re thabišwe ke go dira se se lokilego? Ge re dutše re ithuta go rata toko le go dira dilo tše di lokilego ka botlalo, re tla thaba kudu ge re dira se se kgahlišago Tatago rena wa legodimong. Nagana feela! Go tla fihla nako yeo ka yona batho ka moka ba tla dulago ba thabile e bile ba na le matswalo a mabotse; ba tla bontšha gore ruri ba dirilwe ka seswantšho sa Modimo. Ka baka leo, anke ga bjale re direng gore go rata toko go tseme medu ka dipelong tša rena gomme re thabiše Jehofa.—Die. 23:15, 16.
12, 13. Re ka tlwaetša matswalo a rena bjang?
12 Re ka tlwaetša matswalo a rena bjang? Ge re dutše re ithuta Mangwalo le dikgatišo tša rena tše di theilwego Beibeleng, go bohlokwa go gopola gore “pelo ya moloki e a naganišiša gore e kgone go araba.” (Die. 15:28) Ela hloko kamoo se se holago ka gona ge re swanetše go dira phetho yeo e tswalanago le mošomo. Ge e ba go tloga go le molaleng gore mohuta o itšego wa mošomo o thulana le Mangwalo, bontši bja rena re akgofela go latela tlhahlo yeo re e newago ke sehlopha sa mohlanka yo a botegago le wa temogo. Lega go le bjalo, ge e ba re sa kgonthišege gore mošomo woo o dumelelana le mangwalo goba go se bjalo, gona re swanetše go ela hloko melao ya motheo ya Beibele gomme re e hlahlobe ka thapelo. * Se se šoma melaong ya motheo e bjalo ka go nyakega ga go phema go gobatša matswalo a ba bangwe. (1 Bakor. 10:31-33) Re swanetše go tshwenyega kudu ka melao ya motheo yeo e lego mabapi le tswalano ya rena le Modimo. Ge e ba re tšea Jehofa e le motho wa kgonthe, re tla thoma ka go ipotšiša gore: ‘Na mošomo wo o tla dira gore ke nyamiše Jehofa le go mo kweša bohloko?’—Ps. 78:40, 41.
13 Ge re lokišetša Thuto ya Morokami le Thuto ya Beibele ya Phuthego, re swanetše go naganišiša ka tsebišo yeo e ahlaahlwago. Na re ikhwetša re fo kitimela go thalela dikarabo gomme ra fetela serapeng se se latelago? Go ithuta ka mokgwa o bjalo go ka se dire gore go rata toko go tseme medu ka dipelong tša rena goba go dira gore matswalo a rena a phele. Ge e ba re nyaka go rata toko, re swanetše go ithuta ka mafolofolo gomme re naganišiše ka seo re ithutago sona Lentšung la Modimo le le ngwadilwego. Ga go na tsela ya go kgaoletša ge go tliwa tabeng ya go ithuta go rata toko ka pelo ya rena ka moka!
Go Swarwa ke Tlala le Lenyora la Toko
14. Jehofa Modimo le Jesu Kriste ba nyaka gore re ikwe bjang ka tirelo ya rena e kgethwa?
14 Jehofa Modimo le Jesu Kriste ba nyaka gore re thabe ge re dutše re phetha tirelo ya rena e kgethwa. Ke’ng seo se tla dirago gore re thabe? Re tla thabišwa ke go rata toko! Thutong ya Thabeng, Jesu o itše: “Go thaba bao ba swerwego ke tlala ya toko le bao ba e nyoretšwego, ka ge ba tla kgotsofatšwa.” (Mat. 5:6) Mantšu a a ra gore’ng go bao ba nyakago go rata toko?
15, 16. Tlala le lenyora la moya di tla kgotsofatšwa bjang?
15 Lefase le re phelago go lona le bušwa ke yo kgopo. (1 Joh. 5:19) Ge re bala kuranta karolong le ge e le efe ya lefase, re hwetša dipego tša go ba sehlogo le tša bošoro ka tsela e sa tlwaelegago. Motho wa go rata toko o a tshwenyega ge a bona motho yo mongwe a swarwa ga sehlogo. (Mmo. 8:9) Ka ge re rata Jehofa, re a tseba gore ke yena feela a ka kgotsofatšago tlala le lenyora la moya la batho bao ba nyakago go ithuta toko. Go se go ye kae, lefase le le sa boifego Modimo le tla fedišwa gomme bao ba ratago toko ba ka se sa gateletšwa ke batho bao ba nyatšago molao le ditiro tša bona tše mpe. (2 Pet. 2:7, 8) Yeo ruri e tla ba kimologo!
16 Ka ge re le bahlanka ba Jehofa le balatedi ba Jesu Kriste, re a lemoga gore bao ba swerwego ke tlala le lenyora la toko “ba tla kgotsofatšwa.” Ba tla kgotsofatšwa ka botlalo ka thulaganyo ya Modimo ya magodimo a mafsa le lefase le lefsa moo ‘toko e tla agago gona.’ (2 Pet. 3:13) Ka gona, anke re se ke ra nyamišwa goba ra makatšwa ke gore kgateletšo le bošoro di dirile gore lefase le leo le laolwago ke Sathane le se ke la ba le toko. (Mmo. 5:8) Jehofa, yo Godimodimo, o tseba seo se diregago gomme go se go ye kae o tla phološa bao ba ratago toko.
Holwa ke go Rata Toko
17. E mengwe ya mehola ya go rata toko ke efe?
17 Psalme 146:8 e bontšha gore go latela tsela ya toko go hola kudu. Mopsalme o opetše ka gore: “Jehofa o rata baloki.” Nagana feela! Mmuši wa legohle o re rata ka gobane re rata toko! Ka ge Jehofa a re rata, re kgodišegile gore o tla re hlokomela ge re dutše re etiša dikgahlego tša Mmušo pele maphelong a rena. (Bala Psalme 37:25; Diema 10:3.) Mafelelong, bao ba ratago toko ba tla phela polaneteng ye. (Die. 13:22) Batho ba bantši ba Modimo ba tla putswa ka lethabo le legolo le bophelo bjo bo sa felego lefaseng le lefsa la paradeise ka baka la go dira dilo tša toko. Gaešita le gona bjale, bao ba ratago toko ya Modimo ba putswa ka go ba le khutšo yeo e dirago gore go be le botee ka malapeng a bona le diphuthegong.—Bafil. 4:6, 7.
18. Ke dilo dife tše dibotse tšeo re ka di dirago ge re dutše re letetše letšatši la Jehofa?
18 Ge re dutše re letetše letšatši le legolo la Jehofa, re swanetše go tšwela pele re tsoma toko. (Tsef. 2:2, 3) Ka gona, a re bontšheng gore ruri re rata ditsela tša Jehofa Modimo tša go loka. Seo se akaretša go dula re tiišitše “sephemelasefega sa toko” gore re šireletše dipelo tša rena tša seswantšhetšo. E bile re swanetše go dula re na le letswalo le lebotse—leo le tla re thabišago le go thabiša pelo ya Modimo.—Die. 27:11.
19. Re swanetše go ikemišetša go dira’ng gomme ke’ng seo se tlago go ahlaahlwa sehlogong se se latelago?
19 ‘Mahlo a Jehofa a lebeletše lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.’ (2 Dikor. 16:9) Ruri re kgothatšwa ke mantšu ao ge re dutše re dira se se lokilego lefaseng le leo le emego ka maoto, leo le tletšego bošoro, bokgopo le mathata! Ke therešo gore ditsela tša rena tša go loka di ka makatša batho ba bantši bao ba arogantšwego le Modimo. Eupša re holega kudu ge re kgomarela toko ya Jehofa. (Jes. 48:17; 1 Pet. 4:4) Ka gona, anke re ikemišetšeng go tšwela pele re thabišwa ke go rata le go dira dilo tša toko ka dipelo tša rena ka moka. Lega go le bjalo, go dira dilo ka pelo ka moka go akaretša le go hloya go hloka molao. Sehlogo se se latelago se tla re bontšha gore seo se ra gore’ng.
[Mongwalo wa tlase]
^ ser. 12 Bakeng sa tlhahlobo ya melao ya motheo ye e theilwego Beibeleng mabapi le dipotšišo tša mošomo, bona Morokami wa April 15, 1999, matlakala 28-30.
O be o tla Araba Bjang?
• Ke ka baka la’ng go leboga topollo go le bohlokwa gore re rate toko?
• Ke ka baka la’ng go le bohlokwa gore re apare “sephemelasefega sa toko”?
• Re ka tlwaetša matswalo a rena bjang?
[Dipotšišo tša Thuto]
[Seswantšho go letlakala 26]
Letswalo le le tlwaeditšwego le re thuša go kgetha mošomo o swanetšego
