“E Nthuša go Fihlelela Dipelo tša Batho”

NAKONG e fetilego, motse wa ka borwa bja Brazil wa Porto Alegre, go ile gwa swarwa seboka sa ditšhaba-tšhaba mabapi le ditaba tša tša leago. Batho ba dikete tše masome ba tšwago dinageng tše 135 ba bile gona sebokeng seo. Dinakong tša go khutša, sehlopha sa Dihlatse seo se tšwago phuthegong e nngwe kua Porto Alegre se ile sa batamela baemedi bao ba bantši ba ba tlilego sebokeng gore se boledišane le bona ka molaetša wa Mmušo wo o lego ka Beibeleng. Ba kgonne bjang go boledišana le bona?

Mmulamadibogo yo a bitšwago Elizabete o laodiša ka gore: “Re ile ra diriša pukwana ya Good News for People of All Nations.” O okeditše ka gore: “Ba bantši ba baemedi bao ba be ba se ba ka ba kwa ka ditaba tše dibotse tša Mmušo, eupša ba ile ba amogela molaetša wa rena. Re boledišane le batho ba tšwago Bolivia, China, Fora, India, Isiraele le Nigeria. Re ile ra nea ba bangwe ba baemedi ba dikgatišo tše di theilwego Beibeleng ka maleme a gabo bona gomme ba ile ba di amogela ka lethabo.”

Kua Mexico, mmulamadibogo yo a bitšwago Raúl le yena o diriša pukwana ye ka katlego. Nakong e fetilego, o ile a kopana le mokgalabje wa nywaga e 80 wa Moarabia yo a bego a sa tšwa go hlokofalelwa ke mosadi wa gagwe. Ka morago ga ge monna yoo a badile letlakala leo le bolelago ka molaetša wa Mmušo ka Searabia pukwaneng yeo, o ile a sekiša megokgo ya lethabo. Ka baka la’ng? Kholofetšo ya Modimo ya gore lehu le ka se sa hlwa le e-ba gona, go etša ge e boletšwe go Kutollo 21:3, 4, e ile ya mo kgoma kudu ge a e bala ka segagabo. Lebakeng le lengwe, ge Raúl a be a le boboleding bjo bo sa rulaganyetšwago, o ile a kopana le monna yo a bolelago Sepotokisi. Monna yoo le yena o be a hlokofaletšwe ke motho yo a mo ratago—e lego morwa wa gagwe. Raúl o ile a mo dumelela gore a bale letlakala la Sepotokisi pukwaneng yeo. Ge a fetša go bala, monna yo o ile a bontšha gore o nyaka go ithuta mo go oketšegilego ka Beibele gomme o ile a amogela thuto ya Beibele.

Raúl o dirišitše pukwana ya Good News for People of All Nations go nea bohlatse go bao ba bolelago se-Armenia, se-China, Sefora, Sehindi, Seisemane, Sejeremane, Sekorea, se-Mixe, Seperesia, se-Russia le se-Zapotec. O re: “Ke bone kamoo go lego bohlokwa ka gona go diriša pukwana ye bodireding. E nthuša go fihlelela dipelo tša batho gaešita le ge ke sa bolele leleme la gabo bona.”

Ka ge batho ba bantši ba tšea maeto gomme ba dula dinageng di šele, re na le dibaka tše dintši tša go kopana le batho bao ba bolelago leleme le lengwe. Re tla kgona go boledišana le bona ka molaetša wa Mmušo ka go diriša pukwana ya Good News for People of All Nations. Na o dula o e swere?

[Diswantšho go letlakala 32]

Raúl o swere pukwana yeo e mo thušago go fihlelela dipelo tša batho