Kgomarela “Pelo-thsekexi” Dinakong Tše Tše di Hlobaetšago

“GA GO na motho yo a ka ganago gore go ba le tshekego ke bothata Dikerekeng lehono.” Raditaba wa Mokhatolika, Vittorio Messori, o boletše mantšu a mabapi le dikopano tša botona le botshadi tše di lešago dihlong tšeo morago bjale di bego di akaretša Kereke ya kua Italy. “Se se ka se rarollwe ka go fediša tshwanelo ya baruti ya go tsena lenyalong ka gobane 80 lekgolong ya ditiragalo tše e akaretša bosodoma—melato ya dikopano tša botona le botshadi tše di gobogilego moo baruti ba gobošago banna le bašemanyana.”—La Stampa.

Ga go pelaelo gore bokgopo bjo bo apareditšego ke leswao la ‘mehla ya bofelo’ ya tshepedišo ya gona bjale ya dilo. (2 Tim. 3:1-5) Bjalo ka ge dipego tša ditaba di bontšha, go phuhlama ga boitshwaro moo go lego gona ga bjale go na le mafelelo a mabe e sego feela go batho ka kakaretšo eupša gape le go bao ba ipitšago gore ke batho ba Modimo. Dipelo tša bona tše di senyegilego le tše di sa sekago di ba tutueletša go dira dilo tše di gobogilego. (Baef. 2:2) Ka lebaka le le kwagalago, Jesu o ile a lemoša gore “pelong go tšwa dikeleletšo tše kgopo, dipolao, bohlotlolo, bootswa, bohodu, bohlatse bja maaka le dithogako.” (Mat. 15:19) Lega go le bjalo, Jehofa Modimo o kganyoga gore bahlanka ba gagwe ba rate “pelo-thsekexi.” (Die. 22:11) Ka gona, ke bjang Mokriste a ka kgomarelago pelo e sekilego mehleng ye e hlobaetšago?

Seo se Bolelwago ke go ba le “Pelo-thsekexi”

Ka Beibeleng, “pelo” gantši e dirišwa ka tsela ya seswantšhetšo. Go ya ka nyakišišo e nngwe, tirišo ya Beibele ya lentšu pelo e bolela ka “motho wa ka gare-gare” gomme “ke karolo ya bohlokwa ya ka gare ya motho yeo Modimo a e šeditšego, moo tswalano ya motho le Modimo e theilwego gona, yeo e hlalosago boitshwaro bja motho.” Pelo e emela seo ruri re lego sona ka gare. Bjalo ka ge nyakišišo e tsopotšwego ka mo godimo e bolela, ke pelo yeo Jehofa a e hlahlobago le yeo a e thabelago bathong ba gagwe.—1 Pet. 3:4.

Ka Beibeleng, “go sekega” le “go hlweka” go ka bolela selo seo se hlwekilego ka tsela ya kgonthe. Eupša mantšu a a dirišwa gape le selong seo se sa šilafalago—seo se sa tswakwago, seo se se nago sepatso goba se sa gobogago—boitshwarong le ka tsela ya bodumedi. Thutong ya Thabeng, Jesu o itše: “Go thaba bao ba sekilego pelong.” Ge e le gabotse o be a bolela ka bao ba hlwekilego ka gare. (Mat. 5:8) Maikwelo a bona, dikganyogo tša bona le maikemišetšo a bona di hlwekile. Ba rata Jehofa ka dipelo tša bona ka moka, ka go botega, ka go se ikaketše, ba tutuetšwa ke lerato le tebogo. (Luka 10:27) Na le wena ga o nyake go ba yo a sekilego ka tsela ye?

Go Dula re le ba “Pelo-thsekexi” ke Tlhohlo

Ga se feela gore mohlanka wa Jehofa o swanetše go ba wa “diatla tše di se naxo bosodi” eupša gape o swanetše go ba wa “pelo-thsekexi.” (Ps. 24:3, 4) Lega go le bjalo, ke tlhohlo yeo e oketšegago lehono go bahlanka ba Modimo go dula e le ba “pelo-thsekexi.” Sathane le lefase leo le bušwago ke yena gotee le nama ya rena e sa phethagalago, di re tlišetša kgateletšo e kgolo bakeng sa go re aroganya le Jehofa. Gore re pheme dikgateletšo tše, go bohlokwa kudu gore re rate “pelo-thsekexi” le go e kgomarela ka go tia. Se se tla re šireletša le go re thuša go tšwela pele re le bagwera ba Modimo. Re ka dula re e-na le pelo e sekilego bjang?

Go Baheberu 3:12, re hwetša temošo ye: “Hlokomelang,  bana bešo, gore e se re mohlomongwe gwa tšwelela ka go yo mongwe wa lena pelo e kgopo ya go hloka tumelo ka go katologela kgole le Modimo yo a phelago.” Re ka se dule re e na le “pelo-thsekexi” ge e ba re hlagolela pelo ya go “hloka tumelo.” Ke dikgopolo dife tšeo Sathane Diabolo a di phatlaladitšego bakeng sa go fokodiša tumelo ya rena go Modimo? Tše di akaretša thuto ya tlhagelelo, go phuhlama ga boitshwaro, kgopolo ya gore motho a dire se yena a bonago se nepagetše mabapi le bodumedi le go belaela gore Mangwalo a Makgethwa a buduletšwe ke Modimo. Ga se ra swanela go dumelela gore re kgongwe ke dikgopolo tše bjalo tše kotsi le tše di bolayago. (Bakol. 2:8) Go bala Beibele letšatši le letšatši gotee le go naganišiša ka mo go tseneletšego ke ditšhireletšo tše dikgolo malebana le ditlhaselo tše. Tsebo e nepagetšego ya Lentšu la Modimo e tla matlafatša lerato la rena go Jehofa le kwešišo ya rena mabapi le tsela yeo a dirišanago le batho ka yona. Mohuta o bjalo wa lerato le kwešišo o bohlokwa ge e ba re nyaka go phema dikgopolo tše di fošagetšego le go boloka tumelo ya rena go Jehofa e tiile e le gore re be le pelo e sekilego.—1 Tim. 1:3-5.

Ge re Lebeletšane le Dikganyogo tša Nama

Mohuta o mongwe wa tlhaselo yeo re ka lebeletšanago le yona ge re leka go ba le “pelo-tshekegi” o akaretša dikganyogo tša nama le tša dilo tše di bonagalago. (1 Joh. 2:15, 16) Lerato la tšhelete goba kganyogo ya go kgobela mahumo le go ba le dilo tše di bonagalago di ka šilafatša pelo, tša lebiša Mokriste go direng dilo tšeo di lego kgahlanong le thato ya Modimo. Ba mmalwa ga se ba bontšha potego mošomong, ba radiile ba bangwe goba gaešita le go utswa tšhelete goba dithoto tšeo e sego tša bona—1 Tim. 6:9, 10.

Ka lehlakoreng le lengwe, ka go hlagolela poifo e botse ya go se nyake go nyamiša Jehofa, ya go rata toko le go ikemišetša go ba le letswalo le lebotse, re bontšha gore re rata “pelo-thsekexi.” Lerato leo le re tutueletša go tšwela pele re “itshwara ka go botega dilong tšohle.” (Baheb. 13:18) Ge re itshwara ka tshwanelo, potego e ka feleletša ka gore go newe bohlatse bjo bobotse. Emilio, Hlatse ya kua Italy, yo a šomago e le mootledi khampaning ya tša dinamelwa tša batho bohle, o ile a hwetša sepatšhe se na le R5 100.  A makaditše bašomi-gotee le yena, o ile a tšea sepatšhe seo gomme a se nea mookamedi, yoo ka morago a ilego a se nea motho yoo se bego se mo timeletše. Ba bangwe ba bašomi-gotee le Emilio ba be ba kgahlilwe kudu ke boitshwaro bja gagwe moo ba ilego ba thoma go kgahlegela Beibele gomme ba thoma go ithuta. Mafelelo e bile gore batho ba šupago go tšwa malapeng a mabedi ba amogele therešo. Ee, go itshwara ka potego ka baka la pelo e sekilego ruri go ka tutueletša ba bangwe go tumiša Modimo.—Tito 2:10.

Se sengwe gape seo se ka bago le tutuetšo e mpe pelong e sekilego ya Mokriste ke kgopolo e kgopamego le e gobogilego ka dikopano tša botona le botshadi. Taba ya gore ditswalano tša dikopano tša botona le botshadi tša pele ga lenyalo, tša ka ntle ga lenyalo le bosodoma di lebelelwa e le selo se se tlwaelegilego go ba bantši, e ka šilafatša pelo ya Mokriste. Motho yo a ineelago boitshwarong bjo bo gobogilego bja tša botona le botshadi ka boikaketši a ka phela maphelo a mabedi, a uta sebe. Ruri seo ga se bontšhe go ba le “pelo-tshekegi.”

Gabriele o ile a kolobetšwa ge a be a e-na le nywaga e 15 gomme gatee-tee a thoma go bula madibogo. Lega go le bjalo, ka morago o ile a thoma go fetša nako le bagwera bao ba sa lokago go di-nightclub. (Ps. 26:4) Se e be e le mathomo a bophelo bjo bo gobogilego le bja boikaketši gomme o ile a kgaolwa ka phuthegong ya Bokriste. Tayo e bjalo e tšwago go Jehofa e ile ya mo dira gore a naganišiše ka mo go tseneletšego. Gabriele o gopola ka gore: “Ke ile ka thoma go dira dilo tšeo ke bego ke sa di šetše mathomong. Ke ile ka bala Beibele ka mehla, ke leka go kwešiša seo ge e le gabotse Jehofa a bego a se bolela gomme ke ile ka ithuta dikgatišo tša mokgatlo ka kelohloko. Ke ile ka bona kamoo thuto ya motho ka noši e ka putsago le go kgotsofatša ka gona le kamoo go bala Beibele le go rapela go tšwa pelong go matlafatšago ka gona.” Se se thušitše Gabriele go tlogela boitshwaro bjo bo gobogilego gomme a tsošološa tswalano ya gagwe le Jehofa.

Ga bjale Gabriele o hlankela e le mmulamadibogo gape, yena le mosadi wa gagwe. Seo se mo diragaletšego se hlatsela kamoo go ithuta Beibele le dikgatišo tša “mohlanka yo a botegago le wa temogo” go ka thušago motho go ba le pelo e sekilego gomme a phema boitshwaro bjo bo gobogilego.—Mat. 24:45; Ps. 143:10.

“Pelo-thsekexi” ka Tlase ga Diteko

Go gatelelwa ke baganetši, mathata a boemo bja tša boiphedišo le malwetši a šoro di imetše ba bangwe ba bahlanka ba Modimo. Ka nako e nngwe, dipelo tša bona di ile tša kgongwa gampe. Gaešita le Kgoši Dafida o ile a ba le phihlelo e swanago, o itše: “Ké tšôna tše di lapišaxo môya wa-ka ka xo nna; fá teng xa-ka pelo ya-ka e thšoxile.” (Ps. 143:4) O thušitšwe ke’ng go lebeletšana le maemo a? Dafida o ile a naganišiša ka seo Jehofa a se diretšego bahlanka ba Gagwe le kamoo yena ka noši a ilego a hlakodišwa ka gona. O ile a naganišiša ka seo Jehofa a se dirilego bakeng sa leina la Gagwe le legolo. Dafida o ile a dula a tshwenyegile ka mediro ya Modimo. (Ps. 143:5) Ka tsela e swanago, go naganišiša ka Mmopi wa rena le tšohle tšeo a di dirilego le tšeo a tšwelago pele go re direla tšona go tla re thuša ge re le ka tlase ga teko.

Ge re fošeditšwe, goba re ikwa eka re fošeditšwe, re ka galefa. Go dula re nagana ka taba yeo go ka feleletša ka gore re be le pono e sa lokago ka bana babo rena. Re ka kgaotša go boledišana le bona, ra ikarola le go bontšha kgahlego e nyenyane go ba bangwe. Lega go le bjalo, na tiro e bjalo e tla be e sepedišana le kganyogo ya rena ya go ba le “pelo-thsekexi”? Go molaleng gore go ba le pakane ya go hwetša pelo ya mohuta wo go akaretša tsela yeo re dirišanago ka yona le bana babo rena ba Bakriste.

Lefaseng leo le gobogago ka mo go tšwelago pele le leo le hlephilego boitshwarong, rena bjalo ka Bakriste ba therešo re ba fapanego ka gobane re rata “pelo-thsekexi.” Bophelo bja rena bo tutuetšwa gabotse ge re dutše re thabela khutšo ya ka gare yeo e tlišwago ke go dira thato ya Modimo. Godimo ga tšohle, re thabela tswalano ya kgaufsi le Mmopi wa rena, Jehofa Modimo, yoo a ratago ba “pelo-thsekexi.” (Ps. 73:1) Ee, re ka ba gare ga bao ba tlago go thaba ka gobane, go etša ge Jesu a holofeditše, “ba tla bona Modimo,” ge A tšea kgato bakeng sa bao ba ratago “pelo-thsekexi.”—Mat. 5:8.