Tšeela Karolo ya Gago ka Phuthegong Godimo

“Modimo o beile ditho mmeleng, se sengwe le se sengwe sa tšona kamoo a ratilego ka gona.”—1 BAKOR. 12:18.

1, 2. (a) Ke’ng seo se bontšhago gore motho yo mongwe le yo mongwe ka phuthegong a ka ba le karolo yeo a e thabelago? (b) Ke dipotšišo dife tšeo di tlago go ahla-ahlwa sehlogong se?

GO TLOGA mehleng ya Isiraele ya bogologolo, Jehofa o be a diriša phuthego e le thulaganyo ya go fepa batho ba gagwe moyeng le go ba nea tlhahlo. Ka mohlala, ka morago ga ge Baisiraele ba fentše motse wa Ai, Jošua o ile a ‘bala mantšu ka moka a melao, a tšhegofatšo le a thogo, ka mo a ngwadilwego ohle pukung ya Molao, a a balela phuthego ya Isiraele ka moka.’—Još. 8:34, 35.

² Lekgolong la pele la nywaga C.E., moapostola Paulo o ile a botša mogolo wa Mokriste e lego Timotheo gore phuthego ya Bokriste ke ‘ntlo ya Modimo’ le “kokwane le sethekgo sa therešo.” (1 Tim. 3:15) Lehono, ‘ntlo’ ya Modimo ke borwarre bja lefase ka bophara bja Bakriste ba therešo. Go kgaolo 12 ya lengwalo la gagwe la pele le le buduletšwego leo le yago go Bakorinthe, Paulo o swantšha phuthego le mmele wa motho. O bolela gore le ge setho se sengwe le se sengwe se e-na le modiro wa sona o fapanego, ka moka ga tšona di bohlokwa. Paulo o ngwala gore: “Modimo o beile ditho mmeleng, se sengwe le se sengwe sa tšona kamoo a ratilego ka gona.” O bontšha gape gore “dikarolo tša mmele tšeo re naganago gore ke tše nyatšegago re di rweša kgodišo e kgolo kudu.” (1 Bakor. 12:18, 23) Ka gona, ga se gore karolo yeo e phethwago ka ntlong ya Modimo ke motho yo  a lokilego e kaone goba e phalwa ke ya Mokriste yo mongwe yo a botegago. Ke feela gore ga di swane. Ka gona, re ka hwetša bjang karolo ya rena thulaganyong ya Modimo gomme ra e tšeela godimo? Ke dilo dife tšeo di ka kgomago karolo ya rena ka phuthegong? Le gona, re ka dira bjang gore ‘tšwelopele ya rena e bonagale go batho bohle’?—1 Tim. 4:15.

Go Thabela Karolo ya Rena—Bjang?

3. Re ka hwetša bjang karolo ya rena ka phuthegong le go bontšha gore re e tšeela godimo?

³ Tsela yeo ka yona re ka hwetšago karolo ya rena ka phuthegong gotee le go bontšha gore re e tšeela godimo, ke ka go dirišana ka mo go feletšego le “mohlanka yo a botegago le wa temogo” gotee le moemedi wa gagwe e lego Sehlopha se Bušago. (Bala Mateo 24:45-47.) Re swanetše go hlahloba kamoo re arabelago ka gona tlhahlong yeo re e newago ke sehlopha sa mohlanka. Ka mohlala, go theoša le nywaga re neilwe tlhahlo e lebanyago e lego mabapi le moaparo le go itokiša, boithabišo gotee le dikotsi tša Inthanete. Na re latela keletšo ye e botse ka kelohloko e le gore re šireletšege moyeng? Go thwe’ng ka keletšo ya gore re be le borapedi bja lapa ka mehla? Na re latetše keletšo yeo gomme ra beela mantšiboa a itšego ka thoko bakeng sa morero wo? Ge e ba re se lenyalong, na re ipha nako ya go ithuta Mangwalo? Jehofa o tla re šegofatša re le motho ka o tee ka o tee le ge re le malapa ge e ba re latela tlhahlo ya sehlopha sa mohlanka.

4. Ke’ng seo re swanetšego go se ela hloko ge re dira diphetho tša motho ka noši?

⁴ Ba bangwe ba ka bolela gore dilo tše bjalo ka boithabišo gotee le moaparo le go itokiša ke dilo tšeo motho a swanetšego go itirela phetho go tšona. Lega go le bjalo, go Mokriste yo a ineetšego yoo a tšeelago karolo ya gagwe ka phuthegong godimo, diphetho tšeo a di dirago ga se tša swanela go ithekga feela ka seo se mo kgahlago. Ka mo go kgethegilego, o swanetše go ela hloko pono ya Jehofa yeo e utolotšwego ka Lentšung la gagwe, Beibele. Molaetša wa yona o swanetše go ba ‘lebone la dinao tša rena le seetša tseleng ya rena.’ (Ps. 119:105) E tla ba ga bohlale gape gore re ele hloko kamoo dikgetho tšeo re di dirago ditabeng tša motho ka noši di kgomago bodiredi bja rena le batho ba bangwe, bobedi badumedi-gotee le rena le bao e sego badumedi-gotee le rena.—Bala 2 Bakorinthe 6:3, 4.

5. Ke ka baka la’ng re swanetše go itiša kgahlanong le moya wa go ipuša?

⁵ “Moya woo bjale o šomago go barwa ba go se kwe” o tletše gohle moo e lego gore o bjalo ka moya woo re o hemago. (Baef. 2:2) Moya woo o ka dira gore re nagane gore ga re nyake tlhahlo e tšwago mokgatlong wa Jehofa. Re tloga re sa nyake go swana le Dioterefe, yo a bego a sa ‘amogele selo le ge e le sefe seo se tšwago go moapostola Johane ka tlhompho.’ (3 Joh. 9, 10) Re swanetše go ba šedi gore re se ke ra hlagolela moya wa go ipuša. Anke re se keng ra nyatša ka mantšu goba ka ditiro mokero wa poledišano woo Jehofa ao dirišago lehono. (Num. 16:1-3) Go fapana le moo, re swanetše go tšeela godimo tokelo ya rena ya go dirišana le sehlopha sa mohlanka. Le gona, na ga se ra swanela go katanela go kwa le go ikokobeletša bao ba etelelago pele ka phuthegong ya gabo rena?—Bala Baheberu 13:7, 17.

6. Ke ka baka la’ng re swanetše go hlahloba maemo a rena re le motho ka noši?

⁶ Tsela e nngwe ya go bontšha gore re tšeela karolo ya rena ka phuthegong godimo ke ka go hlahloba maemo a rena re le motho ka o tee ka o tee le go dira sohle seo re ka se kgonago go ‘tagafatša bodiredi bja rena’ le go tlišetša Jehofa kgodišo. (Baroma 11:13) Ba bangwe ba kgona go tsenela tirelo ya bobulamadibogo bja ka mehla. Ba bangwe go dikologa lefase ba tsenetše tirelo e kgethegilego ya nako e tletšego e le baromiwa, balebeledi ba basepedi le ditho tša lapa la Bethele. Bana babo rena le dikgaetšedi ba bantši ba thuša medirong ya kago ya Diholo tša Mmušo. Bontši bja batho ba Jehofa bo dira sohle seo bo ka se kgonago go hlokomela dinyakwa tša moya tša malapa a bona le go tšea karolo ka botlalo bodireding beke le beke. (Bala Bakolose 3:23, 24.) Ge e ba re ikgafa ka go rata tirelong ya Modimo le go dira sohle seo re ka se kgonago go  mo hlankela ka moya ka moka, re ka kgodišega gore ka mehla go tla dula go e-na le karolo yeo re e phethago thulaganyong ya gagwe.

Dilo Tšeo di Kgomago Karolo ya Rena ka Phuthegong

7. Hlalosa kamoo maemo a rena a kgomago karolo yeo re e phethago ka phuthegong.

⁷ Go bohlokwa gore re hlahlobe maemo a rena, ka gobane go ya bokgoleng bjo itšego, karolo ya rena ka phuthegong e ithekgile ka seo re kgonago go se dira goba seo re nago le tokelo ya go se dira. Ka mohlala, karolo yeo ngwanabo rena a e phethago ka phuthegong e fapana ka tsela e itšego le yeo e phethwago ke kgaetšedi. Nywaga ya rena, boemo bja rena bja tša maphelo le maemo a mangwe ao a kago tšwelela a kgoma seo re kgonago go se fihlelela tirelong ya Jehofa. Diema 20:29, e re: “Seala sa thsoxana ké matla a bôná; mofapahlôxô wa baxolo kê hlôxô e pududu.” Bafsa bao ba lego ka phuthegong ba ka kgona go dira mediro e nyakago matla ka gobane ba sa na le matla a bofsa, mola e le gore batho ba bagolo ba hola phuthego kudu ka bohlale le phihlelo ya bona. Le gona, re swanetše go gopola gore selo se sengwe le se sengwe seo re kgonago go se dira mokgatlong wa Jehofa se ithekgile ka botho bjo bo sa swanelago bja Modimo.—Dit. 14:26; Baroma 12:6-8.

8. Kganyogo e kgoma bjang seo re ka se dirago ka phuthegong?

⁸ Mohlala wa bafsa ba babedi ba banenyana bao e lego bana ba motho o gatelela ntlha e nngwe yeo e tšwelelago ge re hlahloba karolo yeo re e phethago ka phuthegong. Bobedi bja bona ba feditše mphato wa marema-tlou. Maemo a bona a a swana. Batswadi ba bona ba dirile sohle seo ba ka se kgonago go ba kgothaletša gore ge ba fetša sekolo ba tsenele tirelo ya nako e tletšego ya bobulamadibogo. Ge ba fetša sekolo, yo mongwe o ile a tsenela tirelo ya nako e tletšego ya bobulamadibogo mola yo mongwe a ile a hwetša mošomo wa nako e tletšego. Ke ka baka la’ng ba ile ba dira diphetho tše sa swanego? Ke ka baka la dikganyogo tša bona. Mafelelong yo mongwe le yo mongwe o dirile seo a bego a kganyoga go se dira. Na se ga se seo bontši bja rena bo se dirago? Re swanetše go naganišiša kudu ka seo re ka kganyogago go se dira tirelong ya Modimo. Na re ka oketša nako ya rena tirelong, gaešita le ge seo se bolela gore re swanetše go beakanya maemo a rena?—2 Bakor. 9:7.

9, 10. Ke’ng seo re swanetšego go se dira ge e ba re sa tutueletšege go dira mo go oketšegilego tirelong ya Jehofa?

⁹ Go thwe’ng ge e ba re sa tutueletšege go oketša tirelo ya rena go Jehofa eupša re sekametše go direng feela seo se nyakegago ka phuthegong? Lengwalong la gagwe leo a le ngwaletšego Bafilipi, Paulo o boletše gore: “Modimo ke yena yo ka baka la go kgahlega ga gagwe a dirago ka go lena, e le gore le rate le be le dire.” Ee, Jehofa a ka dira ka go rena ke moka a tutuetša thato goba kganyogo ya rena.—Bafil. 2:13; 4:13.

¹⁰ Ka gona, na ga se ra swanela go kgopela Jehofa gore a re thuše gore re nyake go dira thato ya gagwe? Kgoši Dafida wa Isiraele ya bogologolo o ile a dira bjalo. O ile a rapela ka gore: “Morêna, ntsebišê ditsela tša xaxo, O nthutê mebila ya xaxo. O nketetšê ka therešô ya xaxo, ’me O nthutê, xobane Modimo wa xo mphološa ke Wene; ke dula kè Xo hloloxetšwe mehla yohle.” (Ps. 25:4, 5) Re ka dira se se swanago ka go rapela gore Jehofa a re thuše gore re nyake go dira  seo se mo kgahlago. Ge re naganišiša kamoo Jehofa Modimo le Morwa wa gagwe ba ikwago ka gona ka seo re se dirago bakeng sa go thekga dikgahlego tša bona, dipelo tša rena di thoma go ba rata. (Mat. 26:6-10; Luka 21:1-4) Maikwelo ao a tebogo a ka re tutueletša go kgopela Jehofa gore a re thuše go dira tšwelopele ya moya. Moporofeta Jesaya o beile mohlala o mobotse wa tshekamelo ya monagano yeo re swanetšego go e hlagolela. Ge a be a e-kwa lentšu la Jehofa le botšiša gore: “Ke tlo roma mang? Ké mang a tl’o xo re êla?” Moporofeta o ile a araba ka gore: “Ké nna é, nthomê!”—Jes. 6:8.

Dira Tšwelopele—Bjang?

11. (a) Ke’ng seo se bontšhago gore go nyakega gore bana babo rena ba katanele go rwala boikarabelo ka mokgatlong wa Modimo? (b) Ngwanabo rena a ka fihlelela bjang ditokelo tša tirelo?

¹¹ Ka ge ngwageng wa tirelo wa 2008 go kolobeditšwe batho ba 289 678 lefaseng ka bophara, go molaleng gore go nyakega bana babo rena ba bantši gore ba etelele pele. Ngwanabo rena o swanetše go arabela bjang boemong bjo? Ge re e bea ka tsela e bonolo, a ka arabela ka go katanela go fihlelela ditshwanelego tša bahlanka ba bodiredi le bagolo tšeo di bontšhitšwego ka Mangwalong. (1 Tim. 3:1-10, 12, 13; Tito 1:5-9) Ngwanabo rena a ka katanela bjang go fihlelela dinyakwa tše bjalo tša Mangwalo? Ka go tšea karolo ka mafolofolo bodireding, go phetha dikabelo tša gagwe ka phuthegong, go šoma ka thata go kaonefatša dikarabo tšeo a di neago dibokeng tša Bokriste le ka go kgahlegela badumedi-gotee le yena. Ka go dira bjalo, o bontšha gore o tšeela karolo ya gagwe ka phuthegong godimo.

12. Bafsa ba ka bontšha bjang gore ba fišegela therešo?

¹² Ke’ng seo bana babo rena bao e sa lego bafsa, kudu-kudu bao ba sa lego mahlalagading, ba ka se dirago gore ba dire tšwelopele ka phuthegong? Ba ka dira boiteko bja go godiša “bohlale bjohle le tlhaologanyo ya moya” ka go ithuta Mangwalo. (Bakol. 1:9) Ruri go ba seithuti se mafolofolo sa Lentšu la Modimo le go tšea karolo ka mafolofolo dibokeng tša phuthego go tla thuša motho gore a oketše bohlale le tlhaologanyo dilong tša moya. Bana babo rena bao e sa lego bafsa le bona ba ka katanela go tsena ka “mojako o mogolo o išago modirong,” ka go tsenela dikarolo tše fapa-fapanego tša tirelo ya nako e tletšego. (1 Bakor. 16:9) Go ba tirelong ya Jehofa ya nako e tletšego ke tsela e kgotsofatšago ya bophelo le yeo e feleletšago ka ditšhegofatšo tše dintši.—Bala Mmoledi 12:1.

13, 14. Dikgaetšedi di ka bontša ka ditsela dife gore di tšeela karolo ya tšona ka phuthegong godimo?

¹³ Dikgaetšedi le tšona di ka bontšha gore di tšeela tokelo ya tšona godimo ka go tšea karolo go phethagatšeng Psalme 68:11 (NW). Go yona re bala gore: “Jehofa yena o ntšha lentšu; Basadi bao ba bolelago ditaba tše dibotse ke lekoko le legolo.” E nngwe ya ditsela tšeo di lemogegago yeo dikgaetšedi di ka bontšhago ka yona gore di tšeela karolo ya tšona ka phuthegong godimo  ke ka go tšea karolo modirong wa go dira barutiwa. (Mat. 28:19, 20) Ka baka leo, dikgaetšedi di hlatsela gore di tšeela karolo ya tšona ka phuthegong godimo ka go tšea karolo ka botlalo modirong wa boboledi le ka go ikgafa ka go rata bakeng sa modiro woo.

¹⁴ Ge Paulo a ngwalela Tito, o boletše gore: “Basadi ba godilego e be ba hlomphegago boitshwarong, . . . e be bao ba rutago se sebotse; gore ba gakolle basadi ba bafsa gore ba rate banna ba bona, ba rate bana ba bona, ba hlaphogelwe monaganong, e be ba sekilego, ba šomago ka gae, ba bolo, ba ikokobeletše banna ba bona, e le gore lentšu la Modimo le se bolelwe ka go gobošwa.” (Tito 2:3-5) Ruri dikgaetšedi tšeo di godilego tsebong e ka ba tutuetšo e botse ka phuthegong! Ka go hlompha bana babo rena ba etelelago pele le ka go dira diphetho tše bohlale ditabeng tše bjalo ka moaparo le go itokiša gotee le boithabišo, di beela ba bangwe mohlala o mobotse le go bontšha gore di tšeela karolo ya tšona ka phuthegong godimo.

15. Kgaetšedi yo a sego lenyalong a ka dira’ng gore a lebeletšane ka katlego le go lewa ke bodutu?

¹⁵ Ka dinako tše dingwe, go ka ba thata gore kgaetšedi yo a sego lenyalong a hwetše karolo ya gagwe ka phuthegong. Kgaetšedi yo mongwe yo a diragaletšwego ke se o boletše gore: “Ka dinako tše dingwe go se be lenyalong go ka leša bodutu.” Ge a botšišwa gore o lebeletšana bjang le boemo bjo, o boletše gore: “Go rapela le go ithuta go nthuša go hwetša karolo ya-ka gape. Ke ithuta kamoo Jehofa a ntebelelago ka gona. Ke moka, ke katanela go thuša ba bangwe ka phuthegong. Se se nthuša gore ke se nagane kudu ka boemo bja-ka.” Go ya ka Psalme 32:8, Jehofa o boditše Dafida gore: “[Ke tla] xo eletša mahlô a-ka à Xo ukametše.” Ee, Jehofa o tshwenyega ka bahlanka ba gagwe ka moka, go akaretša le dikgaetšedi tše di sego lenyalong, gomme o tla thuša bohle gore ba hwetše karolo ya bona ka phuthegong.

Kgomarela Karolo ya Gago!

16, 17. (a) Ke ka baka la’ng go amogela taletšo ya Jehofa ya go ba karolo ya mokgatlo wa gagwe e le phetho e kaone-kaone yeo re e dirilego? (b) Re ka kgomarela bjang karolo ya rena ka mokgatlong wa Jehofa?

¹⁶ Jehofa ka lerato o gogile yo mongwe le yo mongwe wa bahlanka ba gagwe gore a be le tswalano le yena. Jesu o itše: “Ga go motho yo a ka tlago go nna ge a sa gogwe ke Tate yo a nthomilego.” (Joh. 6:44) Gare ga batho ba dimilione tše dikete ba lego lefaseng, Jehofa o laleditše rena gore re be karolo ya phuthego ya gagwe lehono. Go amogela taletšo ye e bile phetho e kaone-kaone yeo re e dirilego. E dirile gore bophelo bja rena bo be le morero. Le gona, re thaba le go kgotsofala gakaakang ka gobane re e-na le karolo yeo re e phethago ka phuthegong!

¹⁷ Mopsalme o boletše gore: “Morêna, ke rata maaxô a Ngwakô wa xaxo.” O ile a ba a opela ka gore: “A dinaô tša-ka di êmê moláleng; ke Xo rêtê, Morêna, kè le mo diphuthexong.” (Ps. 26:8, 12) Modimo wa therešo o beetše yo mongwe le yo mongwe wa rena karolo ka mokgatlong wa gagwe. Ka go tšwela pele re latela tlhahlo ya pušo ya Modimo le ka go dula re swaregile tirelong ya Modimo, re ka boloka maemo a rena a bohlokwa thulaganyong ya Jehofa.

Na o a Gopola?

• Ke ka baka la’ng e le mo go kwagalago go phetha ka gore Bakriste ka moka ba na le karolo ka phuthegong?

• Re bontšha bjang gore re tšeela godimo karolo ya rena ka mokgatlong wa Modimo?

• Ke dilo dife tšeo di kgomago karolo ya rena ka phuthegong?

• Bafsa le batho ba bagolo ba Bakriste ba ka bontšha bjang gore ba tšeela godimo karolo ya bona thulaganyong ya Modimo?

[Dipotšišo tša Thuto]

[Seswantšho go letlakala 16]

Bana babo rena ba ka fihlelela bjang ditokelo ka phuthegong?

[Seswantšho go letlakala 17]

Dikgaetšedi di ka bontšha bjang gore di tšeela karolo ya tšona ka phuthegong godimo?