Go Hwetša Mahumo a Utilwego

NA O kile wa hwetša lehumo leo le utilwego moo o bego o sa letela gore o ka le hwetša gona? Se ke seo se ilego sa diragalela Ivo Laud, e lego yo mongwe wa Dihlatse tša Jehofa kua Estonia ka March 27, 2005. O be a thuša Alma, Hlatse-gotee le yena yeo e tšofetšego go thuba ngwako wa kgale wa bobolokelo. Ge ba dutše ba thuba leboto la ka ntle, ba ile ba bona lepolanka leo le khupeditšego kokwane. Ge ba tloša lepolanka leo, ba ile ba hwetša gore kokwaneng yeo go epilwe molete wa bophara bja disenthimithara tše ka bago 10, botelele bja dimithara tše ka bago 1,2 e bile o iša ka disenthimithara tše 10 gomme o thibilwe ka lepolanka leo le swanago le kokwane yeo. (1) Mahumo a utilwego! Mahumo a e be e le eng? Ke mang yo a bego a a utile moo?

Mahumo ao e be e le diphuthelwana tše mmalwa tšeo di  bego di phuthetšwe ka kelohloko ka dipampiri tše dintši. (2) Diphuthelwana tšeo di be di e-na le dikgatišo tša Dihlatse tša Jehofa gomme tše dintši tša tšona e be e le dihlogo tše ithutwago tša Morokami, go akaretša le dikgatišo tše dingwe tša go thoma ka 1947. (3) Di be di ngwalolotšwe ka kelohloko ka seatla ka se-Estonia. Tše dingwe tša diphuthelwana tšeo di be di e-na le tsebišo yeo e bontšhago gore ke mang yo a di utilego moo. Tšeo e be e le dipego tša ge Villem Vardja, e lego monna wa Alma, a be a botšološišwa ke maphodisa. Le gona, gare ga dilo tšeo di hweditšwego go be go e na le pego ya nywaga yeo a e feditšego a le kgolegong. Ke ka baka la’ng a be a golegilwe?

Villem Vardja e be e le mohlanka yoo a bego a e na le boikarabelo bjo bontši ka phuthegong ya Dihlatse kua Tartu gomme ka morago a hlankela phuthegong ya Otepää, kua Estonia, yeo e bego e le e nngwe ya Direpabliki tša Bosošalise tša Soviet. Go bonala a ile a ithuta ditherešo tša Beibele nako e itšego pele ga Ntwa ya II ya Lefase. Nywaga e sego kae ka morago, ka December 24, 1948, mmušo wa Bokomanisi o ile wa golega Ngwanabo Rena Vardja ka baka la mediro ya gagwe ya bodumedi. O ile a botšološišwa gomme a swarwa gampe ke maphodisa a ka sephiring ge a be a leka go mo gapeletša gore a a botše maina a badumedi-gotee le yena. Ka morago ga gore a se newe sebaka sa go ikemela kgorong ya tsheko, o ile a ahlolelwa nywaga e 10 kgolegong dikampeng tša kgolego tša Russia.

Villem Vardja o ile a dula a botegela Jehofa go fihla lehung la gagwe ka March 6, 1990. Mosadi wa gagwe o be a sa tsebe le gatee gore dikgatišo tšeo di sa le gona. O swanetše go ba a be a nyaka go mo šireletša ge e ba a be a ka botšološišwa ke maphodisa. Ke ka baka la’ng a ile a swanela ke go uta dikgatišo tšeo? O ile a di uta ka gobane Soviet State Security Committee, e lego KGB, e be e phuruphutša magae a Dihlatse gantši go sa letelwa, e nyaka dikgatišo tša bodumedi. Go bonala Ngwanabo Rena Vardja a ile a uta dikgatišo tšeo go kgonthišetša gore go dula go e na le dijo tša moya bakeng sa badumedi-gotee, ge e ba go ka direga gore KGB e tšee dikgatišo tše dingwe ka moka. Dikgatišo tše dingwe tše utilwego di ile tša hwetšwa pejana selemong sa 1990. Tše dingwe di ile tša hwetšwa kua Tartu, ka borwa bja Estonia. Le tšona di be di utilwe ke Villem Vardja.

Ke ka baka la’ng re bitša dikgatišo tše gore ke mahumo? Ka gobane dikopi tše tšeo di ilego tša ngwalollwa ka seatla le go utwa ka kelohloko di bontšha kamoo Dihlatse di bego di tšeela godimo ka gona dijo tša moya tšeo di bego di hwetšagala nakong yeo. (Mat. 24:45) Na o tšeela godimo dijo tša moya tšeo ga bjale o kgonago go di hwetša tikologong ya geno? Tše dingwe tša dijo tšeo ke Morokami wo o hwetšagalago ka se-Estonia gotee le maleme a fetago 170.