Na o ka Hlankela Moo go Nyakegago Bagoeledi ba Oketšegilego ba Mmušo?

“Re be re phela bophelo bjo bo kgotsofatšago kua United States, eupša re be re tshwenyegile ka gore batho ba ratago dilo tšeo di bonagalago ba moo ba be ba ka ba le tutuetšo e mpe go rena le go barwa ba rena ba babedi. Nna le mosadi wa-ka re be re kile ra hlankela re le baromiwa gomme re be re nyaka go thabela bophelo bjoo bjo bonolo le bjo bo thabišago gape.”

BA TUTUEDITŠWE ke kganyogo yeo, ka 1991 Ralph le Pam ba ile ba dira phetho ya go ngwalela diofisi tše mmalwa tša makala ba hlalosa kganyogo ya bona ya go hlankela moo go nyakegago bagoeledi ba oketšegilego ba Mmušo. Ofisi ya lekala ya Mexico e ile ya araba ka gore go nyakega bagoeledi ba Mmušo ka go akgofa bao ba ka dirago boboledi bathong ba bolelago Seisemane nageng yeo. Ge e le gabotse, ofisi ya lekala e bontšhitše gore tšhemo yeo e be e “šweufaletše go bunwa.” (Joh. 4:35) Go se go ye kae, Ralph le Pam gotee le barwa ba bona bao ka nako yeo ba bego ba e-na le nywaga e 8 le e 12, ba ile ba amogela taletšo yeo gomme ba thoma go dira ditokišetšo tša go hudugela nageng e šele.

Tšhemo e Kgolo

Ralph o bega gore: “Pele re tloga United States, ba bangwe ba bana babo rena le dikgaetšedi ba nago le maikemišetšo a mabotse ba ile ba re botša gore: ‘Go hudugela nageng e šele go kotsi kudu!’ ‘Le tla dira’ng ge e ba le ka babja?’ ‘Ke ka baka la’ng le hudugela go yo dira boboledi bathong bao ba bolelago Seisemane? Batho ba moo bao ba bolelago Seisemane ba ka se kgahlegele therešo!’ Lega go le bjalo, re be re feditše le mogopolo. Ge e le gabotse, re be re se ra dira phetho ya go huduga ka baka la go tšewa ke maikwelo. Re be re feditše nywaga e mentši re dira dithulaganyo. Re be re phemile dikoloto tšeo di tlago go tšea nako e telele, re bolokile tšhelete gomme re boledišane gantši re le lapa ka mathata ao re ka lebeletšanago le ona.”

Sa pele, Ralph le lapa la gagwe ba ile ba etela lekala la Mexico. Ge ba le moo, bana babo rena ba ile ba ba bontšha mmapa wa naga ka moka gomme ba botša baeng bao ba sa tšwago go fihla gore, “Tšhemo ya lena ke ye!” Lapa leo le ile la dula kua San Miguel de Allende, e lego toropo yeo e nago le batho ba bantši ba tšwago dinageng dišele yeo e lego dikhilomithara tše ka bago 240 ka borwa-bodikela bja Mexico City. Nywaga e meraro ka morago ga ge ba fihlile, go ile gwa thewa phuthego ya leleme la Seisemane yeo e nago le bagoeledi ba 19 toropong yeo. Yeo e be e le phuthego ya mathomo ya leleme la Seisemane kua Mexico—eupša mošomo o montši o be o sa letše ka pele.

Go akanywa gore go na le batho ba tšwago United States ba ka bago milione bao ba dulago kua Mexico. Go tlaleletša moo, go na le badudi ba bantši ba Mexico ba rutegilego le barutwana bao ba kgonago go bolela Seisemane. Ralph o hlalosa  gore: “Re ile ra rapelela gore go tle bašomi ba oketšegilego. Ka mehla re be re dula re e-na le phapoši ya go robala ya tlaleletšo ka ntlong ya rena bakeng sa bana babo rena le dikgaetšedi bao ba bego ba e-tla moo go tlo “hlôla naxa.”—Num. 13:2.

Ba Nolofaditše Bophelo bja Bona e le Gore ba Oketše Bodiredi bja Bona

Go se go ye kae, bana babo rena le dikgaetšedi bao ba bego ba nyaka go oketša bodiredi bja bona ba ile ba fihla. Ba bangwe ba bona e be e le Bill le Kathy bao ba tšwago United States. Ba be ba šetše ba hlanketše ka nywaga e 25 mafelong ao go nyakegago bagoeledi ba oketšegilego. Ba be ba nagana go ithuta Sepaniši, eupša dithulaganyo tša bona di ile tša fetoga ge ba hudugela toropong ya Ajijic yeo e lego lebopong la Letsha la Chapala, moo batho ba rotšego modiro ba United States ba ratago go dula gona. Bill o hlalosa gore: “Kua Ajijic re ile ra swarega kudu ka go nyaka batho ba bolelago Seisemane bao ba nyakago go ithuta therešo.” Ka tlase ga nywaga e mebedi ka morago ga go fihla toropong yeo, Bill le Kathy ba ile ba thabela go bona phuthego e thewa—phuthego ya bobedi ya leleme la Seisemane kua Mexico.

Ken le Joanne ba tšwago Canada ba be ba nyaka go nolofatša bophelo bja bona gomme ba fetše nako e oketšegilego medirong ya Mmušo. Le bona ba ile ba hudugela Mexico. Ken o anega gore: “Go ile gwa re tšea nako go tlwaela go dula lefelong leo go lona o bego o ka se hwetše meetse a borutho, mohlagase goba ditirelo tša megala ka matšatši a mantši.” Lega go le bjalo, go tšea karolo modirong wa boboledi e be e le mothopo wa lethabo. Go se go ye kae, Ken o ile a kgethelwa go ba mohlanka wa bodiredi gomme ka morago ga nywaga e mebedi a ba mogolo. Mathomong go be go le thata gore morwedi wa bona e lego Britanny a be karolo ya phuthego e nyenyane ya leleme la Seisemane yeo e nago le bafsa ba sego kae. Lega go le bjalo, ka morago ga gore a thome go tšea karolo medirong ya kago ya Diholo tša Mmušo, o ile a hwetša bagwera ba bantši ba bafsa nageng ka bophara.

Patrick le Roxanne, bao ba tšwago seleteng sa Texas kua United States, ba ile ba thabela go kwa ka tšhemo ya baromiwa yeo e sego kgole kudu ya batho ba bolelago Seisemane. Patrick o re: “Ka morago ga go etela Monterrey, toropo yeo e lego ka leboa-bohlabela bja Mexico, re ile ra bona gore re be re hlahlwa ke Jehofa gore re tle go thuša mo.” Ba ile ba kgona go rekiša ntlo ya bona kua Texas ka morago ga matšatši a mahlano gomme gwa ba bjalo ka ge eka ba “tshelela Matsedonia.” (Dit. 16:9) Go be go se bonolo go iphediša kua Mexico, eupša ka nywaga e mebedi feela, ba ile ba thabela go bona sehlopha se senyenyane sa Dihlatse tše 17 se gola go ba phuthego ya bagoeledi ba 40.

Jeff le Deb ke banyalani ba bangwe bao ba ilego ba nolofatša bophelo bja bona e le gore ba oketše bodiredi bja bona. Ba ile ba rekiša ntlo ya bona e kgolo kua United States gomme ba hudugela foleteng e nyenyane kua Cancún, e lego toropo yeo e lego lebopong la ka bohlabela bja Mexico. Nakong e fetilego, ba be ba tlwaetše go ya dikopanong mafelong a nago le metšhene ya go laola phišo ao a bego a le kgaufsi le legae la bona. Ga bjale ba be ba swanelwa ke go sepela diiri tše seswai ka koloi e le gore ba ye kopanong ya kgaufsi ya Seisemane yeo e swarelwago moagong o se nago marulelo. Eupša ba ile ba thaba e le ka kgonthe ge ba bona go thewa phuthego ya bagoeledi ba ka bago 50 kua Cancún.

Bana babo rena ba bangwe le dikgaetšedi ba Mexico ba ile ba thoma go thuša ka modiro wa boboledi ka leleme la Seisemane. Ka mohlala, ge  Rubén le lapa la gagwe ba e-kwa gore go theilwe phuthego ya Seisemane kua San Miguel de Allende le gore tšhemo ya phuthego yeo ke naga ya Mexico ka moka, ba ile ba dira phetho ya go thuša gatee-tee. Se se ile sa bolela gore ba ithute Seisemane, ba itlwaetše setšo se fapanego le gore ba sepele maeto a matelele—dikhilomithara tše 800 beke e nngwe le e nngwe—e le gore ba be gona dibokeng. Rubén o anega gore: “Re ile ra thabela go nea bohlatse bathong ba tšwago dinageng dišele bao ba bego ba e-na le nako e telele ba dula Mexico eupša e le la mathomo ba e-kwa molaetša wa ditaba tše dibotse ka leleme la bona. Ba bangwe ba bona ba ile ba re leboga mahlo a itshekile megokgo.” Ka morago ga go thuša phuthego ya kua San Miguel de Allende, Rubén le lapa la gagwe ba ile ba hlankela e le babulamadibogo toropong ya Guanajuato kua bogareng bja Mexico, moo ba thušitšego go thea phuthego ya leleme la Seisemane ya bagoeledi ba fetago 30. Lehono, ba hlankela sehlopheng sa leleme la Seisemane kua Irapuato, e lego toropo yeo e lego kgaufsi le Guanajuato.

Go Fihlelela Batho Bao go Lego Thata go ba Hwetša

Go tlaleletša bathong ba tšwago dinageng dišele ba bolelago Seisemane, go na le Mamexico a mantši ao a bolelago Seisemane. Gantši go thata go ba nea molaetša wa Mmušo ka gobane ba dula mafelong a humilego moo re bulelwago mejako ke bašomi ba ka gae. Goba ge e ba beng ba dintlo ba bula mojako, go ka direga gore ba se nyake go theetša ka gobane ba nagana gore Dihlatse tša Jehofa ke sehlotswana sa bohlanogi sa lefelong leo.  Lega go le bjalo, ge Dihlatse tše tšwago dinageng dišele di bolela le beng ba dintlo ba bjalo, ba bangwe ba a theetša.

Ela hloko mohlala wa Gloria yo a dulago toropong ya Querétaro kua bogareng bja Mexico. O hlalosa gore: “Dihlatse tšeo di bolelago Sepaniši di ile tša bolela le nna pele eupša ga se ka ka ka di theetša. Lega go le bjalo, ge ba lapa la-ka le bagwera ba be ba thoma go ba le mathata, ke ile ka gateletšega kudu gomme ka rapela Modimo, ke mo kgopela gore a nthuše go hwetša tharollo. Kapejana ka morago ga moo, mosadi yo a bolelago Seisemane o ile a kokota mojako. O ile a botšiša ge e ba ka gae go e na le yo a bolelago Seisemane. Ka ge a be a e-tšwa nageng e šele, ke be ke kganyoga go kwa gore o swere ditaba dife gomme ke ile ka mmotša gore ke kgona go bolela Seisemane. Ge a dutše a bolela, ke be ke ipotšiša gore, ‘Moamerika yo o nyaka’ng mo motseng wa gešo?’ Eupša ke be ke kgopetše Modimo gore a nthuše. Mohlomongwe Modimo o be a araba thapelo ya-ka a diriša motho o šele yo.” Gloria o ile a amogela thuto ya Beibele gomme a dira tšwelopele ka pela a ba a kolobetšwa go sa šetšwe kganetšo ya lapa. Lehono, Gloria o hlankela bjalo ka mmulamadibogo wa ka mehla gomme monna wa gagwe le morwa wa gagwe le bona ba hlankela Jehofa.

Meputso ya Bao ba Oketšago Bodiredi bja Bona

Go hlankela moo go nyakegago bagoeledi ba oketšegilego ba Mmušo go na le mathata a gona, eupša meputso ya gona ke e mentši. Ralph yo go boletšwego ka yena matsenong o re: “Re ile ra swara dithuto tša Beibele le batho ba tšwago Brithania, China, Jamaica, Sweden gaešita le ba ka bogošing ba tšwago Ghana. Ba bangwe ba barutwana ba ba Beibele ba tsenetše tirelo ya nako e tletšego. Go theoša le nywaga e fetilego, lapa la rena le bone go thewa ga diphuthego tše šupa tša Seisemane. Barwa ba rena ka babedi ba ile ba thoma go bula madibogo le rena gomme ga bjale ba hlankela Bethele kua United States.”

Ga bjale kua Mexico go na le diphuthego tše 88 le dihlopha tše mmalwa tša leleme la Seisemane. Ke’ng seo se dirilego gore go be le kgolo e bjalo? Batho ba bantši ba bolelago Seisemane kua Mexico ga se ba ka ba kopana le Dihlatse. Ba bangwe ba ile ba theetša ka gobane ba be ba se na kgateletšo ya dithaka yeo e bego e ka ba šitiša ge nkabe ba le dinageng tša gabo bona. Ba bangwe bona ba amogetše thuto ya Beibele ka gobane ba be ba rotše modiro gomme ba e-na le nako ya go phegelela dilo tša moya. Go tlaleletša moo, bagoeledi ba fetago tee-tharong ba diphuthego tša leleme la Seisemane ba hlankela bjalo ka babulamadibogo, e lego seo se dirago gore diphuthego di fišege gomme di gole.

O Letetšwe ke Ditšhegofatšo

Ga go pelaelo gore batho ba bantši go dikologa lefase ba tla theetša ge ba e-kwa molaetša wa Mmušo ka maleme a bona. Ka gona, go a kgothatša go hlokomela gore bana babo rena le dikgaetšedi ba bantši bao ba sekametšego dilong tša moya—ba bagolo le ba banyenyane, ba lego lenyalong le ba sego lenyalong—ba ikemišeditše go hudugela mafelong ao go ona go nyakegago bagoeledi ba oketšegilego ba Mmušo. Ke therešo gore ba ka lebeletšana le mathata, eupša mathata ao ga se selo ge a bapetšwa le lethabo leo ba bago le lona ge ba hwetša batho ba dipelo tše di botegago bao ba amogelago ditherešo tša Beibele. Na o ka dira diphetogo tšeo di ka dirago gore o kgone go hudugela tšhemong yeo go yona go nyakegago bagoeledi ba oketšegilego ba Mmušo, nageng ya geno goba nageng e šele? * (Luka 14:28-30; 1 Bakor. 16:9) Ge e ba go le bjalo, o ka kgodišega gore o letetšwe ke ditšhegofatšo tše dintši.

[Mongwalo wa tlase]

[Lepokisi go letlakala 21]

Batho ba Thabilego Bao ba Rotšego Modiro ba Tanya Šedi

Beryl o ile a hudugela Canada go tšwa Brithania. Ge a le moo, o ile a šoma bjalo ka molaodi wa dikhamphani tše mmalwa tša ditšhaba-tšhaba. Le gona, o ile a ba monamedi wa dipere yo a nago le bokgoni gomme o ile a kgethwa gore a emele Canada dipapading tša di-Olympic ka 1980. Ka morago ga gore a role modiro gomme a hudugele Chapala kua Mexico, gantši Beryl le monna wa gagwe ba be ba e-ja mabenkeleng a go jela. Ge a bona batho ba rotšego modiro bao ba bolelago Seisemane le bao ba bonalago ba thabile, o ile a itsebiša go bona gomme a ba botšiša gore ba tlišitšwe ke eng Mexico. Gantši batho ba thabilego e be e le Dihlatse tša Jehofa. Beryl le monna wa gagwe ba ile ba nagana gore ge e ba lethabo le morero wa bophelo di tlišwa ke go tseba Modimo, gona le bona ba swanetše go mo tseba. Ka morago ga go ya dibokeng tša Bokriste ka dikgwedi tše mmalwa, Beryl o ile a amogela thuto ya Beibele gomme a ba Hlatse. Beryl o ile a kgona go hlankela bjalo ka mmulamadibogo wa ka mehla ka nywaga e mmalwa.

[Lepokisi go letlakala 22]

“Ke Tšhegofatšo Gore ba be le Rena mo”

Bao ba hudugelago dinageng tšeo go tšona go nyakegago bagoeledi ba oketšegilego ba Mmušo ba tloga ba lebogwa ke bana babo rena ba moo. Ofisi e nngwe ya lekala kua Caribbean e ngwadile gore: “Ge e ba batho ba makgolo ba tšwago dinageng dišele bao ba hlankelago mo ba be ba ka sepela, diphuthego di be di ka se sa tia. Ke tšhegofatšo gore ba be le rena mo.”

Lentšu la Modimo le re “basadi bao ba bolelago ditaba tše dibotse ke lekoko le legolo.” (Ps. 68:11, NW) Ka gona, ga go makatše gore go na le dikgaetšedi tše dintši tšeo di sego lenyalong gare ga bao ba hlankelago dinageng dišele. Dikgaetšedi tše bjalo tšeo di ikgafago di thuša kudu. Ofisi ya lekala kua Yuropa Bohlabela e itše: “Diphuthegong tša rena tše dintši go na le dikgaetšedi tše dintši, ka dinako tše dingwe di dira 70 lekgolong. Bontši bja tšona bo sa tšwa go thoma go kopanela, eupša dikgaetšedi tša babulamadibogo tšeo di sego tša nyalwa tšeo di tšwago dinageng dišele di thuša kudu ka go tlwaetša dikgaetšedi tše tše difsa. Dikgaetšedi tše tšeo di tšwago dinageng dišele ke mpho ya kgonthe go rena!”

Dikgaetšedi tše di ikwa bjang ka go hlankela dinageng dišele? Angelica, e lego kgaetšedi yo a lego bogareng bja nywaga ya bo-30 yo a hlanketšego dinageng dišele ka nywaga e mmalwa e le mmulamadibogo yo a sego a nyalwa o re: “Go na le ditlhohlo tše dintši. Kabelong ye nngwe, letšatši le letšatši ke be ke thatafalelwa ke go sepela ditseleng tšeo di tletšego maraga gomme ke dikologilwe ke batho ba bantši ba tlaišegago. Eupša ke be ke kgotsofatšwa ke go thuša batho bodireding. Le gona, ke ile ka kgongwa ke mantšu a mantši a tebogo a tšwago go dikgaetšedi tša lefelong leo tšeo gantši di bego di nteboga bakeng sa go tlo di thuša. Kgaetšedi yo mongwe o ile a mpotša gore mohlala wa-ka wa go hudugela nageng ya gabo gore ke tlo hlankela bjalo ka mmulamadibogo o mo kgothaleditše go tsenela tirelo ya nako e tletšego.”

Sue, e lego mmulamadibogo yo a lego mathomong a nywaga ya bo-50 o re: “Ka kgonthe, o lebeletšana le ditlhohlo, eupša ditlhohlo tšeo ga se selo ge di bapetšwa le ditšhegofatšo tšeo o di hwetšago. Bodiredi bo a thabiša! Ka ge ke fetša nako e ntši tirelong ke e-na le dikgaetšedi tša bafsa, ke di botša seo ke ithutilego sona ka Beibeleng le dikgatišong tša rena mabapi le kamoo re ka lebeletšanago le mathata. Gantši di mpotša gore mohlala wa-ka wa go lebeletšana ka katlego le mathata mola ke e-na le nywaga e mentši ke hlankela ke le mmulamadibogo yo a sego a nyalwa o di thuša go bona gore le tšona di ka fenya ditlhohlo maphelong a tšona. Go thuša dikgaetšedi tše go dira gore ke ikwe ke kgotsofetše.”

[Mmapa go letlakala 20]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

MEXICO

Monterrey

Guanajuato

Irapuato

Ajijic

Chapala

Letsha la Chapala

San Miguel de Allende

Querétaro

MEXICO CITY

Cancún

[Seswantšho go letlakala 23]

Ba bangwe ba thabela go nea bohlatse go batho bašele bao ba kwago ditaba tše dibotse ka lekga la mathomo