Go Aloga Ga Sehlopha Sa Bo-125

Sa Gilead Baromiwa ba Kgothaletšwa Gore ba Swane le Jeremia

GEOFFREY JACKSON wa Sehlopha se Bušago o boletše gore: “Sehlopha se sa Gilead se bontšha tiragalo e bohlokwa kudu historing.” O be a bolela le batho ba 6 156 bao ba bego ba le gona ge go aloga sehlopha sa bo-125 sa Sekolo sa Beibele sa Watchtower sa Gilead ka September 13, 2008. Sekolo sa Gilead se rometše baromiwa ba ka godimo ga 8 000 “karolong ya kgole ya lefase” go akaretšwa le ba 56 ba sehlopha se!—Dit. 1:8.

Ngwanabo rena Jackson, yo e bego e le modula-setulo wa lenaneo la go aloga, o botšišitše gore, “Na go amogelwa go tla kaonefatša bodiredi bja gago?” Ke moka o ile a lokeletša dilo tše nne tšeo di dirago gore re amogelwe: go ba le boemo bjo bo nepagetšego bja kgopolo, go bea mohlala o mobotse, go thea dithuto tša rena Lentšung la Modimo le go lebiša tlhokomelo go direng gore leina la Jehofa le tsebje.

David Schafer, yo a hlankelago le Komiti ya go Ruta, o ile a bolelela sehlogo se se rego “Na o tla Kwešiša Dilo ka Moka?” O ile a kgonthišetša barutwana ba Gilead gore ba ka “kwešiša dilo ka moka” tšeo di nyakegago bakeng sa go ba thuša tirelong ya boromiwa ge e ba ba tšwela pele ba tsoma Jehofa gomme ka boikokobetšo ba ithekga ka “mohlanka yo a botegago le wa temogo.”—Die. 28:5; Mat. 24:45.

Se se latelago, John E. Barr wa Sehlopha se Bušago o ile a bolelela sehlogo se se rego “A go se be le Seo se go Aroganyago le Lerato la Modimo.” Keletšo ya botswadi ya Ngwanabo rena Barr e dirile gore dialoga le batswadi ba tšona ba se sa hlwa ba tshwenyega kudu ka seo baromiwa ba bafsa ba tlago go kopana le sona dikabelong tša bona. O hlalositše gore: “Go ba leratong la Modimo ke go ba lefelong leo le šireletšegilego kudu le leo le dirago gore re be le boiketlo bophelong.” Ga go seo se ka aroganyago baromiwa le lerato la Modimo ka ntle le ge e ba bona ka noši ba ikaroganya le Modimo.

Sam Roberson wa Lefapha la Dikolo tša Pušo ya Modimo o ile a kgothaletša batheetši go ikapeša “seaparo sa diaparo.” Ka go ithuta mabapi le seo Jesu a se dirilego gotee le go se diriša maphelong a tšona, dialoga di ka ‘apara Morena Jesu Kriste.’ (Baroma 13:14) Se se latelago, William Samuelson, e lego molebeledi wa Lefapha la Dikolo tša Pušo ya Modimo, o ile a bolela ka seo se dirago gore motho a hlomphege. Gore pono ya Modimo ke yona e dirago gore motho a hlomphege, e sego ya batho.

Michael Burnett, yo mongwe wa bahlahli, o ile a boledišana le barutwana mabapi le diphihlelo tša bona tša tirelong ya tšhemo. Gaešita le ge barutwana ba bantši ba be ba abetšwe tšhemong yeo e bego e šongwa ka mehla ge ba be ba le Sekolong sa Gilead kua Patterson, New York, ba be ba hwetša batho ba nago le kgahlego. Gerald Grizzle wa Ofisi ya go Rulaganya Dikopano o ile a boledišana le bana babo rena bao ba bego ba le Sekolong sa Ditho tša Komiti ya Lekala. Ditlhaloso tša bona di ile tša thuša dialoga tša Gilead ka go di lokišeletša seo se bego se ba letetše dikabelong tša bona dinageng di šele.

Polelo e rego “Swana le Jeremia” e ile ya newa  ke David Splane wa Sehlopha se Bušago, e lego sealoga sa sehlopha sa bo-42. Gaešita le ge Jeremia a ile a tshwenyega ka kabelo ya gagwe, Jehofa o ile a mo matlafatša. (Jer. 1:7, 8) Modimo o tla direla baromiwa ba bafsa seo se swanago. Ngwanabo rena Splane o itše: “Ge e ba o e-na le taba le motho yo mongwe, dula fase gomme o ngwale dika tše lesome tšeo o di ratago ka motho yoo. Ge e ba o palelwa ke go hwetša tše lesome, gona go ra gore ga o tsebe motho yoo gabotse ka mo go lekanego.”

Jeremia o be a e-na le moya wa boikgafo. Ge a be a nyaka go bea fase, o ile a rapela gomme Jehofa o ile a mo thekga. (Jer. 20:11) Ngwanabo rena Splane o boletše gore: “Ge o ikwa o nyamile, bolela le Jehofa. O tla makatšwa ke kamoo Jehofa a tlago go thuša ka gona.”

Mafelelong a lenaneo la go aloga, modula-setulo o ile a gopotša batheetši gore dialoga di be di ithutile ditsela tše dintši tša go dira gore di amogelwe. Ge di dutše di nea bohlatse dikabelong tša tšona, go amogelwa ga tšona go tla kaonefatša molaetša wa tšona.—Jes. 43:8-12.

[Lepokisi go letlakala 22]

DIPALO-PALO TŠA SEHLOPHA

Palo ya dinaga tše di emetšwego: 6

Palo ya dinaga tšeo ba abetšwego go tšona: 21

Palo ya barutwana: 56

Palo-gare ya nywaga: 32.9

Palo-gare ya nywaga therešong: 17.4

Palo-gare ya nywaga bodireding bja nako e tletšego: 13

[Seswantšho go letlakala 23]

Sehlopha se se Alogago sa bo-125 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya ka go le letona mothalading o mongwe le o mongwe.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.