Na o ‘Molaki Wa Botho bjo bo sa Swanelago bja Modimo’?
Na o ‘Molaki Wa Botho bjo bo sa Swanelago bja Modimo’?
“Leratong la borwarre e-bang le maikwelo a borutho a bonolo go yo mongwe le yo mongwe. Go bontšhaneng kgodišo, etelelang pele.”—BAROMA 12:10.
1. Ke kgodišego efe yeo re e hwetšago ka Lentšung la Modimo?
LENTŠU la Modimo le re kgonthišetša leboelela gore Jehofa o tla re thuša ge re nyamile goba ge re robegile dipelo. Ka mohlala, ela hloko mantšu a a homotšago: “Morêna ó thêkxa bohle ba ba waxo, ó tsoša bohle ba xo bôkalêla.” “Ó fodiša ba dipelo tše’ robexilexo, ó tlêmêlêla ’nthô tša bôná.” (Ps. 145:14; 147:3) Go feta moo, Tate wa rena wa legodimong ka boyena o bolela gore: “Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!”—Jes. 41:13.
2. Jehofa o thekga bjang bahlanka ba gagwe?
2 Lega go le bjalo, ke bjang Jehofa, yo a dulago magodimong a sa bonagalego, ‘a re swarago ka seatla’? O ‘tsoša bjang bohle bao ba bokalelago’ ka baka la go nyama? Jehofa Modimo o nea thekgo e bjalo ka ditsela tše di fapa-fapanego. Ka mohlala, o nea batho ba gagwe “matla a fetago a tlwaelegilego” ka moya wa gagwe o mokgethwa. (2 Bakor. 4:7; Joh. 14:16, 17) Gape bahlanka ba Modimo ba ikwa ba matlafatšwa ke molaetša o hwetšagalago ka Lentšung le le buduletšwego la Modimo e lego Beibele. (Baheb. 4:12) Na go na le tsela e nngwe gape yeo Jehofa a re matlafatšago ka yona? Re hwetša karabo pukung ya Pele ya Petro.
“Botho bjo bo sa Swanelago bja Modimo bjo bo Bontšhwago ka Ditsela tše di Fapa-fapanego”
3. (a) Ke mantšu afe ao a boletšwego ke moapostola Petro mabapi le diteko? (b) Ke’ng seo se ahla-ahlwago karolong ya mafelelo ya lengwalo la pele la Petro?
3 Ge a ngwalela badumedi bao ba tloditšwego ka moya, moapostola Petro o ngwala gore ba na le lebaka le lebotse la go thaba ka gobane ba letetšwe ke moputso o mogolo. Ke moka o oketša ka gore: “Le ge ka lebakanyana gona bjale, le kwešitšwe bohloko ke meleko e fapa-fapanego ge e ba go swanetše.” (1 Pet. 1:1-6) Ela hloko lentšu “fapa-fapanego.” Le šišinya gore meleko e tla fapa-fapana. Lega go le bjalo, Petro ga a felele moo, a tlogela bana babo ba ipotšiša ge e ba ba tla kgona go lebeletšana le diteko tše bjalo tše di fapa-fapanego. Go e na le moo, Petro o bontšha gore Bakriste ba ka kgodišega gore Jehofa o tla ba thuša go lebeletšana le teko e nngwe le e nngwe yeo ba kopanago le yona, go sa šetšwe gore ke ya mohuta ofe. Kgonthišetšo yeo e newa karolong ya mafelelo ya lengwalo la Petro, moo moapostola a ahla-ahlago ditaba tše di lego mabapi le “bofelo bja dilo tšohle.”—1 Pet. 4:7.
4. Ke ka baka la’ng mantšu a 1 Petro 4:10 a re homotša?
4 Petro o re: “Go ya ka tekanyo yeo yo mongwe le yo mongwe a amogetšego mpho ka yona, e dirišeng ge le hlankelana le le balaki ba babotse ba botho bjo bo sa swanelago bja Modimo bjo bo bontšhwago ka ditsela tše di fapa-fapanego.” (1 Pet. 4:10) Petro o diriša lentšu “fapa-fapanego” gape. Ge e le gabotse o re, ‘Diteko di tla ka mekgwa e mentši e sa swanego, eupša diponagatšo tša botho bjo bo sa swanelago bja Modimo le tšona di bontšhwa ka mekgwa e mentši e fapa-fapanego.’ Ke ka baka la’ng mantšu a e le a homotšago? A bontšha gore go sa šetšwe mohuta wa teko yeo re lebeletšanego le yona, go tla dula go e-na le pontšho ya botho bjo bo sa swanelago bja Modimo bjoo bo tlago go re thuša go kgotlelela. Lega go le bjalo, na o hlokometše mantšung a Petro kamoo botho bjo bo sa swanelago bja Jehofa bo bonagatšwago ka gona go rena? Bo bonagatšwa ka Bakriste-gotee le rena.
“Ge le Hlankelana”
5. (a) Ke’ng seo Mokriste yo mongwe le yo mongwe a swanetšego go se dira? (b) Ke dipotšišo dife tšeo di botšišwago?
5 Ge a bolela le ditho ka moka tša phuthego ya Bokriste, Petro o re: “Godimo ga tšohle, ratanang ka lerato le tseneletšego.” Ke moka o oketša ka gore: “Go ya ka tekanyo yeo yo mongwe le yo mongwe a amogetšego mpho ka yona, e dirišeng ge le hlankelana.” (1 Pet. 4:8, 10) Ka gona, yo mongwe le yo mongwe ka phuthegong o swanetše go ba le karolo go ageng Bakriste-gotee le yena. Re neilwe selo se sengwe sa bohlokwa sa Jehofa gomme re a ikarabela ka go se nea ba bangwe. Ke’ng seo re se neilwego? Petro o re re neilwe “mpho.” Mpho ke’ng? Re ‘e diriša bjang go hlankelana’?
6. Ke dimpho dife tše dingwe tšeo Bakriste ba di neilwego?
6 Lentšu la Modimo le re: “Mpho e nngwe le e nngwe e botse le neo e nngwe le e nngwe e phethagetšego e tšwa godimo.” (Jak. 1:17) Ke therešo gore dimpho ka moka tšeo Jehofa a di neago batho ba gagwe ke diponagatšo tša botho bja gagwe bjo bo sa swanelago. Mpho e nngwe e kgahlišago yeo Jehofa a re neago yona ke moya o mokgethwa. Mpho yeo e dira gore re kgone go hlagolela dika tša go boifa Modimo tše bjalo ka lerato, bolo le boleta. Ke moka, dika tše bjalo di re tutueletša go bontšha badumedi-gotee le rena lerato le le tšwago pelong le go ikemišetša go ba thekga. Bohlale bja kgonthe le tsebo le tšona di gare ga dimpho tše dibotse tšeo re di hwetšago ka thušo ya moya o mokgethwa. (1 Bakor. 2:10-16; Bagal. 5:22, 23) Ge e le gabotse, matla a rena ka moka, bokgoni le ditalente di ka lebelelwa e le dimpho tšeo di swanetšego go dirišetšwa go tumiša Tatago rena wa legodimong le go mo godiša. Re neilwe boikarabelo bjo bo tšwago go Modimo bja gore re diriše bokgoni bja rena le dika tša rena e le tsela ya go fetišetša diponagatšo tša botho bjo bo sa swanelago bja Modimo go badumedi-gotee le rena.
“E Dirišeng ge le Hlankelana”—Bjang?
7. (a) Ke’ng seo se bontšhwago ke polelwana e rego “go ya ka tekanyo”? (b) Ke dipotšišo dife tšeo re swanetšego go ipotšiša tšona, gona ka baka la’ng?
7 Mabapi le dimpho tšeo re di amogetšego, Petro gape o re: “Go ya ka tekanyo yeo yo mongwe le yo mongwe a amogetšego mpho ka yona, e dirišeng.” Polelwana e rego “go ya ka tekanyo” e bontšha gore dika le bokgoni di ka fapa-fapana e sego feela ka mehuta ya tšona eupša gape le ka bogolo. Go sa šetšwe gore ke mpho efe, yo mongwe le yo mongwe o kgothaletšwa go ‘e diriša [ke gore, mpho ya mohuta le ge e le ofe yeo a e amogetšego] go hlankela ba bangwe.’ Go feta moo, polelwana e rego “e dirišeng . . . le le balaki ba babotse” ke taelo. Ka gona, re swanetše go ipotšiša gore: ‘Na ke tloga ke diriša dimpho tšeo ke di neilwego go matlafatša badumedi-gotee le nna?’ (Bapiša le 1 Timotheo 5:9, 10.) ‘Goba na ke diriša bokgoni bjo ke bo amogetšego go Modimo bakeng sa go ikhola—mohlomongwe go ikhweletša mahumo goba maemo setšhabeng?’ (1 Bakor. 4:7) Ge e ba re diriša dimpho tša rena ‘go hlankelana,’ re tla be re thabiša Jehofa.—Die. 19:17; bala Baheberu 13:16.
8, 9. (a) Ke ditsela dife tše dingwe tšeo ka tšona Bakriste lefaseng ka bophara ba hlankelago badumedi-gotee le bona? (b) Bana babo rena le dikgaetšedi phuthegong ya geno ba thušana bjang?
8 Lentšu la Modimo le bolela ka ditsela tše di fapa-fapanego tšeo Bakriste ba lekgolong la pele la nywaga ba ilego ba hlankelana ka tšona. (Bala Baroma 15:25, 26; 2 Timotheo 1:16-18.) Ka mo go swanago lehono, taelo ya gore re diriše dimpho tša rena go hlankela badumedi-gotee le rena e phethagatšwa ka pelo ka moka ke Bakriste ba therešo. Ela hloko tše dingwe tša ditsela tšeo seo se dirwago ka tšona.
9 Bana babo rena ba bantši ba fetša diiri tše dintši kgwedi le kgwedi ba lokišetša diboka. Ge ba le dibokeng gomme ba fetišetša tše dingwe tša ditherešo tša bohlokwa tšeo ba di hweditšego thutong ya bona ya Beibele, mantšu a bona a bohlale a tutuetša bohle ka phuthegong go kgotlelela. (1 Tim. 5:17) Bana babo rena ba bantši le dikgaetšedi ba tsebja ka borutho bja bona le kwelobohloko go badumedi-gotee le bona. (Baroma 12:15) Ba bangwe ba etela ka mehla bao ba gateletšegilego gomme ba rapela le bona. (1 Bathes. 5:14) Ba bangwe ba ipha nako ya go ngwalela Bakriste-gotee le bona bao ba lebeletšanego le teko mantšu a kgothatšago. Go sa dutše go le bjalo, ba bangwe ba thuša ka botho bao ba fokolago mmeleng gore ba be gona dibokeng tša phuthego. Dihlatse tše dikete di tšea karolo modirong wa tša tlhakodišo, di thuša badumedi-gotee le tšona go aga lefsa dintlo tša bona tšeo di hlasetšwego ke dikotsi tša tlhago. Maikwelo a borutho le thekgo ya kgonthe yeo e newago ke bana babo rena ba bjalo ba lerato le dikgaetšedi, ka moka ke diponagatšo tša “botho bjo bo sa swanelago bja Modimo bjo bo bontšhwago ka ditsela tše di fapa-fapanego.”—Bala 1 Petro 4:11.
Ke’ng Seo se Lego Bohlokwa Kudu?
10. (a) Paulo o be a tshwenyegile ka dibopego dife tše pedi tša tirelo ya gagwe go Modimo? (b) Re ekiša Paulo bjang lehono?
10 Bahlanka ba Modimo ga se ba newa mpho yeo e swanetšego go dirišetšwa go hlankela badumedi-gotee le bona feela eupša gape ba neilwe molaetša woo ba swanetšego go o nea batho ba bangwe. Moapostola Paulo o ile a lemoga dibopego tše tše pedi tša tirelo ya gagwe go Jehofa. O ngwaletše phuthego ya kua Efeso mabapi le “bolaki bja botho bjo bo sa swanelago bja Modimo” bjoo a bo neilwego bakeng sa go ba hola. (Baef. 3:2) Lega go le bjalo, o boletše gape gore: “Re hlatsetšwe ke Modimo re le ba swanelwago ke go gafelwa ditaba tše dibotse.” (1 Bathes. 2:4) Go swana le Paulo, le rena re a lemoga gore re neilwe kabelo ya go hlankela re le baboledi ba Mmušo wa Modimo. Ka go tšea karolo ka mafolofolo modirong wa boboledi, re katanela go ekiša mohlala wo Paulo a o beilego bjalo ka mmoledi yo a sa lapego wa ditaba tše dibotse. (Dit. 20:20, 21; 1 Bakor. 11:1) Re a tseba gore go tsebatša molaetša wa Mmušo go ka phološa maphelo. Lega go le bjalo, ka nako e swanago re bile re katanela go ekiša Paulo ka go nyaka dibaka tša go ‘fetišetša mpho e itšego ya moya’ go badumedi-gotee le rena.—Bala Baroma 1:11, 12; 10:13-15.
11. Re swanetše go lebelela bjang dikabelo tša rena tša go bolela ka ditaba tše dibotse le go aga bana babo rena?
11 Ke modiro ofe wa Bokriste go ye e mebedi woo e lego wa bohlokwa kudu? Go botšiša potšišo yeo go ka swana le go botšiša ka nonyana gore, Ke lephego lefe go a mabedi a yona leo le lego bohlokwa kudu? Karabo e molaleng. E le gore nonyana e fofe gabotse, e swanetše go diriša maphego a yona ka bobedi. Ka mo go swanago, re swanetše go tšea karolo dibopegong ka bobedi tša tirelo ya rena go Modimo e le gore re dire dilo ka moka tše di nyakegago go rena bjalo ka Bakriste. Ka gona, go e na le go lebelela kabelo ya rena ya go bolela ka ditaba tše dibotse e sa tswalane le ya go aga badumedi-gotee le rena, re lebelela dikabelo tše go fo swana le kamoo moapostola Petro le moapostola Paulo ba bego ba di lebelela ka gona—e le boikarabelo bjo bo tswalanago. Ka tsela efe?
12. Re hlankela bjang bjalo ka sedirišwa ka seatleng sa Jehofa?
12 Bjalo ka baebangedi, re diriša bokgoni le ge e le bofe bja go ruta bjo re ka bago re e-na le bjona go leka go kgoma dipelo tša batho ba bangwe ka molaetša o kgothatšago wa Mmušo wa Modimo. Ka tsela yeo, re holofela go ba thuša go ba barutiwa ba Kriste. Lega go le bjalo, gape re diriša bokgoni le ge e le bofe le dimpho tše dingwe tšeo re ka bago re e-na le tšona go leka go kgothatša dipelo tša badumedi-gotee le rena ka mantšu a kgothatšago le ka ditiro tše di thušago—diponagatšo tša botho bjo bo sa swanelago bja Modimo. (Die. 3:27; 12:25) Ka tsela yeo, re holofela go ba thuša go dula e le barutiwa ba Kriste. Medirong ye ka bobedi—go dira boboledi go batho le go “hlankelana”—re na le tokelo e kgahlišago ya go hlankela re le sedirišwa ka seatleng sa Jehofa.—Bagal. 6:10.
“E-bang le Maikwelo a Borutho a Bonolo go yo Mongwe le yo Mongwe”
13. Go tla direga’ng ge e ba re ka tlogela go “hlankelana”?
13 Paulo o kgothaleditše badumedi-gotee le yena ka gore: “Leratong la borwarre e-bang le maikwelo a borutho a bonolo go yo mongwe le yo mongwe. Go bontšhaneng kgodišo, etelelang pele.” (Baroma 12:10) Ka kgonthe, go ba le maikwelo a borutho ka bana babo rena go re tutueletša go ba hlankela ka pelo ka moka bjalo ka balaki ba botho bjo bo sa swanelago bja Modimo. Re a lemoga gore ge e ba Sathane a ka atlega go re šitiša “go hlankelana,” o tla fokodiša botee bja rena. (Bakol. 3:14) Ka go rialo, go se be le botee go tla lebiša go se beng le mafolofolo modirong wa boboledi. Sathane o tseba gabotse gore o swanetše go gobatša le lengwe la maphego a rena la seswantšhetšo e le gore a re golofatše.
14. Ke bomang bao ba holegago ge re “hlankelana”? Nea mohlala.
14 Go “hlankelana” ga go hole feela bao ba amogelago botho bjo bo sa swanelago bja Modimo eupša gape go hola le bao ba go fetišetšago go ba bangwe. (Die. 11:25) Ka mohlala, nagana ka Ryan le Roni e lego banyalani ba kua Illinois, U.S.A. Ge ba se na go lemoga gore Ledimo la Katrina le sentše dintlo tše makgolo tša Dihlatse-gotee le bona, lerato la Bokriste le ile la ba tutueletša go tlogela mešomo ya bona, ntlo ya bona, ba reka kharabane ya kgale, ba e lokiša gomme ba sepela dikhilomithara tše 1 400 ba e-ya Louisiana. Ba ile ba dula moo ka lebaka la ka godimo ga ngwaga ge ba dutše ba diriša nako ya bona, matla le dilo tše di bonagalago go thuša bana babo bona. Ryan wa nywaga e 29 o re: “Go tšea karolo modirong wa tša tlhakodišo go ile gwa mpatametša kgaufsi kudu le Modimo. Ke bone kamoo Jehofa a hlokomelago batho ba gagwe ka gona.” Ryan o oketša ka gore: “Go šoma le bana babo rena ba ba godilego go nthutile mo gontši mabapi le kamoo nka hlokomelago bana bešo ka gona. Le gona ke ithutile gore go na le mo gontši mo re ka go dirago mokgatlong wa Jehofa bjalo ka bafsa.” Roni wa nywaga e 25 o re: “Ke thabišwa ke ge ke ile ka ba le karolo go thušeng ba bangwe. Ke ikwa ke thabile kudu go feta le ge e le neng pele bophelong bja-ka. Ke a tseba gore nywageng e tlago, ke tla tšwela pele ke holega phihlelong ye e kgahlišago.”
15. Re na le mabaka afe a mabotse a go tšwela pele re hlankela re le balaki ba botho bjo bo sa swanelago bja Modimo?
15 Ka kgonthe go kwa ditaelo tša Modimo tša gore re bolele ditaba tše dibotse le go aga badumedi-gotee le rena go tlišetša bohle ditšhegofatšo. Bao re ba thušago ba matlafala moyeng mola rena re hwetša lethabo le le tšwago pelong leo le tlišwago feela ke go nea. (Dit. 20:35) Phuthego ka moka e tlala ka borutho ge setho se sengwe le se sengwe se bontšha kgahlego e lerato go ba bangwe. Go oketša moo, lerato leo re le bontšhanago le re hlaola gabotse re le Bakriste ba therešo. Jesu o itše: “Bohle ba tla tseba ka se gore le barutiwa ba-ka, ge e ba le ratana.” (Joh. 13:35) Go feta tšohle, kgodišo e ya go Tatago rena yo lerato Jehofa, ka ge kganyogo ya gagwe ya go matlafatša bao ba hlokago e bonagala go bahlanka ba gagwe ba lefaseng. Ka gona, re na le mabaka a mabotse a go diriša mpho ya rena bakeng sa go ‘hlankelana re le balaki ba babotse ba botho bjo bo sa swanelago bja Modimo’! Na o tla tšwela pele o dira bjalo?—Bala Baheberu 6:10.
Na o a Gopola?
• Jehofa o matlafatša bahlanka ba gagwe ka ditsela dife?
• Ke’ng seo re se neilwego?
• Ke ditsela dife tše dingwe tšeo ka tšona re ka hlankelago badumedi-gotee le rena?
• Ke’ng seo se tlago go re tutueletša go tšwela pele re diriša “mpho” ya rena bakeng sa go “hlankelana”?
[Dipotšišo tša Thuto]
[Diswantšho go letlakala 13]
Na o diriša “mpho” ya gago go hlankela ba bangwe goba go ikhola?
[Diswantšho go letlakala 15]
Re botša ba bangwe ditaba tše dibotse le go thekga Bakriste-gotee le rena
[Seswantšho go letlakala 16]
Bašomi ba tša tlhakodišo ba swanelwa ke theto ka baka la moya wa bona wa boikgafo