Mohlanka wa Jehofa​—“Ó Hlabilwe ka ’Baka la Dikaroxô tša Rena”

“Anthe ó hlabilwe ka ’baka la dikaroxô tša rena; ó tlapirixantšwe ka ’baka la makxôpô a rena. . . . ra tlêlwa ke xo fôla ka dintho tša xaxwe.”​—JES. 53:5.

1. Ke’ng seo re swanetšego go se gopola ge re e-ba gona Segopotšong gomme ke boporofeta bofe bjo bo tlago go re thuša go dira bjalo?

RE BA gona Segopotšong go gopola lehu la Kriste le go gopola seo go hwa le go tsošwa ga gagwe go tlago go se phetha. Segopotšo se re gopotša ka go godišwa ga bogoši bja Jehofa, go kgethagatšwa ga leina la gagwe le go phethagatšwa ga morero wa gagwe go akaretša le go phološwa ga batho. Mohlomongwe ga go na boporofeta bjo bongwe bja Beibele bjo bo swantšhetšago sehlabelo sa Kriste le seo se se phethagaditšego go feta bjo bo begilwego go Jesaya 53:3-12. Jesaya o boletše e sa le pele ka go tlaišega ga Mohlanka gomme a bolela ditaba ka go lebanya tša mabapi le lehu la Kriste le ditšhegofatšo tšeo lehu la gagwe le tlago go di tlišetša bana babo bao ba tloditšwego gotee le ‘dinku tša gagwe tše dingwe.’—Joh. 10:16.

2. Boporofeta bja Jesaya ke bohlatse bja eng gomme bo tla ba le mafelelo afe go rena?

² Nywaga-kgolong e šupa pele ga go belegwa ga Jesu mo lefaseng, Jehofa o ile a budulela Jesaya go porofeta gore Mohlanka wa Gagwe yo a mo hlaotšego o be a tla botega gaešita le ge a lekwa kudu. Therešo ye ke bohlatse bja gore Jehofa  o be a tloga a kgodišegile ka potego ya Morwa wa gagwe. Ge re dutše re hlahloba boporofeta bjo, re tla thaba gomme tumelo ya rena e tla matlafatšwa.

‘O Ile a Nyatšwa’ Gomme ‘a Lebelelwa e se Selo’

3. Ke ka baka la’ng Bajuda ba be ba swanetše go ba ba ile ba amogela Jesu, eupša ba ile ba mo swara bjang?

³ Bala Jesaya 53:3. Nagana feela seo se ilego sa bolelwa ke go tlogela ga Morwa wa Modimo lethabo la go hlankela a le kgaufsi le Tatagwe gomme a tla lefaseng bakeng sa go neela bophelo bja gagwe e le sehlabelo sa go phološa batho sebeng le lehung! (Bafil. 2:5-8) Sehlabelo sa gagwe se be se swanetše go phethagatša tebalelo ya kgonthe ya dibe, yeo e bego e swantšhetšwa ke go dirwa ga dihlabelo tša diphoofolo ka tlase ga Molao wa Moše. (Baheb. 10:1-4) Na nkabe a sa ka a amogelwa le go hlompšha bonyenyane ke Bajuda, bao ba bego ba letetše Mesia yo a holofeditšwego? (Joh. 6:14) Go e na le moo, Kriste o ile a ‘nyatšwa’ ke Bajuda gomme ba ‘mo lebelela e se selo,’ go etša ge Jesaya a porofetile. Moapostola Johane o ngwadile gore: “O tlile ga gabo, eupša batho ba gabo ga se ba ka ba mo amogela.” (Joh. 1:11) Moapostola Petro o boditše Bajuda gore: “Modimo wa bo-rakgolokhukhu ba rena . . . o tagafaditše Mohlanka wa gagwe Jesu yo lena ka bolena le mo gafilego le go mo latola pele ga sefahlego sa Pilato ge a be a dirile phetho ya go mo lokolla. Ee, le latotše yena yoo yo mokgethwa le wa moloki.”—Dit. 3:13, 14.

4. Jesu o tsebile malwetši bjang?

⁴ Jesaya le yena o ile a porofeta ka gore Jesu o be a swanetše go ba motho wa “dihlokofalô.” Nakong ya bodiredi bja gagwe, ruri Jesu o be a lapa ka dinako tše dingwe, eupša ga go na mo go bontšhwago gore o ile a babja. (Joh. 4:6) Lega go le bjalo, o be a tseba malwetši a bao a bego a dira boboledi go bona. O ile a ba kwela bohloko a ba a fodiša ba bantši. (Mar. 1:32-34) Ka baka leo, Jesu o ile a phethagatša boporofeta bjo bo rego: “Ó be a rwele a rena malwetši, ó ipelešitše a rena mahloko.”—Jes. 53:4a; Mat. 8:16, 17.

Bjalo ka ge Eka o ‘Otlilwe ke Modimo’

5. Bajuda ba bantši ba ile ba lebelela lehu la Jesu bjang gomme ke ka baka la’ng se se ile sa oketša tlaišego ya gagwe?

⁵ Bala Jesaya 53:4b. Bontši bja batho bao ba phetšego mehleng ya Jesu ba be ba sa kwešiše lebaka la gore a tlaišege le go hwa. Ba be ba dumela gore o be a otlwa ke Modimo, go le bjalo ka ge eka o be a mo otla ka bolwetši bja go šiiša. (Mat. 27:38-44) Bajuda ba ile ba latofatša Jesu ka go bolela gore ke morogaki. (Mar. 14:61-64; Joh. 10:33) Go ba gona, Jesu e be e se modiradibe goba morogaki. Eupša ge go lebelelwa tsela yeo ka yona a bego a rata Tatagwe, taba ya gore o be a tla hwa ka baka la ge a latofatšwa ka go ba morogaki e swanetše go ba e ile ya oketša tlaišego ya gagwe bjalo ka Mohlanka wa Jehofa. Lega go le bjalo, o be a ikemišeditše go ikokobeletša thato ya Jehofa.—Mat. 26:39.

6, 7. Ke ka kgopolo efe Jehofa a ilego a “šilakanya” Mohlanka wa gagwe yo a botegago gomme ke ka baka la’ng Modimo a ile a ‘rata’ se?

⁶ Ga go re makatše go bala gore boporofeta bja Jesaya bo bolela gore ba bangwe ba be ba tla lebelela Jesu e le yo a ‘otlilwego ke Modimo’ eupša re ka makatšwa ke gore boporofeta bo bolela e sa le pele gore: “Morêna ó ratile xo mo šilakanya.” (Jes. 53:10) Ka ge Jehofa e le yena a boletšego gore: “Bônang mohlanka wa-ka yo ke mo thêkxaxo, yo ke mo hlaotšexo,” go tla bjang gore  Jehofa ‘a rate go mo šilakanya’? (Jes. 42:1) Ke ka kgopolo efe go ka bolelwago gore se se ile sa thabiša Jehofa?

⁷ E le gore re kwešiše karolo ye ya boporofeta, re swanetše go gopola gore ge Sathane a be a hlohla bogoši bja Jehofa, o ile a tsoša pelaelo ya ge e ba go ka ba le bahlanka ba Modimo bao ba mmotegelago legodimong le lefaseng. (Jobo 1:9-11; 2:3-5) Ka go dula a botega go fihla lehung, Jesu o neile karabo e kgotsofatšago tlhohlong ya Sathane. Ka gona, le ge Jehofa a ile a dumelela Kriste gore a bolawe ke manaba a gagwe, ga go pelaelo gore Jehofa o ile a kwa bohloko ge a bona Mohlanka wa gagwe yo a hlaotšwego a bolawa. Lega go le bjalo, Jehofa o ile a thabišwa ke go bona potego e feletšego ya Morwa wa gagwe. (Die. 27:11) Go feta moo, go tseba mehola yeo lehu la Morwa wa gagwe le bego le tla e tlišetša batho bao ba itsholago go ile gwa thabiša Jehofa kudu.—Luka 15:7.

“Ó Hlabilwe ka ’Baka la Dikaroxô tša Rena”

8, 9. (a) Jesu “ó hlabilwe ka ’baka la dikaroxô tša rena” bjang? (b) Petro o kgonthišeditše se bjang?

⁸ Bala Jesaya 53:6. Batho ba sebe ba ile ba ralala go swana le dinku tše di timetšego ba nyaka tlhakodišo malwetšing le lehung tšeo ba di abetšego go Adama. (1 Pet. 2:25) Ka ge ditlogolo tša Adama di sa phethagala, ga go le se tee sa tšona seo se bego se ka kgona go reka seo se lahlegetšego Adama. (Ps. 49:7) Lega go le bjalo, ka lerato la gagwe le legolo, “Morêna a lahlêla makxôpô a rena ka moka xo Yêna,” Morwa wa gagwe yo a rategago le Mohlanka yo a hlaotšwego. Ka go dumela go ‘hlabja ka baka la dikarogo tša rena’ le go ‘tlapiriganywa ka baka la makgopo a rena,’ Kriste o ile a rwala dibe tša rena koteng gomme a re hwela.

⁹ Moapostola Petro o ngwadile gore: “Le bileditšwe tseleng ye, gobane gaešita le Kriste o ile a tlaišega bakeng sa lena, a le tlogelela mohlala gore le latele dikgato tša gagwe kgaufsi. Yena ka noši o ile a rwala dibe tša rena mmeleng wa gagwe koteng, e le gore re tlogelane le dibe gomme re phelele toko.” Ke moka ge a tsopola boporofeta bja Jesaya, Petro o okeditše ka gore: “Le ile la fodišwa ka megogoma ya gagwe.” (1 Pet. 2:21, 24; Jes. 53:5) Se se ile sa bulela badiradibe sebaka sa go boelana le Modimo, go etša ge Petro a tšwetše pele go bolela gore: “Kriste o hwile gatee ya ba moka mabapi le dibe, motho yo a lokilego a hwela ba sa lokago, e le gore a le iše go Modimo.”—1 Pet. 3:18.

“A Etša Kwanyana e Išwaxo Thlabong”

10. (a) Johane Mokolobetši o hlalositše Jesu bjang? (b) Ke ka baka la’ng mantšu a Johane a ile a itlhatsela e le a swanelago?

¹⁰ Bala Jesaya 53:7, 8. Ge Johane Mokolobetši a be a bona Jesu a batamela, o goeleditše ka gore: “Bonang, Kwana ya Modimo e tlošago sebe sa lefase!” (Joh. 1:29) Ge Johane a be a bolela ka Jesu e le Kwana, a ka ba a be a naganne ka mantšu a Jesaya ao a rego: “A etša kwanyana e išwaxo thlabong.” (Jes. 53:7) Jesaya o porofetile ka gore: “Ó thšolletše môya w’axwe mo lehung.” (Jes. 53:12) Se se kgahlišago ke gore bošegong bjo Jesu a hlomilego Segopotšo sa lehu la gagwe ka bjona, o neile baapostola ba 11 bao ba botegago senwelo sa beine gomme a re: “Se se bolela ‘madi a-ka a kgwerano,’ ao a tlago go tšhollelwa ba bantši bakeng sa tebalelo ya dibe.”—Mat. 26:28.

11, 12. (a) Go ikemišetša ga Isaka gore a dirwe sehlabelo go bontšha’ng ka sehlabelo sa Kriste? (b) Ke’ng seo re swanetšego go se gopola mabapi le Aborahama yo Mogolo, Jehofa, ge re gopola Segopotšo?

¹¹ Go swana le Isaka wa mehleng ya bogologolo, Jesu o be a ikemišeditše go gafiwa e le sehlabelo aletareng bakeng sa go phethagatša thato ya Jehofa. (Gen. 22:1, 2, 9-13; Baheb. 10:5-10) Gaešita le ge Isaka a ile a dumela ka go rata gore a dirwe sehlabelo, e be e le Aborahama yo a bego a dirile maiteko a gore sehlabelo seo se dirwe. (Baheb. 11:17) Ka mo go swanago, Jesu ka go rata o ile a amogela gore o swanetše go hwa, eupša e be e le Jehofa yo e bilego Mothomi wa tokišetšo ya topollo. Sehlabelo sa Morwa wa gagwe e be e le pontšho ya gore Modimo o rata batho.

¹² Jesu ka noši o itše: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa,  eupša a be le bophelo bjo bo sa felego.” (Joh. 3:16) Moapostola Paulo o ngwadile gore: “Modimo o bonagatša lerato la gagwe go rena ka gore, ge re be re sa le badiradibe, Kriste o ile a re hwela.” (Baroma 5:8) Ka baka leo, le ge re hlompha Kriste ka go gopola lehu la gagwe, ga se ra swanela go lebala gore yo a dirilego gore go be le tokišetšo ya sehlabelo e be e le Aborahama yo Mogolo, e lego Jehofa. Re gopola Segopotšo bakeng sa go mo tumiša.

Mohlanka o “Lokafatša ba Bantši”

13, 14. Mohlanka wa Jehofa o ‘lokafaditše ba bantši’ bjang?

¹³ Bala Jesaya 53:11, 12, bapiša le NW. Jehofa o boletše ka Mohlanka wa gagwe yo a kgethilwego gore: “Mohlanka wa-ka moloki, ka tsebô ya xaxwe ó tlo lokafatša ba bantši.” Bjang? Karolo ya mafelelo ya temana 12 e re nea thušo ya go hwetša karabo. “Gomme [Mohlanka] a phophothela batshedi ba molao.” Ditlogolo ka moka tša Adama di belegwa e le badiradibe, “batshedi ba molao,” gomme ka go rialo di hwetša “moputso woo sebe se o lefago,” e lego lehu. (Baroma 5:12; 6:23) Poelano magareng ga Jehofa le batho ba sebe e a nyakega. Kgaolo 53 ya boporofeta bja Jesaya e hlalosa gabotse kamoo Jesu a ‘phophothetšego,’ goba a dirilego poelano, bakeng sa batho ba sebe ge e re: “Kôtlô e wetše Yêna xodimo, xore re bônê khutšô; ra tlêlwa ke xo fôla ka dintho tša xaxwe.”—Jes. 53:5.

¹⁴ Ka go ithweša dibe tša rena le go re hwela, Kriste o ‘lokafaditše ba bantši.’ Paulo o ngwadile gore: “Modimo o bone go le botse gore botlalo bjohle bo dule go yena [Kriste], le gore ka yena a boelanye gape dilo tše dingwe ka moka le yena ka go dira khutšo ka madi ao a a tšholotšego koteng ya tlhokofatšo, go sa šetšwe gore ke dilo tše di lego lefaseng goba dilo tše di lego magodimong.”—Bakol. 1:19, 20.

15. (a) “Dilo tše di lego magodimong” tšeo Paulo a boletšego ka tšona ke bomang? (b) Ke bomang feela bao ba nago le tshwanelo ya go ja diswantšhetšo tša Segopotšo, gona ka baka la’ng?

¹⁵ “Dilo tše di lego magodimong” tšeo di boelanywago le Jehofa ka madi a Kriste ao a tšholotšwego ke Bakriste bao ba tloditšwego, bao ba biletšwago go yo buša le Kriste magodimong. Bakriste bao ba nago le “kabelo pitšong ya legodimo” ba bolelwa “ba lokile bakeng sa bophelo.” (Baheb. 3:1; Baroma 5:1, 18) Ke moka Jehofa e ba Tatago bona bjalo ka barwa ba moya. Moya o mokgethwa o hlatselana le bona gore ke “bajabohwa-gotee le Kriste,” bao ba biletšwago go ba dikgoši le baperisita Mmušong wa legodimong. (Baroma 8:15-17; Kut. 5:9, 10) Ba ba karolo ya Isiraele ya moya, “Isiraele wa Modimo” gomme ba išwa ‘kgweranong e mpsha.’ (Jer. 31:31-34; Bagal. 6:16) Ka ge e le ditho tša kgwerano e mpsha, ba neilwe tshwanelo ya go ja diswantšhetšo tša Segopotšo, go akaretša le go nwa senwelo sa beine e khwibidu seo Jesu a boletšego ka sona ge a re: “Senwelo se se bolela kgwerano e mpsha ka baka la madi a-ka ao a tlago go tšhollelwa lena.”—Luka 22:20.

16. “Dilo tše di lego lefaseng” ke’ng gomme di newa boemo bja go ba tše di lokilego pele ga Jehofa ka tsela efe?

¹⁶ “Dilo tše di lego lefaseng” ke ba dinku tše dingwe tša Kriste, bao ba nago le kholofelo ya go phela ka mo go sa felego lefaseng. Mohlanka yo a hlaotšwego wa Jehofa o neile le bona ba boemo bja go ba bao ba lokilego pele ga Jehofa. Ka ge ba e-na le tumelo sehlabelong sa Kriste sa topollo  gomme ka go rialo ba “hlatswitše dikobo tša bona tše telele ba di šweufatša mading a Kwana,” Jehofa o ba bolela ba lokile, e sego e le barwa ba moya, eupša e le bagwera ba gagwe, a ba nea tebelelo e botse ya go phologa ‘masetlapelo a magolo.’ (Kut. 7:9, 10, 14; Jak. 2:23) Ka ge dinku tše tše dingwe di se kgweranong e mpsha gomme ka go rialo di se na kholofelo ya go phela legodimong, ga di je diswantšhetšo tša Segopotšo eupša di ba gona e le babogedi bao ba hlomphago.

A go Lebogwe Jehofa le Mohlanka wa Gagwe yo a mo Amogetšego!

17. Go hlahloba boporofeta bja Jesaya bjo bo lego mabapi le Mohlanka go re thušitše bjang go hlama menagano ya rena bakeng sa Segopotšo?

¹⁷ Go hlahlobja ga boporofeta bjo bo lego go Jesaya bjo bo bolelago ka Mohlanka e bile tsela e botse ya go hlama menagano ya rena bakeng sa Segopotšo sa lehu la Kriste. Go re thušitše go “[dula] re tsepeletše Moemedi yo Mogolo le Mophethagatši wa tumelo ya rena.” (Baheb. 12:2) Re ithutile gore Morwa wa Modimo ga se lerabele. Go fapana le Sathane, Jesu o thabela go rutwa ke Jehofa, a tseba gore ke Mmuši Morena. Re bone gore nakong ya bodiredi bja gagwe bja lefaseng, Jesu o ile a bontšha kwelobohloko bathong bao a bego a dira boboledi go bona, a fodiša ba bantši ba bona mmeleng le moyeng. Ka baka leo o ile a bontšha seo a bego a tla se dira ge e le Kgoši Mesia tshepedišong e mpsha ya dilo ge “a hloma go loka lefaseng.” (Jes. 42:4, PK) Mafolofolo ao a bego a a bontšha ge a be a bolela ka Mmušo, bjalo ka “seetša sa ba-ntlê,” ke kgopotšo go balatedi ba gagwe gore ba bolele ditaba tše dibotse ka mafolofolo lefaseng ka bophara.—Jes. 42:6.

18. Ke ka baka la’ng boporofeta bja Jesaya bo dira gore re leboge Jehofa le Mohlanka wa gagwe yo a botegago?

¹⁸ Le gona boporofeta bja Jesaya bo oketša kwešišo ya rena mabapi le boikgafo bjo bogolo bjo Jehofa a bo dirilego ka go romela Morwa wa gagwe yo a rategago lefaseng gore a tle go tlaišega le go re hwela. Jehofa ga se a ka a thabela go bona Morwa wa gagwe a tlaišega, eupša o ile a thabela go bona go botega mo go feletšego ga Jesu go fihlela a e-hwa. Re swanetše go thaba bjalo ka Jehofa, re lemoga dilo ka moka tšeo Jesu a di dirilego go hlatsela Sathane e le wa maaka le go kgethagatša leina la Jehofa, ka go rialo ra tumiša go swanelega ga bogoši bja Gagwe. Go oketša moo, Kriste o rwele dibe tša rena gomme a re hwela. Ka tsela yeo, o dirile gore mohlatswana wa bana babo bao ba tloditšwego le dinku tše dingwe ba kgone go ba le boemo bja go ba bao ba lokilego pele ga Jehofa. Ge re bokana ka Segopotšo, eka dipelo tša rena di ka tlala ka tebogo e išwago go Jehofa le Mohlanka wa gagwe yo a botegago.

E le Poeletšo

• Ke ka kgopolo efe Jehofa a ilego a ‘rata’ go ‘šilakanywa’ ga Morwa wa gagwe?

• Jesu “ó hlabilwe ka ’baka la dikaroxô tša rena” bjang?

• Ke bjang Mohlanka a ilego a ‘lokafatša ba bantši ka tsebo ya gagwe’?

• Go hlahloba boporofeta bjo bo lego mabapi le Mohlanka go hlamile monagano le pelo ya gago bjang bakeng sa Segopotšo?

[Dipotšišo tša Thuto]

[Seswantšho go letlakala 26]

“Ó nyaditšwe bo-ka moxerulwa; xa r’a ka ra mo re selô”

[Seswantšho go letlakala 28]

“Ó thšolletše môya w’axwe mo lehung”

[Tlhaloso ya seswantšho go letlakala 29]

“Dinku tše dingwe” di ba gona Segopotšong e le babogedi bao ba hlomphago