Na o Etelela Pele go Bontšheng Kgodišo?
Na o Etelela Pele go Bontšheng Kgodišo?
“Go bontšhaneng kgodišo, etelelang pele.”—BAROMA 12:10.
1. Ke’ng se se fetogilego dikarolong tše dintši tša lefase?
DIKAROLONG tše dingwe tša lefase, ke setlwaedi go bana go bontšha batho ba bagolo kgodišo ka go khunama ka tsela e nago le tlhompho ge ba e-na le bona. Ka tsela ye, ga ba emelele pele ga batho ba bagolo. Ditšhabeng tše, selo se sengwe gape seo se lebelelwago e le pontšho ya lenyatšo ke ge ngwana a furalela motho yo mogolo. Gaešita le ge tlhompho e bontšhwa ka ditsela tše sa swanego ditšong tše di fapa-fapanego, dipontšho tše bjalo tša tlhompho di re gopotša Molao wa Moše. O be o akaretša taelo e rego: “Xe O lebana le hlôxô e pududu o êmê; sefahloxô sa mokxalabyê O se hlomphê.” (Lef. 19:32) Ka manyami, dinageng tše dintši ga go sa tlwaelegile go bontšha ba bangwe tlhompho. Ge e le gabotse, go hloka tlhompho go atile.
2. Lentšu la Modimo le re botša gore re godiše bomang?
2 Lentšu la Modimo le gatelela mohola wa go bontšha kgodišo. Le re botša gore re godiše Jehofa le Jesu. (Joh. 5:23) Le gona, re laelwa gore re godiše ditho tša lapa le badumedi-gotee go akaretša le bao e sego karolo ya phuthego. (Baroma 12:10; Baef. 6:1, 2; 1 Pet. 2:17) Re bontšha gore re godiša Jehofa ka ditsela dife tše dingwe? Re bontšha bjang kgodišo goba tlhompho e tseneletšego go bana babo rena ba Bakriste le dikgaetšedi? A re hlahlobeng dipotšišo tše gotee le tše dingwe tšeo di sepedišanago le tšona.
Godiša Jehofa le Leina la Gagwe
3. Tsela e bohlokwa ya go godiša Jehofa ke efe?
3 Tsela e bohlokwa ya go godiša Jehofa ke ka go hlompha leina la gagwe ka tsela e swanetšego. Ge e le gabotse, re “batho ba leina la gagwe.” (Dit. 15:14) E tloga e le kgodišo go bitšwa ka leina la Modimo yo matla-ohle, Jehofa. Moporofeta Mika o itše: “Xe sethšaba se sengwê le se sengwê sè e-ya ka tsela ya modimo wa sôna, rena re tlo fêla rè e-ya ka tsela ya [Jehofa] Modimo wa rena ka mehla le xo ya xo ile.” (Mika 4:5) Re ‘sepela ka leina la Jehofa’ ka go katanela go phela letšatši le lengwe le lengwe ka tsela yeo e emelago gabotse leina leo re bitšwago ka lona. Bjalo ka ge Paulo a gopoditše Bakriste ba Roma, ge e-ba re sa phele ka go dumelelana le ditaba tše dibotse tšeo re di bolelago, leina la Modimo le a “rogakwa,” le a gobošwa.—Baroma 2:21-24.
4. O lebelela bjang tokelo ya go bolela ka Jehofa?
4 Re godiša Jehofa gape ka modiro wa go nea bohlatse. Nakong e fetilego, Jehofa o ile a laletša Baisiraele go ba dihlatse tša gagwe, eupša ba ile ba palelwa ke go phetha karolo yeo. (Jes. 43:1-12) Gantši ba be ba furalela Jehofa gomme “ba šexamiša Yêna Mokxêthwa wa Isiraele.” (Ps. 78:40, 41) Mafelelong, setšhaba se ile sa lahlegelwa ke kamogelo ya Jehofa ka mo go feletšego. Lega go le bjalo, rena lehono re leboga tokelo yeo re nago le yona ya go bolela ka Jehofa le go tsebatša leina la gagwe. Re dira bjalo ka gobane re a mo rata e bile re nyaka gore leina la gagwe le kgethagatšwe. Re ka tlogela bjang go bolela mola re tseba therešo ka Tatago rena wa legodimong le merero ya gagwe? Re ikwa go swana le moapostola Paulo yo a itšego: “Ke tlamegile. Ruri, go madimabe nna ge e ba ke se ka bolela ditaba tše dibotse!”—1 Bakor. 9:16.
5. Go ba le tumelo go Jehofa go tswalana bjang le go mo hlompha?
5 Mopsalme Dafida o boletše gore: “Ba ba tsebaxo leina la xaxo ba Xo holofetše, xobane O ka se kê wa lahla ba ba Xo nyakaxo, Wene Morêna.” (Ps. 9:10) Ge e ba re tseba Jehofa e le ka kgonthe gomme re hlompha leina la gagwe, re tla mmota go swana le bahlanka ba gagwe ba botegago ba bogologolo. Go bota Jehofa ka tsela ye le go ba le tumelo go yena ke tsela e nngwe ya go mmontšha kgodišo. Ela hloko kamoo Lentšu la Modimo le tswalanyago go bota Jehofa le go mo hlompha. Ge Isiraele ya bogologolo e be e palelwa ke go Mmota, Jehofa o ile a botšiša Moše gore: “Sethšaba sé se tlo lesa neng xo nnyatša; se tlo thôma neng xo mpôta ka ’baka la matete ohle ao, a ke a dirilexo mo xo bôná?” (Num. 14:11) Le gona, se se fapanego le se ke therešo. Ka go bota Jehofa gore o tla re šireletša le go re matlafatša gaešita le dinakong tša diteko, re bontšha gore re a mo hlompha.
6. Ke’ng seo se re hlohleletšago go bontšha Jehofa tlhompho e tseneletšego?
6 Jesu o bontšhitše gore go hlompha Jehofa go swanetše go tšwa pelong. Ge a be a bolela le bao borapedi bja bona bo bego bo sa tšwe pelong, Jesu o tsopotše mantšu a Jehofa a rego: “Batho ba ba nkgodiša ka melomo ya bona, fela dipelo tša bona di kgole le nna.” (Mat. 15:8) Go rata Jehofa ka mo go tseneletšego go dira gore re mo hlomphe go tšwa pelong. (1 Joh. 5:3) Le gona, re dula re gopola kholofetšo ya Jehofa e rego: “Ke xodiša ba ba nkxodišaxo.”−1 Sam. 2:30.
Bao ba Etelelago Pele ba Hlompha ba Bangwe
7. (a) Ke ka baka la’ng bana babo rena bao ba nago le boikarabelo ba swanetše go hlompha bao ba lego tlhokomelong ya bona? (b) Paulo o ile a bontšha badumedi-gotee le yena tlhompho bjang?
7 Moapostola Paulo o eleditše badumedi-gotee le yena gore: “Go bontšhaneng kgodišo, etelelang pele.” (Baroma 12:10) Bana babo rena bao ba nago le boikarabelo ka phuthegong ba swanetše go bea mohlala—ba ‘etelele pele’—ka go hlompha bao ba lego tlhokomelong ya bona. Tabeng yeo, bao ba nago le boikarabelo bjo bogolo ba dira gabotse ge ba latela mohlala wa Paulo. (Bala 1 Bathesalonika 2:7, 8.) Bana babo rena ba diphuthegong tšeo Paulo a bego a di etela ba be ba tseba gore o be a ka se ba kgopele go dira dilo tšeo yena a bego a sa nyake go di dira. Paulo o bontšhitše badumedi-gotee le yena tlhompho gomme le bona ba ile ba mo hlompha. Ge Paulo a be a re: “Ka baka leo, ke a le lopa, e-bang baekiši ba-ka,” re ka kgodišega gore ba bantši ba ile ba mo ekiša ka go rata ka baka la mohlala wa gagwe o mobotse.—1 Bakor. 4:16.
8. (a) Ke tsela efe e bohlokwa yeo ka yona Jesu a bontšhitšego barutiwa ba gagwe tlhompho? (b) Lehono balebeledi ba ka ekiša bjang mohlala wa Jesu?
8 Tsela e nngwe yeo ka yona ngwanabo rena yo a nago le boikarabelo a bontšhago tlhompho go bao ba lego tlhokomelong ya gagwe ke ka go ba bontšha gore ke ka baka la’ng a dira kgopelo e itšego goba a ba nea tlhahlo. Ka go dira bjalo, o ekiša Jesu. Ka mohlala, ge a be a botša barutiwa ba gagwe gore ba rapelele gore ba romelwe badiri ba ba oketšegilego punong, Jesu o ile a ba nea lebaka. O itše: “Puno ke e kgolo, eupša badiri ke ba sego kae. Ka baka leo, kgopelang Mong wa puno gore a romele badiri punong ya gagwe.” (Mat. 9:37, 38) Ka mo go swanago, ge a be a botša barutiwa ba gagwe gore ba ‘dule ba phakgame,’ o ile a ba botša lebaka. O itše: “Gobane ga le tsebe letšatši leo Morena wa lena a tlago ka lona.” (Mat. 24:42) Nako le nako, Jesu o be a sa botše barutiwa ba gagwe seo ba swanetšego go se dira feela, eupša o be a ba botša le lebaka leo ka lona ba swanetšego go se dira. Ka tsela yeo, o be a ba bontšha tlhompho le go ba fa seriti. A mohlala o mobotse gakaakang wo balebeledi ba Bakriste ba swanetšego go o latela!
Hlompha Phuthego ya Jehofa le Tlhahlo ya Yona
9. Go hlompha phuthego ya Bokriste ya lefase ka bophara gotee le bao ba e emelago go bontšha’ng? Hlalosa.
9 E le gore re godiše Jehofa, re swanetše go hlompha phuthego ya Bokriste ya lefase ka bophara go akaretša le baemedi ba yona. Ge re amogela keletšo ya Mangwalo go tšwa go sehlopha sa mohlanka yo a botegago, re bontšha gore re hlompha thulaganyo ya Jehofa. Ka phuthegong ya Bokriste ya lekgolong la pele la nywaga, moapostola Johane o bone go nyakega gore a sole bao ba bego ba bontšha go se hlomphe bao ba kgethilwego. (Bala 3 Johane 9-11.) Mantšu a Johane a bontšha gore go be go sa nyatšwe feela balebeledi eupša go be go nyatšwa le thuto ya bona le tlhahlo ya bona. Ka mo go thabišago, Bakriste ba bantši ba be ba se bjalo. Ge baapostola ba be ba sa phela, go molaleng gore phuthego ka moka ya Bokriste e be e bontšha tlhompho e tseneletšego go bao ba etelelago pele.—Bafil. 2:12.
10, 11. Hlalosa go tšwa Mangwalong gore ke ka baka la’ng e le mo go swanetšego gore ba bangwe ba be le matla a bolaodi ka phuthegong ya Bokriste.
10 Ba bangwe ba ile ba bea mabaka ka gore, ka ge Jesu a boditše barutiwa ba gagwe gore “lena ka moka le . . . barwarre,” gona ga se gwa swanela go ba le bao ba etelelago pele ka gare ga phuthego ya Bokriste. (Mat. 23:8) Lega go le bjalo, Mangwalo a Segerika le a Seheberu a na le mehlala e mentši ya banna bao ba ilego ba diriša matla a taolo ao ba a neilwego ke Modimo. Histori ya bapatriareka, baahlodi le dikgoši tša Baheberu ba bogologolo e nea bohlatse bjo bo lekanego bja gore Jehofa o nea tlhahlo ka baemedi bao e lego batho. Ge batho ba be ba sa hlomphe ka mo go swanetšego bao ba kgethilwego, Jehofa o be a ba laya.—2 Dikx. 1:2-17; 2:19, 23, 24.
11 Ka tsela e swanago, Bakriste ba lekgolong la pele la nywaga ba be ba amogela bolaodi bja baapostola. (Dit. 2:42) Ka mohlala, Paulo o ile a nea bana babo tlhahlo. (1 Bakor. 16:1; 1 Bathes. 4:2) Lega go le bjalo, le yena o be a ikokobetša ka go rata go bao ba bego ba e-na le matla a bolaodi go yena. (Dit. 15:22; Bagal. 2:9, 10) Ee, Paulo o be a e-na le pono e swanetšego ka bolaodi ka phuthegong ya Bokriste.
12. Ke dithuto dife tše pedi tšeo re ithutago tšona mabapi le bolaodi go tšwa mehlaleng ya ka Beibeleng?
12 Re ithuta dilo tše pedi. Sa pele, Mangwalo a dumelela “mohlanka yo a botegago le wa temogo” gore ka Sehlopha se Bušago a kgethele banna maemong a boikarabelo, gomme banna ba bangwe ba kgethelwa go ba le matla a bolaodi godimo ga banna ba bangwe ba kgethilwego. (Mat. 24:45-47; 1 Pet. 5:1-3) Sa bobedi, ka moka ga rena, go akaretša le banna ba kgethilwego, re swanetše go hlompha bao ba nago le matla a bolaodi go rena. Ka gona, ke ditsela dife tše šomago tšeo ka tšona re ka godišago bao ba lego maemong a bolebeledi ka phuthegong ya Bokriste ya lefase ka bophara?
Go Hlompha Balebeledi ba Basepedi
13. Re ka hlompha bjang baemedi ba mehleng yeno ba phuthego ya Bokriste?
13 Paulo o boletše gore: “Re a le kgopela, bana bešo, gore le hlomphe bao ba šomago ka thata gare ga lena gomme ba le okametše Moreneng e bile ba le eletša; le go ba nea kgodišo e fetago e tlwaelegilego ka lerato ka baka la modiro wa bona. E-bang le khutšo seng sa lena.” (1 Bathes. 5:12, 13) Ruri balebeledi ba basepedi ba swanetšwe ke go balwa gare ga “bao ba šomago ka thata.” Ka baka leo, a re ba neeng “kgodišo e fetago e tlwaelegilego.” Tsela e nngwe ya go dira se ke ka go arabela ka pelo ka moka ge ba re eletša le ge ba re kgothatša. Ge molebeledi yo bjalo a re nea tlhahlo e tšwago go sehlopha sa mohlaka yo a botegago, “bohlale bjo bo tšwago godimo” bo tla re šušumeletša gore re ‘ikemišetše go kwa.’—Jak. 3:17.
14. Phuthego e bontšha bjang gore e hlompha balebeledi ba basepedi go tšwa pelong, gomme ka mafelelo afe?
14 Ka gona, go thwe’ng ge e ba re laelwa go dira dilo ka tsela e fapanego le yeo re tlwaetšego go dira dilo ka yona? Go bontšha tlhompho ka dinako tše dingwe go ka nyaka gore re pheme go gana tlhahlo, ka go bolela gore, “Ga re dire dilo ka tsela yeo mo” goba, “Seo se ka šoma mafelong a mangwe eupša e sego ka phuthegong ya gabo rena.” Go e na le moo, re katanela go kwa. Go dula re gopola gore phuthego ke ya Jehofa le gore Jesu ke Hlogo ya yona go tla re thuša go dira bjalo. Ge tlhahlo yeo e tšwago go molebeledi wa mosepedi e amogelwa ka lethabo gomme e dirišwa ke phuthego, se se bontšha tlhompho e tšwago pelong. Moapostola Paulo o ile a reta bana babo ba kua Korinthe ka ge ba ile ba kwa ka tlhompho keletšo yeo e neilwego ke mogolo yo a bego a etetše moo, e lego Tito. (2 Bakor. 7:13-16) Le rena lehono re ka kgodišega gore go diriša ka go rata tlhahlo yeo re e hwetšago go balebeledi ba basepedi go tlaleletša kudu lethabong leo re le hwetšago modirong wa rena wa boboledi.—Bala 2 Bakorinthe 13:11.
“Godišang Batho ba Mehuta ka Moka”
15. Ke ditsela dife tše dingwe tšeo ka tšona re ka bontšhago gore re hlompha badumedi-gotee le rena?
15 Paulo o ngwadile gore: “O se ke wa kgalema monna yo mogolo ka matla. Go fapana le seo, o mo lope bjalo ka tate, banna ba bafsa bjalo ka bana beno, basadi ba bagolo bjalo ka bo-mma, basadi ba bafsa bjalo ka dikgaetšedi ka thakgafalo yohle. Godiša bahlologadi bao e lego bahlologadi e le ka kgonthe.” (1 Tim. 5:1-3) Ee, Lentšu la Modimo le re kgothaletša go godiša yo mongwe le yo mongwe ka phuthegong ya Bokriste. Lega go le bjalo, go thwe’ng ge e ba go e-na le phapano magareng ga gago le ngwaneno goba kgaetšedi? Na seo se tla go palediša go phetha boikarabelo bja gago bja go hlompha Mokriste-gotee le wena? Goba na o ka kaonefatša boemo bja gago bja kgopolo ka go lemoga dika tša moya tšeo mohlanka yoo wa Modimo a nago le tšona? Bao ba nago le matla a taolo ba swanetše go dula ba hlompha bana babo bona—e se be ka “go buša . . . mohlape.” (1 Pet. 5:3) Ka kgonthe, ka phuthegong ya Bokriste yeo e hlaolwago ka lerato le le tšwago pelong leo le lego gona gare ga ditho tša yona, re na le dibaka tše mmalwa tša go godišana.—Bala Johane 13:34, 35.
16, 17. (a) Ke ka baka la’ng go le bohlokwa go hlompha e sego feela bao re dirago boboledi go bona eupša gotee le baganetši? (b) Re ‘godiša batho ba mehuta ka moka’ bjang?
16 Ke therešo gore ga re lekanyetše tlhompho ya rena go bao e lego karolo ya phuthego ya Bokriste feela. Paulo o ngwaletše Bakriste ba mehleng ya gagwe gore: “Ge feela re sa na le nako e loketšego, anke re direleng bohle botse, eupša kudu-kudu re bo direleng bao ba tswalanego le rena tumelong.” (Bagal. 6:10) Go ba gona, go diriša molao woo wa motheo e ka ba tlhohlo ge e ba mošomi-gotee goba motho yoo re tsenago le yena sekolo a re swara ka tsela yeo e sego botho. Maemong a bjalo, re swanetše go gopola mantšu a: “Se je pelo xe O bôna babe.” (Ps. 37:1) Go diriša keletšo yeo go tla re thuša go arabela ka tlhompho gaešita le go baganetši. Ka mo go swanago, ge re le bodireding bja phatlalatša, go inyenyefatša go ka re thuša go araba bohle ka “moya o boleta le ka tlhompho e tseneletšego.” (1 Pet. 3:15) Gaešita le ponagalo ya rena le moaparo di ka bontšha gore re hlompha bao re boledišanago le bona.
17 Ee, go sa šetšwe gore re dirišana le badumedi-gotee goba bao ba lego ka ntle ga phuthego, re nyaka go katanela go diriša keletšo ye: “Godišang batho ba mehuta ka moka, ratang mokgatlo wohle wa bana babo rena, boifang Modimo, godišang kgoši.”—1 Pet. 2:17.
O be o tla Araba Bjang?
O ka bontšha bjang tlhompho e swanetšego go:
• Jehofa?
• Bagolo ba phuthego le balebeledi ba basepedi?
• Setho se sengwe le se sengwe sa phuthego?
• Bao o dirago boboledi go bona?
[Dipotšišo tša Thuto]
[Seswantšho go letlakala 23]
Bakriste ba lekgolong la pele la nywaga ba ile ba hlompha bolebeledi bja Sehlopha se Bušago
[Seswantšho go letlakala 24]
Bagolo nageng e nngwe le e nngwe ba hlompha balebeledi ba basepedi bao ba kgethilwego ke sehlopha se bušago