Bodiredi bja Ntlo le Ntlo​—Ke ka Baka La’ng bo le Bohlokwa Gona Bjale?

“Letšatši le lengwe le le lengwe ka tempeleng le ka ntlo le ntlo ba tšwela pele ba sa kgaotše ba ruta e bile ba tsebatša ditaba tše dibotse ka Kriste, Jesu.”​—DIT. 5:42.

1, 2. (a) Dihlatse tša Jehofa di tsebja ka mokgwa ofe wa go dira boboledi? (b) Re tlo ahla-ahla’ng sehlogong se?

SE KE se se bonwago mo e nyakilego go ba setšhabeng se sengwe le se sengwe mo lefaseng. Batho ba babedi bao ba aperego gabotse ba lebile ntlong gomme ba ikemišeditše go botša mong wa ntlo molaetša o mokopana o tšwago Beibele wa mabapi le Mmušo wa Modimo. Ge a bontšha kgahlego molaetšeng woo, ba ka mo sepedišetša kgatišo e theilwego Beibeleng gomme ba mmotša ka thuto ya legae ya Beibele e sa lefelelwego. Ke moka ba ya ntlong e latelago. Ge e ba o tšea karolo modirong wo, o ka no hwetša gore gantši batho ba lemoga gore o yo mongwe wa Dihlatse tša Jehofa gaešita le pele o thoma go bolela. Ee, bodiredi bja ntlo le ntlo bo fetogile leswao la rena.

² Re diriša mekgwa e fapa-fapanego go phetha taelo ya Jesu ya go dira boboledi le go dira barutiwa. (Mat. 28:19, 20) Re nea bohlatse mebarakeng, ditarateng le mafelong a mangwe a batho bohle. (Dit. 17:17) Re ikgokaganya le ba bantši ka mogala le mangwalo. Re bolela ditherešo tša Beibele le bao re kopanago le bona ge re dira mediro ya rena ya letšatši le letšatši. Le gona re na le mokero wa semmušo wa Web, woo o go bulelago mojako wa go hwetša tsebišo e theilwego Beibeleng ka maleme a fetago 300. * Mekgwa ye ka moka e ba le mafelelo a mabotse. Lega go le bjalo, mafelong a mantši, mokgwa wa rena o mogolo wa go phatlalatša ditaba tše dibotse ke wa go dira boboledi ka ntlo le ntlo. Mokgwa wo wa boboledi o theilwe kae? Go tlile bjang gore o dirišwe kudu ke batho ba Modimo mehleng ya lehono? Le gona ke ka baka la’ng o le bohlokwa gona bjale?

Mokgwa wa Baapostola

3. Ke ditaelo dife tša mabapi le go dira boboledi tšeo Jesu a ilego a di nea baapostola, gomme se se bontšha’ng mabapi le kamoo ba bego ba swanetše go dira boboledi ka gona?

³ Mokgwa wa go bolela ka ntlo le ntlo o theilwe Mangwalong. Ge Jesu a be a roma baapostola gore ba ye go dira boboledi, o ba laetše gore: “Motse goba motsana le ge e le ofe wo le tsenago go wona, le nyakeng yo a swanelegago go wona.” Ba be ba tla nyaka bjang bao ba swanelegago? Jesu o ile a ba botša gore ba ye magaeng a batho, ka go ba botša gore: “Ge le tsena ka ntlong le dumediše ba ntlo yeo; ge e ba ntlo e swanela, a khutšo yeo le e kganyogelago yona e e tlele.” Na ba be ba swanetše go no ba baeng ba sa letelwago? Ela hloko mantšu a Jesu a tšwelago pele a rego: “Kae le kae moo motho a sa le amogelego goba a sa theetšego mantšu a lena, ge le e-tšwa ntlong yeo goba motseng woo le hlohlore lerole dinaong tša lena.” (Mat. 10:11-14) Ditaelo tše di bontšha gabotse gore ge baapostola ba be “ba phatša naga-selete go tloga motsaneng go ya motsaneng, ba bolela ditaba tše dibotse,” ba be ba swanetše go gata mogato wa pele wa go etela batho magaeng a bona.—Luka 9:6.

4. Boboledi bja ntlo le ntlo bo begwa kae ka go lebanya ka Beibeleng?

⁴ Beibele e bolela ka go lebanya gore baapostola ba be ba bolela ka ntlo le ntlo. Ka mohlala, Ditiro 5:42 e bolela ka bona gore: “Letšatši le  lengwe le le lengwe ka tempeleng le ka ntlo le ntlo ba tšwela pele ba sa kgaotše ba ruta e bile ba tsebatša ditaba tše dibotse ka Kriste, Jesu.” Nywaga e ka bago e 20 ka morago, moapostola Paulo o ile a gopotša banna ba bagolo ba phuthegong ya Efeso gore: “Ke be ke sa lese go le botša selo le ge e le sefe sa dilo tšeo e bego e le tše di holago goba go le ruta phatlalatša le ka ntlo le ntlo.” Na Paulo o ile a etela bagolo bao pele ba e-ba badumedi? Go bonagala a ile a ba etela, ka gobane gare ga dilo tše dingwe tšeo a di boletšego, o ile a ba ruta “mabapi le boitsholo go Modimo le go dumela go Morena wa rena Jesu.” (Dit. 20:20, 21) Ge e hlalosa Ditiro 20:20, puku ya Word Pictures in the New Testament ya Robertson e re: “Ke mo gobotse go ela hloko gore baboledi ba ba bagolo ba be ba bolela ka ntlo le ntlo.”

Madira a Ditšie a Mehleng Yeno

5. Modiro wa boboledi o swantšhitšwe bjang boporofeteng bja Joele?

⁵ Go nea bohlatse mo go dirilwego lekgolong la pele la nywaga e be e fo ba mathomo-mayo a modiro o mogolo wo o bego o tla dirwa mehleng ya rena. Moporofeta Joele o swantšhitše modiro wa boboledi wa Bakriste ba tloditšwego le kotlo e senyago ya dikhunkhwane, go akaretša le ditšie. (Joele 1:4) Di hlasela bjalo ka madira, ditšie di fenya mapheko, di tsena ka dintlong, gomme di metša selo le ge e le sefe seo se lego tseleng ya tšona. (Bala Joele 2:2, 7-9.) A seswantšho se se kgahlišago gakaakang sa go bontšha kamoo batho ba Modimo ba phegelelago ka gona ge ba phetha modiro wa go nea bohlatse le kamoo ba o phethago ka botlalo ka gona mehleng yeno! Mokgwa woo o di gogago pele wo o dirišwago ke Bakriste ba tloditšwego le bagwera ba bona ba “dinku tše dingwe” ge ba phethagatša seswantšho se sa boporofeta ke wa go dira boboledi bja ntlo le ntlo. (Joh. 10:16) Rena, Dihlatse tša Jehofa, re thomile bjang go diriša mokgwa wo wa baapostola wa go dira boboledi?

6. Ka 1922, go ile gwa newa kgothatšo efe ya gore go newe bohlatse ka ntlo le ntlo, eupša ba bangwe ba ile ba arabela bjang?

⁶ Go tloga ka 1919 go ya pele, go ile gwa gatelelwa boikarabelo bja Mokriste yo mongwe le yo mongwe bja go tšea karolo modirong wa go nea bohlatse. Ka mohlala, sehlogo seo se rego “Service Essential (Tirelo e Bohlokwa)” ka go Morokami (wa Seisemane) wa August 15, 1922, se ile sa gopotša Bakriste ba tloditšwego bohlokwa bja  “go iša molaetša o gatišitšwego bathong ka mafolofolo le go bolela le bona mejakong ya bona, ba nea bohlatse bja gore mmušo wa magodimong o batametše.” Dithero tše nago le dintlha ka botlalo di be di le gona ka go Bulletin (yeo ga bjale e lego Tirelo ya Rena ya Mmušo). Lega go le bjalo, palo ya bao ba bego ba dira boboledi bja ntlo le ntlo e be e le e nyenyane mathomong. Ba bangwe ba ile ba bontšha go se rate. Ba ile ba rotoša dikganetšo tše di fapa-fapanego, eupša bothata bjo bogolo e be e le gore ba bangwe ba be ba bona go bolela ka ntlo le ntlo go ba theola seriti. Ge go gatelelwa tirelo ya tšhemo go be go oketšega, ba bantši ba ba bjalo ba ile ba tlogela go kopanela le mokgatlo wa Jehofa ganyenyane-ganyenyane.

7. Ka bo-1950, ke’ng seo go ilego gwa ba molaleng gore se be se nyakega?

⁷ Nywaga-someng e latetšego, modiro wa boboledi o ile wa gola kudu. Lega go le bjalo, go ile gwa ba molaleng gore go be go nyakega tlwaetšo e oketšegilego ya go dira bodiredi bja ntlo le ntlo. Ka mohlala, ela hloko boemo bja kua United States. Mathomong a bo-1950, 28 lekgolong ya Dihlatse tša nageng yeo di be di lekanetša modiro wa tšona wa boboledi ka go fo sepediša dipampišana tša taletšo goba go ema setarateng ka dimakasine. Tšeo di lego ka godimo ga 40 lekgolong di be di sa be gona ka mehla modirong wa boboledi, ba dumelela dikgwedi di feta ba sa nee bohlatse. Ke’ng seo se bego se ka dirwa bakeng sa go thuša Bakriste ka moka ba ineetšego gore ba dire boboledi ka ntlo le ntlo?

8, 9. Ke lenaneo lefe la tlwaetšo leo le ilego la thongwa ka 1953, gomme le bile le mafelelo afe?

⁸ Kopanong ya ditšhaba-tšhaba yeo e ilego ya swarelwa kua New York City ka 1953, go ile gwa lebišwa tlhokomelo e kgethegilego bodireding bja ntlo le ntlo. Ngwanabo rena Nathan H. Knorr o ile a tsebatša gore modiro o mogolo wa balebeledi ba Bakriste e swanetše go ba go thuša Hlatse e nngwe le e nngwe gore e be modiredi wa ka mehla wa go ya ka ntlo le ntlo. O itše: “Yo mongwe le yo mongwe o swanetše go kgona go bolela ditaba tše dibotse ka ntlo le ntlo.” Go ile gwa thongwa lenaneo la tlwaetšo la lefase ka bophara bakeng sa go fihlelela pakane ye. Bao ba bego ba se ba hlwa ba dira boboledi bja ntlo le ntlo ba ile ba newa tlwaetšo ya go lata batho magaeng a bona, ba boledišana le bona ka Beibele gotee le go araba dipotšišo tša bona.

⁹ Mafelelo a lenaneo le la tlwaetšo e ile ya ba a mabotse kudu. Ka nywaga e lesome, palo ya bagoeledi lefaseng ka bophara e ile ya oketšega ka 100 lekgolong, palo ya maeto a go boela yona ka 126 lekgolong, gomme palo ya dithuto tša Beibele ya oketšega ka 150 lekgolong. Lehono, bagoeledi ba Mmušo ba e nyakilego go ba ba dimilione tše šupago ba bolela ditaba tše dibotse lefaseng ka bophara. Koketšego ye yeo e kgahlišago ke bohlatse bjo bongwe bja tšhegofatšo ya Jehofa maitekong a batho ba gagwe bodireding bja ntlo le ntlo.—Jes. 60:22.

Go Swayela Batho Phologo

10, 11. (a) Ke pono efe yeo e ilego ya fiwa Hesekiele, bjalo ka ge e begilwe go Hesekiele kgaolo 9? (b) Pono yeo e phethagala bjang mehleng ya rena?

¹⁰ Bohlokwa bja bodiredi bja ntlo le ntlo bo ka bonwa ponong yeo e neilwego moporofeta Hesekiele. Ponong yeo, Hesekiele o bona banna ba tshelelago ba swere dibetša gomme wa bošupa yo a aperego leokodi a swere pitšana ya pilwana ya go ngwala ka lehlakoreng la gagwe. Monna wa bošupa o botšwa gore “yaa O putlê motse ka boxare” le gore “batho ba O ba hwetšaxo bà lla bà hlokofetše ka xo bôna makxapha a a dirwaxó, O ba swayê leswaô diphatleng.” Ka morago ga modiro woo wa go swaya, banna ba tshelelago ba swerego dibetša tše di bolayago ba botšwa gore ba bolaye bohle bao ba se nago leswao.—Bala Hesekiele 9:1-6.

¹¹ Re a tseba gore phethagalong ya boporofeta bjo, monna yo a “aperexo leokodi” o swantšhetša mašaledi a Bakriste ba tloditšwego ka moya. Ka go diriša modiro wa boboledi le wa go dira barutiwa, sehlopha sa batlotšwa se bea leswao  la seswantšhetšo go bao ba fetogago karolo ya “dinku tše dingwe” tša Kriste. (Joh. 10:16) Leswao leo ke eng? Ke bohlatse, bjo e kego bo bonagala diphatleng tša bona tšeo di sego tša bipša ka selo, bja gore dinku tše bjalo ke barutiwa ba Jesu Kriste bao ba ineetšego le go kolobetšwa le gore ba apere motho yo mofsa yo a swanago le Kriste. (Baef. 4:20-24) Batho ba bao ba swanago le dinku ba ba mohlape o tee le Bakriste ba tloditšwego e bile ba ba thuša modirong wa bona o mogolo wa go swaya batho ba bangwe.—Kut. 22:17.

12. Pono ya Hesekiele ya mabapi le go swaya batho diphatleng e gatelela bjang bohlokwa bja go tšwela pele re tsoma bao ba swanago le dinku?

¹² Pono ya Hesekiele e gatelela lebaka le lengwe leo ka lona go tsoma ga rena ka mo go tšwelago pele batho bao “bà [llago] bà hlokofetše” e lego mo go akgofilego kudu. Go akaretša maphelo. Go se go ye kae, madira a Jehofa a legodimong a phedišo, ao a swantšhetšwago ke banna ba tshelelago, a tla fediša bao ba se nago leswao la seswantšhetšo. Paulo o ngwadile mabapi le kahlolo e tlago gore Morena Jesu, a e-na le “barongwa ba gagwe ba matla,” o tla tliša “tefetšo go bao ba sa tsebego Modimo le bao ba sa kwego ditaba tše dibotse mabapi le Morena wa rena Jesu.” (2 Bathes. 1:7, 8) Ela hloko gore batho ba tla ahlolwa go ya ka karabelo ya bona ditabeng tše dibotse. Ka baka leo, boboledi bja molaetša wa Modimo bo swanetše go tšwela pele bo sa kgaotše go ba go fihla bofelong. (Kut. 14:6, 7) Se se dira gore bahlanka ba Jehofa bao ba ineetšego ba be le boikarabelo bjo bogolo kudu.—Bala Hesekiele 3:17-19.

13. (a) Moapostola Paulo o ile a ikwa a e-na le boikarabelo bofe, gona ka baka la’ng? (b) Ke boikarabelo bofe bjoo o ikwago o e-na le bjona bathong ba lego tšhemong ya gabo lena?

¹³ Moapostola Paulo o be a bona e le boikarabelo bja gagwe go botša ba bangwe ditaba tše dibotse. O ngwadile gore: “Ke na le molato go Bagerika gotee le go Babarebare, go ba bohlale gotee le go ba go hloka tlhaologanyo: ka go re’alo ke na le phišego ya go bolela ditaba tše dibotse le go lena moo Roma.” (Baroma 1:14, 15) Ka go leboga kgaugelo yeo a bego a e bontšhitšwe, Paulo o ile a ikwa a gapeletšega go leka go thuša ba bangwe gore ba holwe ke botho bja Modimo go fo swana le yena. (1 Tim. 1:12-16) Go be go le bjalo ka ge eka o be a kolota motho yo mongwe le yo mongwe yo a bego a kopana le yena, sekoloto seo se bego se ka lefša feela ka go bolela ditaba tše dibotse le motho yoo. Na o ikwa o e-na le sekoloto se bjalo bathong ba lego tšhemong ya gabo lena?—Bala Ditiro 20:26, 27.

14. Lebaka la rena le legolo la go dira boboledi phatlalatša le ka ntlo le ntlo ke lefe?

¹⁴ Gaešita le ge go phološa maphelo a batho go le bohlokwa, go na le lebaka le lengwe le legolo la go dira boboledi ka ntlo le ntlo. Boporofeteng bjo bo begilwego go Maleaki 1:11 (PK), Jehofa o tsebatša gore: “Go tloga bohlabela go iša bodikela, leina la-ka le tlo godišwa gare ga ditšhaba, gomme leina la-ka . . . le tlo tlišetšwa dineo tša dijo tše di sekilego; gobane leina la-ka ke le legolo gare ga ditšhaba.” Phethagatšong ya boporofeta bjo, bahlanka ba Jehofa bao ba ineetšego ba reta leina la gagwe phatlalatša lefaseng ka moka ge ba dutše ba phetha bodiredi bja bona ka boikokobetšo. (Ps. 109:30; Mat. 24:14) Go direla Jehofa “sehlabelo sa tumišo” ke lebaka la rena le legolo la go dira boboledi phatlalatša le ka ntlo le ntlo.—Baheb. 13:15.

Ditiragalo tše Dikgolo di Letše ka Pele

15. (a) Baisiraele ba ile ba godiša modiro wa bona bjang ge ba be ba dikologa Jeriko ba gwanta matšatši a šupago? (b) Se se bontšha’ng ka modiro wa boboledi?

¹⁵ Ke ditiragalo dife tšeo di letšego ka pele bakeng sa modiro wa boboledi? Thakelelo ya Jeriko, yeo e begilwego pukung ya Jošua, e bontšha mohlala wa se. Gopola gore pejana ga ge Jehofa a fediša  Jeriko, Baisiraele ba ile ba laelwa gore ba dikologe motse woo gatee ka letšatši ba gwanta ka matšatši a tshelelago. Lega go le bjalo, letšatšing la bošupa modiro wa bona o be o swanetše go gola ka tsela e kgethegilego. Jehofa o ile a botša Jošua gore: “Motse wó Le o dikoloxê xa-šupa, ’me baperisita ba tšamê bà letša dinaka. E tlo re xe ba letša naka ya moxobo, . . . xôna sethšaba ka moka se thšêlê lehowa le lexolo. Ké mo merakô ya motse e tl’o xo phušoxa.” (Još. 6:2-5) Go na le kgonagalo ya gore go be le kgolo e swanago modirong wa rena wa boboledi. Ka ntle le pelaelo, nakong ya phedišo ya tshepedišo ya gona bjale ya dilo, re tla ba re bone go newa bohlatse mo gogolo kudu leineng la Modimo gotee le Mmušo wa gagwe historing ya lefase le.

16, 17. (a) Ke’ng seo se tlago go fihlelelwa pele go fela “masetlapelo a magolo”? (b) Re tlo ahla-ahla’ng sehlogong se se latelago?

¹⁶ Go ka tla nako yeo ka yona molaetša woo re o tsebatšago o tlago go ba bjalo ka “lehowa le lexolo.” Ka pukung ya Kutollo, melaetša e matla ya kahlolo e swantšhwa le “sefako se segolo seo lefsika le lengwe le le lengwe la sona e lego la boima bjo e ka bago bja talente.” * Le gona Kutollo 16:21 e re: “Kotlo ya sona e be e le e kgolo ka mo go sa tlwaelegago.” Re sa letetše go tlo bona tema yeo e tlago go kgathwa ke bodiredi bja ntlo le ntlo ya go goeletša melaetša ya mafelelo ya dikahlolo tša Modimo. Eupša re ka kgodišega gore pele ga ge “masetlapelo a magolo” a fela, leina la Jehofa le tla ba le tsebaditšwe go feta le ge e le neng pele historing ya batho.—Kut. 7:14; Hesek. 38:23.

¹⁷ Ge re dutše re letetše ditiragalo tše dikgolo kudu tšeo di letšego ka pele, anke re tšweleng pele re tsebatša ditaba tše dibotse tša Mmušo ka mafolofolo. Ge re phethagatša kabelo yeo, ke ditlhohlo dife tšeo re di hwetšago bodireding bja ntlo le ntlo, le gona re ka lebeletšana le tšona bjang? Dipotšišo tše di tla ahla-ahlwa sehlogong se se latelago.

[Mengwalo ya tlase]

O be o tla Araba Bjang?

• Go bolela ka ntlo le ntlo go na le motheo ofe wa Mangwalo?

• Boboledi bja ntlo le ntlo bo ile bja gatelelwa bjang mo mehleng yeno?

• Ke ka baka la’ng bahlanka ba Jehofa ba ineetšego ba e-na le boikarabelo bja go dira boboledi?

• Ke ditiragalo dife tše dikgolo tšeo di letšego ka pele?

[Dipotšišo tša Thuto]

[Diswantšho go letlakala 4]

Go swana le moapostola Paulo, na o ikwa o e-na le boikarabelo bja go dira boboledi go ba bangwe?

[Seswantšho go letlakala 5]

Ngwanabo rena Knorr, 1953