Go Aloga ga Sehlopha sa Gilead sa Bo-123

Dialoga tša Gilead di Kgothaletšwa go “Thoma go Epa”

KA Mokibelo, September 8, 2007, lešaba la batho ba 6 352 ba tšwago dinageng tše 41 le be le le gona ge go be go aloga sehlopha sa bo-123 sa Sekolo sa Beibele sa Watchtower sa Gilead. Ka 10:00 mesong, modula-setulo wa lenaneo, Anthony Morris wa Sehlopha se Bušago, o ile a amogela batheetši. Ka morago ga mantšu a sego kae a matseno, o ile a rola seboledi sa mathomo, Gary Breaux wa Komiti ya Lekala ya United States.

Ngwanabo rena Breaux o kgonthišeditše barutwana gore go sa šetšwe ponagalo ya bona, bao ba dirago thato ya Jehofa ke ba babotse mahlong a Gagwe. (Jer. 13:11) O kgothaleditše dialoga gore di dule e le tše dibotse ka tsela yeo. Se se latelago, Gerrit Lösch wa Sehlopha se Bušago o gateletše gore ke mo go swanetšego go holofela moputso ge re hlankela Jehofa. (Baheb. 11:6) Lega go le bjalo, boikemišetšo bja rena e swanetše go ba lerato le se nago boithati.

Molebeledi wa Lefapha la Dikolo tša Pušo ya Modimo, William Samuelson, o latetše ka go kgothaletša dialoga go kgomarela kabelo e nago le seriti ya go tsebatša Kgoši e bušago le go bonagatša seriti sa tšona ka boitshwaro bja tšona bjo bobotse. * Sam Roberson, mothuši wa molebeledi wa Lefapha la Dikolo tša Pušo ya Modimo, o kgothaleditše dialoga go dula di lebelela dika tše dibotse go ba bangwe. Ke moka dialoga di be di tla kgona go “[rata] mokgatlo wohle wa bana babo rena.”—1 Pet. 2:17.

Ka morago ga dipolelo tšeo tše di tutuetšago, mofahloši wa Gilead e lego Mark Noumair o ile a boledišana le dialoga tše mmalwa tšeo di ilego tša anega diphihlelo tše di bilego le tšona tirelong ya tšhemo nakong ya thuto ya Gilead. Batheetši ka moka ba ile ba bona gore dialoga tše di be di tloga di rata bodiredi e bile di kganyoga go thuša batho. Kent Fischer wa Ofising ya Bethele ya Patterson ke moka o ile a boledišana le ditho tša Komiti ya Lekala tše tšwago dinageng tše tharo tšeo go tšona go nago le baromiwa. Mantšu a bana ba babo rena a ile a kgonthišetša batheetši, bao ba bego ba akaretša ba bantši ba batswadi ba dialoga, gore baromiwa ba bafsa ba hlokomelwa gabotse dikabelong tša bona. Izak Marais wa Lefapha la Tirelo ya tša Bofetoledi o ile a latela ka go boledišana le bao e lego kgale e le baromiwa, bao diphihlelo tša bona di filego dialoga tatso ya lethabo leo ba tlago go le hwetša.

Polelo ya thwadi ya lenaneo, yeo e neilwego ke Geoffrey Jackson wa Sehlopha se Bušago, e be e le ya sehlogo se se rego “Ka Morago ga Tšohle tše o di Kwelego—O tla Dira’ng?” Ngwanabo rena Jackson, yo a hlanketšego bjalo ka moromiwa nywaga e nyakilego go ba e 25 kua Pacific Borwa, o ile a ahla-ahla mafetšo a Thuto ya Thabeng. Polelong yeo, Jesu o boletše ka banna ba babedi, yo mongwe a e-na le temogo gomme yo mongwe e le lešilo, bao ba ilego ba aga nywako. Seboledi se  bontšhitše gore nywako yeo e ka no ba e be e le lefelong letee. Lega go le bjalo, monna wa lešilo o ile a fo o aga lebatong, santeng, mola yo a nago le temogo yena a ile a epa a iša tlase go fihlela a hwetša lefsika la motheo leo a bego a tla thoma go aga go lona. Ge ledimo le lešoro le e-tla, ngwako wo o agilwego lefsikeng o ile wa ema o tiile eupša wo o agilwego santeng o ile wa buragana.—Mat. 7:24-27; Luka 6:48.

Jesu o hlalositše gore monna wa lešilo o swantšhetša bao ba ilego ba fo theetša dithuto tša Jesu eupša ba se di diriše. Monna yo bohlale o be a le bjalo ka bao ba theetšago le go diriša mantšu a Jesu. Ngwanabo rena Jackson o boditše dialoga gore, “Ge tšhemong ya lena ya boromiwa le diriša seo le ithutilego sona thutong ya Beibele, le tla ba bjalo ka monna yo a nago le temogo.” Ka gona ge a ruma, o kgothaleditše dialoga go “thoma go epa” dikabelong tša tšona tša boromiwa.

Mafelelong, dialoga di ile tša amogela di-diploma tša tšona le dikabelo, gomme Ngwanabo rena Morris o ile a nea ditemošo tša mafelelo. O kgothaleditše dialoga go dula di latela Jesu le go se tsoge di paletšwe ke go ithekga ka Jehofa gore a di nee matla. Ka go rialo, lenaneo la go aloga le ile la phethwa.

[Mongwalo wa tlase]

[Lepokisi go letlakala 31]

DIPALO-PALO TŠA SEHLOPHA

Palo ya dinaga tše di emetšwego: 10

Palo ya dinaga tšeo ba abetšwego go tšona: 24

Palo ya barutwana: 56

Palo-gare ya nywaga: 33,5

Palo-gare ya nywaga therešong: 17,9

Palo-gare ya nywaga bodireding bja nako e tletšego: 13,8

[Seswantšho go letlakala 32]

Sehlopha se se Alogago sa bo-123 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya go le letona mothalading o mongwe le o mongwe.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton,J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.