Keresemose—E Sekametše Kae?

NYWAGA e lesome e fetilego ka kgwedi ye, makasine wa U.S.News & World Report o ile wa ngwala pego e nago le sehlogo se se rego, “Go Tsoma Keresemose.” Sehlogo seo se be se lebiša tlhokomelo tabeng ya ge e ba Keresemose e be e e-ba e “sekilego, e sa senyego tšhelete.” Na Keresemose ke e sekilego, e sa senyego tšhelete?

Sehlogo seo se re thušitše go kwešiša lebaka leo ka lona re sa swanelago go letela gore go be bjalo. Se bontšhitše gore: “Ga go na pego e bontšhago go ketekwa ga letšatši la go belegwa ga Jesu ka molao go ba go fihla lekgolong la bone la nywaga ge Constantine . . . e be e le Mmušiši wa Roma.” Seo se ile sa bontšha “bonyenyane bohlatse bja gore ga go na yo a tsebago ka kgonthe gore Jesu o belegwe neng.” Sehlogo se ile sa dumela gore, “ga go na mo diebangedi di bolelago ka ngwaga, kgwedi goba letšatši.” Go ya ka setsebi sa histori sa Yunibesithi ya Texas, “Bakriste ba pele ba be ba sa keteke Matswalo a Jesu.”

Ka tlase ga sehlogwana se se rego “Taba ya Boikgopolelo,” sehlogo se se ile sa ahla-ahla “kamoo kereke e kgethilego December 25.” Se hlalositše gore: “Kgopolo yeo e amogetšwego ke ba bantši ke ya gore letšatši la maikhutšo le kgethilwe ka boomo bakeng sa go dira gore Saturnalia le menyanya e mengwe ya boheitene e dirwe ya “Bokriste.” “Ka go kgetha gore Keresemose e be mafelelong a December, nakong yeo batho ba bego ba šetše ba tlwaetše go keteka ka yona, baetapele ba kereke ba be ba kgonthišetša gore matswalo a Mophološi a tla ketekwa ke batho ba bantši.” Bogareng bja lekgolo la bo-19 la nywaga, tlhokomelo e ile ya thoma go lebišwa mokgweng wa go rekelana le go fana dimpho. “Mokgwa o mofsa wa go keteka Keresemose ka go rekelana dimpho o ile wa tliša lehumo la ka pela gomme borakgwebo le babapatši ba ile ba thoma go bapatša sehla sa Keresemose.”

Ka gona, ga go na lebaka la gore re letele gore Keresemose e dumelelane le Bokriste bjo bo sekilego. Le ge Keresemose ya mehleng yeno e tletše ka “kgwebo ya bompogeng, e se nago mohola,” taba-taba ke gore Bakriste ba therešo ga se ba ka ba letela go keteka matswalo a Jesu. Go e na le moo, Beibele e lebiša tlhokomelo topollong yeo Kriste a e lefilego ka go hwa le go tsošetšwa ga gagwe legodimong. (Mateo 20:28) Seo e tla dula e le sa bohlokwa kudu dinakong ka moka tše di tlago.