Go Belegwa ga Jesu—Kamoo go Tlišago Khutšo

GE POLELWANA “khutšo bathong bao a ba amogelago,” e be e tsebatšwa, e be e se yona feela yeo e tswalanego le boporofeta bja go belegwa ga Jesu. Go tlaleletša go seo barongwa ba se tsebišitšego badiši ba maketšego, baromiwa ba legodimo ba ile ba dira tsebišo e buduletšwego mabapi le Jesu, e lego lesea la Maria le monna wa gagwe Josefa. Go ela hloko melaetša ye go tla re thuša go ba le kwešišo e oketšegilego mabapi le pego ya go belegwa ga Jesu le go kwešiša bohlokwa bja kgonthe kholofetšong ya barongwa ya gore batho ba tla ba le khutšo.

Pele ga ge Jesu a ka belegwa, le pele ga ge a ka ingwa, Maria o ile a etelwa ke morongwa yo Beibele e rego ke Gabriele. Morongwa o mo dumedišitše ka gore: “Dumela, wena yo a ratilwego kudu, Jehofa o na le wena.” Ka ge o ka bona, seo se ile sa makatša Maria kudu, mohlomongwe o be a bile a tšhogile ganyenyane. Ditumedišo tše bjalo di ra go reng?

Gabriele o hlalositše gore: “Bona! o tla ima popelong ya gago gomme wa belega morwa, leina la gagwe o mmitše Jesu. Yo e tla ba yo mogolo gomme o tla bitšwa Morwa wa Yo Godimo-dimo; Jehofa Modimo o tla mo nea sedulo sa bogoši sa Dafida tatagwe.” Maria o ile a botšiša gore se se tla kgonega bjang ka ge yena e le kgarebe, a sa tsebe monna. Gabriele o hlalositše gore ngwana o be a tla fetišetšwa ka popelong ka thušo ya moya o mokgethwa wa Modimo. Yo e be e ka se be ngwana yo a tlwaelegilego.—Luka 1:28-35.

Kgoši Yeo go Boletšwego ka Yona e sa le Pele

Mantšu a Gabriele a swanetše go ba a thušitše Maria go kwešiša gore ngwana yo a bego a tla mo ima o be a tswalana le boporofeta bja bogologolo. Tsebišo ya gore Jehofa o be a tla nea morwa wa Maria “sedulo sa bogoši sa Dafida tatagwe” e be e tla dira gore Maria—gotee le Mojuda yo mongwe le yo mongwe yo a tlwaelanego le Mangwalo—a gopole kholofetšo yeo Modimo a e dirilego go Kgoši Dafida wa Isiraele.

A diriša moporofeta Nathane, Jehofa o boditše Dafida gore: “Ngwakô wa xaxo wôna o tlo tia, le mmušô wa xaxo ké wa neng le neng ò e-ya; sedulô sa xaxo sa boxoši se tlo ba xôna ka mehla le mehla.” (2 Samuele 7:4, 16) Jehofa o boletše mabapi le Dafida gore: “Peu y’axwe ke tlo e lôtôlôla neng le neng; ’dulô s’axwe se tlo dula sè le xôna bo-ka mehla ya leratadima. Peu y’axwe ké ya neng le neng; sedulô s’axwe sa boxoši se pele xa-ka byalo ka letšatši.” (Psalme 89:20, 29, 35, 36) Ka gona, e be e le ka morero ge Maria a tšweletše lelokong la Dafida, bjalo ka ge Josefa le yena e le wa leloko leo.

E be e se diporofeto tše feela tše di hwetšwago ka Mangwalong a Seheberu tšeo di bolelago ka morwa wa bogoši wa Dafida. Maria le yena o swanetše go ba a be a tlwaelane le boporofeta bja Jesaya bjo bo rego: “Xobane re tswaletšwe ngwana, re neilwe morwa, yo pušô e lexo lexetleng la xaxwe. Leina la xaxwe ké: Matete, Moeletši, Modimo yo matla, Tatê wa xo sa felexo, Kxoši ya kaxišô. Mmušô wó ké wa kênêlô, wa khutšô ye e sa felexo mo sedulong sa Dafida le mmušong wa xaxwe, ké wa xo tlo tia, le wa xo thêkxwa ka molaô le ka tokô byale le mehleng ya neng le neng. Tšeo di tlo dirwa ke xo pelofala xa Morêna wa mašaba.”—Jesaya 9:5, 6.

Lega go le bjalo, molaetša wo Gabriele a o boditšego Maria o be o feta go belegwa ka mohlolo  ga morwa wa lesea. Morwa wa gagwe e be e tla ba mojabohwa wa bogoši bja Kgoši Dafida—mojabohwa wa sa ruri, Mmušong wo o hlomilwego ke Modimo. Boporofeta bja Gabriele mabapi le karolo yeo e bego e tla phethwa ke Jesu nakong e tlago, ke bja bohlokwa bjo bogolo go rena bohle.

Ge Josefa a lemoga gore mmeeletšwa wa gagwe o imile, o ile a dira phetho ya go mo tlogela. O be a tseba gore ngwana ga se wa gagwe ka gobane yena le mmeeletšwa wa gagwe ba be ba se ba ka ba ba le dikopano tša botona le botshadi. O ka nagana gore go ka ba go be go le thata gakaakang go Josefa go dumela seo Maria a bego a mo hlalosetša sona mabapi le go ima ga gagwe. Dipego tša Ebangedi di hlalosa gore: “Morongwa wa Jehofa a tšwelela go yena ka toro, a re: ‘Josefa, morwa wa Dafida, o se tšhabe go iša Maria mosadi wa gago gae, gobane seo a se imilego ke ka moya o mokgethwa. Yena o tla belega morwa, gomme leina la gagwe o mmitše Jesu, gobane o tla phološa batho ba gabo dibeng tša bona.’”—Mateo 1:20, 21.

Beibele ga e bolele gore ke go fihla bokgoleng bofe moo Josefa a bego a kwešiša kamoo ngwana a bego a tla “phološa batho ba gabo dibeng tša bona.” Lega go le bjalo, molaetša wo o be o lekane go kgonthišetša Josefa gore mosadi yo a imilego o be a se a dira sebe. O ile a dira ka mo morongwa a mo laetšego ka gona gomme o ile a iša Maria gae, e lego mogato woo o swanago le lenyalo.

Ka thušo ya tsebišo yeo e hwetšwago Mangwalong a mangwe, re kgona go kwešiša seo se bego se bolelwa ke morongwa. Mathomong a histori ya motho morongwa wa lerabele o ile a hlohla bobuši bja Jehofa. Mangwalo a Seheberu a bontšha gore gare ga tše dingwe, lerabele le ile la bolela gore tsela ya Modimo ya go buša ga se ya toka le gore ga go na motho yo a bego a ka botegela Jehofa ge a lekwa. (Genesi 3:2-5; Jobo 1:6-12) Adama o paletšwe ke go botega. Ka baka la sebe sa gagwe, batho bohle ba abela sebe gomme ditla-morago tša sona ke lehu. (Baroma 5:12; 6:23) Lega go le bjalo, Jesu o belegwe a se na sebe ka baka la gore ga se a belegwa ke tate wa  motho wa nama. Ka go neela bophelo bja gagwe bjo bo phethagetšego bja lefaseng e le topollo e lekanago tlwaa le bophelo bjo Adama a bo lahlilego, Jesu o ile a kgona go phološa batho dibeng tša bona le go ba nea kholofelo ya bophelo bjo bo sa felego.—1 Timotheo 2:3-6; Tito 3:6, 7; 1 Johane 2:25.

Nakong ya bodiredi bja gagwe bja lefaseng, Jesu o ile a bontšha seo go fedišwa ga ditla-morago tša sebe go tla se direlago batho nakong e tlago. O ile a fodiša batho bao ba swerwego ke mehuta ka moka ya malwetši gomme o ile a ba a tsoša bahu. (Mateo 4:23; Johane 11:1-44) Mehlolo yeo e be e le pontšho ya seo a tlago go se dira nakong e tlago. Jesu ka boyena o boletše gore: “Nako e a tla yeo ka yona bohle bao ba lego mabitleng a kgopotšo ba tlago go kwa lentšu [la-ka] gomme ba tšwa.”—Johane 5:28, 29.

Kholofetšo yeo ya tsogo ya nakong e tlago e bontšha kamoo go belegwa ga Jesu—le lehu la gagwe ka mo go kgethegilego—e lego tša bohlokwa bjo bogolo go rena. Johane 3:17 e bolela gore Modimo o rometše Morwa wa gagwe lefaseng “gore lefase le phološwe ka yena.” Ditaba tše tše di kgahlišago di re gopotša tsebišo yeo e boditšwego badiši bao ba bego ba letile mehlape ya bona bošegong bjo Jesu a belegwego ka bjona.

“Ditaba tše Dibotse tša Lethabo le Legolo”

E be e tloga e le “ditaba tše dibotse tša lethabo le legolo” molokong wa batho ge barongwa ba tsebatša go belegwa ga “Mophološi, yo e lego Kriste Morena.” (Luka 2:10, 11) Ngwana yo e be e tla ba Mesia, Moporofeta yo mogolo le Mmuši yo batho ba Modimo ba bego ba mo letetše ka nako e telele. (Doiteronomio 18:18; Mika 5:1) Bophelo bja gagwe bja lefaseng le lehu di be di tla phetha karolo e kgolo go phagamišeng bogoši bja Jehofa bja legohle, e le gore barongwa ba tle ba re: “Letago a le ye go Modimo magodimo-dimong.”—Luka 2:14.

Jesu yo Beibele e mmitšago “Adama wa mafelelo,” o ile a bontšha gore go a kgonega gore le ge motho a le ka tlase ga teko e šoro a ka botegela Jehofa. (1 Bakorinthe 15:45) O ile a hlatsela gore Sathane ke moaketši yo mobe. Se ke seo se bakilego gore barongwa ba botegago ba legodimong ba thabe.

Ka gona a re boele potšišong e rego, “Na go na le kholofelo e kwagalago e bontšhago gore tsebišo yeo e dirilwego ke morongwa bošegong bjo Jesu a belegwego ka bjona e tla ka ya phethagatšwa?” Karabo ke ee, e kwagalago! Khutšo ke selo sa bohlokwa phethagatšong ya morero wa Modimo ka lefase, woo o akaretšago go tsošološwa ga maemo a paradeise. Ge seo se phethagaditšwe lefaseng ka bophara, batho bohle ba tla tutuetšwa ke lerato le potego. Ka gona, go phethagatšwa ga morero wa Jehofa, go bolela go fedišwa ga batho bohle bao ba ganetšago bogoši bja gagwe. Tše ga se ditaba tše dibotse go mang le mang yo a thekgago Sathane dipolelong tša gagwe tša gore ditekanyetšo tša Jehofa ga se tša loka. Go bona bao, di bolela phedišo.—Psalme 37:11; Diema 2:21, 22.

Hle ela hloko gore barongwa ga se ba botša badiši gore batho bohle ba tla ba le khutšo le kamogelo. Go e na le moo, ba boletše ka “khutšo bathong bao a ba amogelago.” Seo se bolela gore, bathong bao Modimo a ba amogelago. Bao ba nago le tumelo go Jehofa e le ka kgonthe ba fetoga balatedi ba botegago le baekiši ba Jesu. Banna le basadi ba bjalo ba ikemišeditše go nea ka diatla tše di bulegilego le go naganela ba bangwe, e sego ka matšatši a sego kae feela ngwageng eupša matšatši ka moka.

Na Moya wa Bokriste o ka ba Gona Ngwaga ka Moka?

Matla a ditaba tše dibotse tšeo Jesu a bego a di ruta a fetotše maphelo a batho ba bantši. Ba bantši ba diriša melao ya motheo ya Bokriste dikarolong ka moka tša maphelo a bona. Batho bao pele ba bego ba e-na le boithati ba thomile go ipotšiša gore ke eng seo Jesu a ka bego a se dirile ge nkabe a be a le boemong bja bona. Ba bangwe bao ba bego ba theile maphelo a bona dithotong tša bona le maipshinong, ba ile ba lemoga bohlokwa bja dilo tša moya le go boledišana le baagišani ba bona ka tšona. Batho bao ba dirago dilo tše ba katanela go nea ka seatla se se bulegilego le go ba ba botho ngwaga ka  moka. Na ga se seo o se letetšego go Bakriste ba therešo?

Ge e ba batho bohle ba botegago ba be ba ka ema go se nene gomme ba naganišiša ka seo se bolelwago ke molaetša wa barongwa wa khutšo le bohlokwa bja molaetša woo gotee le go šoma ka go dumelelana le seo o se bolelago, ka kgonthe lefase e be e ka ba le le kaone.

Diporofeto tšeo di lego mabapi le go belegwa ga Jesu di kgonthišetša bao ba amogelwago ke Modimo gore ba ka thabela khutšo ya kgonthe ka mo go sa felego. Na se ke seo o se kganyogago? Re ka kgodišega gore diporofeto tše di kgahlišago tša khutšo tšeo di tsebaditšwego ke barongwa mabapi le go belegwa ga Jesu di tla phethagala e le ka kgonthe. Go e na le gore e be polelo e se nago mohola nakong ya Keresemose, khutšo e tla ba selo sa kgonthe sa ka mehla.

[Ntlhakgolo go letlakala 7]

Moya wa Bokriste o ka bonagatšwa ngwaga ka moka e bile o swanetše go bonagatšwa ngwaga ka moka