Phihlelo

Jehofa o Šegofaditše Kudu Kganyogo Ya-ka Ya go ba Moromiwa

KA GE GO ANEGA SHEILA WINFIELD DA CONCEIÇÃO

Moromiwa yo a bego a re etetše a e-tšwa Afrika o kile a re botša gore mo a abetšwego gona batho ba mo kgopela gore a tsene ka gae gomme ba theetša ditaba tše dibotse tša Mmušo wa Modimo ka kelohloko. Ke ile ka bolelela ka pelong gore, ‘Nka thabela kudu go šoma tšhemong e bjalo!’ Ka nako yeo ke be ke e-na le nywaga e 13 gomme poledišano yeo e ile ya bjala ka go nna kganyogo ya go ba moromiwa.

LEGA go le bjalo, lapa lešo le thomile go ithuta ka Jehofa pele ga moo. Mesong e mengwe ka 1939 kua toropong ya Hemel Hempstead, ka ntlenyana ga Greater London, kua Engelane, masogana a mabedi ao a bego a apere gabotse a ile a kokota mojakong ga gešo. E be e le Dihlatse tša Jehofa. Ke belegwe ngwaga pele ga moo, ka gona ga ke gopole ketelo yeo. E le ge a a raka, mma o ile a a botša gore tate a ka no thabela molaetša wa ona eupša a ka se ke a boa gae pele ga 9:00 mantšiboa. O be a maketše gakaakang ge masogana ao a boa bošegong bjoo! Ka morago ga ge a kgonthišegile ka boemo bja ona ditabeng tša dipolitiki le tša borata-naga, tate e lego Henry Winfield, o ile a a botša gore a tsene ka ntlong gomme a amogela thuto ya Beibele. O ile a dira tšwelopele ka lebelo, a ba a kolobetšwa. Ka morago ga nywaga e itšego, mma e lego Kathleen, o ile a thoma go ithuta Beibele. O ile a kolobetšwa ka 1946.

Ka 1948, ke ile ka thoma go tšea karolo ka mehla modirong wa go bolela ka ditaba tše dibotse tša Mmušo wa Modimo. Ke ile ka bona ke swanetše go hwetša sešupanako gore ke kgone go bega ka go nepa nako yeo ke e feditšego ke le bodireding. Ge e ba re be re itshwere gabotse, ka Mokibelo o mongwe le o mongwe rena bana re be re fiwa sixpence (tšhelete ya tšhipi ya go kgomagana yeo e lekanago le disente tše tshela) bakeng sa gore re kgone go  ithekela dilo tšeo re di nyakago. Ke ile ka boloka disente tša-ka tše tshela mo e ka bago ka nywaga e mebedi e le gore ke kgone go reka sešupanako sa go se bitše tšhelete e ntši kudu seo se bego se hwetšagala ka nako yeo. Lega go le bjalo, Ray, yo monyenyane go dikgaetšedi tša-ka tše pedi, ka mehla o be a kgopela gore tate a mo nee di-threepence tše pedi (tšhelete ya tšhipi ya go kgomagana yeo e lekanago le disente tše tharo), e sego sixpence e tee. Ka letšatši le lengwe o ile a gapeletša gore a newe di-threepence tše pedi moo e lego gore tate o ile a ba a galefa. Ray o ile a thoma go lla gomme a re o nyaka di-threepence tše pedi ka baka la keno yeo a bego a e dirile le Jehofa. Mafelelong, Ray o ile a hlalosa gore: “Threepence e tee e ya ka lepokising la meneelo, gomme e nngwe ke ya-ka.” Mma o ile a lla ka lethabo, tate kapejana o ile a mo nea tšona, gomme ke ile ka ithuta bohlokwa bja go thekga modiro wa Mmušo ka ditšhelete.

Dinakong tšona tšeo, tate o ile a dira dithulaganyo tša gore re hudugele moo go bego go nyakega bagoeledi ba bantši ba Mmušo. Ka 1949 o ile a rekiša polase ya gagwe le melete yeo santa le lekgwara di bego di epša go yona gomme a thoma go bula madibogo, e lego go hlankela e le modiredi wa nako e tletšego wa Dihlatse tša Jehofa. Ke kolobeditšwe ka September 24, 1950, e le go bontšha boineelo bja-ka go Jehofa. Go tloga ka nako yeo go ya pele, ge dikolo di be di tswaletšwe ke be ke ingwadiša ke le mmulamadibogo wa nakwana (ga bjale wa go thuša), ke fetša diiri tše 100 ka kgwedi ke le bodireding. Eupša seo e be e le feela mathomo-mayo. Kapejana kganyogo e matla ya go tšwetša pele borapedi bjo bo sekilego e ile ya gola ka pelong ya-ka.

Kganyogo Ya-ka ya go ba Moromiwa

Ka 1951, tate o ile a abelwa go ya Bideford, ka Leboa la Devon. Nakwana ka morago ga ge re fihlile moo, phuthego ya gabo rena e ile ya etelwa ke moromiwa yo a bego a hlankela Afrika, ka ge go bontšhitšwe kua mathomong. Ka morago ga moo, kganyogo ya-ka ya go ba moromiwa e ile ya tutuetša diphetho tša-ka ka moka. Barutiši sekolong ba ile ba tseba ka pakane ya-ka gomme ba ile ba dira sohle seo ba ka se kgonago go ntšhitiša, ba nyaka gore ke phegelele mešomo ya boiphedišo ya lefase. Lega go le bjalo, letšatšing la-ka la mafelelo sekolong ge ke be ke e-ya ka phapošing ya barutiši bakeng sa gore ke ba leboge le go ba laela, yo mongwe wa bona o ile a re: “Re a go lebogiša! O morutwana a nnoši yo a tlogago a tseba seo a se nyakago bophelong. Re holofela gore o tla fihlelela pakane ya gago.”

Ka ntle le go senya nako ke ile ka hwetša mošomo wa ka thoko, gomme ka December 1, 1955, ke ile ka ba mmulamadibogo wa ka mehla. Ka morago, mma le dikgaetšedi tša-ka le bona ba ile ba ba babulamadibogo. Ka gona ka nywaga e sego kae, lapa lešo ka moka le be le le tirelong ya nako e tletšego.

Go ya Ireland

Ka morago ga ngwaga, ke ile ka amogela taletšo ya go hlankela Ireland. Wo e ile ya ba mogato wo o lebišago pakaneng ya-ka ya go ba moromiwa. Ke gorogile Cork ka borwa bja Ireland ka February 1957, ke e-na le bafsa ba bangwe ba babedi ba babulamadibogo, June Napier le Beryl Barker.

Tirelo ya tšhemo kua Ireland e be e le thata. Go be go e-na le kganetšo e kgolo go tšwa Kerekeng ya Roma Katholika. Re ile ra ithuta go kgonthišetša  gore go be go e-ba le tsela ya go phonyokga go tšwa ka moagong goba dintlong, ge e ba re be re swanetše go tšwa re tšhaba. Re be re tlwaetše go uta dipaesekela tša rena kgole, eupša gantši di be di hwetšwa ke motho yo a bego a sega dithaere goba a ntšha maotwana moya.

Ka nako e nngwe, ge nna le Beryl re be re etetše batho ba dulago ka dintlong tše dikgolo, sehlopha sa bana se ile sa thoma go re roga le go re foša ka mafsika. Ka gona re ile ra tsena ka lebenkeleng leo go lona go rekišwago mafsi le le bapilego le ntlo ya motho yo mongwe. Sehlopha sa batho se ile sa thoma go kgobokana ka ntle. Ka ge Beryl a rata mafsi, o ile a nwa digalase tše pedi go iša go tše tharo tša mafsi ka go iketla a holofetše gore sehlopha seo se tla phatlalala. Ga se sa ka sa phatlalala. Ke moka moruti wa lesogana o ile a tsena ka mo lebenkeleng. Ka ge a be a nagana gore re baeng o ile a re o tla sepela le rena go re bontšha lefelo leo. Lega go le bjalo, o ile a thoma ka go re iša ka phapošing e nngwe ka ntlong yeo, gomme ge re be re dutše re homotše, o ile a phetha ditirelo tša mafelelo go mokgalabje yo a bego a le kgaufsi le go hwa. Ka gona re ile ra tšwa ka ntlong yeo le moruti. Eitše ge sehlopha sela se bona re boledišana le yena, sa phatlalala.

Go ya Gilead

Kopano ya Ditšhaba-tšhaba ya Divine Will e be e tlo swarelwa New York ka 1958. Tate o be a e-ya, le nna ke be ke nyaka go ya, eupša ke be ke se na tšhelete. Ka morago, makgolo o ile a hwa go se gwa letelwa gomme o be a ntlogeletše diponto tše 100. Tšhelete ya go ya kopanong le go boa e be e le diponto tše 96, ka gona ke ile ka lefelela sefofane bakeng sa leeto ka ntle le go senya nako.

Nakwana ka morago ga moo, moemedi yo a tšwago ofising ya lekala ya Dihlatse tša Jehofa ya Brithania o ile a re etela gomme a laletša babulamadibogo ka moka ba kgethegilego bao ba bego ba e-ya kopanong gore ba dire kgopelo ya go tsenela tlhahlo ya boromiwa Sekolong sa Beibele sa Watchtower sa Gilead. Ke ile ka se dumele seo ke bego ke se kwa! O ile a nea bohle difomo tša go dira dikgopelo ka ntle le nna. Ke be ke sa le yo monyenyane kudu. Ke ile ka kgopela gore ke akaretšwe, ka hlalosa gore ke šetše ke tlogile nageng ya gešo gomme ge e le gabotse ke šetše ke le kabelong ya boromiwa. Ge a bona maikemišetšo a-ka, o ile a nnea fomo. Ke ile ka rapela kudu gore ke amogelwe! Ke ile ka hwetša karabo ka pela gomme ka laletšwa gore ke tle sekolong sa Gilead.

Ka lethabo, ke ile ka tsenywa sehlopheng sa bo-33 sa Gilead, gotee le babulamadibogo ba bangwe ba 81 ba tšwago dinageng tše 14. Dikgwedi tše hlano tša go rutwa di ile tša feta ka lebelo. Go ya mafelelong, Ngwanabo rena Nathan H. Knorr o ile a nea polelo e kgothatšago ya diiri tše nne. O ile a kgothaletša bao ba ka kgonago go dula ba se lenyalong gore ba dire bjalo. (1 Bakorinthe 7:37, 38) Eupša go bao ba swanago le rena, bao ba kganyogago go nyalwa ka letšatši le lengwe, o ile a šišinya gore re dire lelokelelo la dilo tšeo rena re naganago gore molekane yo a swanelegago o swanetše go ba le tšona. Ka morago, ge go be go ka ba le batho bao ba nyakago go re nyala, re be re ka ba hlahloba re diriša dinyakwa tšeo.

 Lelokelelo la-ka la dilo tšeo ke bego ke nyaka gore monna yo a tlago go nnyala a be le tšona le be le e-na le dilo tše di latelago: O be a swanetše gore le yena a be moromiwa le gona a rate Jehofa, a tsebe therešo ya Beibele go mpheta, a ikemišetše go se be le bana pele ga Haramagedone e le gore a kgone go tšwela pele ka tirelo ya nako e tletšego, a bolele Seisemane gabotse, gomme e be yo mogolo go nna. Lelokelelo le le ile la ba thušo e kgolo kudu go nna, ke e-na le nywaga e 20, ke le kgaufsi le go fiwa kabelo ya go ya mafaseng a kgole.

Go ya Brazil

Ka Sontaga, August 2, 1959, re ile ra aloga gomme ra newa dikabelo tša rena. Vehanouch Yazedjian, Sarah Greco, Ray le Inger Hatfield, Sonia Springate, Doreen Hines le nna re ile ra abelwa go ya Brazil. Re be re thabile. Ke be ke nagana ka dithokgwa, dinoga, dihlare tša go dira raba le ka Maindia a setlogo. Lega go le bjalo, ge ke fihla ke ile ka makala! Go e na le go hwetša sethokgwa seo se nelwago ke pula e ntši sa Amazon, ke ile ka hwetša Rio de Janeiro yeo ka nako yeo e bego e le motse-mošate wa naga, e le toropo e hlabologilego yeo e hlabelwago ke letšatši.

Tlhohlo ya rena ya kapejana e be e le ya go ithuta Sepotokisi. Kgweding ya mathomo, re be re fetša diiri tše 11 ka letšatši re ithuta. Ka morago ga go dira boboledi kua Rio le go dula nakwana ofising ya lekala ya Dihlatse tša Jehofa moo, ke ile ka romelwa legaeng la baromiwa kua Paracicaba, kua Motseng wa São Paulo, gomme ka morago ka ya legaeng la baromiwa kua Porto Alegre, Motseng wa Rio Grande do Sul.

Ka morago, mathomong a 1963, ke ile ka amogela taletšo ya go šoma Lefapheng la Bofetoledi kua lekaleng. Floriano Ingez da Conceição, yo a re rutilego Sepotokisi ge re be re fihla la mathomo, e be e le molebeledi wa lefapha. O ithutile therešo ka 1944, ge go be go e-na le Dihlatse tše ka bago 300 feela kua Brazil, le gona e be e le sealoga sa Gilead sa sehlopa sa bo-22. Ka letšatši le lengwe, ka morago ga dikgwedi tše mmalwa, Ngwanabo Rena Conceição o ile a nkgopela gore ka nako ya matena ke šale, ka ge a be a nyaka go bolela le nna. Mathomong ke be ke tshwenyegile. Na go na le phošo yeo ke e dirilego? Mafelelong ge tšhipi ya go re biletša dijong e lla, ke ile ka mmotšiša gore ke’ng seo a bego a nyaka go bolela le nna ka sona. Ge a fetola o ile a nkgopela ka gore, “Na nka go nyala?” Potšišo ye e be e ntletše dimpa. Ke ile ka kgopela gore a mphe nako ya go naganišiša ka taba yeo gomme ka kitimela dijong tša matena.

Floriano e be e se ngwanabo rena wa mathomo wa go bontšha kgahlego go nna. Lega go le bjalo, go fihla ka nako yeo go be go se na yo a bego a fihleletše dinyakwa tša-ka tša molekane wa lenyalo yo a swanelegago. Ke dumela gore lelokelelo la-ka le nthušitše gore ke efoge go dira diphetho tše fošagetšego. Mo nakong ye, dilo di be di le ka tsela e nngwe. Floriano o ile a fihlelela dinyakwa tša-ka ka moka! Ka gona re ile ra nyalana ka May 15, 1965.

Go Lebeletšana le Mathata a Bolwetši

Lenyalo e ile ya ba phihlelo e thabišago go nna le Floriano, go sa šetšwe mathata ao re ilego ra lebeletšana le ona. Bjo bongwe bja ona ke go se phele gabotse mmeleng ga Floriano, mo go ilego gwa thoma nakwana pele ga ge re ka nyalana. Nywageng e fetilego, leswafo la gagwe la ka go le letshadi le ile la se sa šoma, gomme dingalo di ile tša thoma go mo tshwenya o šoro. Ka baka leo re ile ra tloga Bethele gomme re ile ra abelwa go ya go šoma re le babulamadibogo ba kgethegilego toropong ya Teresópolis, lefelong la dithaba Motseng wa Rio de Janeiro. Re be re holofela gore boemo bja moo bja leratadima bo tla mo thuša gore a fole.

Ka godimo ga moo, ka December 1965, ke ile ka hwetša molaetša wa gore mma o swerwe ke bolwetši bja kankere gomme o babja o šoro. Re be re ngwalelana ka mehla, eupša ke be ke feditše nywaga e šupa ke sa bone mma. Ka gona o ile a re lefelela go ya go mmona kua Engelane. Mma o ile a buiwa, eupša dingaka di paletšwe ke go tloša kankere. Le ge a be a phela a robetše e bile a babja kudu, o be a dula a kgomaretše kganyogo ya gagwe ya go tšea karolo modirong wa boboledi. O be a e-na le motšhene wa go tlanya ka phapošing ya gagwe bakeng sa gore batho ba mo tlanyetše seo a bego a ba botša sona. Le gona o be a nea bohlatse bjo bokopana go baeng. O ile a hwa ka November 27, 1966. Ka yona kgwedi yeo, o ile a bega diiri tše lesome tša tšhemo! Tate o ile a tšwela pele ka potego tirelong ya bobulamadibogo go fihla lehung la gagwe ka 1979.

Ka morago ga lehu la mma, nna le Floriano re ile ra boela Brazil, Motseng wa Rio de Janeiro, mo re thomilego go hlankela gona re le gotee. Mathomong re be re abetšwe modiro wa tikologo  motseng-mošate, eupša lethabo la rena e ile ya ba la nakwana, ka ge Floriano a ile a babja o šoro gape. Ka morago re ile ra boela Teresópolis re le babulamadibogo ba kgethegilego.

Ka 1974, ka morago ga nywaga e mentši ya dikalafo tše kwešago bohloko, dingaka mafelelong di ile tša ntšha leswafo la Floriano la ka go le letshadi. Ka nako yeo, o be a sa kgone go hlankela e le molebeledi yo a okamelago goba mmulamadibogo yo a kgethegilego, eupša nakong ya ge batho ba dumeletšwe go bona balwetši ka sepetlele o be a kgona go swara dithuto tša Beibele—e nngwe ya tšona o be a e swara ka Seisemane le Bob, monna yo a tšofetšego yo a tšwago Amerika. Bob o ile a amogela ditherešo gomme ka morago a kolobetšwa. Floriano ganyenyane-ganyenyane o ile a fola gomme o ile a hlankela e le mmulamadibogo wa ka mehla go tloga ka nako yeo.

Jehofa o Šegofaditše Bodiredi Bja-ka

Ge nywaga e dutše e feta, ke ile ka tšwela pele ke hlankela ke le mmulamadibogo yo a kgethegilego, gomme Jehofa o ile a šegofatša bodiredi bja-ka. Kua Teresópolis, ke ile ka ba le tokelo e kgahlišago ya go thuša batho ba e ka bago ba 60 gore ba neele maphelo a bona go Jehofa. Gare ga bona go be go e-na le mosadi yo a bitšwago Jupira, yo ke ilego ka mo ruta le go bala. Ge nako e feta, ke ile ka ithuta le bana ba gagwe ba godilego ba seswai. Ka baka leo, Jupira gotee le ditho tše fetago 20 tša lapa le meloko ba hlankela Jehofa ka mafolofolo lehono. Yo mongwe ke mogolo, ba bararo ke bahlanka ba bodiredi gomme ba babedi ke babulamadibogo.

Ke ithutile go ba le boemo bjo bo nepagetšego bja kgopolo mabapi le kgonagalo ya gore batho ba ithute therešo. Ka nako e nngwe, ke be ke swere thuto ya Beibele le mosadi yo mofsa yo a bitšwago Alzemira ge monna wa gagwe, Antônio a be a ntšhošetša ka go ntomiša dimpša tše pedi tše dikgolo ge e ba ke sa tšwe ka lapeng la bona ka yona nako yeo. Ka morago ga moo, ke be ke kopana le Alzemira ka sewelo go ba go fihla ge go fetile nywaga e šupago gomme ke kgonne go kgopela Antônio tumelelo ya gore ke ithute le Alzemira gape. Lega go le bjalo, Antônio yena o be a sa nyake gore ke boledišane le yena ka Beibele. Lega go le bjalo, ka letšatši le lengwe ge pula e e-na, ke ile ka kgopela Antônio gore a tšee karolo thutong ya Beibele. Ke ile ka lemoga gore bothata bja gagwe e be e le gore ga a kgone go bala. Go tloga ka nako yeo go ya pele, Floriano le ba bangwe ba ile ba ithuta le yena gomme ba mo ruta go bala. Lehono, bobedi Alzemira le Antônio ba kolobeditšwe. O tloga a thuša kudu ka phuthegong, gomme o sepela le bontši bja bafsa bodireding.

Tše ke tše dingwe tša diphihlelo tše mmalwa tšeo re bilego le tšona nywageng ya ka godimo ga e 20 yeo re hlanketšego re le Teresópolis. Mathomong a 1988, re ile ra amogela kabelo e mpsha—toropong ya Niterói, moo re hlanketšego nywaga e mehlano e latetšego pele re romelwa Santo Aleixo. Ka morago re ile ra romelwa Phuthegong ya Japuíba ka gare ga motse le gona re bile le tokelo ya go thoma Phuthego ya Ribeira.

Bophelo bjo Bonolo Eupša bjo bo Putsago

Ge nywaga e dutše e feta, nna le Floriano re bile le tokelo ya go thuša batho ba fetago 300 gore ba neele maphelo a bona go Jehofa. Ga bjale, ba bangwe ba bona ba hlankela lekaleng, ba bangwe ke babulamadibogo, bagolo le bahlanka ba bodiredi. Ke leboga gakaakang gore Modimo ka moya wa gagwe o mokgethwa o be a re diriša gore re thuše batho ba bantši gakaakaa!—Mareka 10:29, 30.

Ke therešo gore Floriano o ile a swanelwa ke go lwantšha mathata a magolo a tša maphelo. Go sa šetšwe boemo bja gagwe, o sa dutše a tiile, a thabile e bile a botile Jehofa. Gantši o bolela gore: “Lehono lethabo ga le tlišwe ke go phela bophelo bjo bo se nago mathata. Le tlišwa ke go thušwa ke Jehofa go lwantšha mathata a rena.”—Psalme 34:19.

Ka 2003, go ile gwa hwetšwa gore leihlo la-ka la ka go le letshadi le na le kankere. Ke ile ka buiwa, leihlo la-ka le ile la ntšhwa gomme ka tsenywa la maitirelo, leo le bego le swanetše go hlatswiwa gantši ka letšatši. Go sa šetšwe se, Jehofa o ntšhegofaditše ka matla a go tšwela pele ke mo hlankela ke le mmulamadibogo yo a kgethegilego.

Mabapi le dilo tše di bonagalago, ke phetše bophelo bjo bonolo. Lega go le bjalo, Jehofa o ntšhegofaditše kabelong ya-ka le gona o dirile gore ke hume moyeng. Polelo ye e ilego ya bolelwa ke kgaetšedi yola wa moromiwa mabapi le modiro wa go ruta kua Afrika e ipontšhitše e le polelo e swanelago kabelo ya rena Brazil. Ka kgonthe, Jehofa o šegofaditše kudu kganyogo ya-ka ya go ba moromiwa!

[Seswantšho go letlakala 9]

Ke e-na le lapa lešo ka 1953

[Seswantšho go letlakala 9]

Ke nea bohlatse kua Ireland ka 1957

[Seswantšho go letlakala 10]

Ke e-na le baromiwa-gotee kua Brazil ka 1959. Go tloga go le letshadi go ya go le letona: Nna, Inger Hatfield, Doreen Hines le Sonia Springate

[Seswantšho go letlakala 10]

Ke e-na le monna wa-ka