Dipotšišo tše Tšwago go Babadi

Boikarabelo bja phuthego ke bofe ge Mokriste yo a otlelago koloi a dira kotsi yeo go yona go feleletšago go e-ba le bao ba hwago?

Taba ya ge e ba mootledi a e-na le molato wa madi e swanetše go elwa hloko ka gobane phuthego e swanetše go phema go ba le boikarabelo bja molato wa madi setšhabeng. (Doiteronomio 21:1-9; 22:8) Mootledi yo a ikarabelago ka kotsi e bolayago a ka ba le molato wa madi ge e ba a ile a hlokomologa dilo goba ka boomo a ile a roba molao wa Kesara wa tša tšhireletšo goba wa tsela. (Mareka 12:14) Eupša go na le ditaba tše dingwe tšeo re swanetšego go di ela hloko.

Mmolai yo a bego a tšhabetše go o mongwe wa metse ya botšhabelo ya Isiraele o be a swanelwa ke go sekišwa. Ge e ba polao e be e se ya maikemišetšo, o be a ka dumelelwa go dula motseng, a šireleditšwe go mo-lefetša-madi. (Numeri 35:6-25) Ka baka leo, ge e ba Mokriste a ikarabela ka lehu la motho yo mongwe kotsing, bagolo ba swanetše go nyakišiša ditaba go bona ge e ba go e-na le tekanyo e itšego ya molato wa madi. Pono ya mmušo goba phetho ya kgoro ya tsheko ga e nape e bontšha mogato wo phuthego e tla o tšeago.

Ka mohlala, kgoro ya tsheko e ka bolela gore motho o na le molato ka baka la go roba melao e itšego ya tsela, eupša bagolo bao ba dirago nyakišišo ba ka lemoga gore mootledi ga a na molato wa madi ka ge a be a ka se kgone go laola maemo ao a ilego a feleletša ka kotsi ye e bolayago. Lega go le bjalo, gaešita le ge kgoro ya tsheko e ka no se mmone molato, bagolo ba ka hwetša gore ge e le gabotse o na le molato wa madi.

Phetho ya bagolo bao ba nyakišišago taba ye e swanetše go thewa Mangwalong le dintlheng tšeo di kwagalago gabotse—go dumela ga mootledi gore o na le molato le/goba bohlatse bja dihlatse tše pedi goba tše tharo tše di botegago tšeo di bonego kotsi yeo. (Doiteronomio 17:6; Mateo 18:15, 16) Ge e ba go phethwa ka gore mootledi o na le molato wa madi, go swanetše go hlongwe komiti ya boahlodi. Ge e ba komiti e lemoga gore motho yo a nago le molato wa madi o a itshola, o tla hwetša kgalemelo e swanetšego go tšwa Mangwalong gomme a ka se newe ditokelo ka phuthegong. A ka se sa hlwa a hlankela e le mogolo goba mohlanka wa bodiredi. A ka beelwa le dithibelo tše dingwe gape. Le gona o ikarabela go Modimo ka baka la go se šetše ga gagwe, go hlokomologa dilo goba go se ele hloko temošo mo go feleleditšego ka kotsi le lehu.—Bagalatia 6:5, 7.

Ka mohlala: Ge e ba boemo bja leratadima bo be bo mpefetše nakong ya kotsi, mootledi o be a swanetše gore a ntšhe mahlo dinameng. Ge e ba e le gore o be a otsela, o be a swanetše go ba a eme gomme a khutša go fihlela a se sa otsela goba nkabe a ile a kgopela yo mongwe gore a otlele.

Anke re re mohlomongwe mootledi o be a otlela ka lebelo le le sa swanelago. Ge e ba Mokriste le ge e le ofe a fetiša lebelo le le swanetšego, se ke go palelwa ke go nea “Kesara tša Kesara.” Le gona go bontšha go se be le taba ka go kgethega ga bophelo, ka ge go ka feleletša ka lehu. (Mateo 22:21) Ela hloko selo se sengwe gape tabeng ye. Ke mohlala wa mohuta ofe wo mogolo a bego a tla ba a o beela mohlape ge a be a itshwere bošaedi melaong ya tsela ya Kesara goba ge a ile a palelwa ka boomo ke go e-kwa?—1 Petro 5:3.

Bakriste ga se ba swanela go botša ba bangwe gore ba be lefelong le itšego ka nako yeo ruri e ka se kgonegego ge e se feela ge ba ka otlela ka lebelo le le feteletšego. Lega go le bjalo, maemong a mantši, ke taba feela ya go thoma e sa le ka pela goba gore motho a fetoše lenaneo la gagwe e le gore a kgone go ba le nako e lekanego ya go tšea leeto. Ge e ba seo se dirwa, Mokriste a ka se ke a lekega gore a otlele ka lebelo leo le sa swanelago, eupša o tla kgona go dumelelana le melao ya tsela ya “balaodi ba bagolo” ba mmušo. (Baroma 13:1, 5) Se se tla thuša mootledi go phema dikotsi tšeo di bakago polao le tšeo di ka dirago gore a be le molato wa madi. Le gona go tla ba thuša go bea mohlala o swanetšego le go dula ba e-na le letswalo le lebotse.—1 Petro 3:16.