Dipotšišo tše Tšwago go Babadi

Ka morago ga teko ya mafelelo ge Nywaga e Sekete e fela, na go tla kgonega gore batho ba dire dibe gomme ba hwe?

Mangwalo a mabedi ao a hwetšwago go Kutollo a re thuša go araba potšišo e lego ka mo godimo ge a re: “Lehu le Hadese tša lahlelwa letsheng la mollo. Se se bolela lehu la bobedi, letsha la mollo.” (Kutollo 20:14) “O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:4.

Ela hloko nako yeo e akaretšwago mo. Go lahlelwa ga “lehu le Hadese” ka letsheng la mollo go direga ka morago ga gore baphologi ba Haramagedone, bahu bao ba tsošitšwego gotee le motho le ge e le ofe yo a belegwego ka morago ga Haramagedone ba ahlotšwe go ya ka “dilo tšeo di ngwadilwego mangwalong a go phuthwa,” goba dinyakwa tša Jehofa tša maleba bakeng sa batho ba phelago nakong ya nywaga e sekete. (Kutollo 20:12, 13) Moapostola Johane o bega ka pono e nngwe yeo e hwetšwago go Kutollo kgaolo 21, e lego yeo e tlago go phethagala nakong ya Pušo ya Kriste Jesu ya Nywaga e Sekete. Lega go le bjalo, go phethagala mo go feletšego ga pono yeo, go tla direga mafelelong a nywaga e sekete ka Letšatši la Kahlolo. Jehofa ka nako yeo o tla dula le batho ka tsela ya kgonthe a sa diriše bo-mmaditsela, ka morago ga ge Jesu a tla be a bušeditše Mmušo go Tatagwe. Jehofa o tla dula ka tsela ya seswantšhetšo le “batho ba gagwe,” a dulela le bona sa ruri le ka tsela e lebanyago. Ge batho ba tla be ba boetše phethegong ka baka la ge sehlabelo sa Kriste sa topollo se tla be se phethile morero wa sona ka mo go feletšego, “lehu le ka se hlwe le sa ba gona.”—Kutollo 21:3, 4.

Ka baka leo, lehu leo go boletšwego ka lona ka mangwalong ao a tsopotšwego ka mo godimo ke lehu leo le bakilwego ke Adama, e lego lona leo le tlago go tlošwa ke topollo ya Kriste. (Baroma 5:12-21) Ge lehu leo batho ba le abetšego go tšwa go monna wa pele le tlošwa, batho ba tla swana gabotse kudu le Adama nakong ya ge a be a bopša. Adama o be a phethagetše, eupša seo se be se sa bolele gore go be go se na kgonagalo ya gore a hwe. Jehofa o ile a botša Adama gore a se ke a ja “sehlare sa xo tseba botse le bobe” gomme a ba a re: “Mohla ò tl’o xo se ja O tlo hwa lehu.” (Genesi 2:17) Leo e be e le lehu le le bakilwego ke sebe sa ka boomo. Ka morago ga teko ya mafelelo bofelong bja Pušo ya Nywaga e Sekete, batho ba tla ba ba sa dutše ba e-na le tokologo ya go ikgethela. (Kutollo 20:7-10) Ba tla ba ba sa dutše ba kgona go ikgethela seo ba nyakago go se dira, e ka ba go tšwela pele ba hlankela Jehofa goba go se mo hlankele. Ka gona, go ka se bolelwe gore le ka mohla go ka se be le motho yo a tlago go hlanogela Modimo go swana le ge Adama a dirile.

Go tla direga’ng ka motho yoo a tlago go rabela ka morago ga teko ya mafelelo ge go se sa na lehu goba Hadese? Ka nako yeo, lehu leo le bakilwego ke Adama le tla ba le tlošitšwe. Le gona Hadese, e lego lebitla le le tlwaelegilego la batho bao ba nago le kholofelo ya tsogo e tla ba e fedišitšwe. Lega go le bjalo, Jehofa a ka kgona go fediša lerabele le ge e le lefe letsheng la mollo, a se sa hlwa a le nea kholofelo ya tsogo. Lehu leo le tla swana le la Adama le Efa, e sego lehu leo batho ba le abetšego go Adama.

Lega go le bjalo, ga re na lebaka la go letela gore selo se bjalo se direge. Bao ba fenyago teko ya mafelelo ba tla fapana le Adama ka kgopolo e nngwe e tseneletšego. Ba tla ba ba lekilwe ka mo go feletšego. Re ka kgodišega gore teko ya mafelelo e tla direga ka botlalo ka gobane Jehofa o tseba go hlahloba batho ka mo go feletšego. Re ka kgodišega gore teko ya mafelelo e tla dira gore go fedišwe motho le ge e le ofe yo a dirišago tokologo ya gagwe ya go ikgethela gampe. Ka gona, gaešita le ge go kgonega gore bao ba fenyago teko ya mafelelo ba rabele malebana le Modimo gomme ba fedišwe ka baka la go dira bjalo, ga go na seo se tiišago gore selo se bjalo se tla direga.

[Seswantšho go letlakala 31]

Ka morago ga teko ya mafelelo, batho ba tla swana le Adama ka kgopolo efe?