‘E-yang le Dire Barutiwa, le ba Kolobetše’
‘E-yang le Dire Barutiwa, le ba Kolobetše’
“Ka gona, e-yang le dire batho ba ditšhaba ka moka barutiwa, le ba kolobetša . . . , le ba ruta go boloka dilo tšohle tšeo ke le laetšego tšona.”—MATEO 28:19, 20.
1. Ke phetho efe yeo setšhaba sa Isiraele se ilego sa e dira thitong ya Thaba ya Sinai?
NYWAGENG e ka bago 3 500 e fetilego, setšhaba ka moka se ile sa ikana go Modimo. Baisiraele bao ba bego ba bokane thitong ya Thaba ya Sinai ba boletše phatlalatša gore: “Tšohle tše Morêna a di boletšexo re tlo di dira.” Go tloga ka nako yeo go ya pele, Baisiraele e ile ya ba batho bao ba ineetšego go Modimo, e le “baruiwa” ba gagwe. (Ekisodo 19:5, 8; 24:3) Ba be ba lebeletše gore o tla ba šireletša gomme go tloga molokong o mongwe go ya go o mongwe ba be ba tla phela nageng “e êlaxo mafsi le nose.”—Lefitiko 20:24.
2. Batho ba ka ba le tswalano efe le Modimo lehono?
2 Lega go le bjalo, go etša ge mopsalme Asafa a boletše, Baisiraele ba ile “ba hlala kxwêranô [ya Modimo] ba lahla, ba xana xo ya ka molaô wa xaxwe.” (Psalme 78:10) Ba ile ba palelwa ke go kgomarela keno yeo bo-rakgolokhukhu ba bona ba bego ba e dirile go Jehofa. Mafelelong, setšhaba se ile sa lahlegelwa ke tswalano yeo ya moswana-noši le Jehofa. (Mmoledi 5:4; Mateo 23:37, 38) Ke moka, Modimo o ile “a lebiša tlhokomelo ya gagwe ditšhabeng go amogela batho ba leina la gagwe go tšwa go tšona.” (Ditiro 15:14) Le gona matšatšing a a bofelo, o bokanya “lešaba le legolo leo go sego motho yo a kgonago go le bala, le le tšwago ditšhabeng tšohle le melokong yohle le merafong yohle le malemeng ohle,” leo ka lethabo le rego: “Phološo e tšwa go Modimo wa rena yo a dutšego sedulong sa bogoši, le go Kwana.”—Kutollo 7:9, 10.
3. Motho o swanetše go gata megato efe pele ga ge a ka ba le tswalano ya kgaufsi le Modimo?
3 E le gore motho a be gare ga batho bao ba nago le tswalano yeo e bohlokwa le Modimo, o swanetše go ineela go Jehofa gomme a bontšhe seo phatlalatša ka go kolobetšwa meetseng. Go kolobetšwa mo ke go kwa taelo e lebanyago ya Jesu yeo e yago go barutiwa ba gagwe e rego: “Ka gona, e-yang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona.” (Mateo 28:19, 20) Baisiraele ba ile ba theetša ge go be go balwa “puku ya kxwêranô.” (Ekisodo 24:3, 7, 8) Ka baka leo, ba be ba tseba boikarabelo bja bona go Jehofa. Ka mo go swanago lehono, go bohlokwa gore motho a be le tsebo e nepagetšego ka thato ya Modimo yeo e hwetšwago ka Lentšung la gagwe e lego Beibele pele ga ge a ka kolobetšwa.
4. Motho o swanetše go dira’ng gore a swanelegele kolobetšo? (Akaretša lepokisi le le lego ka mo godimo.)
4 Go molaleng gore Jesu o be a nyaka gore barutiwa ba gagwe ba be le motheo o tiilego wa tumelo ya bona pele ga ge ba ka kolobetšwa. Ga se a laela barutiwa ba gagwe gore ba ye gomme ba dire barutiwa feela eupša gape o laetše gore ba rute batho ‘go boloka dilo tšohle tšeo a di laetšego.’ (Mateo 7:24, 25; Baefeso 3:17-19) Ka baka leo, bao ba swanelwago ke go kolobetšwa gantši ba ba ba ithutile Beibele ka dikgwedi tše mmalwa goba gaešita le ka ngwaga o tee goba e mebedi, e le gore ba se dire phetho ya bona ka lepotla-potla goba ka go hloka tsebo. Tabeng ye, bao ba yago kolobetšong ba araba dipotšišo tše pedi tša motheo ka gore ee. Ka ge Jesu a gateletše gore ‘Ee ya rena e be Ee, Aowa ya rena e be Aowa,’ e tla ba mo go thušago gore ka moka ga rena re hlahlobe ka kelohloko seo se bolelwago ke dipotšišo tše tše pedi tša kolobetšo.—Mateo 5:37.
Go Sokologa le go Ineela
5. Ke megato efe ya bohlokwa yeo potšišo ya pele ya kolobetšo e e gatelelago?
5 Potšišo ya pele ya kolobetšo e botšiša yo a yago kolobetšong ge e ba a tlogetše tsela ya gagwe ya kgale ya bophelo le ge e ba a neetše bophelo bja gagwe go Jehofa gore a dire thato ya gagwe. Potšišo ye e gatelela megato e mebedi ya bohlokwa yeo e swanetšego go gatwa pele ga kolobetšo, e lego go sokologa le go ineela.
6, 7. (a) Ke ka baka la’ng go nyakega gore batho ka moka bao ba yago kolobetšong ba sokologe? (b) Motho o swanetše go dira diphetogo dife ka morago ga go sokologa?
6 Ke ka baka la’ng motho a swanetše go sokologa pele ga ge a ka kolobetšwa? Moapostola Paulo o hlalosa gore: “Ka moka ga rena re kile ra itshwara ka go dumelelana le dikganyogo tša nama ya rena.” (Baefeso 2:3) Pele ga ge re ka tseba thato ya Modimo ka mo go nepagetšego, re be re phela ka go dumelelana le lefase, go ya ka melao ya lona le ditekanyetšo tša lona. Tsela ya rena ya bophelo e be e laolwa ke modimo wa tshepedišo ye, e lego Sathane. (2 Bakorinthe 4:4) Lega go le bjalo, ka morago ga go tseba thato ya Modimo, re ikemišetša go se sa phelela “dikganyogo tša batho, eupša [re] phelela thato ya Modimo.”—1 Petro 4:2.
7 Tsela ye e mpsha ya bophelo e hola ka ditsela tše dintši. Go feta tšohle, e bula tsela ya gore motho a be le tswalano ya bohlokwa le Jehofa, yeo Dafida a e bapišitšego le taletšo ya go tsena “ngwakong” wa Modimo le “thabeng e kxêthwa”—tokelo e kgolo e le ruri. (Psalme 15:1) Ke mo go kwagalago gore Jehofa ga a laletše motho le ge e le ofe eupša o laletša feela bao ba “swerexo tsela ya bothakxa, [ba] dira tša xo loka, [ba] búa therešô ka [dipelong tša bona].” (Psalme 15:2) Mabapi le maemo a rena a pele ga ge re ka ithuta therešo, go fihlelela dinyakwa tše go ka bolela gore re swanetše go dira diphetogo tše itšego—boitshwarong le semelong. (1 Bakorinthe 6:9-11; Bakolose 3:5-10) Selo seo se tutuetšago diphetogo tšeo ke go sokologa—go itshola go tšwa pelong mabapi le tsela ya rena ya kgale ya go phela le go ba le boikemišetšo bjo matla bja go thabiša Jehofa. Se se lebiša phetogong e kgolo—go tlogela tsela ya boithati ya lefase ya go phela le go phegelela tsela yeo e thabišago Modimo.—Ditiro 3:19.
8. Re ineela bjang, gomme boineelo bo tswalana bjang le kolobetšo?
8 Karolo ya bobedi ya potšišo ya pele ya kolobetšo e botšiša bao ba yago kolobetšong ge e ba ba šetše ba ineetše go Jehofa gore ba dire thato ya gagwe. Boineelo ke mogato wa bohlokwa wo o swanetšego go dirwa pele ga kolobetšo. Bo dirwa ka thapelo yeo go yona re bolelago kganyogo ya rena ya go neela maphelo a rena go Jehofa ka Kriste. (Baroma 14:7, 8; 2 Bakorinthe 5:15) Ke moka Jehofa e ba Mong wa rena, gomme re thabela go dira thato ya Modimo go swana le Jesu. (Psalme 40:8; Baefeso 6:6) Go ikana ka tsela ye go Jehofa go dirwa gatee feela. Lega go le bjalo, ka ge boineelo e le taba ya motho le Modimo, go tsebatša phatlalatša ka letšatši la kolobetšo go dira gore motho yo mongwe le yo mongwe a tsebe gore re ineetše e le ka kgonthe go Tatago rena wa legodimong.—Baroma 10:10.
9, 10. (a) Go dira thato ya Modimo go akaretša’ng? (b) Ke bjang boineelo bja rena bo ilego bja lemogwa gaešita le ke bahlankedi ba Nazi?
9 Go latela mohlala wa Jesu wa go dira thato ya Modimo go akaretša’ng? Jesu o boditše barutiwa ba gagwe gore: “Ge e ba motho le ge e le ofe a nyaka go ntšhala morago, a a itatole gomme a tšee kota ya gagwe ya tlhokofatšo a ntatele ka go se kgaotše.” (Mateo 16:24) Mo, o bontšhitše dilo tše tharo tšeo re swanetšego go di dira. Sa pele, re a ‘itatola.’ Ka mantšu a mangwe, re lahla ditshekamelo tša rena tša boithati le tša go se phethagale gomme ra amogela keletšo le tlhahlo ya Modimo. Sa bobedi, re ‘tšea kota ya rena ya tlhokofatšo.’ Mehleng ya Jesu, kota ya tlhokofatšo e be e le leswao la go lešwa dihlong le tlaišo. Re le Bakriste, re amogela taba ya gore ka dinako tše dingwe re ka tlaišwa ka baka la ditaba tše dibotse. (2 Timotheo 1:8) Gaešita le ge lefase le ka re kwera goba go re goboša, re swana le Kriste ka go “se be le taba le go hlabišwa dihlong,” gomme re thabela go tseba gore re thabiša Modimo. (Baheberu 12:2) Mafelelong, re latela Jesu “ka go se kgaotše.”—Psalme 73:26; 119:44; 145:2.
10 Se se kgahlišago ke gore gaešita le baganetši ba bangwe ba lemoga boineelo bja go hlankela Modimo ka mo go feletšego bjo Dihlatse tša Jehofa di bo dirilego go Modimo. Ka mohlala, kampeng ya tshwenyo ya Nazi kua Buchenwald, Jeremane, Dihlatse tšeo di ilego tša gana go latola tumelo ya tšona di be di swanetše go saena letlakala le le gatišitšwego le le nago le mantšu a: “Ke sa dutše ke le Morutwana wa Beibele yo a ineetšego le gona nka se ke ka roba keno yeo ke e dirilego go Jehofa.” Ee, se se bontšha boemo bja kgopolo bja bahlanka ka moka ba Jehofa bao ba ineetšego le bao ba botegago!—Ditiro 5:32.
Go Tsebja o le yo Mongwe wa Dihlatse tša Jehofa
11. Ke tokelo efe yeo yo a kolobetšwago a bago le yona?
11 Potšišo ya bobedi e botšiša yo a yago kolobetšong ge e ba sa pele, a kwešiša gore go kolobetšwa ga gagwe go mo hlaola e le yo mongwe wa Dihlatse tša Jehofa. Ka morago ga kolobetšo, e ba mohlanka yo a kgethilwego yo a bitšwago ka leina la Jehofa. Ye ke tokelo e kgolo e bile ke boikarabelo bjo bogolo. Le gona e dira gore yo a kolobeditšwego a be le tebelelo ya phološo ya sa ruri, ge feela a dula a botegela Jehofa.—Mateo 24:13.
12. Ke go itlama gofe mo go sepedišanago le tokelo ya go bitšwa ka leina la Jehofa?
12 Go bitšwa ka leina la Modimo yo matla ohle e lego Jehofa ruri e tloga e le tokelo gare ga ditokelo. Moporofeta Mika o itše: “Xe sethšaba se sengwê le se sengwê sè e-ya ka tsela ya modimo wa sôna, rena re tlo fêla rè e-ya ka tsela ya Morêna Modimo wa rena ka mehla le xo ya xo ile.” (Mika 4:5) Lega go le bjalo, tokelo ye e sepedišana le go itlama. Re swanetše go katanela go phela maphelo a rena ka tsela yeo e tumišago leina leo re bitšwago ka lona. Go etša ge Paulo a gopoditše Bakriste kua Roma, ge e ba motho a sa dire seo a se bolelago, leina la Modimo le a “rogakwa,” goba go nyatšwa.—Baroma 2:21-24.
13. Ke ka baka la’ng bahlanka ba Jehofa bao ba ineetšego ba e-na le boikarabelo bja go nea bohlatse ka Modimo wa bona?
13 Ge motho e e-ba yo mongwe wa Dihlatse tša Jehofa, le yena o amogela boikarabelo bja go nea bohlatse ka Modimo wa gagwe. Jehofa o laleditše setšhaba se se ineetšego sa Isiraele gore se be dihlatse bakeng sa go hlatsela gore ke Modimo wa ka mo go sa felego. (Jesaya 43:10-12, 21) Eupša setšhaba se ile sa palelwa ke go phethagatša boikarabelo bjo, gomme mafelelong se ile sa se sa amogelwa ke Jehofa ka mo go feletšego. Lehono, Bakriste ba therešo ba ikgantšha ka go ba le tokelo ya go nea bohlatse ka Jehofa. Re dira bjalo ka gobane re a mo rata gomme re hlologetše gore leina la gagwe le kgethagatšwe. Re tla ba re dulela’ng re sa bolele le batho mabapi le therešo ka Tatago rena wa legodimong le morero wa gagwe? Re ikwa go swana le moapostola Paulo yo a itšego: “Ke tlamegile. Ruri, go madimabe nna ge e ba ke se ka bolela ditaba tše dibotse!”—1 Bakorinthe 9:16.
14, 15. (a) Mokgatlo wa Jehofa o bapala karolo efe kgolong ya rena ya moya? (b) Go na le ditokišetšo dife tše di reretšwego go re thuša moyeng?
14 Potšišo ya bobedi le yona e gopotša yo a yago kolobetšong ka boikarabelo bja gore a dirišane le mokgatlo wa Jehofa wo o hlahlwago ke moya. Ga se rena feela bao re hlankelago Modimo, le gona re nyaka thušo, thekgo le kgothatšo ya “mokgatlo wohle wa bana babo rena.” (1 Petro 2:17; 1 Bakorinthe 12:12, 13) Mokgatlo wa Modimo o bapala karolo ya bohlokwa tabeng ya gore re gole moyeng. O re nea motlalo wa dikgatišo tša Beibele tšeo di re thušago go gola ka tsebo e nepagetšego, go dira dilo ka bohlale ge re lebeletšane le mathata le go hlagolela tswalano ya kgaufsi le Modimo. Ka go swana le mma yo a kgonthišetšago gore ngwana wa gagwe o ja gabotse le go hlokomelwa gabotse, “mohlanka yo a botegago le wa temogo” o nea motlalo wa dijo tša moya ka nako e swanetšego e le gore re gole moyeng.—Mateo 24:45-47; 1 Bathesalonika 2:7, 8.
15 Dibokeng tša beke le beke, batho ba Jehofa ba amogela tlwaetšo e nyakegago le kgothatšo e le gore e be Dihlatse tša Jehofa tše di botegago. (Baheberu 10:24, 25) Sekolo sa Bodiredi sa Pušo ya Modimo se re ruta go bolela phatlalatša, gomme Seboka sa Tirelo se re tlwaetša go bolela molaetša wa rena ka katlego. Ka diboka tša rena le ka thuto ya rena ya motho ka noši ya go ithuta dikgatišo tše di theilwego Beibeleng, re ka bona gore moya wa Jehofa o a šoma e bile o hlahla mokgatlo wa gagwe. Ka ditokišetšo tše tša ka mehla, Modimo o re lemoša ka dikotsi, a re tlwaetša gore re be badiredi bao ba atlegago le go re thuša gore re dule re phafogile moyeng.—Psalme 19:7, 8, 11; 1 Bathesalonika 5:6, 11; 1 Timotheo 4:13.
Se se re Tutuetšago go Dira Phetho
16. Ke’ng seo se re tutueletšago go ineela go Jehofa?
16 Ka gona dipotšišo tše pedi tšeo di botšišwago bao ba yago kolobetšong di ba gopotša ka seo se bolelwago ke go kolobetšwa meetseng le boikarabelo bjo bo tlišwago ke go dira bjalo. Ka gona, ba swanetše go tutuetšwa ke’ng e le gore ba dire phetho ya go kolobetšwa? Re ba barutiwa bao ba kolobeditšwego e sego ka baka la gore motho yo mongwe o re gapeletša go dira bjalo eupša ka baka la gore Jehofa o a re ‘goga.’ (Johane 6:44) Ka ge “Modimo [e le] lerato,” o buša legohle ka lerato, e sego ka molamo wa tšhipi. (1 Johane 4:8) Re gogelwa go Jehofa ka baka la dika tša gagwe tše botho le ka baka la tsela yeo a dirišanago le rena ka yona. Jehofa o gafile Morwa wa gagwe yo a tswetšego a nnoši bakeng sa rena gomme o re nea bokamoso bjo bobotse kudu. (Johane 3:16) Ka baka leo, re tutueletšega go mo nea maphelo a rena.—Diema 3:9; 2 Bakorinthe 5:14, 15.
17. Ga ra ineela go eng?
17 Ga re ineele selong se itšego goba modirong o itšego, eupša re ineela go Jehofa ka boyena. Dikabelo tšeo Modimo a di neago batho ba gagwe di ka se swane, eupša boineelo bja bona go yena bo a swana. Ka mohlala, seo a boditšego Aborahama gore a se dire se be se fapana kudu le seo a boditšego Jeremia gore a se dire. (Genesi 13:17, 18; Jeremia 1:6, 7) Lega go le bjalo, bobedi bja bona ba ile ba tšwetša pele modiro o itšego wo Modimo a ba neilego gore ba o dire ka gobane ba be ba rata Jehofa e bile ba rata go dira thato ya gagwe ka potego. Mehleng ye ya bofelo, balatedi ka moka ba Kriste bao ba kolobeditšwego ba katanela go phethagatša taelo ya Kriste ya go bolela ditaba tše dibotse tša Mmušo le go dira barutiwa. (Mateo 24:14; 28:19, 20) Go dira modiro woo ka pelo ka moka ke tsela e botse ya go bontšha gore re rata Tatago rena wa legodimong le gore re tloga re ineetše go yena.—1 Johane 5:3.
18, 19. (a) Ke mantšu afe ao re a bolelago phatlalatša ge re kolobetšwa? (b) Ke’ng seo se tlago go ahla-ahlwa sehlogong se se latelago?
18 Ka ntle le pelaelo, kolobetšo e re bulela tsela ye e re tlišetšago ditšhegofatšo tše dintši, eupša ga se mogato wo o swanetšego go tšewa gabohwefo. (Luka 14:26-33) E bontšha boikemišetšo bjo bo tlago pele ga boikarabelo le ge e le bofe. (Luka 9:62) Ge re kolobetšwa, ge e le gabotse re bolela phatlalatša gore: “Modimo yó ké Yêna Modimo wa rena wa mehleng le neng le neng; ó tlo re sepediša xo ya xo ile.”—Psalme 48:14.
19 Sehlogo se se latelago se tla ahla-ahla dipotšišo tše di oketšegilego tšeo di ka rotošwago mabapi le go kolobetšwa meetseng. Na go ka ba le mabaka a kwagalago a gore motho a se ke a nyaka go kolobetšwa? Na go na le taba gore motho o na le nywaga e mekae? Batho ka moka ba ka thuša bjang gore nako ya kolobetšo e be le seriti?
Na o ka Hlalosa?
• Ke ka baka la’ng Mokriste yo mongwe le yo mongwe a swanetše go sokologa pele ga ge a ka kolobetšwa?
• Go ineela go Modimo go akaretša’ng?
• Ke boikarabelo bofe bjo bo tlišwago ke tokelo ya go bitšwa ka leina la Jehofa?
• Ke’ng seo se swanetšego go re tutueletša go dira phetho ya go kolobetšwa?
[Dipotšišo tša Thuto]
[Lepokisi/Seswantšho go letlakala 22]
DIPOTŠIŠO TŠE PEDI TŠA KOLOBETŠO
Motheong wa sehlabelo sa Jesu Kriste, na o sokologile dibeng tša gago gomme wa ineela go Jehofa gore o dire thato ya gagwe?
Na o a kwešiša gore boineelo bja gago le kolobetšo di go hlaola o le yo mongwe wa Dihlatse tša Jehofa ka go kopanela le mokgatlo o hlahlwago ke moya wa Modimo?
[Seswantšho go letlakala 23]
Boineelo ke go ikana go Jehofa go tšwa pelong ka thapelo
[Seswantšho go letlakala 25]
Modiro wa rena wa boboledi o bontšha gore re ineetše go Modimo