Na o Kganyoga go ba le Bagwera ba Paala?

BATHO ba bantši ba kganyoga go ba le bagwera ba paala. Go abelana tsebo le bao o ntšhanago le bona sa inong go ka dira gore bophelo bja gago bo thabiše. Eupša o ka thoma bjang segwera sa paala? Nywaga e ka bago e 2 000 e fetilego, Jesu o bontšhitše gore lerato la go hloka boithati ke senotlelo sa go atlegiša segwera sa batho. O rutile gore: “Ka mo le nyakago batho ba le dira ka gona, le lena le ba direng ka wona mokgwa woo.” (Luka 6:31) Polelo yeo gantši e bitšwa Molao wa Gauta, e bontšha gore o swanetše go hloka boithati gomme o nee ka seatla seo se bulegilego e le gore o be le bagwera. Ge re e bea ka tsela e bonolo, gore o be le bagwera o swanetše go ba mogwera. Bjang?

Segwera sa paala, ga se hlagolelwe ka letšatši letee. Go ba gona, bagwera ga e fo ba batho bao re tlwaelanego le bona. Ke batho bao o ba ratago ka pelo le moya. Go aga segwera le go tiiša ditlemo tša sona go nyaka boiteko. Segwera gantši se nyaka gore o etiše dinyakwa tša mogwera wa gago ka pele ga tša gago. Bagwera ba ba gotee lethabong le manyaming.

O bontšha gore o mogwera wa paala, kudu-kudu ge o thekga le go kgothatša motho yo a nyamilego. Diema 17:17 e re: “Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” Ge e le gabotse, ditlemo tša segwera di ka ba tša tia go feta le ditlemo tša lapa. Diema 18:24 e re: “Boati bya baxwêra bo tliša thsenyêxêlô; xo na le moratwa-mmotexi mo-phala-ngwana weno.” Na o rata go tseba mo go oketšegilego ka go hlagolela segwera se se bjalo sa bohlokwa? Na o ka rata go ba karolo ya sehlopha sa batho bao ba tsebjago ka go ratana? (Johane 13:35) Ge e ba go le bjalo, Dihlatse tša Jehofa motseng wa geno di tla thabela go go bontšha tsela yeo ka yona o ka hwetšago bagwera ba paala.