Go Sepela Tseleng ya Seetša se se Oketšegago
Go Sepela Tseleng ya Seetša se se Oketšegago
“Xe e le mmila [“tsela,” NW] wa baloki ó étša boka mahuba xe a hlatloxa, ’tšatši la bá la hlaba.”—DIEMA 4:18.
1, 2. Batho ba Modimo ba ile ba thabela’ng ka baka la seetša sa moya se se oketšegago se se tšwago go Jehofa?
KE MANG yo a ka hlalosago gakaone mafelelo ao letšatši le le hlabago le bago le ona lefsifsing la bošego go feta Mothopo wa seetša, e lego Jehofa Modimo? (Psalme 36:9) Modimo o re: ‘Ge mahuba a swara morumo wa lefase, lona lefase le fetoga bjalo ka letsopa ge le bopša, la itlhopha eka ke matsaka.’ (Jobo 38:12-14) Seetša se se oketšegago se se tšwago letšatšing se dira gore sebopego sa lefase se thome go bonagala gabotse kudu, go etša ge letsopa le boleta le fetoga sebopego ge le kgomaretšwa selong seo se nago le mokgabišo.
2 Le gona, Jehofa ke Mothopo wa seetša sa moya. (Psalme 43:3) Le ge lefase le sa dutše le le gare ga kgampi ya lefsifsi, Modimo wa therešo o tšwela pele a hlabišetša batho ba gagwe seetša. Ka mafelelo afe? Beibele e araba ka gore: “Mmila [“tsela,” NW] wa baloki ó étša boka mahuba xe a hlatloxa, ’tšatši la bá la hlaba.” (Diema 4:18) Seetša se se oketšegago se se tšwago go Jehofa se tšwela pele se bonega tsela ya batho ba gagwe. Se tliša diphetogo mokgatlong wa bona, dithutong tša bona le boitshwarong bja bona.
Seetša se se Oketšegago se Tliša Diphetogo Mokgatlong
3. Ke’ng se se holofetšwago go Jesaya 60:17?
3 Jehofa o boletše e sa le pele a diriša moporofeta Jesaya gore: “’Bakeng sa mphiri ke tlo tliša thsipi e khwibidu; ’bakeng sa thsipi ke tlo tliša thsipi-thsêhla; ’bakeng sa kwata ke tlo tliša mphiri; ’bakeng sa mafsika ke tlo tliša thsipi.” (Jesaya 60:17) Go etša ge go diriša tšhipi e kaone legatong la e sa rego selo go bolela tšwelopele, go bile le diphetogo dithulaganyong tša mokgatlo wa Dihlatse tša Jehofa ‘bofelong bja tshepedišo ya dilo,’ goba “mehleng ya bofelo.”—Mateo 24:3; 2 Timotheo 3:1.
4. Ke thulaganyo efe yeo e ilego ya thoma go šoma ka 1919, gomme e ile ya thuša bjang?
4 Mathomong a mehla ye ya bofelo, diphuthego tša Barutwana ba Beibele, go etša ge Dihlatse tša Jehofa di be di tsebja bjalo ka nako yeo, di be di kgetha bagolo ba tšona le batiakone ka tsela ya pušo ka batho. Lega go le bjalo, bagolo ba bangwe ba be ba tloga ba sa rate modiro wa boebangedi. Ba bangwe ba be ba sa dika-dike go tšea karolo modirong wa boboledi feela eupša gape ba be ba sa kgothaletše ba bangwe go o dira. Ka gona, ka 1919 go ile gwa ba le maemo a mafsa a boikarabelo phuthegong e nngwe le e nngwe—a molaodi wa tirelo. Molaodi wa tirelo o be a sa kgethwe ke phuthego eupša o be a kgethwa ke ofisi ya lekala ya batho ba Modimo ka tsela ya pušo ya Modimo. Boikarabelo bja molaodi yo a kgethilwego bo be bo akaretša go rulaganya modiro wa boboledi, go abela batho ditšhemo le go kgothaletša batho gore ba tšee karolo bodireding bja tšhemo. Nywageng e latetšego, modiro wa go bolela ka Mmušo o ile wa thekgwa kudu.
5. Ke phetogo efe yeo e ilego ya dirwa ka bo-1920?
5 Batho ka moka ka phuthegong ba ile ba tutuetšwa ke kgothatšo e rego, “Tsebatšang, tsebatšang, tsebatšang Kgoši le mmušo wa yona,” yeo e neilwego ka 1922 kopanong ya Barutwana ba Beibele kua Cedar Point, Ohio, U.S.A. Ka 1927 tirelo ya tšhemo e be e rulagantšwe go fihla bokgoleng bja gore letšatši la Sontaga le be le kgethilwe e le le le swanetšego kudu bakeng sa go tšea karolo modirong wa go dira boboledi ka ntlo le ntlo. Ke ka baka la’ng go ile gwa kgethwa letšatši leo? Ka gobane letšatši la Sontaga e be e le letšatši leo batho ba bantši ba bego ba sa ye mešomong. Dihlatse tša Jehofa lehono di bontšha moya o swanago ka go katanela go etela batho ka dinako tšeo ba ka bago ba le gae, go etša mafelo-bekeng le mantšiboa.
6. Ka 1931, go ile gwa amogelwa setlamo sefe, gomme seo se ile sa kgoma bjang modiro wa go bolela ka Mmušo?
6 Kgothatšo e kgolo kudu modirong wa go bolela ka Mmušo e neilwe ka Sontaga thapama, July 26, 1931, ge go be go amogelwa setlamo la mathomo kopanong ya Columbus, Ohio, U.S.A., gomme ka morago sa amogelwa lefaseng ka moka. Ka boripana, setlamo seo se be se re: “Re bahlanka ba Jehofa Modimo bao ba laetšwego go dira modiro leineng la gagwe, gomme ka go kwa taelo ya gagwe, re nea bohlatse bja Jesu Kriste le go tsebiša batho gore Jehofa ke Modimo wa therešo le yo Matla ohle; ka gona re amogela le go rwala ka lethabo leina leo molomo wa Morena Modimo o le boletšego gomme re kganyoga go tsebja le go bitšwa ka leina leo, ke gore, dihlatse tša Jehofa.” (Jesaya 43:10) Ruri leina leo le lefsa le ile la hlalosa gabotse modiro o mogolo wa bohle bao ba tlago go bitšwa ka lona! Ee, Jehofa o be a e-na le modiro woo bahlanka ba gagwe ka moka ba swanetšego go o dira. Karabelo ya bohle e be e kgahliša e le ruri!
7. Ke phetogo efe yeo e ilego ya dirwa ka 1932, gomme ka baka la’ng?
7 Bagolo ba bantši ka boikokobetšo ba ile ba dira modiro wa boboledi ka mafolofolo. Lega go le bjalo, dinageng tše dingwe bagolo bao ba kgethilwego ba ile ba ganetšana kudu le kgopolo ya gore motho yo mongwe le yo mongwe ka phuthegong o swanetše go tšea karolo bodireding bja phatlalatša. Go sa šetšwe seo, diphetogo tše di oketšegilego di be di le kgaufsi le go dirwa. Ka 1932 diphuthego di ile tša amogela taelo ka Morokami ya gore di se sa tšwela pele di kgetha bagolo le batiakone. Go e na le moo, di be di swanetše go kgetha komiti ya tirelo yeo e bopšago ke banna ba sekametšego dilong tša moya bao ba bego ba tšea karolo modirong wa go bolela phatlalatša. Ka gona, bolebeledi bo ile bja newa bao ba bego ba tšea karolo ka mafolofolo bodireding, gomme modiro o ile wa tšwela pele.
Seetša se se Oketšegilego se Bolela Diphetogo tše Oketšegilego
8. Ke phetogo efe yeo e ilego ya dirwa ka 1938?
8 Seetša se be se ‘tšwela pele se hlaba.’ Ka 1938 taba ya dikgetho e ile ya fedišetšwa sa ruri. Bahlanka ka moka ka phuthegong ba be ba kgethwa ka tsela ya pušo ya Modimo ka tlase ga bolebeledi bja “mohlanka yo a botegago le wa temogo.” (Mateo 24:45-47) Phetogo yeo e ile ya amogelwa gabotse ke mo e nyakilego go ba diphuthego ka moka tša Dihlatse tša Jehofa, gomme modiro wa go nea bohlatse o ile wa tšwela pele o enywa dienywa.
9. Ka 1972, go ile gwa thoma go dirišwa thulaganyo efe, gomme ke ka baka la’ng yeo e be e le phetogo e kgolo?
9 Go thoma ka October 1, 1972, go ile gwa ba le phetogo e nngwe gape tabeng ya bolebeledi ka phuthegong. Thulaganyo ya gore modiro wa bolebeledi o dirwe ke sehlopha sa bagolo e ile ya thoma ka diphuthegong tša Dihlatse tša Jehofa lefaseng ka bophara, ya tšeela legato thulaganyo ya gore modiro wa bolebeledi o dirwe ke mohlanka goba molebeledi o tee feela ka phuthegong. Thulaganyo ye e mpsha e ile ya kgothatša kudu banna ba godilego ka tsebo gore ba swanelege go etelela pele ka phuthegong. (1 Timotheo 3:1-7) Ka baka leo, bana babo rena ba bantši ba ile ba ba le phihlelo tabeng ya go rwala boikarabelo bja phuthego. Ruri ba ile ba ipontšha e le badiši ba bohlokwa kudu go batho ba bantši ba ba sa tšwago go amogela therešo ya Beibele bao ba tlilego ka phuthegong!
10. Ke thulaganyo efe yeo e ilego ya thoma go dirišwa ka 1976?
10 Ditho tša Sehlopha se Bušago di ile tša rulaganywa ka dikomiti tše tshelelago, gomme go thoma ka January 1, 1976, mediro ka moka ya mokgatlo le ya diphuthego lefaseng ka moka e ile ya hlokomelwa ke dikomiti tše. Ruri go ile gwa ipontšha go hola gore dibopego ka moka tša modiro wa Mmušo di hlokomelwe ke ‘baeletši ba bantši’!—Diema 15:22; 24:6.
11. Ke phetogo efe yeo e ilego ya dirwa ka 1992, gomme ka baka la’ng?
11 Go ile gwa ba le phetogo e nngwe ka ngwaga wa 1992, yeo e bego e ka bapetšwa le seo se ilego sa direga ka morago ga ge ba-Isiraele le ba bangwe ba boile bothopša Babele. Morago kua ka nako yeo, go be go se na ba-Lefi ba lekanego gore ba ka dira ditirelo tša tempeleng. Ka gona, ba-Nethinime bao e sego ba-Isiraele ba ile ba newa modiro o oketšegilego e le gore ba thuše ba-Lefi. Ka go dumelelana le se, e le go thuša sehlopha sa mohlanka yo a botegago le wa temogo go hlokomela mediro ya sona e oketšegago ya mo lefaseng, ka 1992 ba bangwe bao e lego karolo ya “dinku tše dingwe” ba ile ba newa boikarabelo bjo bo oketšegilego. Ba ile ba kgethwa e le bathuši ba dikomiti tša Sehlopha se Bušago.—Johane 10:16.
12. Jehofa o kgethile bjang khutšo gore e be molaki wa rena?
12 Mafelelo a tše ka moka e bile afe? Jehofa o re: “Ke tlo bea moláô ya ba molaki wa xaxo; ke tlo bea tokô, ya ba mmuši wa xaxo.” (Jesaya 60:17) Go na le “moláô” goba khutšo gare ga bahlanka ba Jehofa lehono, gomme lerato la go rata “tokô” le fetogile “mmuši” wa bona—matla ao a ba tutueletšago go hlankela Modimo. Ba rulagantšwe gabotse bakeng sa go dira modiro wa go bolela ka Mmušo le wa go dira barutiwa.—Mateo 24:14; 28:19, 20.
Jehofa o Hlabiša Seetša Dithutong
13. Ka bo-1920, Jehofa o ile a hlabišetša bjang batho ba gagwe seetša dithutong?
13 Jehofa gape o tšwela pele a hlabišetša batho ba gagwe seetša dithutong. Kutollo 12:1-9 e nea mohlala. Pego e bolela ka baanegwa-thwadi ba bararo ba seswantšhetšo—“mosadi” yo a imilego gomme a belega, “drakone” le “morwa, e motona.” Na o tseba gore yo mongwe le yo mongwe wa bona o emela mang? Ba ile ba hlaloswa ka sehlogong se se rego “Go Belegwa ga Setšhaba” ka tokollong ya Morokami (wa Seisemane) ya March 1, 1925. Sehlogo seo se ile sa nea batho ba Modimo kwešišo e kaone ya diporofeto tša mabapi le go belegwa ga Mmušo, e lego kwešišo yeo e ilego ya bontšha gabotse gore go na le mekgatlo e mebedi e sa swanego—wa Jehofa le wa Sathane. Ke moka ka 1927/28, batho ba Modimo ba ile ba lemoga gore Keresemose le menyanya ya matšatši a matswalo ga se ya thewa Mangwalong gomme ba ile ba kgaotša go e keteka.
14. Ke dithuto dife tša therešo tšeo di ilego tša hlaloswa gabotse ka bo-1930?
14 Ka bo-1930 go ile gwa ba le seetša se se oketšegilego dithutong tše tharo tša therešo. Ka nywaga e mentši, Barutwana ba Beibele ba be ba tseba gore “lešaba le legolo” leo go bolelwago ka lona go Kutollo 7:9-17 le be le fapane le ba 144 000 bao ba tlago go buša le Kriste e le dikgoši le baperisita. (Kutollo 5:9, 10; 14:1-5) Lega go le bjalo, go be go dutše go sa tsebje gabotse gore lešaba le legolo ke bomang. Go etša ge mahuba ao a hlatlogago a dira gore sebopego le mebala ya dilo tšeo di sa bonagalego gabotse di thome go bonagala, ka 1935 lešaba le legolo le ile la tsebja e le bao ba tlago go phologa ‘masetlapelo a magolo,’ bao ba nago le kholofelo ya go phela ka mo go sa felego lefaseng. Ka morago ngwageng wona woo go ile gwa hlaloswa taba e nngwe yeo e ilego ya kgoma bana ba nywaga ya go tsena sekolo ba Dihlatse tša Jehofa dinageng tše mmalwa. Ge moya wa borata-naga o be o oketšega lefaseng ka moka, Dihlatse di ile tša lemoga gore go dumediša folaga go be go bolela se se fetago mokgwa feela wa tlwaelo. Ngwageng o latetšego, go ile gwa hlaloswa thuto e nngwe ya bodumedi, ya gore Kriste o hwetše koteng ya tlhokofatšo, e sego sefapanong.—Ditiro 10:39.
15. Go kgethega ga madi go ile gwa gatelelwa neng gomme bjang?
15 Kapejana ka morago ga Ntwa ya II ya Lefase, e be e le tlwaelo go diriša tšhelo ya madi bakeng sa go alafa mašole ao a gobetšego, gomme go ile gwa ba le seetša se se oketšegilego mabapi le go kgethega ga madi. Tokollo ya Morokami (wa Seisemane) ya July 1, 1945 e ile ya kgothatša “barapedi ka moka ba Jehofa bao ba tsomago go phela ka mo go sa felego lefaseng la gagwe le lefsa la go loka gore ba hlomphe go kgethega ga madi le go dira dilo ka go dumelelana le ditaelo tša Modimo tša go loka tabeng ye ya bohlokwa.”
16. New World Translation of the Holy Scriptures e lokolotšwe neng, gomme e-na le dibopego dife tše pedi tše di kgahlišago?
16 Ka 1946 go ile gwa ba molaleng gore go nyakega phetolelo ya Beibele yeo e bego e latela tlhahlo ya diithuti tša morago bjale le yeo e sego ya šilafatšwa ke dithuto tšeo di theilwego metlwaeng ya Bojakane. Phetolelo e bjalo e thomilwe ka December 1947. Ka 1950 Phetolelo ya Lefase le Lefsa ya Mangwalo a Bakriste a Segerika e ile ya lokollwa ka Seisemane. Mangwalo a Sehebere a Seisemane a ile a gatišwa ka dibolumo tše hlano, gomme a lokollwa ka go latelelana go thoma ka 1953. Bolumo ya mafelelo e lokolotšwe ka 1960, nywaga ya ka godingwana ga e 12 ka morago ga ge modiro wa go fetolela o thomile. Beibele e feletšego ya New World Translation of the Holy Scriptures e le bolumo e tee e lokolotšwe ka 1961. Ka ge ga bjale e hwetšagala ka maleme a mantši, phetolelo ye e na le dibopego tše dingwe tše di kgahlišago. E diriša leina la Modimo, e lego Jehofa. Go oketša moo, go fetolela ga yona mengwalo ya mathomo ka go lebanya go neile batho sebaka sa go kwešiša therešo ya Modimo ka mo go oketšegilego.
17. Ke seetša sefe se se oketšegilego seo se ilego sa hlaba ka 1962?
17 Tlhaloso ya polelwana “balaodi ba bagolo” yeo e lego go Ba-Roma 13:1 le gore Mokriste o swanetše go ikokobeletša bona go fihla kae e neilwe ka 1962. Go ithuta ka mo go tseneletšego kgaolo 13 ya Baroma le ditemana tša Mangwalo tše bjalo ka Tito 3:1, 2 le 1 Petro 2:13, 17 go ile gwa bontšha gabotse gore polelwana “balaodi ba bagolo” ga e šupe go Jehofa Modimo le Jesu Kriste, eupša e šupa go balaodi ba mebušo ya batho.
18. Ke ditherešo dife tše dingwe tšeo di ilego tša hlaloswa gabotse ka bo-1980?
18 Nywageng e latetšego, tsela ya baloki e ile ya tšwela pele e hlabelwa ke seetša. Ka 1985 go ile gwa ba le seetša mabapi le seo se bolelwago ke go bolelwa ba lokile “bakeng sa bophelo” le go ba yo a lokilego bjalo ka mogwera wa Modimo. (Baroma 5:18; Jakobo 2:23) Seo se bolelwago ke Ngwaga wa Bakriste wa Megobo se ile sa hlaloswa ka botlalo ka 1987.
19. Jehofa o hlabišeditše bjang batho ba gagwe seetša se se oketšegilego sa moya nywageng e sa tšwago go feta?
19 Ka 1995 go hlaolwa ga “dinku” go “dipudi” go ile gwa kwešišwa gabotse. Ka 1998 go ile gwa newa tlhaloso e feletšego ya pono ya Hesekiele ya tempele, yeo e šetšego e le kgaufsi le go phethagatšwa. Ka 1999 go ile gwa hlaloswa gore ke neng le gona ke bjang ‘makgapha a emego lefelong le lekgethwa.’ (Mateo 24:15, 16; 25:32) Le gona, ka 2002 go ile gwa ba le kwešišo e oketšegilego mabapi le seo se bolelwago ke go rapela Modimo “ka moya le ka therešo.”—Johane 4:24.
20. Ke karolong efe e nngwe moo batho ba Modimo ba bilego le diphetogo?
20 Go oketša tabeng ya go dira diphetogo mokgatlong le dithutong, go bile le diphetogo boitshwarong bja Bokriste. Ka mohlala, ka 1973 go dirišwa ga motšoko go be go kwešišwa e le ‘go šilafatša nama’ gomme go lebelelwa e le sebe se segolo. (2 Bakorinthe 7:1) Nywaga-some ka morago, tokollo ya Morokami (wa Seisemane) ya July 15, 1983 e ile ya hlalosa boemo bja rena tabeng ya go dirišwa ga dithunya. Ye e fo ba mehlala ya seetša se se oketšegago mehleng ya rena.
Tšwelang Pele le Sepela Tseleng ya Seetša se se Oketšegago
21. Ke go ba le kgopolo efe mo go tlago go re thuša go tšwela pele re sepela tseleng ya seetša se se oketšegago?
21 Mogolo yo mongwe wa nako e telele o dumela ka gore: “Go amogela phetogo ge e e-tla le go dira dilo ka go dumelelana le yona go ka ba thata.” O thušitšwe ke’ng go amogela diphetogo tše dintši tšeo a di bonego nywageng e 48 ya ge e le mogoeledi wa Mmušo? O araba ka gore: “Go ba le kgopolo e swanetšego go bohlokwa. Go gana go amogela phetogo go bolela gore o tla šalela morago ge mokgatlo o tšwela pele. Ge e ba ke ikhwetša ke le boemong bja go thatafalelwa ke go amogela diphetogo, ke naganišiša ka mantšu ao Petro a ilego a a botša Jesu a rego: ‘Morena, re tla ya go mang? O na le mantšu a bophelo bjo bo sa felego.’ Ke moka ka ipotšiša gore, ‘Ke tla ya kae—ntle kua lefaseng le lego lefsifsing?’ Se se nthuša go kgomarela ka go tia mokgatlong wa Modimo.”—Johane 6:68.
22. Re holwa bjang ke go sepela seetšeng?
22 Lefase leo le re dikologilego le tloga le le gare ga kgampi ya lefsifsi. Ge Jehofa a tšwela pele a hlabišetša batho ba gagwe seetša, phapano magareng ga bona le bao ba lego lefaseng e tšwela pele e bonagala kudu. Seetša se se re direla’ng? Ee, go etša ge lebone la koloi leo le bonegilego molete o lego tseleng le sa tloše molete woo, seetša se se tšwago Lentšung la Modimo ga se tloše melaba. Lega go le bjalo, seetša sa Modimo ka kgonthe se re thuša go e phema e le gore re kgone go tšwela pele re sepela tseleng ya seetša se se oketšegago. Ka gona, anke re tšweleng pele re ela hloko lentšu la Jehofa la boporofeta, “go etša lebone le le bonegilego lefelong la lefsifsi.”—2 Petro 1:19.
Na o a Gopola?
• Ke diphetogo dife tšeo Jehofa a di tlišitšego mokgatlong wa batho ba gagwe?
• Seetša se se oketšegago se tlišitše diphetogo dife dithutong?
• Ke diphetogo dife tšeo wena ka noši o ilego wa di bona, gomme ke’ng seo se go thušitšego go di amogela?
• Ke ka baka la’ng o nyaka go tšwela pele o sepela tseleng ya seetša se se oketšegago?
[Dipotšišo tša Thuto]
[Diswantšho go letlakala 27]
Kopano ya 1922 ya kua Cedar Point, Ohio, e ile ya matlafatša Barutwana ba Beibele gore ba dire modiro wa Modimo
[Seswantšho go letlakala 29]
“Phetolelo ya Lefase le Lefsa ya Mangwalo a Bakriste a Segerika” yeo e lokolotšwego ka 1950, ke N. H. Knorr
[Mothopo wa Seswantšho go letlakala 26]
© 2003 BiblePlaces.com