Ba Thomile ka go Rakedišwa, ke Moka ba Amogelwa

NYWAGENG e fetilego, Santiago le mosadi wa gagwe, Lourdes, ba ile ba hudugela toropong e botse ya Huillcapata kua Peru, go yo boledišana le batho ba gona moo ka molaetša wa Beibele. Lega go le bjalo, go se go ye kae moruti yo a tšwago Cuzco o ile a fihla gomme a kgobokanya badudi ba moo Huillcapata. Moruti o ile a ba lemoša ka gore go ba gona ga Dihlatse tša Jehofa go be go tla tliša kotlo e bolayago gotee le go wa ga lehlwa le lešoro leo le bego le tla bolaya dikgomo tša bona gotee le go senya dibjalo tša bona.

Ba bantši ba bona ba ile ba hlohleletšwa ke se seo go thwego ke porofeto, gomme lebakeng la ngwaga le seripa, ga gwa ka gwa ba le o tee wa badudi yo a ilego a amogela taletšo ya Santiago le Lourdes ya go ithuta Beibele. Mohlankedi wa mmušo wa toropong yeo yo a bitšwago Miguel, e lego motlatša-mmuši, o ile a rakediša Santiago le Lourdes setarateng gomme a ba foša ka matlapa. Eupša ba be ba dula ba itshwere ka tsela ya go dira khutšo le ya Bokriste.

Ge nako e dutše e e-ya, badudi ba bangwe ba ile ba amogela thuto ya Beibele. Gaešita le Miguel o ile a fetoša boemo bja gagwe bja kgopolo. O ile a thoma go ithuta le Santiago, a tlogela go nwa ka mo go feteletšego gomme a ba motho yo a dirago khutšo. Mafelelong Miguel, mosadi wa gagwe gotee le barwedi ba gagwe ba babedi ba ile ba amogela therešo ya Beibele.

Lehono, go na le phuthego e golago ya Dihlatse tša Jehofa toropong yona yeo. Miguel o thabišwa ke gore bontši bja matlapa ao a fošitšego Santiago le Lourdes ka ona ga a ka a ba itia, gape o leboga banyalani ba bakeng sa mohlala wa bona o mobotse wa go dira khutšo.

[Diswantšho go letlakala 32]

Go dira khutšo ga Santiago le Lourdes (ka mo godimo) go ile gwa dira gore Miguel (ka go le letona) a fetoše boemo bja gagwe bja kgopolo