“Le Lengwe la Matšatši a Kaone Kudu Bophelong Bja-ka”

MOKGATLO wa Beyondblue wo o thekgwago ke mmušo ka tša ditšhelete wa Australia, o bolela gore: “Kgateletšego ke bothata bjo bo begwago gantši kudu, e bile mohlomongwe ke bolwetši bjo bogolo kudu bja monagano bjo bo swarago bafsa.” Dinyakišišo di bontšha gore ngwageng o mongwe le o mongwe bafsa ba ka bago 100 000 ba Australia ba tlaišwa ke kgateletšego.

Bafsa ba Bakriste le bona ba a gateletšega. Lega go le bjalo, go bontšha tumelo go Jehofa go thušitše ba bantši ba bona go fenya maikwelo a sa swanelago le go atlega bjalo ka bafsa. Ka go dira bjalo, ba ba le tutuetšo e botse go ba bangwe. Bjang?

Ela hloko phihlelo ya Claire wa nywaga e 18. Yena le mmagwe ba kopanela le phuthego ya Dihlatse tša Jehofa ya Melbourne. Claire o ile a gateletšega ge tatagwe a se no lahla lapa. Eupša tumelo ya gagwe go Tatagwe wa legodimong, Jehofa, e ile ya dula e tiile. Ka letšatši le lengwe, ngaka ya lapa yeo e bitšwago Lydia, e ile ya etela gabo Claire go bona mmago Claire yo a bego a babja. Ka morago, e ile ya ithapela go iša Claire mabenkeleng. Ge ba le tseleng e ile ya botšiša Claire ge e ba a e-na le lesogana. Claire o ile a hlalosa gore bjalo ka yo mongwe wa Dihlatse tša Jehofa, o be a sa bapale ka go ba le masogana. Se se ile sa makatša ngaka. Ke moka Claire o ile a hlalosa kamoo Beibele e mo thušitšego ka gona go dira diphetho tše bohlale bophelong. Mafelelong, Claire o ile a ithapela go tlišetša ngaka kgatišo yeo e theilwego Beibeleng yeo yena ka noši e ilego ya mo thuša kudu. Puku yeo e bitšwa Dipotšišo tša Bafsa le Dikarabo tše Šomago.

Matšatši a mararo ka morago ga go amogela puku, Lydia o ile a leletša mmago Claire mogala go mmotša kamoo a thabetšego go e bala. Ke moka o ile a kgopela dipuku tše dingwe gape tše tshela bakeng sa bašomi-gotee le yena. Ge Claire a išitše dipuku, ngaka e ile ya hlalosa kamoo e bego e kgahlilwe ke tumelo ya Claire ka gona. Claire o ile a ithapela go swara thuto ya Beibele le ngaka gomme e ile ya dumela.

Ka dikgwedi tše mmalwa, Claire o be a swara thuto le ngaka nakong yona ya matena. Ke moka Lydia o ile a botšiša ge e ba Claire a ka kgona go bolela seminareng mabapi le taba ya kgateletšego go bafsa. Gaešita le ge a be a tšhogile, Claire o ile a dumela. Batho ba fetago 60 ba ile ba ba gona seminareng. Ditsebi tše nne tša bophelo bjo bobotse bja monagano—tšeo ka moka e lego batho ba bagolo—di ile tša bolela le batheetši. Ke moka e ile ya ba nako ya Claire ya go bolela. O ile a gatelela kamoo go lego bohlokwa ka gona gore bafsa ba be le tswalano le Modimo. O ile a hlalosa gore Jehofa Modimo o tshwenyegile kudu ka bafsa gomme o thuša bohle bao ba retologelago go yena bakeng sa go hwetša thekgo le khomotšo. Go oketša moo, o ile a bontšha kgodišego ya gagwe ya gore Jehofa kgaufsinyane o tla fediša dibopego ka moka tša malwetši a mmele gotee le a monagano. (Jesaya 33:24) Na bohlatse bjo bjo bobotse bo bile le mafelelo afe?

Claire o itše: “Ba bantši ba ile ba tla go nna ka morago ga lenaneo go mpotša kamoo ba kgahlilwego ke go kwa mofsa a bolela ka Modimo. Ke ile ka sepediša dikopi tše 23 tša puku ya Dipotšišo tša Bafsa. Banenyana ba bararo gare ga batheetši ba ile ba mpha dinomoro tša bona tša mogala. Gona bjale yo mongwe wa banenyana bao o ithuta Beibele. Leo e be e le le lengwe la matšatši a kaone kudu bophelong bja-ka.”