Phihlelo

Ke Hweditše ‘tše Pelo Ya-ka e di Kgopelago’

KA GE GO ANEGA DOMINIQUE MORGOU

Mafelelong, ka December 1998, ke be ke le Afrika! Toro ya-ka ya bjaneng ga bjale e be e phethagetše. Ka mehla ke be ke thabišwa ke go nagana ka melala ya Afrika le diphoofolo tše di kgahlišago tša naga. Ga bjale ke be ke le moo! Ka yona nako yeo, toro e nngwe le yona e be e phethagetše. Ke be ke le moebangedi wa nako e tletšego ke hlankela nageng e šele. Go ba bantši, se se ka ba se ile sa bonagala se sa kgonege. Ga ke bone gabotse, gomme ke sepela ditarateng tša santa tša metsaneng ya Afrika ke hlahlwa ke mpša yeo e tlwaeleditšwego go sepela ditarateng tša ditoropong tša Yuropa. E re ke go hlalosetše kamoo go tlilego ka gona gore ke kgone go hlankela kua Afrika le kamoo Jehofa a ilego a nnea ‘tše pelo ya-ka e di kgopelago.’—Psalme 37:4.

KE BELEGWE ka June 9, 1966, ka borwa bja Fora. Ke be ke le phejane go bana ba šupago—bašemane ba babedi le banenyana ba bahlano—ka moka ga rena re be re hlokomelwa ke batswadi ba rena ba lerato. Lega go le bjalo, ge ke be ke sa le ngwana ke ile ka diragalelwa ke selo se se sa kgahlišego. Go etša makgolo, mma le yo mongwe wa banabešo, ke swerwe ke bolwetši bja leabela bjoo bo feleletšago ka bofofu.

Ge ke le mahlalagading, ke ile ka lebeletšana le kgethollo ya morafo, go beba sefahlego le boikaketši, tšeo di ilego tša ntira gore ke rabele kgahlanong le setšhaba. E be e le nakong ye e thata moo re ilego ra hudugela tikologong ya Hérault. Ge re le moo, go ile gwa direga selo se sengwe se se kgahlišago.

Mesong e mengwe ya Sontaga, Dihlatse tša Jehofa tše pedi di ile tša tla legaeng la gešo. Mma o  be a di tseba gomme o ile a di dumelela gore di tsene. Yo mongwe wa basadi ba ba Dihlatse o ile a botšiša mma ge e ba a be a gopola gore o ile a ka a mo holofetša gore ka letšatši le lengwe o tla amogela thuto ya Beibele. Mma o ile a gopola gomme a botšiša gore, “Re tla thoma neng?” Ba ile ba dumelelana ka gore ba gahlane mesong e mengwe le e mengwe ya Sontaga, gomme ka tsela ye mma o ile a thoma go ithuta “therešô ya Ebangedi.”—Ba-Galatia 2:14.

Go ba le Temogo

Mma o ile a leka ka matla go kwešiša le go gopola seo a ithutilego sona. Ka ge a be a foufetše, o be a swanetše go swara dilo ka moka ka hlogo. Dihlatse di be di sa mo felele pelo. Ge e le nna, nako le nako ge Dihlatse di be di tlile, ke be ke ikuta ka phapošing ya-ka gomme ke e-tšwa feela ge di sepetše. Lega go le bjalo, mathapameng a mangwe ke ile ka gahlana le Eugénie, e lego yo mongwe wa Dihlatse, gomme a boledišana le nna. O ile a mpotša gore Mmušo wa Modimo o tla fediša boikaketši, lehloyo le kgethollo lefaseng. O itše: “Ke Modimo feela yo a nago le tharollo.” Ke moka a mpotšiša ge e ba ke nyaka go tseba mo go oketšegilego. Letšatšing le le latelago, ke ile ka thoma go ithuta Beibele.

E be e le mathomo ke e-kwa dilo tšeo ke bego ke ithuta tšona. Mo nakong ye ke ile ka kwešiša gore Modimo o dumeletše bokgopo ka nakwana lefaseng ka mabaka a kwagalago. (Genesi 3:15; Johane 3:16; Ba-Roma 9:17) Ke ile ka ithuta gape gore Jehofa ga se a re tlogela re se na kholofelo. O re neile kholofelo e kgahlišago ya bophelo bjo bo sa felego lefaseng la paradeise. (Psalme 37:29; 96:11, 12; Jesaya 35:1, 2; 45:18) Paradeiseng yeo, mahlo a-ka a be a tla boela a bona, ka ge a be a tšwela pele a fokola.—Jesaya 35:5.

Go Tsena Tirelong ya Nako e Tletšego

Ka December 12, 1985, ke ile ka bontšha boineelo bja-ka go Jehofa ka go kolobetšwa meetseng, gomme ka tlatša ngwanešo e lego Marie-Claire, yo a bego a šetše a gatile mogato wo. Go se go ye kae, kgaetšedi’a-ka e lego Jean-Pierre le yena o ile a kolobetšwa, gomme le mma yo a rategago o ile a dira bjalo.

Phuthego yeo ke bego ke kopanela le yona e be e-na le babulamadibogo ba mmalwa ba ka mehla, goba baebangedi ba nako e tletšego. Ke be ke kgothatšwa ke lethabo la bona le mafolofolo a bona bodireding. Gaešita le Marie-Claire, yo a bego a swerwe ke bolwetši bja mahlo e bile a rwala sedirišwa sa go thekga leoto le lengwe, o ile a tsena tirelong ya nako e tletšego. O sa dutše a nkgothatša moyeng go fihla le nankhono. Go dula ke e-na le babulamadibogo phuthegong le ka lapeng go ile gwa nthuša gore le nna ke rate go tšea karolo tirelong ya nako e tletšego. Ka gona, ka November 1990, ke ile ka thoma go hlankela kua Béziers ke le mmulamadibogo.—Psalme 94:17-19.

Go Lebeletšana le go Nolega Moko

Bodireding, ke be ke thušwa ke babulamadibogo ba bangwe bao ba bego ba ntlhokomela kudu. Lega go le bjalo, nako le nako ke be ke nolwa moko ke mafokodi a-ka gomme ke kganyoga go dira mo go oketšegilego. Lega go le bjalo, Jehofa o ile a nthekga dinakong tšeo ka moka ge ke be ke nolegile moko. Ke ile ka dira nyakišišo go Watch Tower Publications Index, ka tsoma diphihlelo tša babulamadibogo bao go swana le nna ba bego ba swerwe ke bolwetši bja go se bone gabotse. Ke ile ka makatšwa ke go bona gore e be e tloga e le ba bantši! Dipego tše tše di holago le tše di kgothatšago di ile tša nthuta go tšeela godimo seo ke bego ke kgona go se dira le go kwešiša mafokodi a-ka.

E le gore ke kgone go itlhokomela, nna le Dihlatse tše dingwe re be re šoma mošomo wa go hlwekiša meagong yeo e nago le mabenkele a mantši. Ka letšatši le lengwe ke ile ka lemoga gore batho bao ke šomago le bona ba be ba hlwekiša mafelong ao ke bego ke sa tšwa go a hlwekiša. Go molaleng gore ke be ke sa hlwekiše gabotse. Ke ile ka ya go bona Valérie, mmulamadibogo yo e bego e le mohlokomedi wa sehlopha sa rena sa go hlwekiša, ka mo kgopela gore a bolele le nna a sa šie selo gomme a mpotše ge e ba ke be ke thatafaletša batho ka moka bophelo. Ka botho, o ile a ntumelela gore ke tlogele mošomo ge feela ke be ke ikwa gore nka se sa kgona go tšwela pele. Ka March 1994, ke ile ka tlogela mošomo wa-ka wa go hlwekiša.

Le gona mo, ke ile ka nolwa moko ke go ikwa ke hloka mohola. Ke ile ka rapela Jehofa go tšwa pelong, gomme ke a tseba gore o kwele dithapelo tša-ka. Le mo nakong ye, go ithuta Beibele le dikgatišo tša Bokriste go ile gwa nthuša kudu. Le ge mahlo a-ka a be a dutše a fokola go ya pele,  kganyogo ya-ka ya go rata go hlankela Jehofa e be e tšwela pele e matlafala. Ke be ke tla dira’ng?

Go Leta, Gomme ka Morago ka Dira Phetho ka go Akgofa

Ke ile ka kgopela gore ke newe tlwaetšo Lefelong la go Rutwa go Itirela Dilo la Difofu le Batho ba sa Bonego Gabotse kua Nîmes gomme mafelelong ke ile ka dumelelwa go ya gona ka dikgwedi tše tharo. Nako yeo ke e feditšego ke le moo e bile le mohola. Ke ile ka thoma go kwešiša boemo bja-ka bja bofofu gomme ka ithuta go itlwaelanya le bjona. Go gwerana le batho ba bangwe bao ba bego ba swerwe ke malwetši a fapa-fapanego go ile gwa nthuša go lemoga gore kholofelo ya-ka ya Bokriste e tloga e le ya bohlokwa. Bonyenyane ke be ke e-na le maikemišetšo bophelong e bile ke be ke e-na le selo sa mohola seo nka se dirago. Go oketša moo, ke ile ka ithuta Mongwalo wa Difofu wa Sefora.

Ge ke be ke boela gae, lapa lešo le ile la lemoga gore tlwaetšo yeo e nthušitše kudu. Lega go le bjalo, selo se nnoši seo ke bego ke tloga ke sa se rate e be e le patla e tšhweu yeo ke bego ke swanetše go e diriša. Go be go le thata go nna go diriša “patlana” yeo. E be e tla ba mo gobotse go ba le selo se sengwe seo se ka nthušago—mohlomongwe mpša yeo e tlwaeleditšwego go hlahla difofu.

Ke ile ka kgopela gore ke newe mpša eupša ka botšwa gore go be go e-na le batho ba bantši bao ba e letetšego. Le gona, mokgatlo wa go nyakela difofu dimpša o be o tla swanelwa ke go dira nyakišišo pele. Ga se difofu ka moka tšeo di bego di newa mpša yeo e tlago go di hlahla. Ka letšatši le lengwe mosadi yo a bego a thuša go hlokomela mokgatlo wa difofu o ile a mpotša gore sehlopha seo se bapalago thenise sa lefelong leo se be se tlo neela ka mpša yeo e tlago go hlahla sefofu goba motho yo a sa bonego gabotse yo a dulago tikologong ya rena. O boletše gore o ile a nagana ka nna. Na ke be ke tla e amogela? Ke ile ka lemoga gore ke thušitšwe ke Jehofa tabeng ye gomme ka amogela thušo yeo e botho. Lega go le bjalo, ke ile ka swanelwa ke go letela mpša yeo.

Ke sa Dutše ke Nagana ka Afrika

Ge ke dutše ke letile, ke ile ka lebiša tlhokomelo ya-ka selong se sengwe. Go etša ge ke boletše pejana,  ga e sa le go tloga bjaneng bja-ka ke be ke dutše ke rata Afrika kudu. Go sa šetšwe gore mahlo a-ka a be a mpefala go ya pele, lerato leo le ile la gola go feta le ge e le neng pele, kudu-kudu ka ge ke be ke kwele gore batho ba bantši kudu kua Afrika ba rata go ithuta Beibele e bile ba rata go hlankela Jehofa. Pejana ga moo, re ile ra re re iketlile ka botša Valérie gore ke tla rata go yo etela Afrika. Ke moka ka mo kgopela gore a sepele le nna. O ile a dumela, gomme re ile ra ngwalela makala a mmalwa a Dihlatse tša Jehofa a kua Afrika a batho bao ba bolelago Sefora.

Re ile ra arabja ke lekala la Togo. Ke be ke thabile kudu, gomme ka kgopela Valérie gore a mpalele lengwalo leo. Lengwalo e be e le le le kgothatšago kudu, ka gona Valérie o ile a re: “Ge e ba go le bjalo, gona a re ye.” Ka morago ga go ngwalelana le bana babo rena ba lekaleng leo, ke ile ka laelwa gore ke ikgokaganye le Sandra, mmulamadibogo yo a dulago Lomé, e lego motse-mošate wa Togo. Re ile ra rulaganya gore re tla sepela ka December 1, 1998.

A phapano e kgolo gakaakang! Eupša ruri e be e le e thabišago. Ka morago ga ge sefofane se kotame kua Lomé, re ile ra fologa gomme ra gahlanetšwa ke phišo ya Afrika. Sandra o be a re letetše. Re be re sa tsebane, eupša re ile ra ikwa eka ke kgale re le bagwera di sa tloga fase. Pejana ga ge re ka fihla, Sandra le modirišani-gotee le yena e lego Christine, ba be ba sa tšwa go kgethwa e le babulamadibogo ba kgethegilego kua Tabligbo, e lego torotswana yeo e lego bogareng bja naga. Ga bjale re be re e-na le tokelo ya go sepela le bona kabelong ya bona e mpsha. Re dutše dikgwedi tše ka bago tše pedi, gomme ge re be re sepela, ke be ke tseba gore ke tla boa.

Ke be ke Thabetše go Boa

Ge ke le kua Fora, kapejana ke ile ka thoma go itokišeletša leeto la-ka la bobedi la go ya Togo. Ka thekgo ya lapa lešo, ke ile ka kgona go dira ditokišetšo tša go yo dula gona dikgwedi tše tshela. Ka gona, ka September 1999, ke ile ka namela sefofane gape ka boela Togo. Lega go le bjalo, mo nakong ye ke be ke sepela ke nnoši. Akanya kamoo ba lapa lešo ba ilego ba ikwa ka gona ge ke be ke sepela ke nnoši go sa šetšwe bofokodi bja-ka! Eupša ba be ba sa swanela go tshwenyega. Ke ile ka kgonthišetša batswadi ba-ka gore bagwera ba-ka, bao go nna ba bego ba šetše ba le bjalo ka lapa lešo, ba tla ba ba nkemetše kua Lomé.

E be e le mo go thabišago gakaakang go boela tikologong yeo ye go yona batho ba bantši kudu ba thabelago go ithuta Beibele! Ke mo go tlwaelegilego go bona batho ba bala Beibele setarateng. Kua Tabligbo batho ba no go biletša gore o tlo boledišana le bona ka Beibele. Le gona, e be e tloga e le tokelo e kgolo gakaakang go dula mafelong a bodulo a maemo a tlasana le dikgaetšedi tše pedi, tšeo e lego babulamadibogo ba kgethegilego! Ke ile ka thoma go tseba tsela ya batho ba bangwe ya bophelo, tsela e fapanego ya go lebelela dilo. Selo sa bohlokwa kudu ke gore ke ile ka lemoga gore bana babo rena le dikgaetšedi ba Bakriste ba kua Afrika ba etiša mediro ya Mmušo pele maphelong a bona. Ka mohlala, taba ya gore ba swanetše go sepela dikhilomithara tše dintši go ya Holong ya Mmušo ga e ba thibele go ba gona dibokeng. Le gona, ke ile ka ithuta mo gontši ka go rata ga bona batho le go amogela baeng moo ba bego ba go bontšha.

Ka letšatši le lengwe ge ke be ke boa tirelong ya tšhemo, ke ile ka ntšhetša Sandra sa mafahleng ke mmotša gore ke be ke boifa go boela Fora. Mahlo a-ka a be a fokola le go feta. Ke be ke nagana ka  ditarata tša kua Béziers tšeo di nyeumago ka batho le tšeo di tletšego lešata, ke nagana ka manamelelo a meagong ya bodulo le ka dilo tše dingwe tše dintši tšeo di dirago gore bophelo bo be thata go motho yo a sa bonego gabotse. Ka mo go fapanego, ditarata tša Tabligbo, le ge di be di se na sekontiri, di be di homotše—di sa nyeume ka batho e bile di se na dinamelwa tše dintši. Ga bjale, ke be ke tla kgona bjang go phela kua Fora ka ge ke be ke šetše ke tlwaetše go phela Tabligbo?

Matšatšing a mabedi ka morago mma o ile a nteletša mogala bakeng sa go ntsebiša gore sekolo sa go tlwaetša dimpša go hlahla difofu se be se nkemetše. Mpša e kgolo yeo e bitšwago Océane e be e ikemišeditše go ba “mahlo” a-ka. Mo le gona, dinyakwa tša-ka di ile tša hlokomelwa gomme ka se sa tshwenyega. Ka morago ga dikgwedi tše tshela ke le tirelong e thabišago kua Tabligbo, ke ile ka boela Fora go yo gahlana le Océane.

Sekolo se ile sa tlwaetša Océane ka dikgwedi tše mmalwa, ke moka sa nnea yona. Mathomong go be go se bonolo. Re ile ra swanelwa ke go ithuta gore re kwešišane. Lega go le bjalo, ganyenyane-ganyenyane ke ile ka thoma go lemoga kamoo Océane e bego e tloga e nthuša ka gona. Therešo ke gore ga bjale Océane ke karolo ya bophelo bja-ka. Batho ba Béziers ba ile ba ikwa bjang ge ba be ba bona ke ba etela ke sepela le mpša? Ba be ba ntlhompha kudu e bile e le ba botho. Océane e ile ya fetoga “mogale” tikologong ya gabo rena. Ka ge batho ba bantši ba sa ikwe ba phuthologile ge ba dutše le motho yo a foufetšego, go sepela le mpša ye go ile gwa nthuša go bolela ka bolwetši bja-ka ka bolokologi. Batho ba be ba iketla gomme ba ntheetša. Ke therešo gore Océane e ile ya fetoga tsela e kaone kudu ya go thoma poledišano.

Ke le Afrika le Océane

Ga se ka ka ka lebala Afrika, gomme ga bjale ke ile ka thoma go lokišeletša leeto la-ka la boraro. Mo nakong ye ke ile ka sepela le Océane. Ke ile ka sepela gape le banyalani ba bafsa e lego Anthony le Aurore le mogwer’a-ka Caroline—bao ka moka e lego babulamadibogo go swana le nna. Re fihlile Lomé ka September 10, 2000.

Mathomong, batho ba bantši ba be ba boifa Océane. Ke batho ba sego kae kua Lomé bao ba kilego ba bona mpša e kgolo gakaalo, ka ge dimpša tše dintši tša kua Togo e le tše dinyenyane. Ge ba be ba bona lepanta leo ke bego ke e bofile ka lona, ba bangwe ba be ba nagana gore ke mpša e bogale yeo e bego e swanetše go dula e bofilwe. Océane le yona e ile ya thoma go se sa bota motho, gomme e be e ikemišeditše go ntšhireletša selong le ge e le sefe seo e naganago gore se ka nkgobatša. Lega go le bjalo, go se go ye kae Océane e ile ya ikwa e phuthologile tikologong ye e mpsha. Ge ke e bofa ka lepanta, e a tseba gore e mošomong—e swanetše go itshwara gabotse, e bontšhe boikarabelo gomme e dule e na le nna. Ge ke e bofolotše e a bapala, gomme ka dinako tše dingwe e a seleka. Re bapala kudu re le gotee.

Ka moka ga rena re be re laleditšwe gore re dule le Sandra le Christine kua Tabligbo. E le go thuša bana babo rena le dikgaetšedi ba tikologong ye gore ba tlwaele Océane, re ile ra ba laletša gore ba re etele gomme ra ba hlalosetša karolo yeo e kgathwago ke mpša ya go hlahla sefofu, lebaka leo ke bego ke swanetše go ba le yona le go ba bontšha kamoo ba swanetšego go dira dilo ka gona ge e le gona. Bagolo ba ile ba ntumelela gore ke tle le Océane Holong ya Mmušo. Ka ge tokišetšo ye e be e tloga e sa tlwaelega kua Togo, go ile gwa dirwa tsebišo bakeng sa go hlalosetša phuthego mabapi le taba ye. Bodireding, Océane e be e sepela le nna ge feela ke be ke e-ya maetong a go boela le go yo swara dithuto tša Beibele—maemong ao go ba gona ga yona go bego go kwešišwa gabonolo.

Ke sa dutše ke thabela go dira boboledi tikologong ye. Ka dinako tšohle ke be ke kgahlwa ke kwelobohloko ya batho ba ba botho, yeo ba bego ba e bontšha ka ditiro tša bona tše botho, tše bjalo ka go akgofela ga bona go nnea setulo. Ka October 2001, mma o ile a sepela le nna leetong la-ka la bone la go ya Togo. Ka morago ga dibeke tše tharo o ile a boela Fora, a kgonthišegile gore ke phela gabotse e bile a thabile.

Ke tloga ke leboga Jehofa gore ke ile ka kgona go mo hlankela kua Togo. Ke kgodišegile gore Jehofa o tla tšwela pele a nnea ‘tšeo pelo ya-ka e di kgopelago’ ge ke dutše ke diriša tšohle tšeo ke nago natšo tirelong ya gagwe. *

[Mongwalo wa ka tlase]

[Diswantšho go letlakala 10]

Ka mehla ke be ke dutše ke thabišwa ke go nagana ka melala ya Afrika le diphoofolo tše di kgahlišago tša naga

[Seswantšho go letlakala 10]

Océane e be e e-ya le nna maetong a go boela

[Seswantšho go letlakala 11]

Bagolo ba ile ba ntumelela gore ke tle le Océane dibokeng