“O Phatšê Naxa”
“O Phatšê Naxa”
“O phatšê naxa yé ka botelele le ka bophara.”—Genesi 13:17.
1. Ke taelo efe e sa tlwaelegago yeo Modimo a ilego a e nea Aborahama?
NA O thabela go boga naga, mohlomongwe go tšea leeto ka koloi mafelo-bekeng? Ba bangwe ba rata go sepela ka paesekela e le gore ba ithobolle le gore ba thabele go bona naga ba iketlile. Lega go le bjalo, ba bangwe ba kgetha go sepela ka maoto e le tsela ya gore ba tlwaelane le tikologo le gore ba e thabele ba iketlile. Maeto a bjalo gantši a tšea nako e lekanyeditšwego. Eupša akanya kamoo Aborahama a swanetšego go ba a ile a ikwa ka gona ka morago ga ge Modimo a mmoditše gore: “Tsoxa-xê O phatšê naxa yé ka botelele le ka bophara, ka xobane ke Xo nea yôna”!—Genesi 13:17.
2. Ka morago ga go tloga Egipita, Aborahama o ile a ya kae?
2 Nagana ka taba e dikologilego ya mantšu ao. Aborahama o be a ile a dula ka nakwana kua Egipita a e na le mosadi wa gagwe le ba bangwe. Genesi kgaolo 13 e re botša gore ba ile ba tloga Egipita gomme ba hudušetša mehlape ya bona “Negebe.” Ke moka Aborahama “xo la Borwa [“Negebe,” NW] ó tloxile a sepela, a fihla Bethele.” Ge bothata bo be bo rotoga magareng ga badiši ba gagwe le ba Lota e lego ngwana wa morwarragwe go ile gwa ba molaleng gore bobedi bja bona ba be ba tla swanelwa ke gore ba arogane mafulo, gomme Aborahama ka botho o ile a botša Lota gore a kgethe pele. Lota o ile a kgetha ‘molala wa nokeng ya Jorodane,’ e lego moedi o nonnego go “etša thšemo ya Morêna,” gomme ge nako e dutše e e-ya o ile a dula Sodoma. Modimo o ile a botša Aborahama gore: “Lebêlêla Ò le xôna-moo, O išê mahlô thokô ya Lebowa, le Borwa, le Bohlabêla, le Bodikêla.” Go bonagala Aborahama a ile a kgona go bona dikarolo tše dingwe tša naga a le lefelong le le phagamego la Bethele. Lega go le bjalo, o be a sa swanetšwe ke go dira mo go oketšegilego. Modimo o ile a mo kgopela gore a “phatšê naxa” e le gore a tlwaelane le sebopego gotee le ditikologo tša yona.
3. Ke ka baka la’ng go ka ba thata go bopa seswantšho-kgopolo sa maeto a Aborahama?
3 Go sa šetšwe gore Aborahama o ile a phatša naga go fihla bokgoleng bofe pele ga ge a ka fihla Heburone, go bonagala a be a tloga a tlwaelane le Naga ya Kholofetšo go feta bontši bja rena. Nagana ka mafelo ao go boletšwego ka ona ka pegong ye—Negebe, Bethele, molala wa nokeng ya Jorodane, Sodoma le Heburone. Na o hwetša go le thata go bopa seswantšho-kgopolo sa moo mafelo a bjalo a bego a le gona? Go ba bantši go thata ka gobane ke batho ba Jehofa ba sego kae bao ba ilego ba etela mafelo ao ba balago ka ona ka Beibeleng, ba sepela naga ye ka botelele le ka bophara. Lega go le bjalo, re na le lebaka la go nyaka go tseba ka mo go tseneletšego mabapi le mafelo a ka Beibeleng. Ka baka la’ng?
4, 5. (a) Diema 18:15 e tswalana bjang le tsebo gotee le kwešišo ya rena ka dinaga tša ka Beibeleng? (b) Tsefanya kgaolo 2 e bontšha’ng?
4 Lentšu la Modimo le re: “Pelo ya thlaloxanyô e tlo sêla tsebô; tsebô e tsongwa ke tsêbê ya mohlale.” (Diema 18:15) Go na le ditaba tše dintši tšeo motho a ka bago le tsebo ka tšona, eupša tsebo e nepagetšego yeo e tswalanago le Jehofa Modimo gotee le ditirišano tša gagwe ke ya bohlokwa kudu. Ke therešo gore seo re ithutago sona ka Beibeleng se bohlokwa e le gore re hwetše tsebo yeo e nepagetšego. (2 Timotheo 3:16) Lega go le bjalo, ela hloko gore seo se akaretša go ba le kwešišo. Kwešišo ke bokgoni bja go ba le temogo ka taba, go tseba goba go kwešiša tswalano magareng ga dikarolo tša taba le taba e feletšego. Se ke sa therešo ka dipego tša mabapi le mafelo ao go boletšwego ka ona ka Beibeleng. Ka mohlala, bontši bja rena re tseba moo Egipita e lego gona, eupša ke go fihla bokgoleng bofe moo re kwešišago tlhaloso ye ya gore Aborahama o ile a tloga Egipita a ya “Negebe,” gomme ka morago a ya Bethele, ke moka a ya Heburone? Na o kwešiša kamoo mafelo ao a tswalanago ka gona?
5 Mmalong wa gago wa Beibele o ka ba o ile wa bala Tsefanya kgaolo 2. Moo o badile ka maina a metse, a batho le a dinaga. Gatsa, Asikaloni, Asidodo, Ekironi, Sodoma le Ninife gotee le Kanana, Moaba, Amoni le Asiria ke dinaga ka moka tšeo go bolelwago ka tšona ka kgaolong yeo e tee. O ile wa atlega gakaaka’ng go bopeng seswantšho-kgopolo sa mafelo ao go ona go bego go dula batho ba kgonthe, batho bao ba bego ba akaretšwa go phethagatšweng ga boporofeta bjo bo tšwago go Modimo?
6. Ke ka baka la’ng Bakriste ba bangwe ba ile ba thoma go lemoga bohlokwa bja mebapa? (Bona lepokisi.)
6 Barutwana ba bantši ba Lentšu la Modimo ba hotšwe kudu ke go lebelela mebapa ya dinaga tša ka Beibeleng. Ga ba dire se ka gobane ba fo kgahlwa ke mebapa, eupša ba se dira ka gobane ba lemoga gore ka go diriša mebapa, ba ka kgona go oketša tsebo ya bona ka Lentšu la Modimo. Le gona mebapa e ka ba thuša go oketša kwešišo ya bona, ge ba bona kamoo ditherešo tšeo ba šetšego ba di tseba di tswalanago ka gona le tsebišo e nngwe. Ge re dutše re ahla-ahla mehlala e mengwe, mohlomongwe o tla ba wa leboga Jehofa ka mo go tseneletšego gomme wa hwetša temogo e oketšegilego ka dipego tšeo di lego ka Lentšung la gagwe.—Bona lepokisi leo le lego go letlakala 14.
Go Tseba Monabo go Dira Phapano
7, 8. (a) Ke selo sefe se se makatšago sa mabapi le Gatsa seo Simisone a ilego a se dira? (b) Ke tsebišo efe yeo e ka dirago gore tiro ya Simisone e be e kgahlišago kudu? (c) Re ka thušwa bjang ke go ba le tsebo gotee le kwešišo ka pego ye ya mabapi le Simisone?
7 Go Baahlodi 16:2, o ka bala mabapi le go ba ga Moahlodi Simisone kua Gatsa. Leina Gatsa le tšwelela gantši ka dipegong tša mehleng yeno tša ditaba, ka gona o ka ba o e-na le tsebonyana ka lefelo leo Simisone a bego a le go lona, tikologong ya ba-Filisita kgaufsi le Lebopo la Mediterranean. [11] Ga bjale ela hloko Baahlodi 16:3 e rego: “Simisone a rôbala xo fihla mašexo-xare: mašexo-xare a tsoxa, a swara mamati a mabedi a kxôrô a a kxola xotee le dijakwana le mekxokô, a di šikara a di rotošetša nthleng ya thaba e ukametšexo Heburone.”
8 Ga go pelaelo gore dikgoro le dijakwana tše di tiilego go etša tša Gatsa e be e le tše dikgolo e bile di le boima. Akanya o leka go di rwala! Simisone o ile a di rwala, eupša o ile a di iša kae, gomme o ile a swanelwa ke go sepela leeto la mohuta mang? Ge e le gabotse, Gatsa e lebopong mo e ka bago tekanyong ya lewatle. [15] Lega go le bjalo, Heburone e ka bohlabela bophagamong bja dimithara tše 900—morotoga e le ka kgonthe! Ga re kgone go tseba ka go lebanya lefelo leo “thaba e ukametšexo Heburone” e bego e le go lona, eupša motse o be o le kgole le Gatsa ka dikhilomithara tše 60—morotogeng! Go tseba monabo wo o bego o akaretšwa go dira gore tiro ya Simisone e bonagale ka sebopego se sefsa, na ga go bjalo? Le gona gopola lebaka leo ka lona Simisone a bego a kgona go dira ditiro tše bjalo—‘moya wa Jehofa o be o šoma go yena.’ (Baahlodi 14:6, 19; 15:14) Re le Bakriste lehono, ga re letele gore moya wa Modimo o re nee matla a sa tlwaelegago. Lega go le bjalo, moya o swanago o matla o ka oketša kwešišo ya rena ka ditaba tše di tseneletšego tša moya gomme wa re dira ba matla go ya ka motho yo re lego yena ka gare. (1 Ba-Korinthe 2:10-16; 13:8; Ba-Efeso 3:16; Ba-Kolose 1:9, 10) Ee, ge re kwešiša pego ya mabapi le Simisone, re kgolwa therešo ya gore moya wa Modimo o ka re thuša.
9, 10. (a) Go fenya ga Gideoni ba-Midiane go be go akaretša’ng? (b) Tsebo ya rena ka dinaga tšeo go bolelwago ka tšona e ka thuša bjang go dira gore pego ye e be e bohlokwa kudu?
9 Pego ya go fenya ga Gideoni ba-Midiane ke e nngwe yeo e bontšhago bohlokwa bja go tseba monabo wo o akaretšwago ka pegong ya Beibele. Babadi ba bantši ba Beibele ba tseba gore Moahlodi Gideoni le bahlabani ba gagwe ba 300 ba ile ba fenya setlamo sa bašwahledi ba 135 000—ba-Midiani, ba-Amaleke le ba bangwe bao ba bego ba hlomile mešaša melaleng ya Jeseriele, kgaufsi le mmoto wa More. [18] Banna ba Gideoni ba ile ba letša diphalafala, ba pšhatla dipitša gore ba kgone go emiša dirumola tša bona, gomme ba goeletša ba re: “Ka lerumô la Morêna le la Gideoni!” Se se ile sa gakantšha le go tšhoša manaba, moo a ilego a thoma go bolayana seng sa ona. (Baahlodi 6:33; 7:1-22) Na tiragalo yeo ka moka e be e le tiro e tee ya kapejana lefsifsing la bošego? Tšwela pele o bale go Baahlodi kgaolo 7 le 8. O tla bona gore Gideoni o ile a tšwetša pele tlhaselo yeo. Go mafelo a mantši ao go boletšwego ka ona, a mangwe ga go tsebje moo a lego gona lehono, ka gona a ka no se tšwelele mebapeng ya Beibele. Lega go le bjalo, go na le mafelo a mantši ao a tsebjago e le gore re kgone go kwešiša ditiro tša Gideoni.
10 Gideoni o ile a rakediša mašaledi a setlamo sa madira go feta Bethesita ke moka a ya ka borwa thoko tša Abele-mehola, kgaufsi le Jorodane. (Baahlodi 7:22-25) Pego e re: “Mola Gideoni à setše noka ya Jorodane à na le banna bála ba makxolo a mararo, ba be ba lapile ka xo raka manaba.” (Mongwalo o sekamego ke wa rena.) Ge ba-Isiraele ba šetše ba setše, ba ile ba rakediša manaba go ya ka borwa thoko tša Sukothe le Penuele, kgaufsi le Jaboko, ke moka ba namela meboto go ya Jogobea (kgaufsi le naga yeo mehleng yeno e lego Amman, Jorodane). Ba a rakedišitše ba dutše ba e-lwa le ona ka monabo wa dikhilomithara tše ka bago 80. Gideoni o ile a swara dikgoši tše pedi tša ba-Midiani gomme a di bolaya; ke moka o ile a boela motseng wa gabo, wa Ofura, kgaufsi le lefelo leo ntwa e thomilego go lona. (Baahlodi 8:4-12, 21-27) Go tloga go le molaleng gore tiro ya Gideoni e tšere nako e fetago metsotso e sego kae ya go letšwa ga diphalafala, go emišwa ga dirumola le go goeletša. Le gona nagana kamoo e gatelelago ka gona ka mo go oketšegilego polelo ya mabapi le banna ba tumelo e rego: “Nka hlaêlêlwa ke lebaka xe nka laodiša ka tša Gideoni, [le ba bangwe bao ba ilego] ba tia matla ba lapile, ba ba baxale ntweng, ba raka dirá tša manaba.” (Ba-Hebere 11:32-34) Bakriste le bona ba ka lapa mmeleng, eupša na ga se gabohlokwa gore re tšwele pele re dira thato ya Modimo?—2 Ba-Korinthe 4:1, 16; Ba-Galatia 6:9.
Batho ba Nagana le go Arabela Bjang?
11. Ke leeto lefe leo ba-Isiraele ba ilego ba le tšea pele le ka morago ga ge ba be ba ka fihla Kadese?
11 Ba bangwe ba ka retologela mebapeng ya Beibele gore ba kgone go bona moo mafelo a lego gona, eupša na o nagana gore mebapa e ka nea temogo mabapi le seo batho ba bego ba se nagana? Tšea ka mohlala ba-Isiraele bao ba tlogilego Thabeng ya Sinai go ya Nageng ya Kholofetšo. Le ge ba be ba dutše ba khutša tseleng, mafelelong ba ile ba fihla Kadese (goba Kadese-baranea). [9] Doiteronomio 1:2 e bontšha gore le e be e le leeto la matšatši a 11, e lego monabo wa dikhilomithara tše ka bago 270. Go tloga lefelong leo Moše o ile a roma dihlodi tše 12 gore di ye Nageng ya Kholofetšo. (Numeri 10:12, 33; 11:34, 35; 12:16; 13:1-3, 25, 26) Dihlodi di ile tša ya leboa go phatša Negebe, gomme go bonala di ile tša phatša Bereseba, ke moka tša ya Heburone, tša ba tša fihla mellwaneng ya ka leboa ya Naga ya Kholofetšo. (Numeri 13:21-24) Ka ge ba-Isiraele ba ile ba amogela pego e mpe ya dihlodi tše lesome, ba ile ba swanelwa ke go ralala lešokeng ka nywaga e 40. (Numeri 14:1-34) Se se utolla’ng ka tumelo ya bona le go ikemišetša ga bona go bota Jehofa?—Doiteronomio 1:19-33; Psalme 78:22, 32-43; Juda 5.
12. Re ka phetha ka go re’ng mabapi le tumelo ya ba-Isiraele, gomme ke ka baka la’ng seo e le selo se re swanetšego go naganišiša ka sona?
12 Nagana mabapi le kamoo naga e bego e le ka gona. Ge e ba ba-Isiraele ba ile ba bontšha tumelo gomme ba latela keletšo ya Jošua le Kalebe, na ba ka ba ba ile ba sepela leeto le letelele gakaakaa gore ba fihle Nageng ya Kholofetšo? Kadese e be e le kgole le Beer-lahai-roi ka dikhilomithara tše ka bago 16, moo Isaka le Rebeka ba bego ba dula gona. [7] E be e le kgole le Bereseba ka dikhilomithara tša ka tlase ga tše 95, gomme e le yona mollwane wa ka borwa wa Naga ya Kholofetšo. (Genesi 24:62; 25:11; 2 Samuele 3:10) Ka ge ba be ba sepetše go tloga Egipita go ya Thabeng ya Sinai gomme ka morago ba sepela dikhilomithara tše ka bago 270 go ya Kadese, go be go le bjalo ka ge eka ba mollwaneng wa go tsena Nageng ya Kholofetšo. Le rena re mollwaneng wa go tsena lefaseng le le holofeditšwego la Paradeise. Re ithuta thuto efe? Moapostola Paulo o ile a tswalanya boemo bja ba-Isiraele le keletšo ye e rego: “A re phêxêleleng-xê xo tsêna khutšong yeo, xore xo se bê le e a waxo a etša bala ba xo se kwê.”—Ba-Hebere 3:16–4:11.
13, 14. (a) Ke boemong bofe moo ba-Gibeoni ba ilego ba gata mogato o bohlokwa? (b) Ke’ng seo se utollago boemo bja kgopolo bja ba-Gibeoni, gomme ke thuto efe yeo re swanetšego go ithuta yona go se?
13 Boemo bja kgopolo bjo bo fapanego—bja go bota Modimo gore o tla phetha thato ya gagwe—bo bonwa tiragalong ya Beibele yeo e akaretšago ba-Gibeoni. Ka morago ga ge Jošua a eteletše ba-Isiraele pele go phatša Noka ya Jorodane go tsena nageng yeo Modimo a e holofeditšego lapa la Aborahama, bjale e be e le nako ya go raka ba-Kanana. (Doiteronomio 7:1-3) Seo se be se akaretša go rakwa ga ba-Gibeoni. Ba-Isiraele ba ile ba fenya Jeriko le Ai gomme ba be ba hlomile mešaša kgaufsi le ba-Gibeoni kua Giligala. Ba-Gibeoni ba be ba sa nyake go hwa bjalo ka ba-Kanana bao ba rogakilwego, ka gona ba ile ba romela baemedi ba bona go Jošua kua Giligala. Ba ile ba itira eka ba tšwa ka ntle ga tikologo ya ba-Kanana e le gore ba kgone go dira kgwerano ya khutšo le ba-Hebere.
14 Baemedi bao ba ile ba re: “Rena bahlanka ba xaxo re tšwa naxeng ya [kgole]. Re tla ka ’baka la leina la Morêna Modimo wa lena.” (Jošua 9:3-9, mongwalo o sekamego ke wa rena.) Diaparo le dijo tša bona di be di bonagala di tiišetša gore ba be ba e-tšwa kgole, eupša ge e le gabotse Gibeoni e be e le kgole le Giligala ka dikhilomithara tše ka bago 30. [19] Ba kgodišegile, Jošua le bakgomana ba gagwe ba ile ba dira kgwerano ya khutšo le ba-Gibeoni gotee le metse ya kgaufsi yeo e tswalanago le Gibeoni. Na leano la ba-Gibeoni e be e fo ba mokgwa wa go efoga go fedišwa? Se se fapanego ke gore le ile la bontšha kganyogo ya go nyaka go amogelwa ke Modimo wa ba-Isiraele. Jehofa o ile a amogela ba-Gibeoni gomme ba fetoga “baphaphi ba dikxong mohla woo, le baxi ba meetse ba phuthêxô le aletare ya Morêna,” ba kgoboketša dikgong tša go dira dihlabelo aletareng. (Jošua 9:11-27) Ba-Gibeoni ba ile ba tšwela pele ba bontšha go rata go dira mediro ya tlasana tirelong ya Jehofa. Go bonagala ba bangwe ba bona ba be ba le gare ga ba-Nethinime bao ba ilego ba boa Babele gomme ba thuša go agweng lefsa ga tempele. (Esera 2:1, 2, 43-54; 8:20) Re ka ekiša boemo bja bona bja kgopolo ka go katanela go tšwela pele re e-na le khutšo le Modimo le ka go ikemišetša go phetha gaešita le dikabelo tša tlasana tirelong ya gagwe.
Ikgafe
15. Ke ka baka la’ng tsebo ya thutafase e le ya bohlokwa mabapi le Mangwalo a Bakriste a Segerika?
15 Thutafase ya dinaga tša ka Beibeleng go bolelwa ka yona ka dipegong tšeo di lego ka Mangwalong a Bakriste a Segerika, tše bjalo ka maeto gotee le bodiredi bja Jesu le bja moapostola Paulo. (Mareka 1:38; 7:24, 31; 10:1; Luka 8:1; 13:22; 2 Ba-Korinthe 11:25, 26) Dipegong tše di latelago, leka go bopa seswantšho-kgopolo sa maeto ao a bego a akaretšwa.
16. Bakriste ba kua Berea ba ile ba bontšha bjang gore ba rata Paulo?
16 Leetong la gagwe la bobedi la boromiwa (mothaladi o mophepolo mmapeng), Paulo o ile a fihla Filipi, yeo ga bjale e lego Gerika. [33] O ile a dira boboledi moo, a golegwa gomme ka morago a lokollwa, ke moka a ya Thesalonika. (Ditiro 16:6–17:1) Ge ba-Juda ba be ba tsoša moferefere, bana babo rena ba Thesalonika ba ile ba kgothaletša Paulo go ya Berea, yeo e lego bokgole bja dikhilomithara tše 65. Paulo o ile a dira bodiredi ka katlego kua Berea, eupša ba-Juda ba ile ba tla gomme ba befediša setšhaba. Ka go rialo, “ké mo bana babô ba tumêlô ba hlaxanetšexo ba laêlana le Paulo, ba mo felexetša xo fihla lewatleng,” gomme “bafelexetši ba Paulo ba mo fihliša motseng wa Athene.” (Ditiro 17:5-15) Go molaleng gore ba bangwe bao ba bego ba sa tšwa go sokollwa ba be ba ikemišeditše go sepela leeto la dikhilomithara tše 40 go ya Lewatleng la Aegean, go lefela leeto le go sepela dikhilomithara tše 500 ka sekepe. Leeto le bjalo le be le ka ba kotsi, eupša bana babo ba ile ba amogela dikotsi tšeo gomme ka go rialo ba fetša nako e ntši le moemedi yo wa Modimo wa mosepedi.
17. Ke’ng seo re ka se tsebago gakaone ge re šetše re kwešiša monabo wa magareng ga Mileto le Efeso?
17 Leetong la gagwe la boraro (mothaladi o motala-morogo mmapeng), Paulo o ile a fihla boema-kepeng bja Mileto. O ile a roma motho gore a yo bitša banna ba bagolo ba phuthego ya Efeso, yeo e lego bokgole bja dikhilomithara tše 50. Akanya bagolo bao ba tlogela mediro e mengwe yeo ba bego ba e dira gore ba ye go Paulo. Ge ba dutše ba sepela, go bonagala ba be ba bolela ka lethabo mabapi le seboka seo ba bego ba tla ba le sona. Ka morago ga go kopana le Paulo le go mo kwa a rapela, go ile “xwa tsoxa sellô mo xo bôná bohle; ba bá ba xokarêla Paulo ba mo atla.” Ke moka “ba mo felexetša ba mo fihliša le-sela-watleng” gore a ye Jerusalema. (Ditiro 20:14-38) Ba swanetše go ba ba ile ba ba le dilo tše dintši tše ba ka di naganago le tše ba ka bolelago ka tšona leetong la go boela Efeso. Na ga o kgahlwe ke lerato leo ba ilego ba le bontšha ka go sepela monabo woo o motelele gore ba yo ba le modiredi wa mosepedi yo a bego a ka ba hlahla le go ba kgothatša? Na mo tabeng ye o bona selo seo o ka se dirišago bophelong bja gago le tseleng ya gago ya go nagana?
Ithute ka Naga Yeo le Seo se Letšego ka Pele
18. Re swanetše go ikemišetša go dira’ng ge e le mabapi le dinaga tša ka Beibeleng?
18 Mehlala yeo e boletšwego ka mo godimo e bontšha bohlokwa bja go tlwaelana le naga yeo Modimo a ilego a e nea ba-Isiraele gomme seo se bohlokwa kudu dipegong tše dintši tša Beibele. (Le gona re ka kgona go katološa seswantšho-kgopolo sa rena ka go akaretša go ithuta ka dinaga tše di dikologilego naga ye tšeo di tšwelelago ka dipegong tša Beibele.) Ge re dutše re oketša tsebo le kwešišo ya rena ka Naga ya Kholofetšo ka mo go kgethegilego, re swanetše go gopola selo seo se bego se tloga se nyakega e le gore ba-Isiraele ba tsene nageng ya ‘mafsi le dinose’ le gore ba e thabele. Selo seo e be e le go boifa Jehofa le go boloka ditaelo tša gagwe.—Doiteronomio 6:1, 2; 27:3.
19. Ke diparadeise dife tše pedi tšeo re swanetšego go nagana ka tšona ka dinako tšohle?
19 Ka mo go swanago lehono, re swanetše gore re phethe karolo ya rena, re boife Jehofa gomme re kgomarele ditsela tša gagwe. Ka go dira bjalo, re tla tšea karolo go tšwetšeng pele le go botsefatšeng paradeise ya moya yeo e lego gona ga bjale ka phuthegong ya Bokriste lefaseng ka bophara. Re tla tšwela pele re gola ka tsebo ya go tseba dibopego le ditšhegofatšo tša yona. Le gona re a tseba gore go sa dutše go e na le ditšhegofatšo tše dintši tšeo di tlago. Jošua o ile a etelela ba-Isiraele pele go phatša Jorodane go tsena nageng e enywago, e kgotsofatšago. Mo nakong ye re na le lebaka le lebotse la go lebelela pele ka kholofelo Paradeiseng ya kgonthe, e lego naga e botse yeo e letšego ka pele ga rena.
[Dipotšišo tša Thuto]
Na o a Gopola?
• Ke ka baka la’ng re swanetše go kganyoga go oketša tsebo le kwešišo ya rena mabapi le dinaga tša ka Beibeleng?
• Ke tsebišo efe e feletšego ya mabapi le dinaga yeo e ahla-ahlilwego mo sehlogong se yeo e go thušitšego kudu?
• Ke thuto efe yeo e kwagetšego kudu go wena ge o dutše o ithuta ka mo go oketšegilego ka dinaga tšeo go bolelwago ka tšona ditiragalong tše dingwe?
[Lepokisi go letlakala 14]
‘Bonang Naga e Botse’
Dikopanong tša 2003 le 2004, Dihlatse tša Jehofa ka lethabo di ile tša amogela poroutšha ya ‘Bonang Naga e Botse.’ Kgatišo ye e mpsha yeo e hwetšagalago ka maleme a 80, e tletše ka mebapa ya mmala o feletšego le ditšhate tšeo di bontšhago mafelo a fapanego a lefase leo go bolelwago ka lona ka Beibeleng kudu-kudu Naga ya Kholofetšo ya mehleng e fapa-fapanego.
Sehlogo seo se sepedišanago le taba ye se bolela ka mebapa e kgethegilego ka go diriša dinomoro tšeo di ngwadilwego ka bokoto, tše bjalo ka [15]. Ge e ba o e-na le poroutšha ye e mpsha, iphe nako ya go tlwaelana le dibopego tše di fapanego tšeo di ka go thušago go oketša tsebo le kwešišo ya gago ka Lentšu la Modimo.
(1) Mebapa e mentši e akaretša mongwalo o sepedišanago le mmapa goba lepokisi le le nago le maswao a kgethegilego ao a neago tlhaloso mmapeng [18]. (2) Mebapa e mentši e na le scale sa go lekanyetša monabo ka di-mile le dikhilomithara seo se tlago go go thuša go kwešiša bogolo goba menabo yeo e akaretšwago [26]. (3) Gantši go na le leswao leo le šupago leboa (N), le go bontšha moo karolo ya ka leboa e lego gona mmapeng [19]. (4) Gantši mebapa e na le mebala e le go bontšha mafelo ao ka kakaretšo a phagamego [12]. (5) Ka mathokong a mmapa, go ka ba le ditlhaka/dinomoro e le gore o kgone go bona methalwana ya ditšhupetšo, yeo o ka e dirišago go hwetša metse goba maina [23]. (6) Tlhatlamanong ya maina a mafelo yeo e lego matlakaleng a mabedi [34-5], o tla bona nomoro ya letlakala yeo e ngwadilwego ka bokoto, gantši e latelwa ke lefelo leo le lego methalwaneng ya ditšhupetšo, le bjalo ka E2. Ka morago ga ge o dirišitše dibopego tše ka makga a mmalwa, o ka makatšwa ke gore di tloga di thuša go oketša tsebo ya gago le go nweletša kwešišo ya gago ka Beibele.
[Tšhate/Mmapa go letlakala 16, 17]
(Bakeng sa mongwalo o beakantšwego ka mokgwa wa kgatišo, bona kgatišo ka boyona)
Tšhate Ya Ditikologo Tša Kgonthe
A. Lebopo la Lewatle le Legolo
B. Melala ya ka Bodikela bja Jorodane
1. Molala wa Asere
2. Motsweketlane wa Naga wa Lebopong la Doro
3. Mafulo a Sarona
4. Molala wa Filisita
5. Moedi wa Gare wo o Tlogago Bohlabela o E-ya Bodikela a. Molala wa Megido b. Moedi wa Jeseriele
C. Dithaba Tšeo di Lego ka Bodikela bja Jorodane
1. Meboto ya Galilea
2. Meboto ya Karamele
3. Meboto ya Samaria
4. Šefela (mebotwana)
5. Naga ya Meboto ya Juda
6. Lešoka la Juda
7. Negebe
8. Lešoka la Parane
D. Araba (Moedi wa Magorogoro)
1. Moedi wa Hula
2. Tikologo ya Lewatle la Galilea
3. Moedi wa Jorodane
4. Lewatle la Letswai (Lewatle le le Hwilego)
5. Araba (ka borwa bja Lewatle la Letswai)
E. Dithaba/Melala Yeo e Lego ka Bohlabela bja Jorodane
1. Basani
2. Gileada
3. Amoni le Moaba
4. Nagadimo ya Thaba ya Edomo
F. Dithaba tša Libanoni
[Mmapa]
Thaba ya Heremone
Jerusalema
Bereseba
More
Abele-mehola
Bethele
Gibeoni
Gatsa
Sukothe
Giligala
Heburone
Sodoma?
Kadese
Jogobea
[Mmapa/Seswantšho go letlakala 15]
Megido
Dothane
Sikeme
KANANA
Bethele (Lusi)
Jerusalema (Salema)
Betlelehema (Efurate)
Mamure
Gerara
Rehobothe?
GILEADA
Jorodane
Ai
Moria
Lewatle la Letswai
Heburone
(Makapela)
Bereseba
Sodoma?
NEGEBE
[Caption on page 15]
Aborahama o ile a phatša naga