‘O Thabele Jehofa’

“O thabêlê Morêna [“Jehofa,” PK ], ’me Yêna ó tlo Xo nea tše pelo y’axo e di kxopêlaxo.”​—Psalme 37:⁠4.

1, 2. Mothopo wa lethabo la kgonthe ke mang, gomme Kgoši Dafida o ile a lebiša tlhokomelo bjang ntlheng ye?

“GO THABILE bao ba lemogago dinyakwa tša bona tša moya, . . . go thabile bao ba nago le kgaugelo, . . . go thabile bao ba nago le khutšo.” Dipolelwana tše gotee le tše dingwe tše tshela tša mabapi le bao ba thabilego di hlama matseno a ipiletšago a Thuto ya Jesu e tumilego ya Thabeng, bjalo ka ge e begilwe ke mongwadi wa Ebangedi e lego Mateo. (Mateo 5:​3-11, NW) Mantšu a Jesu a kgonthišetša gore re ka kgona go hwetša lethabo.

² Kopelo e kgethwa yeo e ngwadilwego ke Kgoši Dafida wa Isiraele ya bogologolo e gogela tlhokomelo Mothopong wa lethabo la kgonthe e lego Jehofa. Dafida o itše: “O thabêlê Morêna [“Jehofa,” PK], ’me Yêna ó tlo Xo nea tše pelo y’axo e di kxopêlaxo.” (Psalme 37:⁠4) Eupša ke’ng se se ka dirago gore go tseba Jehofa gotee le dibopego tše dintši tša semelo sa gagwe e be ‘mo go thabišago’? Ke bjang go ela hloko seo a šetšego a se dirile le seo a sa tlago go se dira go phethagatšeng morero wa gagwe go go neago kholofelo ya go amogela “tše pelo y’axo e di kxopêlaxo”? Go hlahlobišiša Psalme 37, ditemana 1 go ya go 11, go nea dikarabo.

‘O se be le Lehufa’

3, 4. Bjalo ka ge go begilwe go Psalme 37:⁠1, Dafida o nea keletšo efe, gomme ke ka baka la’ng lehono e le mo go swanetšego go e ela hloko?

³ Re phela ‘mabakeng a mathata,’ gomme bobe bo atile. Re bone go phethagala ga mantšu a moapostola Paulo a rego: “Batho ba babe le baaroši, bobe bya bôná bo tlo fêla bò xola bò e-⁠ya, bà fora ba bangwê, le bôná bà forwa.” (2 Timotheo 3:​1, 13) Go bonolo gakaakang go kgongwa ke seo se bonagalago e le katlego le lehumo la batho ba babe! Tšeo ka moka di ka re šitiša, tša dira gore re se sa lebiša tlhokomelo ponong ya rena ya moya. Ela hloko kamoo matseno a Psalme 37 a re lemošago ka kotsi ye yeo e ka bago gona: “Se je pelo xe O bôna babe; se hufêxêlê ba diraxo tše di sa lokaxo.”

⁴ Letšatši le letšatši mokero wa ditaba wa lefase le o re imetša ka lelokelelo la ditaba tša go hloka toka. Bo-rakgwebo ba ba sa botegego ba dira boradia ntle le go otlwa. Disenyi di ikhola ka bao ba hlaselegago gabonolo. Babolai ba dula ba sa hwetšwe goba ba phela ntle le go otlwa. Mehlala e bjalo ka moka ya go kgopamišwa ga toka e ka tsoša pefelo le go šitiša khutšo ya rena ya monagano. Seo se ka bonagalago e le katlego ya ba babe se ka ba sa tsoša maikwelo a lehufa. Eupša na go befelwa ga rena go tla kaonefatša boemo? Na go hufegela seo go bonagalago e le mehola yeo ba babe ba e thabelago go ka fetoša ditla-morago tša bona? Ga go bjalo le gatee! Le gona go tloga go sa nyakege gore re ‘je pelo.’ Ka baka la’ng?

5. Ke ka baka la’ng ba babe ba swantšhwa le bjang?

 ⁵ Mopsalme o araba ka gore: “Xobane ba tlo etša byang bò se thata xo ôma; ba tlo pôna bo-ka matlakala a matalá.” (Psalme 37:⁠2) Bjang bjo botala bjo bo sa tšwago go mela bo ka bonagala e le bjo bobotse, eupša go se go ye kae bo a pona gomme bo a hwa. Go bjalo le ka ba babe. Seo go bonagalago e le katlego ya bona ga se sa ka mo go sa felego. Ge ba e-⁠hwa, dithoto tša bona tšeo di hweditšwego ka boradia ga di ba thuše. Mafelelong yo mongwe le yo mongwe o swarwa ka toka. Paulo o ngwadile gore: “Moputsô wa sebe ké lehu.” (Ba-Roma 6:​23) Ba babe le bohle bao ba sa lokago mafelelong ba tla hwetša “moputsô” wa bona ya ba moka. A mokgwa wa bophelo wo o se nago mohola gakaakang!​—Psalme 37:​35, 36; 49:​16, 17.

6. Re ka hwetša thuto efe go Psalme 37:​1, 2?

⁶ Ka gona, na re swanetše go dumelela lehumo leo le fetago kapejana la ba babe le re tshwenya? Thuto e lego ditemaneng tše pedi tša mathomo tša Psalme 37 ke ye: O se ke wa dumelela katlego ya bona e go aroša tseleng yeo o e kgethilego ya go hlankela Jehofa. Go e na le moo, dula o tsepamišeditše kgopolo ya gago ditšhegofatšong le dipakaneng tša moya.​—Diema 23:⁠17.

‘Bota Jehofa Gomme o Dire tše Botse’

7. Ke ka baka la’ng re swanetše go bota Jehofa?

⁷ Mopsalme o re kgothaletša gore re ‘bote Jehofa gomme re dire tše botse.’ (Psalme 37:3a) Ge e ba re imelwa ke dipelaelo goba gaešita le ke dipoifo, kholofelo ya rena e swanetše go bewa go Jehofa ka mo go tiilego. Ke Yena a neago tšhireletšego e feletšego ya moya. Moše o ngwadile gore: “E a dutšego tšhireletšong ya yo godimo-dimo o tlo robala moriting wa yo matla ka moka.” (Psalme 91:​1, PK) Ge re tshwenywa ke go oketšega ga go hlokega ga molao tshepedišong ye ya dilo, re swanetše go ithekga ka Jehofa ka mo go oketšegilego. Ge re thintše kokoilane, re thabela thekgo ya mogwera. Ka mo go swanago, ge re katanela go sepela ka potego, re nyaka thekgo ya Jehofa.​—Jesaya 50:⁠10.

8. Go tšea karolo bodireding bja Bokriste go ka re thuša bjang go phema go tshwenyega kudu ka lehumo la ba babe?

⁸ Tharollo e nngwe ya ge re tshwenywa ke lehumo la ba babe ke go swarega ka go tsoma le go thuša bao ba swanago le dinku e le gore ba hwetše tsebo e nepagetšego ka morero wa Jehofa. Ge re lebeletšane le go ata ga bobe, re swanetše go swarega ka mo go feletšego ka go thuša ba bangwe. Moapostola Paulo o itše: “Le se kê la lebala xo dira batho xa-botse le xo ba nea; xobane Modimo ó kxahlwa ke didimo tše byalo.” Tiro e ‘botse’ kudu yeo re ka e dirago ke go boledišana le ba bangwe ka ditaba tše dibotse tšeo di thabišago tša Mmušo wa Modimo. Ka kgonthe boboledi bja rena bja phatlalatša ke “sedimo sa theto.”​—Ba-Hebere 13:​15, 16; Ba-Galatia 6:⁠10.

9. Hlalosa keletšo ya Dafida ya gore re ‘dule nageng.’

⁹ Dafida o tšwela pele ka gore: “Itulêlê mo naxeng ya xeno, O tlwaêlanê le pôtêxô.” (Psalme 37:3b) ‘Naga’ ya mehleng ya Dafida e be e le tikologo yeo Jehofa a bego a e neile Isiraele, e lego Naga ya Kholofetšo. Nakong ya pušo ya Salomo mellwane ya yona e be e tloga kua Dani ka leboa go ya Bereseba ka borwa. Le e be e le legae la ba-Isiraele. (1 Dikxoši 4:​25) Lehono, lefelong le ge e le lefe leo re dulago go lona mo lefaseng, re lebeletše pele nakong ya ge polanete ka moka e tla ba paradeise lefaseng le lefsa la go loka. Ge e le gabjale, re dula tšhireletšegong ya moya.​—Jesaya 65:​13, 14.

10. Mafelelo ke afe ge re “tlwaêlanê le pôtêxô”?

 ¹⁰ Mafelelo e tla ba afe ge re “tlwaêlanê le pôtêxô”? Seema se se buduletšwego se re gopotša gore: “Monna-mmôtexi ó tlo huma thšexofatšô; mo-thakanêla-khumô molato xa a o hloke.” (Diema 28:​20) Go phegelela ga rena ka potego go boleleng ditaba tše dibotse le ge e le kae moo re dulago gona le go motho le ge e le mang ka ntle le pelaelo go tliša meputso e tšwago go Jehofa. Ka mohlala, Frank le mosadi wa gagwe Rose, ba ile ba tsenela kabelo ya bobulamadibogo nywaga e 40 e fetilego toropong ya ka leboa la Scot­land. Ba sego kae bao ba bego ba bontšhitše kgahlego therešong fao ba be ba arogile. Ka go se langwe, banyalani ba ba babulamadibogo ba ile ba thoma modiro wa go bolela le go dira barutiwa. Gabjale go na le phuthego e golago toropong yeo. Ka ntle le pelaelo go botega ga banyalani ba go ba tlišeditše ditšhegofatšo tša Jehofa. Frank o hlalosa ka boikokobetšo gore: “Tšhegofatšo e kgolo ke feela gore re sa dutše re le therešong gomme re sa na le mohola go Jehofa.” Ee, ge re “tlwaêlanê le pôtêxô,” re amogela le go thabela ditšhegofatšo tše dintši.

‘O Thabele Jehofa’

11, 12. (a) Re ka ‘thabela Jehofa’ bjang? (b) O ka ipeela pakane efe mabapi le thuto ya motho ka noši, gomme ka mafelelo afe ao a ka bago gona?

¹¹ E le gore re matlafatše tswalano ya rena le Jehofa le go kgomarela go mmota ga rena, re swanetše go ‘thabela Jehofa.’ (Psalme 37:⁠4) Re dira seo bjang? Go e na le go swarega ka boemo bja rena, gaešita le ge bo ka ba thata, re lebiša tlhokomelo go Jehofa. Tsela e nngwe ya go dira se ke ka go diriša nako re bala Lentšu la gagwe. (Psalme 1:​1, 2) Na mmalo wa gago wa Beibele o a go thabiša? O tla go thabiša ge o bala ka pakane ya go ithuta ka mo go oketšegilego ka Jehofa. Ke ka baka la’ng o sa eme ganyenyane ka morago ga go bala karolo e itšego gomme o ipotšiše gore, ‘Karolo ye e nthuta’ng ka Jehofa?’ O ka hwetša e le mo go thušago go swara puku goba letlakala ge o bala Beibele. Nako e nngwe le e nngwe ge o ema e le gore o naganišiše ka se se bolelwago ke seo o se badilego, ngwala mantšu ao a go gopotšago ka se sengwe sa dika tša Modimo tše di kgahlišago. Psalmeng e nngwe, Dafida o opetše ka gore: “A nkê O kxahlwê-hlê ke polêlô tša molomo wa-ka, le dikeleletšô tšé tša pelo ya-ka, Wêna Morêna Lentswê la-ka, Wêna Monamoledi wa-ka.” (Psalme 19:​14) Go lebiša tlhokomelo Lentšung la Modimo ke mo go ‘kgahlago’ Jehofa​—gomme le rena go a re kgahla.

¹² Re ka hwetša bjang lethabo thutong ya rena le go naganišišeng? Re ka itirela pakane ya go ithuta mo gontši kamoo re ka kgonago ka Jehofa le ka ditsela tša gagwe. Dikgatišo tše bjalo ka Motho yo a Phagamego Kudu yo a Kilego a Phela le Batamela Kgaufsi le Jehofa * di re nea mo gontši moo re ka naganišišago ka gona ka tebogo. Dafida o kgonthišetša baloki gore ge ba dirile bjalo, Jehofa ‘o tla ba nea tše dipelo tša bona di di kgopelago.’ (Psalme 37:4b) E bile mohuta wo wa kholofelo woo o swanetšego go ba o ile wa tutueletša moapostola Johane go ngwala mantšu a a rego: “Kholofêlô ye e tiilexo, ye re Mo holofetšexo ka yôna, ké xe re tseba xore ó a re kwa xe re kxopêla se se amanaxo le thatô ya xaxwe. Xomme xe re tseba xobane ó a re kwa xe re tla le kxopêlô efe le efe, xôna re tseba le xore, tše re di kxopetšexo re šetše rè na natšô.”​—1 Johane 5:​14, 15.

13. Nywageng ya morago bjale, ke koketšego efe ya modiro wa go bolela ka Mmušo yeo e bonwego dinageng tše dintši?

¹³ Ka ge re le babotegi, lethabo la rena le legolo  ke go bona go lwelwa ga bogoši bja Jehofa. (Diema 27:​11) Na dipelo tša rena ga di phophome ka lethabo ge re ithuta ka modiro o mogolo wa boboledi wo o dirwago ke bana babo rena dinageng tšeo nakong e fetilego di bego di le ka tlase ga pušo ya bonkgwete goba puša-noši ya taolo e feletšego? Re fagahletše go bona seo tokologo e oketšegilego e tla se tlišago pele ga bofelo bja tshepedišo ye. Bahlanka ba Jehofa ba bantši bao ba dulago dinageng tša ka bodikela ba tšea karolo ka mafolofolo go ruteng bana ba sekolo, bafaladi gotee le ba bangwe bao ba dulago ka nakwana dinageng tša ka bodikela gomme ba thabela tokologo ya borapedi. Kganyogo ya ­rena e tšwago pelong ke gore ge batho ba ba boela gae, ba tšwele pele ba dira gore seetša sa therešo se bonege gaešita le dinageng tšeo mo­diro wa boboledi o thibetšwego.​—Mateo 5:​14-⁠16.

‘Gafela Jehofa Ditsela tša Gago’

14. Go na le bohlatse bofe bja gore re ka ithekga ka Jehofa?

¹⁴ Ke mo go imollago gakaakang go tseba gore dipelaelo tša rena le seo go rena se ka bonagalago e le morwalo o boima se ka imollwa! Bjang? Dafida o re: “Xafêla Morêna ditsela tša xaxo, O mmôtê;” gomme o oketša ka gore “Yêna ó tlo dira.” (Psalme 37:⁠5) Diphuthegong tša rena, re na le bohlatse bjo bo lekanego bja gore Jehofa ke thekgo e ka botwago. (Psalme 55:​22) Bao ba lego bodireding bja nako e tletšego, e ka ba e le babulamadibogo, balebeledi ba basepedi, baromiwa goba baithapi bao ba hlankelago Bethele, ka moka ba ka hlatsela go botweng ga tlhokomelo ya Jehofa. Ke ka baka la’ng o sa boledišane le bao o ba tsebago gomme o ba botšiše kamoo Jehofa a ba thušitšego ka gona? Ka ntle le pelaelo o tla kwa diphihlelo tše dintši tšeo di bontšhago gore gaešita le dinakong tše thata, letsogo la Jehofa ga se le le kopana. Ka mehla o nea dinyakwa tša bophelo.​—Psalme 37:​25; Mateo 6:​25-⁠34.

15. Go loka ga batho ba Modimo go bonega bjang?

¹⁵ Ge re dira Jehofa kholofelo ya rena gomme re mmota ka mo go feletšego, re ka bona go phethagala ga mantšu a a tšwelago pele a mopsalme: “Xo loka xa xaxo ó tlo xo hlabiša byalo ka seetša, ditaba tša xaxo tša tlo êʹla bo-ka mosexare.” (Psalme 37:⁠6) Ka ge re le Dihlatse tša Jehofa, gantši re bolelwa gampe. Eupša Jehofa o bula mahlo a batho ba dipelo tše di botegago go ba thuša go lemoga gore bodiredi bja rena bja phatlalatša bo tutuetšwa ke lerato la go rata Jehofa le moagišani. Ka nako e swanago, gaešita le ge boitshwaro  bja rena bjo bobotse bo bolelwa gampe ke ba bantši, bo ka se utege. Jehofa o re atlegiša mehuteng ka moka ya kganetšo le tlaišo. Ka baka leo, go loka ga batho ba Modimo go bonega bjalo ka letšatši mosegare wa sekgalela.​—1 Petro 2:⁠12.

“Ikhomolêlê . . . mo Letêlê”

16, 17. Ka go dumelelana le Psalme 37:⁠7, gabjale ke nako ya eng gomme ka baka la’ng?

¹⁶ Mantšu a latelago a mopsalme a re: “Ikhomolêlê pele xa Morêna, O mo letêlê; O se kê wa ja pelo xe mo-loxa-maanô à lêtlêlwa ke ditsela.” (Psalme 37:⁠7) Dafida mo o gatelela go nyakega ga gore re letele Jehofa ka go se fele pelo gore a gate mogato. Gaešita le ge bofelo bja tshepedišo ye ya dilo bo se bja tšwa bo e-⁠tla, se ga se bolele gore re swanetše go belaela. Na ga se ra tšwa re bona gore kgaugelo ya Jehofa le go se fele pelo ga gagwe ke tše kgolo kudu go feta kamoo re bego re nagana ka gona pele? Na gabjale re ka bontšha gore le rena re letile ka go se fele pelo ge re dutše re swaregile ka go bolela ditaba tše dibotse pele ga ge bofelo bo fihla? (Mareka 13:​10) Gabjale ke nako ya go phema go dira ditiro tša lephaku-phaku tšeo di ka re amogago lethabo le tšhireletšego ya moya. Gabjale ke nako ya go ganetša ka matla kudu tutuetšo e senyago ya lefase la Sathane. Le gona gabjale ke nako ya go kgomarela go sekega boitshwarong le gore le ka mohla re se ke ra bea kotsing boemo bja rena bja go loka pele ga Jehofa. Anke re tšweleng pele go tloša dikgopolo tše gobogilego gomme re pheme ditiro tše di sa swanelago bathong ba bong bjo bo fapanego le bja rena, ee, gaešita le ba bjo bo swanago.​—Ba-Kolose 3:⁠5.

¹⁷ Dafida o re eletša ka gore: “Lesa xo xalefa, O ilê lehlôyô; xe O ka selekêxa O tlo bá wa senya. Xobane ba babe ba tlo lôba; baleta-Morêna e tlo ba beng ba naxa.” (Psalme 37:​8, 9) Ee, re ka lebelela pele ka kgodišego nakong​—yeo gabjale e lego kgaufsi​—ya ge Jehofa a tla fediša kgobogo ka moka lefaseng gotee le bao ba e bakago.

“Xo se Xokae”

18, 19. O hwetša kgothatšo efe go Psalme 37:⁠10?

¹⁸ “Xo se xokae e mobe ó tlo ba a ile; O tlo bôxa lešope, yêna à se xôna.” (Psalme 37:​10) Mantšu ao a re kgothatša gakaakang ge re dutše re batamela bofelo bja tshepedišo ye ya dilo le go fela mo go lego kotsi ga go phela ntle le Jehofa! Mohuta le ge e le ofe wa mmušo goba taolo yeo e dirilwego ke motho e paletšwe o šoro. Le ­gona gabjale re kgaufsi le nako ya go boela pušong ya Modimo, e lego Mmušo wa Jehofa ka diatleng tša Jesu Kriste. O tla laola ka mo go feletšego ditaba tša lefase gomme wa fediša baganetši ka moka ba Mmušo wa Modimo.​—Daniele 2:⁠44.

¹⁹ Lefaseng le lefsa ka tlase ga Mmušo wa Modimo o ka se hwetše “e mobe” le ge o ka mo tsoma. Ka kgonthe, motho le ge e le ofe yo a rabelago malebana le Jehofa o tla fedišwa kapejana. Ga go le o tee yo a hlaselago bogoši bja gagwe goba yo a ganago go ikokobeletša bolaodi bja Modimo yo a tla bago gona fao. Baagišani ba gago ka moka ba tla ba le kgopolo e swanago ka kganyogo ya bona ya go thabiša Jehofa. Seo se tla tliša tšhireletšego e kaakang​—ga go sa tlo ba le dinotlelo gotee le ditšhipi mafasetereng, ga go na selo seo se tla senyago go botana ka mo go feletšego le lethabo!​—Jesaya 65:​20; Mika 4:⁠4; 2 Petro 3:⁠13.

20, 21. (a) “Ba bolêta” bao go bolelwago ka bona go Psalme 37:​11 ke bomang, gomme ba hwetša kae “botlalô bya moláô”? (b) Re tla hwetša ditšhegofatšo dife ge e ba re ekiša Dafida yo Mogolo?

²⁰ Ke moka, “ba bolêta e tlo ba bôná beng ba naxa.” (Psalme 37:​11a) Eupša “ba bolêta” ba ke bomang? Lentšu le le fetoletšwego e le “bolêta” le tšwa modung wa lentšu le le bolelago “go tlaiša, go ikokobetša le go kokobetša.” Ee, “ba bolêta” ke bao ba letelago Jehofa ka boikokobetšo e  le gore a lokiše go hloka toka ka moka moo ba go dirwago. “Ba tlo thaba ka botlalô bya moláô.” (Psalme 37:​11b) Gaešita le gona bjale re hwetša boati bja khutšo paradeiseng ya moya yeo e tswalanago le phuthego ya therešo ya Bokriste.

²¹ Gaešita le ge re se ra tšwa re imollwa matshwenyegong, re a thekgana le go homotša bao ba gateletšegilego. Ka baka leo, kgotsofalo ya kgonthe e tšwago ka gare e a godišwa gare ga batho ba Jehofa. Bana babo rena bao ba kgethilwego e le badiši ka lerato ba hlankela dinyakwa tša rena tša moya​—gomme ka dinako tše dingwe le tša nama​—ba dira gore re kgone go kgotlelela matshwenyego ao a re welago ka baka la go loka. (1 Ba-Thesalonika 2:​7, 11; 1 Petro 5:​2, 3) Khutšo ye ke selo sa bohlokwa gakaakang! Le gona re na le kholofelo ya bophelo bjo bo sa felego Paradeiseng ya khutšo ye e lego kgaufsi. Ka gona, anke re ekišeng Dafida yo Mogolo, Kriste Jesu, yoo phišego ya gagwe bakeng sa Jehofa e ilego ya mo tutueletša go hlankela ka potego go fihla mafelelong. (1 Petro 2:​21) Ka go dira bjalo, re tla tšwela pele re thabile, re tumiša yo re mo thabelago, Modimo wa rena Jehofa.

Bakriste ga ba ‘jele ba babe pelo’

‘Bota Jehofa gomme o dire tše botse’

Thabela Jehofa ka go ithuta mo gontši ka mo o ka kgonago mabapi le yena

“Ba bolêta e tlo ba bôná beng ba naxa”

Na o ka Araba?

• O ithutile dithuto dife go Psalme 37:⁠1, 2?

• O ka ‘thabela Jehofa’ bjang?

• Go na le bohlatse bofe bja gore re ka ithekga ka Jehofa?