Lerato Ke le Bohlokwa Kudu

GO SA šetšwe nywaga, setšo, polelo goba morafe, batho bohle ba na le senyakwa se segolo sa lerato. Ge e ba senyakwa seo se sa kgotsofatšwe, gona ga ba thabe. Monyakišiši wa tša kalafo o ngwadile gore: “Lerato le tswalano ya kgaufsi ke mabaka a magolo a go hlaola dilo tšeo di re dirago gore re babje le tšeo di re fodišago, tšeo di bakago manyami le tšeo di tlišago lethabo, tšeo di dirago gore re tlaišege le tšeo di re kaonefatšago. Ge e ba seokobatši se sefsa se be se e-⁠na le mafelelo a swanago bathong, mo e ka bago ngaka e nngwe le e nngwe nageng e be e tla laela gore balwetši ba yona ba se diriše. Go se laele gore se dirišwe e be e tla ba tshwaro e mpe.”

Lega go le bjalo, batho ba mehleng yeno, kudu-kudu mekero ya bona ya ditaba le batho ba tumilego bao ba tšewago e le mehlala, gantši ba lebiša bohlokwa bjo bogolo go lehumo, matla, botumo le dikopano tša botona le botshadi go e na le go bo lebiša go senyakwa sa batho sa ditswalano tše borutho le tše lerato. Barutiši ba bantši ba tšea dipakane le mešomo ya lefase e le tša bohlokwa, gomme ba hlalosa gore katlego e theilwe go tšona. Ke therešo gore thuto le go hlagolela ditalente ke tša bohlokwa, eupša na di swanetše go phegelelwa ka boikemišetšo bjo bjalo moo e lego gore motho ga a be le nako bakeng sa lapa le bagwera? Mongwadi wa bogologolo yo a rutegilego yo a bego a e-⁠na le bokgoni bja go lemoga tlhago ya batho o ile a swantšha motho yo a nago le bokgoni eupša a se na lerato le ‘tšhipi e llago goba moropa wo o dumago.’ (1 Ba-Korinthe 13:⁠1) Batho ba bjalo ba ka huma, gaešita le go ba ba tumilego, eupša le ka mohla e se ba thabilego e le ka kgonthe.

Jesu Kriste, yo a bego a e-⁠na le kwešišo e tseneletšego le maikwelo a kgethegilego a borutho ka batho, o ile a lebelela lerato la go rata Modimo le moagišani e le la bohlokwa-hlokwa thutong ya gagwe. O itše: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka. . . . Wa xeno O mo ratê ka mokxwa wo O ithataxo ka wôna.” (Mateo 22:​37-39) Ke feela ba ba bego ba latela mantšu a bao e bego e tla ba balatedi ba Jesu e le ka kgonthe. Ke ka baka leo a itšego: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.”​—Johane 13:⁠35.

Ka gona, ke bjang motho a ka hlagolelago lerato lefaseng le la lehono? Le gona batswadi ba ka ruta bana ba bona lerato bjang? Sehlogo se se latelago se tla ahla-ahla dipotšišo tše.

[Caption on page 3]

Ke tlhohlo go hlagolela lerato lefaseng leo le bušwago ke megabaru