Phihlelo

Go Hlankela ba Bangwe go Fokotša Tlaišego ya Motho

KA GE GO ANEGA JULIÁN ARIAS

Ka 1988, ge ke be ke e-⁠na le nywaga e 40, mošomo wa-ka wo ke ithutetšego wona o be o bonagala o šireletšegile. Ke be ke le molaodi wa tikologo wa khamphani ya ditšhaba tše dintši. Ka baka la mošomo wa-ka, khamphani e ile ya nnea koloi ya mabai-bai, ya ntefa tšhelete e ntši gomme ya nnea le ofisi e botse bogareng bja Madrid, Sepania. Khamphani e ile ya ba ya bolela ka go se lebanye gore e be e tla nkgetha gore ke be molaodi wa yona wa gare ga naga. Ka nako yeo ke be ke sa lemoge gore bophelo bja-ka bo be bo le kgaufsi le go fetoga kudu.

KA LETŠATŠI le lengwe wona ngwageng woo, ngaka ya-ka e ile ya mpotša gore ke na le multiple sclerosis, e lego bolwetši bjo bo sa folego. Ke be ke nyamile kudu. Ka morago, ge ke be ke bala ka seo multiple sclerosis e ka se dirago go motho, ke ile ka tšhoga. * Go be go bonagala eka ke tla dula ke le kotsing bophelo bja-ka ka moka. Ke be ke tla hlokomela bjang mosadi wa-ka, Milagros le morwa wa-ka wa nywaga e meraro, Ismael? Re be re tla lebeletšana bjang le boemo bjo ka katlego? Ge ke be ke dutše ke phopholetša dikarabo tša dipotšišo tše, go ile gwa direga selo se sengwe gape se se nyamišago.

Mo e ka bago kgwedi ka morago ga ge ngaka ya-ka e mpoditše ka bolwetši bja-ka, mookamedi wa-ka o ile a mpiletša ka ofising ya gagwe gomme a ntsebiša gore khamphani e be e nyaka batho bao ba nago le seo go thwego ke ponagalo e botse. Le gona motho yo a nago le bolwetši bjo bo golofatšago​—gaešita le megatong ya bjona ya mathomo⁠—​o be a sa tšweletše ponagalo yeo. Ka gona, mong  wa-ka o ile a nthaka mošomong ka yona nako yeo. Ka motsotswana feela, mošomo wa-ka o be o fedile.

Go ba lapa la-ka, ke ile ka leka go ba yo a tiilego, eupša ke be ke hlologetšwe go ba noši, go nagana ka maemo a-⁠ka a mafsa le go naganišiša ka bokamoso bja-ka. Ke ile ka leka go lwantšha maikwelo ao a bego a gola a kgateletšego. Seo se ilego sa nkweša bohloko le go feta e be e le gore ka ponyo ya leihlo ke ile ka se sa ba yo bohlokwa mahlong a khamphani ya-ka.

Go Hwetša Matla Bofokoding Bja-⁠ka

Ke leboga gore nakong ye ya manyami, ke ile ka kgona go ithekga ka methopo e mmalwa ya matla. Nywageng e 20 pejana, ke ile ka ba yo mongwe wa Dihlatse tša Jehofa. Ka gona ke ile ka rapela Jehofa go tšwa pelong mabapi le maikwelo a-⁠ka gotee le dipelaelo tša-ka ka bokamoso. Mosadi wa-ka, yo le yena e lego yo mongwe wa Dihlatse tša Jehofa, e be e le mothopo wo o sa fetogego wa matla, gomme ke be ke e-⁠na le thekgo ya ba bangwe ba bagwera ba kgaufsi bao botho bja bona le kwelobohloko di ilego tša ipontšha e le tša bohlokwa.​—Diema 17:⁠17.

Go ikwa ke ikarabela ka ba bangwe le gona go ile gwa thuša. Ke be ke nyaka go godiša morwa wa-ka gabotse, go mo ruta, go bapala le yena le go mo tlwaetša modirong wa boboledi. Ka gona ke be nka se itlhoboge. Go oketša moo, ke be ke le mogolo go e nngwe ya diphuthego tša Dihlatse tša Jehofa, gomme bana bešo le dikgaetšedi ba Bakriste moo ba be ba nyaka thekgo ya-ka. Ge nkabe ke ile ka dumelela gore tlaišego ya-ka e fokodiše tumelo ya-ka, ke be ke tla ba mohlala o bjang go ba bangwe?

Ka ntle le pelaelo, bophelo bja-ka bo fetogile mmeleng le go tša boiphedišo​—ka ditsela tše dingwe bo mpefetše eupša ka ditsela tše dingwe bo kaonafetše. Ka nako e nngwe ke ile ka kwa ngaka e re: “Bolwetši ga bo bolaye motho, eupša bo a mo fetola.” Le gona ke ithutile gore ga se diphetogo ka moka tšeo e lego tše mpe.

Sa pele, ‘phatša ya-ka nameng’ e ile ya nthuša go kwešiša mathata a batho ba bangwe a tša maphelo gakaone gotee le go ba kwela bohloko. (2 Ba-Korinthe 12:⁠7) Ke ile ka kwešiša go feta le ge e le neng pele mantšu a Diema 3:⁠5, a rego: “Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô.” Go feta tšohle, maemo a-⁠ka a mafsa a ile a nthuta dilo tšeo e tlogago e le tša bohlokwa bophelong le tšeo di neago kgotsofalo ya kgonthe le go ikwa o le bohlokwa. Go be go sa dutše go na le mo gontši mo nka go dirago mokgatlong wa Jehofa. Ke ile ka kwešiša seo se bolelwago ke mantšu a Jesu e le ka kgonthe a rego: “Lešexo la monei le phala la monewa.”​—Ditiro 20:⁠35.

Bophelo bjo Bofsa

Kapejana ka morago ga gore ke hlahlobje gomme ke hwetšwe ke e-⁠na le bolwetši bjo, ke ile ka laletšwa go ya seminaring kua Madrid moo Bakriste ba baithapi ba bego ba rutwa go hlagolela tirišano magareng ga dingaka le balwetši ba bona ba Dihlatse. Ka morago, baithapi bao ba ile ba rulaganywa gore e be Dikomiti tša go Hloma Kwano le Sepetlele. Go nna, seminari yeo e tlile ka nako e swanetšego. Ke ile ka hwetša mošomo o kaone woo o bego o tla ntlišetša kgotsofalo e kgolo go feta mošomo le ge e le ofe wa kgwebo.

Kua seminaring re ithutile gore Dikomiti tša go Hloma Kwano le Sepetlele tšeo di sa tšwago go hlongwa di be di abetšwe go etela dipetlele, go boledišana le dingaka le go direla bašomi ba tirelo ya tša maphelo dipontšho, tšohle di dirwa ka morero wa go hlagolela tirišano le go thibela diphapano. Dikomiti di thuša Dihlatse-gotee go hwetša dingaka tšeo di ikemišeditšego go dira ditshepedišo tša tša kalafo ka ntle le go diriša madi. Ke therešo gore bjalo ka motho feela yo a sa tsebego selo ka tša kalafo, go be go na le mo gontši moo ke bego ke swanetšego go ithuta gona ka mantšu a tša kalafo, melao ya boitshwaro ya tša kalafo le mekgatlo ya sepetlele. Lega go le bjalo, ka morago ga seminari ke ile ka ya gae ke le motho yo mofsa, ke hlametšwe tlhohlo e mpsha yeo e nthabišago.

 Go Etela Sepetlele Leboelela​—Mothopo wa Kgotsofalo

Gaešita le ge bolwetši bja-ka bo be bo nkgolofatša ka go nanya le ka mo go sa fetogego, boikarabelo bja-ka ke le setho sa Komiti ya go Hloma Kwano le Sepetlele bo ile bja gola. Ka gona ka ge ke be ke newa phenšene ya digole, ke be ke e-⁠na le nako ya go etela sepetlele leboelela. Go sa šetšwe dinako tšeo di nyamišago, maeto a a ile a ipontšha e le a bonolo le a putsago go feta kamoo ke bego ke lebeletše. Gaešita le ge bjale ke sepela ka setulo sa digole, ye ga se ya ka ya ba tšhitišo e kgolo. Setho-gotee le nna sa komiti ka mehla se sepela le nna. Go oketša moo, dingaka di tlwaetše go bolela le batho ba ba sepelago ka ditulo tša digole, gomme ka dinako tše dingwe go bonagala di theetša ka tlhompho e kgolo ge di bona boiteko bjoo ke bo dirago bja go di etela.

Nywageng e lesome e fetilego, ke etetše dingaka tše makgolo. Tše dingwe di be di ikemišeditše go re thuša go tloga le mathomong. Dr. Juan Duarte​—e lego ngaka ya go bua pelo kua Madrid yeo e kgotsofatšwago ke go hlompha letswalo la molwetši⁠—​kapejana o ile a re nea ditirelo tša gagwe. Ga e sa le go tloga ka nako yeo, o ile a dira mediro ya go bua e 200 ka ntle le go diriša madi balwetšing ba Dihlatse bao ba tšwago dikarolong tše dintši tša Sepania. Go theoša le nywaga dingaka tše dintši di ile tša thoma go bua ka ntle le go diriša madi. Maeto a rena a ka mehla a ile a bapala karolo e itšego, eupša kgatelopele e ile ya tlišwa gape ke tšwelopele ya tša kalafo gomme mafelelo a mabotse a ile a fihlelelwa modirong wa go bua ka ntle le madi. Le gona re kgodišegile gore Jehofa o šegofaditše maiteko a rena.

Ke ile ka kgothatšwa kudu-kudu ke karabelo ya dingaka tše dingwe tša go bua pelo tšeo ka mo go kgethegilego di alafago bana. Ka nywaga e mebedi re ile ra etela sehlopha se setee sa dingaka tše pedi tša go bua le dingaka tša tšona tše pedi tšeo di alafago ka go hwiša bogogoma. Re ile ra se nea puku ya tša kalafo yeo e bego e hlalosa seo dingaka tše dingwe di bego di se dira lefapheng le. Maiteko a rena a ile a putswa ka 1999 Sebokeng sa tša Kalafo Seo se Bego se Bolela ka go Bua Tshepedišo ya Megalatšhika ya Bana. Dingaka tše tše pedi tša go bua​—di hlahlwa ka bokgoni ke ngaka ya go bua ye e nago le tirišano yeo e tšwago Engelane​—di ile tša dira modiro o thata ka mo go feteletšego wa go bua ngwana wa Hlatse yoo belefe ya gagwe ya mogalatšhika o mogolo wa pelo e bego e nyaka go lokišwa. * Ke ile ka thaba le batswadi ge yo mongwe wa dingaka tša go bua a be a e-⁠tšwa ka phapošing ya go buwela go tla go tsebiša gore modiro wa go bua o atlegile le gore letswalo la lapa le hlomphilwe. Ga bjale dingaka tše tše pedi ka mehla di amogela balwetši ba Dihlatse go tšwa Sepania ka moka.

Seo ke hwetšago e le se se thabišago e le ka kgonthe ka ditiragalo tše bjalo ke go lemoga gore nka kgona go thuša bana bešo ba Bakriste. Ge ba ikgokaganya le Komiti ya go Hloma Kwano le Sepetlele, gantši ye e ba e nngwe ya dinako tše thata kudu maphelong a bona. Ba swanelwa ke go buiwa, gomme dingaka tša sepetlele seo se lego tikologong ga di nyake goba ga di kgone go ba alafa ka ntle le go diriša madi. Lega go le bjalo, ge bana bešo ba lemoga gore go na le dingaka tša go bua tšeo di nago le tirišano mafapheng ka moka a tša kalafo mo Madrid, ba ikwa ba imologile kudu. Ke ile ka bona ponagalo ya sefahlego sa ngwanešo e fetoga go tloga go tshwenyegeng go ya boiketlong, feela ka baka la go ba gona ga rena thoko ga gagwe kua sepetlele.

 Lefase la Baahlodi le Melao ya Boitshwaro ya tša Kalafo

Nywageng ya morago bjale, ditho tša Dikomiti tša go Hloma Kwano le Sepetlele di ile tša etela le baahlodi. Maetong ao re ba nea kgatišo e bitšwago Family Care and Medical Management for Jehovah’s Witnesses, yeo ka mo go kgethegilego e bego e lokišeditšwe go tsebiša baemedi ba bjalo ka boemo bja rena tabeng ya go diriša madi le ditsela tše dingwe tšeo di lego gona tšeo di ka dirišwago tša tša kalafo tšeo di sa dirišego madi. Maeto a a be a nyakega kudu, ka ge pele e be e le mo go tlwaelegilego go baahlodi kua Sepania gore ba laele dingaka gore di tšhele molwetši madi kgahlanong le dikganyogo tša gagwe.

Diphapoši tša baahlodi ke mafelo a mabotse kudu, gomme ketelong ya-ka ya pele, ke ile ka inyatša ge ke be ke sepela ditsejaneng tša ka moagong ka setulo sa-ka sa digole. Seo se ilego sa thatafatša ditaba le go feta ke gore re ile ra ba le kotsi e nyenyane, gomme ke ile ka wa setulong sa-ka ka wela fase ka dikhuru. Baahlodi le bo-ramolao ba sego kae bao ba ilego ba bona boemo bja-ka, ka botho ba ile ba tla go nthuša eupša ke ile ka lewa ke dihlong pele ga bona.

Gaešita le ge baahlodi ba be ba sa kgonthišega ka lebaka leo ka lona re bego re ba etela, ba bantši ba bona ba ile ba re swara ka botho. Moahlodi wa pele yoo ke mo etetšego o be a šetše a naganišiša ka boemo bja rena, gomme o ile a bolela gore o be a tla rata go bolela le rena ka mo go nabilego. Ketelong ya rena e latetšego, yena ka noši o ile a ntshepediša ka setulo sa-ka a ntsenya ka phapošing ya gagwe gomme a theetša ka kelohloko. Mafelelo a mabotse ao a ilego a tšwelela ketelong ye ya pele a ile a kgothaletša nna le bagwera ba-ka gore re fenye dipoifo tša rena, gomme go se go ye kae re ile ra bona mafelelo a oketšegilego a mabotse.

Ngwageng wona woo re ile ra tlogela kopi ya Family Care le moahlodi yo mongwe gape yoo a ilego a re amogela ka botho gomme a holofetša go bala tsebišo. Ke ile ka mo nea nomoro ya-ka ya mogala bakeng sa ge go ka direga gore a nyake go ikgokaganya le rena ka tšhoganetšo. Dibekeng tše pedi ka morago o ile a nteletša mogala go mpotša gore ngaka ya go bua ya tikologong e mo kgopetše gore a ntšhe taelo ya gore Hlatse yeo e bego e nyaka go buiwa e tšhelwe madi. Moahlodi o ile a re botša gore o be a nyaka gore re mo thuše go hwetša tharollo yeo e bego e tla hlompha kganyogo ya Hlatse ya go phema go diriša madi. Ga se ra ka ra ba le bothata bjo bogolo bja go hwetša sepetlele se sengwe, seo go sona dingaka tša go bua di ilego tša dira modiro wa go bua ka katlego ka ntle le go diriša madi. Moahlodi o be a thabile ge a e-⁠kwa ka mafelelo a seo, gomme o ile a re kgonthišetša gore o be a tla nyaka ditharollo tše di swanago nakong e tlago.

Nakong ya go etela ga-ka sepetlele leboelela, potšišo  ya mabapi le melao ya boitshwaro ya tša kalafo e be e rotoga gantši, ka ge re be re nyaka gore dingaka di ele hloko ditshwanelo gotee le letswalo la molwetši. Sepetlele se sengwe seo se nago le tirišano kua Madrid se ile sa ntaletša gore ke tšee karolo lenaneo-thutong leo go lona go bego go rutwa melao ya boitshwaro. Lenaneo-thuto le le ile la dira gore ke kgone go tšweletša pono ya rena yeo e theilwego Beibeleng go ditsebi tše dintši tšeo di lego lefapheng le. Le ile la nthuša gape go kwešiša diphetho tše dintši tše thata tšeo dingaka di swanetšego go di dira.

Yo mongwe wa barutiši ba lenaneo-thuto le, e lego Moprofesara Diego Gracia, gantši o rulaganya lenaneo-thuto la tša boitshwaro leo le newago ke setsebi sa tša kalafo bakeng sa dingaka tša Sepania gomme o fetogile mothekgi o mogolo wa tshwanelo ya go nea tumelelo ya go alafša ka morago ga go newa tsebišo tabeng ya ditšhelo tša madi. * Go ikgokaganya ga rena le bona ka mehla go ile gwa dira gore baemedi ba bangwe ba lekala la Sepania la Dihlatse tša Jehofa ba laletšwe gore ba ye go hlalosa boemo bja rena go barutwana bao ba šetšego ba alogile ba Moprofesara Gracia, bao ba bangwe ba bona ba lebelelwago e le dingaka tše kaone nageng.

Go Lebeletšana le Therešo ya Bophelo

Ke therešo gore mošomo wo o kgotsofatšago wo ke o direlago badumedi-gotee le nna ga se wa rarolla mathata a-⁠ka ka moka. Bolwetši bja-ka bo tšwela pele ka mo go sa fetogego. Lega go le bjalo, ka mahlatse, monagano wa-ka o phafogile. Ke leboga mosadi wa-ka le morwa wa-ka, bao le ka mohla ba sa ngongoregego, ke sa dutše ke kgona go phetha boikarabelo bja-ka. Ka ntle le thušo gotee le thekgo ya bona, se se be se ka se kgonege. Ga ke kgone gaešita le go konopela borokgo bja-ka goba go ikapeša jase. Ke thabela kudu go dira boboledi Mokibelo o mongwe le o mongwe le morwa wa-ka, Ismael, yo a ntshepedišago ka setulo sa-ka go ya gohle e le gore nka kgona go bolela le beng ba dintlo ba fapa-fapanego. Le gona ke sa dutše ke kgona go dira mediro ya-ka ke le mogolo wa phuthego.

Ke ile ka ba le dinako tše dingwe tša go gateletšega nywageng e 12 e fetilego. Ka dinako tše dingwe, go bona tsela yeo ka yona bogole bja-ka bo kgomago lapa la-ka ka gona go ile gwa nkweša bohloko kudu go feta bolwetši ka bo bjona. Ke a tseba gore ba a tlaišega, gaešita le ge ba sa bolele ka seo. E sego kgale kudu, mmatswale wa-ka le tate ba ile ba hwa lebakeng la ngwaga. Ngwageng wona woo, ke ile ka ikhwetša ke sa kgone go sepela-sepela ka ntle le setulo sa digole. Tate, yo a bego a dula ka ngwakong wa rena, o ile a bolawa ke bolwetši bjo bongwe bjo bo golofatšago. Milagros, yo a bego a mo hlokomela, o ile a ikwa eka o bona seo se tlago go ntiragalela nakong e tlago.

Lega go le bjalo, ka lehlakoreng le lengwe, lapa la rena le momagane ka ge re lebeletšana le mathata re le gotee. Setulo sa ka sa bolaodi se tšeetšwe sebaka ka setulo sa digole, eupša bophelo bja-ka ga bjale ge e le gabotse bo kaone ka gobane bo neetšwe ka mo go feletšego go thušeng ba bangwe. Go nea go ka fokotša go tlaišega ga motho, gomme Jehofa ruri o phethagatša kholofetšo ya gagwe ya go re nea matla ge re a hloka. Ka go swana le Paulo, nka bolela e le ka kgonthe gore: “Ke kxôna tšohle ka Eo a mphaxo matla, Yêna Kriste.”​—Ba-Filipi 4:⁠13.

[Mengwalo ya ka tlase]

[Lepokisi go letlakala 24]

Pono ya Morwa

Kgotlelelong ya tate le ponong ya gagwe e nepagetšego, ke hwetša mohlala o mobotse kudu, gomme ke ikwa ke na le mohola ge ke mo sepediša gohle ka setulo sa gagwe. Ke a tseba gore ga se ka dinako tšohle nka kgonago go dira dilo tšeo ke tla ratago go di dira. Ga bjale ke mofsa yo a lego mahlalagading, eupša ge ke gola, ke tla rata go hlankela ke le setho sa Komiti ya go Hloma Kwano le Sepetlele. Ke tseba go tšwa dikholofetšong tša Beibele gore tlaišego ke selo sa nakwana le gore bana bešo ba bantši le dikgaetšedi ba tlaišega go feta kamoo rena re tlaišegago ka gona.

[Lepokisi go letlakala 24]

Pono ya Mosadi

Go mosadi yo a nyetšwego, go phela le molekane yo a tlaišwago ke multiple sclerosis go thata​—monaganong, maikwelong le mmeleng. Ke swanetše go ba yo a leka-lekanego dilong tšeo ke rulaganyetšago go di dira le go ikemišetša go hlokomologa go belaela mo go sa nyakegego ka bokamoso. (Mateo 6:​34) Lega go le bjalo, go phela ka go tlaišega go ka utolla dika tša motho tše kaone. Lenyalo la rena le tiile kudu go feta pele, gomme ke na le tswalano ya kgaufsi kudu le Jehofa. Diphihlelo tša ba bangwe bao ba lego maemong a swanago a gateletšago le tšona di ile tša mmatlafatša kudu. Ke na le kgotsofalo yeo Julián a nago le yona ka baka la tirelo ya gagwe e bohlokwa yeo a e direlago bana bešo, gomme ke hweditše gore Jehofa le ka mohla a ka se re nyamiše, gaešita le ge letšatši le lengwe le le lengwe le ka tliša tlhohlo e mpsha.

[Caption on page 22]

Mosadi wa-ka ke mothopo wa matla go nna

[Caption on page 23]

Poledišano le Dr. Juan Duarte e lego ngaka ya go bua pelo

[Caption on page 25]

Nna le morwa wa-ka re thabela go šoma gotee bodireding