Dipotšišo tše Tšwago go Babadi

Ke ka baka la’ng go Ba-Hebere 2:​14, NW Sathane a bitšwa “yo a nago le tsela ya go baka lehu”?

Ka boripana, Paulo o be a bolela gore Sathane a ka baka lehu la batho goba a ka diriša baemedi ba gagwe go dira seo. Ka go dumelelana le seo, Jesu o ile a bitša Sathane “mmolai wa batho go tloga mathomong.”​—Johane 8:​44, PK.

Go ka tsoga go se kwešišane ka lengwalo la Ba-Hebere 2:​14 ka baka la tsela yeo diphetolelo tše dingwe di e fetolelago ka yona, di bolela gore Sathane o na le “matla a lehu” goba “matla a go fenya lehu.” (King James Version; Revised Standard; New International Version; Jerusalem Bible) Diphetolelo tše bjalo di ka dira gore go bonagale eka Sathane o na le matla a sa lekanyetšwago a go bolaya motho le ge e le ofe yo a mo kgethago. Lega go le bjalo, seo ga se bjalo le gatee. Ge nkabe go be go le bjalo, ka ntle le pelaelo nkabe e le kgale a fedišitše barapedi ba Jehofa mo lefaseng.​—Genesi 3:⁠15.

Polelwana ya Segerika yeo e fetoletšwego e le “matla a go fenya lehu” ka diphetolelong tše dingwe le “tsela ya go baka lehu” ka go New World Translation ke “kraʹtos tou tha·naʹtou.” Tou tha·naʹtou ke mohuta wa polelwana yeo e bolelago “lehu.” Ge e le gabotse kraʹtos e bolela “matla.” Go ya ka Theological Dictionary of the New Testament, e bolela “go ba gona le bohlokwa bja matla go e na le go dirišwa ga ona.” Ka gona, go Ba-Hebere 2:​14, Paulo ga a bolele gore Sathane o na le matla a feletšego a go fenya lehu. Go e na le moo, o šupa go bokgoni bja Sathane bja go baka lehu.

Sathane o diriša bjang “tsela ya go baka lehu”? Ka pukung ya Jobo, re bala ka tiragalo e nngwe yeo e ka bago ya moswana-noši ka tsela e itšego. Pego e bolela gore Sathane o ile a diriša ledimo go ‘baka lehu’ la bana ba Jobo. Lega go le bjalo, ela hloko gore Sathane o be a ka dira se feela ka tumelelo ya Modimo, yeo e bego e neilwe ka baka la gore go be go dirwa phetho tabeng ya bohlokwa kudu. (Jobo 1:​12, 18, 19) Ka kgonthe, Sathane ga se a kgona go bolaya Jobo ka boyena. O ile a ganwa le tumelelo ya go dira seo. (Jobo 2:⁠6) Se se bontšha gore gaešita le ge ka dinako tše dingwe Sathane a ile a kgona go baka lehu la batho bao ba botegago, ga se ra swanela go boifa gore a ka re bakela lehu neng le neng ge a nyaka go dira bjalo.

Le gona Sathane o bakile lehu ka go diriša baemedi ba batho. Ka baka leo, Bakriste ba bantši ba hwetše tumelo ya bona, ba bangwe ba ile ba bolawa ke dihlopha tša bahlola-mpherefere tšeo di galefilego goba ba ahlolwa ka go hloka toka ke balaodi ba mmušo goba baahlodi bao ba gobogilego.​—Kutollo 2:⁠13.

Go oketša moo, ka dinako tše dingwe Sathane o bakile lehu ka go ikhola ka mafokodi a batho. Morago kua mehleng ya Isiraele, moporofeta Bileama o ile a eletša ba-Moaba gore ba gogele ba-Isiraele ‘go hlaleng Jehofa.’ (Numeri 31:​16) Seo se ile sa feleletša ka go hwa ga ba-Isiraele ba ka godimo ga ba 23 000. (Numeri 25:⁠9; 1 Ba-Korinthe 10:⁠8) Ka mo go swanago lehono ba bangwe ba tanywa ke “dipoxo” tša Sathane gomme ba gogelwa boitshwarong bjo bo gobogilego goba mekgweng e mengwe ya go se boife Modimo. (Ba-Efeso 6:​11) Ke therešo gore gantši batho ba bjalo ga ba lahlegelwe ke maphelo a bona kapejana. Eupša ba kotsing ya go lahlegelwa ke bophelo bjo bo sa felego, gomme ka tsela yeo Sathane o baka lehu la bona.

Gaešita le ge re lemoga bokgoni bja Sathane bja go baka kotsi, ga se ra swanela go mmoifa ka mo go sa hlokagalego. Ge Paulo a be a bolela gore Sathane o na le tsela ya go baka lehu, o ile a ba a bolela gore Kriste o hwile e le gore ‘a ka fenya Sathane, le go lokolla bao e bego e le batlengwa ka go boifa lehu mehla yohle ge ba sa phela.’ (Ba-Hebere 2:​14, 15) Ee, Jesu o lefile topollo gomme ka go rialo a lokolla batho bao ba dumelago bokgobeng bja sebe le lehu.​—2 Timotheo 1:⁠10.

Go ba gona, ke mo go šišinyago kgopolo go nagana gore Sathane o na le tsela ya go baka lehu, eupša re kgodišegile gore Jehofa a ka lokiša tshenyo le ge e le efe yeo e bakilwego ke Sathane le baemedi ba gagwe. Jehofa o re kgonthišetša gore Jesu yo a tsošitšwego o tla “fediša medirô ya Diabolo.” (1 Johane 3:⁠8) Ka matla a Jehofa, Jesu o tla tsoša bahu gomme ka go rialo a fediša lehu. (Johane 5:​28, 29) Mafelelong, Jesu o tla pepentšha ka tsela e makatšago go hlaelelwa ga Sathane ke matla ka go mo lahlela moleteng. Mafelelong Sathane o ahlolelwa phedišo ya ka mo go sa felego.​—Kutollo 20:​1-10.