Na e fo ba Mokgwa o Tlwaelegilego Goba ke Letsogo-le-kobong?

DIKHOLETŠHENG tše dingwe tša kua Poland, barutwana ba tlwaetše go kgoboketša tšhelete bakeng sa go rekela barutiši ba bona dimpho ba holofetše gore ba tla hwetša dintlha tše kaone kudu ditlhahlobong tša bona. Ka gona, ga go makatše ge mofsa wa Mokriste yo a bitšwago Katarzyna a ile a lebeletšana le boemo bjo thata. O ile a ipotšiša gore: “Na ke ntšhe tšhelete goba ke se e ntšhe?” Barutwana-gotee le yena ba ile ba mmotša gore: “Ke mokgwa o tlwaelegilego. Ga o lahlegelwe ke selo, eupša o ka holega, bjale o belaetšwa ke’ng?”

Katarzyna o dumela ka gore: “Therešo ke gore ngwageng wa-ka wa mathomo dithutong, ke ile ka tšea karolo go kgoboketšweng ga tšhelete. E bile ka morago ga nako e itšego moo ke ilego ka lemoga gore ke be ke thekga letsogo-le-kobong, e lego selo seo se iletšwago ka Beibeleng.” O ile a gopola mangwalo ao a bontšhago gore Jehofa o tloga a iletša letsogo-le-kobong. (Doiteronomio 10:​17; 16:​19; 2 Koronika 19:⁠7) Katarzyna o re: “Ke ile ka kwešiša kamoo go lego bonolo ka gona go ineela kgateletšong ya dithaka. Ke ile ka lebeledišiša taba yeo gape, gomme go tloga nakong yeo ga se ka ka ka tšea karolo gape mokgweng wo.” Nywageng e meraro e fetilego o ile a kgona go hlalosetša ba bangwe gore ga a tšee karolo dikgoboketšong tša seo go thwego ke mpho ka baka la ditumelo tša gagwe tšeo di theilwego Beibeleng, go sa šetšwe go kwerwa ga gagwe ke ba bangwe.

Ba bangwe ba ile ba latofatša Katarzyna ka gore o na le moya wa boithati le wa go ikarola. O re: “Le gona bjale ba bangwe ba bona ga ba ntebelele gabotse. Ka lehlakoreng le lengwe, ba bantši ba hlompha tsela yeo ke lebelelago dilo ka yona e lego selo seo se nthabišago.” Katarzyna o ile a tsebja e le yo mongwe wa Dihlatse tša Jehofa tšeo di phelago ka melao ya motheo ya Beibele bophelong bja letšatši le letšatši.