Lebelelang Dika Tše Dibotse Go Bohle
Lebelelang Dika Tše Dibotse Go Bohle
“O nkgopole, Modimo wa-ka, ka tše botse.”—Nehemia 13:31, NW.
1. Ke bjang Jehofa a dirago batho bohle ka botho?
KA MORAGO ga matšatši a mantši a ge go be go apešitše maru, go hlaba ga letšatši go a thabelwa. Batho ba a thaba ke moka ba ikwa gabotse. Ka mo go swanago, ka morago ga ge letšatši le fišitše nako e telelele gomme go omile, go na ga pula—gaešita le go tšhologa ga yona—e ba mo go lapološago le mo go imollago. Mmopi wa rena yo lerato, Jehofa, o rulagantše tikologo ya lefase gore e be le boemo bjo bjo bobotse bja leratadima. Jesu o ile a gogela tlhokomelo go neeng kudu ga Modimo ge a be a ruta gore: “Ratang manaba a lena; ba ba Le roxaxo Le ba šexofatšê; ba ba Le hlôyaxo Le ba setšê; ba ba Le pharaxo le ba Le hlômaraxo Le ba rapêlêlê. Ké xôna xe Le tlo ba bana ba Tata-weno wa maxodimong; xobane Yêna, letšatši la xaxwe ó le hlabišetša ba babe le ba boló; le pula ya xaxwe ó e nešetša baloki le bakxôpô.” (Mateo 5:43-45) Ee, Jehofa o dira bohle ka botho. Bahlanka ba gagwe ba swanetše go katanela go mo ekiša ka go lebelela dika tše dibotse go ba bangwe.
2. (a) Jehofa o swara batho ka botho motheong ofe? (b) Jehofa o lemoga’ng mabapi le tsela yeo re arabelago ka yona bothong bja gagwe?
2 Jehofa o swara batho ka botho motheong ofe? Ga e sa le go tloga ge Adama a wetše sebeng Jehofa ga se a ka a palelwa ke go lebelela dika tše dibotse bathong. (Psalme 130:3, 4) Morero wa gagwe ke go bušetša batho bao ba kwago bophelong bja Paradeiseng. (Ba-Efeso 1:9, 10) Botho bja gagwe bjo bo sa swanelago bo re neile tebelelo ya go lopollwa sebeng le go se phethagaleng ka Peu e holofeditšwego. (Genesi 3:15; Ba-Roma 5:12, 15) Go amogela tokišetšo ya topollo go kgora tsela ya gore batho mafelelong ba boele phethegong. Ga bjale Jehofa o šeditše yo mongwe le yo mongwe wa rena, gare ga dilo tše dingwe o re šeditše gore a bone kamoo re arabelago ka gona go neeng kudu ga gagwe. (1 Johane 3:16) O lemoga selo le ge e le sefe seo re se dirago bakeng sa go bontšha tebogo ya rena ya go leboga botho bja gagwe. Moapostola Paulo o ngwadile gore: “Xobane Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.”—Ba-Hebere 6:10.
3. Ke potšišo efe yeo re swanetšego go e ahla-ahla?
3 Ka gona, re ka ekiša Jehofa bjang go lebeleleng dika tše dibotse go ba bangwe? Anke re ahla-ahleng dikarabo tša potšišo ye dikarolong tše nne tša bophelo: (1) bodireding bja Bokriste, (2) ka lapeng, (3) phuthegong le (4) ditswalanong tša rena le ba bangwe.
Modirong wa go Bolela le wa go Dira Barutiwa
4. Ke bjang go tšea karolo bodireding bja Bokriste e lego pontšho ya go lebelela dika tše dibotse go ba bangwe?
4 Ge Jesu a be a araba dipotšišo tša barutiwa ba gagwe tša mabapi le seo se bolelwago ke seswantšho sa mabele le mefoka o ile a hlalosa gore “thšemo ké lefase.” Ka ge re le barutiwa ba Kriste ba mehleng yeno, re lemoga therešo ye ge re le bodireding bja rena. (Mateo 13:36-38; 28:19, 20) Bodiredi bja rena bja tšhemo bo akaretša boipolelo bja phatlalatša bja tumelo ya rena. Taba ya gore Dihlatse tša Jehofa di tsebja gabotse ka bodiredi bja tšona bja go ya ka ntlo le ntlo le ditarateng e hlatsela go ba mafolofolo ga rena go tsomeng bohle bao ba swanelwago ke molaetša wa Mmušo. Ka kgonthe, Jesu o laetše gore: “Xe Le tsêna motseng xoba motsaneng, Le botšišê xe xo ka ba le e a swanetšexo xo iwa xo yêna.”—Mateo 10:11; Ditiro 17:17; 20:20.
5, 6. Ke ka baka la’ng re phegelela go etela batho leboelela magaeng a bona?
5 Ge re etela batho re sa letelwa, re lemoga karabelo ya bona molaetšeng wa rena. Ka dinako tše dingwe re hwetša gore setho se sengwe sa lapa se tla re theetša, mola legaeng lona leo yo mongwe a ka goeletša ka gore, “Ga re thabele,” ke moka ketelo ya felela moo. Re kwišwa bohloko kudu gakaakang ke gore kganetšo goba go se be le kgahlego ga motho o tee go kgoma karabelo ya yo mongwe! Ka gona, re ka dira’ng e le gore re tšwele pele re lebelela dika tše dibotse go bohle?
6 Ketelo ya rena e latelago legaeng leo ge re dira modiro wa boboledi tikologong yeo e ka re nea sebaka sa go bolela ka go lebanya le motho yo a ilego a kgaosetša ketelo ya nakong e fetilego. Go gopola seo se ilego sa direga nakong e fetilego go ka re thuša go lokišeletša. Mohlomongwe moganetši a ka ba ile a dira seo ka maikemišetšo a mabotse, a dumela gore o swanetše go thibela motho yo a thabelago go theetša molaetša wa Mmušo. Mohlomongwe dikgopolo tša gagwe di be di tutueditšwe ke tsebišo ya maaka yeo a e hweditšego mabapi le maikemišetšo a rena. Eupša seo ga se re thibele go phegelela go bolela ditaba tše dibotse tša Mmušo legaeng leo, ka bohlale re leka go phošolla go se kwešišane. Re thabela go thuša bohle go hwetša tsebo e nepagetšego ya go tseba Modimo. Ka morago ga moo mohlomongwe Jehofa o tla gogela motho yoo go yena.—Johane 6:44; 1 Timotheo 2:4.
7. Ke’ng seo se ka re thušago go ba le boemo bja kgopolo bjo bo nepagetšego ge re e-ya bathong?
7 Le gona ditaelo tšeo Jesu a di neilego barutiwa ba gagwe di be di akaretša kganetšo ya lapa. Na ga se a re: “Ke tlile xo šitanya motho le tat’axwe, ngwanenyana le mm’axwe, ngwetši le matswal’axwe”? Jesu o okeditše ka gore: “Ba-bô-motho e tlo ba manaba ’axwe.” (Mateo 10:35, 36) Lega go le bjalo, maemo le dipono tša batho di a fetoga. Bolwetši bja kapejana, go lahlegelwa ke wa leloko, dikotsi, mathata a maikwelo le mabaka a mangwe a sa balegego di tutuetša tsela yeo ka yona batho ba arabelago modirong wa rena wa boboledi. Ge e ba re e-na le pono e fošagetšego—ya gore batho bao re bolelago le bona ba tla dula ba sa arabele—na re tloga re lebelela dika tše dibotse go bona? Ke ka baka la’ng re sa etele magaeng a bona gape ka lethabo nakong e nngwe? Mohlomongwe re ka hwetša karabelo e fapanego. Ka dinako tše dingwe ga se feela seo re se bolelago seo se dirago gore go be le karabelo e fapanego, eupša le tsela yeo re se bolelago ka yona. Go rapela Jehofa ka go tšwa pelong pele re thoma modiro wa boboledi ka ntle le pelaelo go tla re thuša go ba le boemo bjo bo nepagetšego bja kgopolo le go nea molaetša wa Mmušo ka tsela e ipiletšago go bohle.—Ba-Kolose 4:6; 1 Ba-Thesalonika 5:17.
8. Mafelelo e ka ba afe ge e ba Bakriste ba lebelela dika tše dibotse go metswalo ya bona yeo e sa dumelego?
8 Ka diphuthegong tše dingwe go na le ditho tše dintši tša lapa le tee tšeo di hlankelago Jehofa. Gantši seo se ilego sa tanya kgahlego le tlhompho ya ba banyenyane e bile kgotlelelo ya wa leloko yo a godilego yoo ditswalano tša gagwe tše botse ka lapeng le tlemong ya lenyalo di ilego tša kgora tsela ya go fetoga ga dipelo tša ba banyenyane. Go ela hloko keletšo ya moapostola Petro go thušitše basadi ba bantši ba Bakriste go rua banna ba bona “xò se lentšu le le bolêlwaxo.”—1 Petro 3:1, 2.
Ka Lapeng
9, 10. Jakobo gotee le Josefa ba ile ba lebelela bjang dika tše dibotse go ba gabo bona?
9 Ditswalano tša kgaufsi-ufsi tšeo di tlemaganyago ditho tša lapa gotee di nea tikologo e nngwe yeo go yona re ka lebelelago dika tše dibotse go ba bangwe. Ela hloko thuto go tšwa ditirišanong tša Jakobo le barwa ba gagwe. Go Genesi kgaolo 37, ditemana 3 le 4, Beibele e bontšha gore Jakobo o be a rata Josefa kudu. Bana babo Josefa ba ile ba arabela ka lehufa, gaešita le go fihla ntlheng ya go loga leano la go bolaya ngwanabo bona. Lega go le bjalo, ela hloko boemo bja kgopolo bjoo Jakobo le Josefa ba bilego le bjona ka morago maphelong a bona. Bobedi bja bona ba ile ba lebelela dika tše dibotse go ba gabo bona.
10 Ge Josefa a be a hlankela e le molaodi yo mogolo wa dijo kua Egipita yeo e bego e hlasetšwe ke tlala, o ile a amogela bana babo. Gaešita le ge a sa ka a ikutolla kapejana, o ile a dira dilo ka bohlale bakeng sa go kgonthišetša gore ba be ba hlokometšwe gabotse le go ba le dijo tšeo ba bego ba tla di išetša tatago bona yo a tšofalago. Ee, go sa šetšwe gore ba ile ba mo hloya, Josefa o ile a ba swara gabotse. (Genesi 41:53–42:8; 45:23) Ka mo go swanago, ge Jakobo a be a le kgaufsi le go hwa o ile a bolela tšhegofatšo ya boporofeta go barwa ba gagwe ka moka. Gaešita le ge ditiro tša bona tše kgopo di ile tša feleletša ka gore ba lahlegelwe ke ditokelo tše dingwe, bohle ba ile ba hwetša bohwa nageng. (Genesi 49:3-28) A pontšho e kgahlišago gakaakang ya lerato leo le swarelelago yeo Jakobo a ilego a e bontšha fao!
11, 12. (a) Ke mohlala ofe wa boporofeta wo o gatelelago bohlokwa bja go lebelela dika tše dibotse go ba ka lapeng? (b) Re ithuta thuto efe mohlaleng wa tate yo go boletšwego ka yena seswantšhong sa Jesu sa morwa wa lehlaswa?
11 Go se fele pelo ga Jehofa ge a be a dirišana le setšhaba seo se se nago tumelo sa Isiraele go nea temogo e oketšegilego ya mabapi le kamoo a lebelelago dika tše dibotse bathong ba gagwe. Jehofa o ile a bontšha lerato la gagwe le le swarelelago ka go diriša maemo a lapa la moporofeta Hosea. Gomere e lego mosadi wa Hosea, o ile a dira bootswa leboelela. Go sa šetšwe seo, Jehofa o ile a laela Hosea gore: “Boêla O raté mosadi e a bexo a ratwa ke monna wa xaxwe, ’me a ya a dira bootswa, bo-ka Morêna à ratile Isiraele, bôna bà lebišitse difahloxô xo medimo e šele, ba kxanyoxa dinkxwanyana tša morara.” (Hosea 3:1) Ke ka baka la’ng a ile a newa ditaelo tšeo? Jehofa o be a tseba gore go tšwa setšhabeng seo se ilego sa aroga ditseleng tša gagwe, batho ba be ba tla arabela go go se fele pelo ga gagwe. Hosea o tsebaditše gore: “Ka morago ga fao bana ba Isiraele ba tlo sokologa, ba tsoma Jehofa, Modimo wa bona, le Dafida, kgoši ya bona, ba tla go Jehofa ka go boifa, le go botho bja gagwe matšatšing a mafelelo.” (Hosea 3:5, PK) Ka ntle le pelaelo wo ke mohlala o mobotse woo re ka naganišišago ka wona ge re lebeletšane le mathata ka lapeng. Go tšwela pele ga gago o lebelela dika tše dibotse dithong tše dingwe tša lapa bonyenyane go tla bea mohlala o mobotse wa go se fele pelo.
12 Seswantšho sa Jesu sa morwa wa lehlaswa se nea temogo e oketšegilego ya mabapi le kamoo re ka lebelelago dika tše dibotse go ba malapa a rena. Morwa yo monyenyane o ile a boela gae ka morago ga ge a tlogetše bophelo bja gagwe bjo bo gobogilego. Tatagwe o ile a mo swara ka kgaugelo. Tate o ile a arabela bjang dipelaelong tša morwa wa gagwe yo mogolo yo a bego a sa ka a tloga gae? Ge a be a boledišana le morwa wa gagwe yo mogolo, tate o itše: “Ngwan’a-ka! O na le nna ka mehla; ’me dilô tša-ka ka moka ké tša xaxo.” Ye e be e se kgalemelo e kwišago bohloko, eupša e be e fo ba kgonthišetšo ya lerato la tate. O ile a tšwela pele ka gore: “Xo swanetše xe re thaba ra hlalala, xobane monn’axo é ó be a hwile, xomme ó boetše ó a phela; ó be a lahlexile, ’me a bônala.” Ka mo go swanago re ka tšwela pele re lebelela dika tše dibotse go ba bangwe.—Luka 15:11-32.
Ka Phuthegong ya Bokriste
13, 14. Tsela e nngwe ya go diriša molao o bušago wa lerato ke efe ka phuthegong ya Bokriste?
13 Ka ge re le Bakriste, re nyaka go diriša molao o bušago wa lerato. (Jakobo 2:1-9) Ke therešo gore re ka amogela ditho tša phuthego ya gabo rena tšeo maemo a tšona a dilo tše di bonagalago a fapanago le a rena. Eupša na re sa dutše re e-na le se go thwego ke go kgetholla batho go ya ka maemo a bona moo go theilwego setlogong sa morafo, sa setšo goba gaešita le sa bodumedi? Ge e ba go le bjalo, ke bjang re ka elago hloko keletšo ya Jakobo?
14 Go amogela bohle bao ba bago gona dibokeng tša Bokriste go nea bohlatse bja go ba ga rena le moya wa go amogela baeng kudu. Ge re gata mogato wa pele go bolela le bao ba sa tšwago go thoma go kopanela bao ba etelago Holong ya Mmušo, go tšhoga le go itšhoga ga bona le ge e le gofe ga mathomong go ka fela. Ka kgonthe, ba bangwe bao ba bago gona sebokeng sa Bokriste ka lekga la pele ba bolela gore: “Yo mongwe le yo mongwe o be a e-na le bogwera. Go be go bonagala eka yo mongwe le yo mongwe o be a šetše a ntseba. Ke ile ka ikwa ke le gae.”
15. Ke bjang bafsa ka phuthegong ba ka thušwago go kgahlegela batho ba bagolo?
15 Diphuthegong tše dingwe bafsa ba sego kae ba ka bokana gotee ka Holong ya Mmušo goba ka ntle ge diboka di e-tšwa, ba efoga go gwerana le batho ba bagolo. Go ka dirwa bjang selo se itšego se sebotse bakeng sa go fenya tshekamelo ye? Go ba gona, mogato wa pele ke wa gore batswadi ba tlwaetše bana ba bona ka gae, ba ba lokišeletše diboka. (Diema 22:6) Ba ka newa mošomo wa go kgoboketša dikgatišo tše fapa-fapanego e le gore bohle ba ka tšea seo se nyakegago ge ba e-ya dibokeng. Le gona batswadi ba boemong bjo bobotse bja go kgothaletša bana ba bona go abelana dikgopolo tše sego kae le batho ba bagolo goba bao ba babjago Holong ya Mmušo. Ge bana ba e-na le selo se itšego seo se nago le morero seo ba ka se botšago batho ba bjalo, ba ka ikwa ba kgotsofetše.
16, 17. Batho ba bagolo ba ka lebelela bjang dika tše dibotse bathong ba banyenyane ka phuthegong?
16 Bana babo rena le dikgaetšedi bao ba godilego le bona ba swanetše go kgahlegela bana ka phuthegong. (Ba-Filipi 2:4) Ba ka gata mogato wa pele wa go bolela le bana ka tsela e kgothatšago. Gantši go bolelwa dintlha tše itšego tšeo di kgahlišago dibokeng. Bana ba ka botšišwa ge e ba ba thabetše seboka le ge e ba go bile le dintlha le ge e le dife tšeo ba tlogago ba di thabetše le tšeo di ka dirišwago. Ka ge bafsa e le karolo e bohlokwa ya phuthego, ba swanetše go lebogwa bakeng sa go ela hloko ga bona gomme ba retwe bakeng sa dikarabo le ge e le dife tšeo ba di neilego dibokeng goba go tšea karolo le ge e le gofe moo ba bilego le gona dikarolong tša lenaneo. Tsela yeo ka yona bafsa ba dirišanago le batho ba bagolo ka phuthegong le tsela yeo ba dirago mediro e bonolo ya ka gae e tla bontšha ge e ba ba ka kgona go hlokomela boikarabelo bjo bogolo gabotse, ka morago bophelong.—Luka 16:10.
17 Ka go amogela boikarabelo, bafsa ba bangwe ba dira tšwelopele go fihla ntlheng yeo go yona dika tša bona tša moya di dirago gore ba kgone go amogela dikabelo tše bohlokwa kudu. Go ba le selo se itšego seo ba se dirago le gona go ka thuša go thibela mekgwa ya bošilo. (2 Timotheo 2:22) Dikabelo tše bjalo di ka ‘leka go swanelega’ ga bana babo rena bao ba katanelago go hlankela e le bahlanka ba bodiredi. (1 Timotheo 3:10, bapiša le NW.) Go dula ga bona ba ikemišeditše go tšea karolo dibokeng le phišego ya bona bodireding gotee le moya wa bona wa go kgahlegela bohle ka phuthegong, go dira gore bagolo ba kgone go lemoga bokgoni bja bona ge ba nagana go ba nea dikabelo tše oketšegilego.
Go Lebelela Dika tše Dibotse go Bohle
18. Ke molaba ofe wo o swanetšego go phengwa mabapi le go ahlola, gomme ka baka la’ng?
18 Diema 24:23 e re: “Xo êmêla motho sepitša xa se moahlolêlô o botse.” Bohlale bja legodimong bo nyaka gore bagolo ba pheme go beba sefahlego ge ba ahlola ditaba tša ka phuthegong. Jakobo o boletše gore: “Bohlale byo bo tšwaxo xodimo, sa pele mo xo byôna ké xo ila thšila, sa bobedi ké kaxišô le bonôlô; bo na le xo kwa, bo humile kxauxêlô le dikenyô tše botse; xa bo bebe motho, xa bo na bomenetša.” (Jakobo 3:17) Go molaleng gore ge bagolo ba lebelela dika tše dibotse go ba bangwe, ba swanetše go kgonthišetša gore kahlolo ya bona ga e širwe ke go tswalana ga bona le motho yoo goba maikwelo. Mopsalme Asafa o ngwadile gore: “Modimo ó eme phuthexong ya Modimo; ó ahlola à le xare xa medimo [“medimo” e šupa go baahlodi ba batho]. Le tlo kxaotša neng xo šaetša kahlolong le xo beba difahloxô tša bakxôpo?” (Psalme 82:1, 2) Ka mo go swanetšego, bagolo ba Bakriste ba phema tshekamelo le ge e le efe ya go beba sefahlego moo ditaba di akaretšago mogwera goba wa leloko. Ka tsela ye ba boloka botee bja phuthego gomme ba dumelela moya wa Jehofa go šoma ka bolokologi.—1 Ba-Thesalonika 5:23.
19. Ke ka ditsela dife re ka lebelelago dika tše dibotse go ba bangwe?
19 Ge re lebelela dika tše dibotse go bana babo rena le dikgaetšedi, re ekiša boemo bja kgopolo bja Paulo ge a be a bolela le phuthego ya Thesalonika. O itše: “Xomme rena re Le holofetše ka Morêna, xore tše re Le laêlaxo tšôna Le a di dira, ’me Le tlo fêla Le di dira.” (2 Ba-Thesalonika 3:4) Re tla sekamela kudu go tshedišeng diphošo tša ba bangwe mahlo ge re lebelela dika tše dibotse go bona. Re tla lebelela dibaka tšeo go tšona re ka retago bana babo rena, ka ntle le pelaelo re phema moya wa go swaya diphošo. Paulo o ngwadile gore: “Se tee se se nyakwaxo xo balaki, ké xore motho a bôtêxê.” (1 Ba-Korinthe 4:2) Go botega ga bana babo rena le dikgaetšedi ba Bakriste ka moka e sego feela ga bao ba nago le bolaki ka phuthegong, go dira gore re ba rate. Ka go rialo re batamela kgaufsi le bona, gomme ra matlafatša ditlemo tša bogwera bja Bokriste. Re ba le pono e swanago le ya Paulo ka bana babo ba mehleng ya gagwe. Ke ‘badirišani ba rena mmušong wa Modimo’ e bile ke “thušo e matlafatšago” go rena. (Ba-Kolose 4:11, bapiša le NW.) Ka go rialo re bonagatša boemo bja kgopolo bja Jehofa.
20. Ke ditšhegofatšo dife tšeo di tlago go tlela bao ba lebelelago dika tše dibotse go bohle?
20 Ka ntle le pelaelo re boeletša thapelo ya Nehemia e rego: “O nkgopole, Modimo wa-ka, ka tše botse.” (Nehemia 13:31, NW) Re thaba kudu gakaakang gore Jehofa o lebelela dika tše dibotse bathong! (1 Dikxoši 14:13) Anke re direng ka mo go swanago ditirišanong tša rena le ba bangwe. Go dira bjalo go re nea tebelelo ya go lopollwa le ya bophelo bjo bo sa felego lefaseng le lefsa leo ga bjale le lego kgaufsi kudu.—Psalme 130:3-8.
[Dipotšišo tša Thuto]
O tla Araba Bjang?
• Jehofa o swara bohle ka botho motheong ofe?
• Re ka lebelela bjang dika tše dibotse go ba bangwe
• bodireding bja rena?
• ka lapeng la rena?
• ka phuthegong ya gabo rena?
• ditswalanong tša rena ka moka?
[Caption on page 18]
Go sa šetšwe lehloyo la bana babo la pejana go yena, Josefa o ile a ba swara gabotse
[Caption on page 19]
Kganetšo ga e re thibele go leka go thuša bohle
[Caption on page 20]
Go sa šetšwe maemo a bona a nakong e fetilego, barwa ba Jakobo ka moka ba ile ba hwetša ditšhegofatšo tša gagwe
[Caption on page 21]
Amogela bohle dibokeng tša Bokriste