Ba Hlankela Borwarre bja Bokriste Dinageng Dišele

NA O kile wa kwa ka maina “bahlanka ba ditšhaba-tšhaba” le “baithapi ba ditšhaba-tšhaba”? Dihlatse tša Jehofa tšeo di bopilego dihlopha tše di neela nako le bokgoni bja tšona go thuša ka go agwa ga mafelo a go gatiša le go aba molaetša wa Mmušo wo go bolelwago ka wona ka Beibeleng. Le gona baithapi ba bjalo ba thuša ka go agwa ga Diholo tša Kopano le Diholo tša Mmušo, tšeo di šomago e le mafelo a go newa ga tlhahlo ya Beibele. Ga bjale baithapi ba ba thuša ka mediro ya go aga dinageng tše di fapa-fapanego tše 34, kudu-kudu dinageng tšeo di nago le ditlabakelo tše di lekanyeditšwego. Ke ditlhohlo le mathabo afe ao ka mo go kgethegilego badiredi ba bjalo ba lebeletšanago le ona ge ba dutše ba hlankela borwarre bja Bokriste dinageng dišele? Ba ikwa bjang ka “tirelo e kgethwa” yeo ba e dirago? (Kutollo 7:​9, 15, NW) E le gore re hwetše karabo, a re boledišaneng le ba bangwe ba baithapi bao ba ilego ba hlankela kua Mexico.

Baithapi bao ba tšwago dinageng dišele ba ile ba fihla kua Mexico la mathomo ka May 1992. Kapejana ka morago ga fao, ba ile ba thoma go etelela pele go katološweng ga lekala leo le hlokometšego mediro ya Dihlatse tša Jehofa kua Mexico. Modiro wa go katološa o be o akaretša meago e 14 e mefsa, go akaretša le meago ya bodulo bakeng sa baithapi bao ba hlankelago ofising ya lekala, lefelo la go gatiša le moago wa diofisi.

Baithapi ba ka godimo ga ba 730 go tšwa Canada, Great Britain, United States le dinageng tše dingwe ba ile ba šoma ka botee le baithapi ba bangwe ba makgolo go tšwa dikarolong ka moka tša Mexico bakeng sa go thuša modirong wo wa go aga. Go oketša moo, Dihlatse tša ka godimo ga tše 28 000 tšeo di kopanelago le diphuthego tše ka bago 1 600 tšeo di lego tikologong ya kgaufsi le ofisi ya lekala di ile tša thuša ka mediro ya go aga mafelo-bekeng. Bohle ba ile ba šoma ka moya wa go rata gomme ba diriša bokgoni bja bona ka bolokologi. Ba ile ba go lebelela e le tokelo go hlankela Jehofa ka tsela ye. Lebakeng ka moka la modiro wa go aga, ba ile ba dula ba gopola mantšu a buduletšwego ao a hwetšwago go Psalme 127:⁠1 ao a rego: “Ngwakô wà sa axwa ke Morêna, baaxi ba wôna ba itapiša ka lefêla.”

Ditlhohlo Tšeo ba Lebeletšanago le Tšona

Bahlanka ba ditšhaba-tšhaba ba lebeletšana le ditlhohlo dife ge ba dutše ba hlankela dikabelong tša dinageng dišele? Tše ke tše dingwe tša dilo tšeo ba di lemogilego. Curtis le Sally,  banyalani bao ba tšwago kua United States ba ile ba thuša ka mediro ya go aga kua India, Jeremane, Mexico, Paraguay, Romania, Russia, Senegal le Zambia. Curtis o anega ka gore: “Tlhohlo ya mathomo e be e le go tlogela morwedi wa rena, yoo a bego a hlankela e le mmulamadibogo [modiredi wa nako e tletšego], le go tlogela phuthego ya gabo rena ya kua Minnesota. Nna le mosadi wa-ka re ile ra kopanela le phuthego yeo ka nywaga e 24, gomme re be re ikwa re le gae.”

Sally o re: “Go phela ka tlase ga maemo ao o sa a tlwaelago ke tlhohlo, mohlomongwe e bile ke tlhohlo e kgolo go basadi go feta go banna, eupša ke ile ka ithuta gore go tlwaelana le maemo go a kgonega. Le gona ke ile ka ithuta go kgotlelela bontši bja dikhunkhwane!” O oketša ka gore: “Nageng e nngwe, rena baithapi ba lesome re ile ra abelana lefelo la bodulo leo le se nago khitšhi gomme le e-⁠na le mafelo a mabedi feela a go hlapela. Moo ke ile ka ithuta go se fele pelo.”

Go ithuta leleme le lefsa ke tlhohlo e nngwe yeo e nyakago boiteko le boikokobetšo. Sharon yo a ilego a hlankela le monna wa gagwe medirong ya go aga dinageng tše di fapa-fapanego o re: “Go se tsebe leleme la moo o hlankelago gona ke tlhohlo. Mathomong go thata go batamela kgaufsi le bana beno ba moya le dikgaetšedi ge o sa kgone go bolela maikwelo a gago ka bolokologi. Seo ke se se ferekanyago. Eupša bana babo rena bao re kopanago le bona dikabelong tša rena tša dinageng dišele ga ba re felele pelo gomme ba tloga ba na le kgahlego e tseneletšego ka boiketlo bja rena. Go se go ye kae, re kgona go boledišana le bona ka tsela e itšego.”

Go Tšea Karolo Bodireding go Nyaka Sebete

Gaešita le ge baithapi ba bjalo bao ba ikgafago ba dira mo gontši tšwelopeleng ya modiro wa go aga, ba lemoga gore sa bohlokwa kudu ke bagoeledi ba ditaba tše dibotse tša Mmušo wa Modimo. Ka go rialo, ba thekga ka botlalo modiro wa boboledi woo o dirwago ke diphuthego tšeo ba kopanelago le tšona. Åke le Ing-Mari, banyalani bao ba ilego ba thuša medirong ya go aga kua  Guadeloupe, Malawi, Mexico le Nigeria, ba dumela gore go nyaka sebete go bolela leleme le lengwe ge o tšea karolo tirelong ya tšhemo nageng e šele.

Ing-Mari o re: “Mathomong go tšea ga rena karolo go be go lekanyeditšwe, ka ge ka mehla re be re sepela le Dihlatse tša lefelong leo gomme gantši re be re dira gore di bolele ka ge re be re lewa ke dihlong. Lega go le bjalo, mesong e mengwe re ile ra dira phetho ya go ya tirelong ya tšhemo re le noši. Re ile ra tšwa maoto a rena a roromela gomme dipelo tša rena di betha-betha. Re ile ra kopana le mosadi yo mofsa yoo a ilego a theetša thero ya-ka yeo ke bego ke e lokišeleditše. Ke ile ka bala lengwalo gomme ka sepediša dipuku tše mmalwa. Ke moka mosadi o ile a re: ‘Anke o mpotše. Ke na le wa leloko yo a ithutago Beibele le Dihlatse tša Jehofa. Na nna nka hwetša bjang thuto?’ Ke be ke feletšwe ke mantšu. Ke moka ke ile ka thekga ditho gomme ka ithapela go mo swarela thuto ya Beibele.”

Ing-Mari o oketša ka gore: “Nagana ka lethabo le tebogo tšeo ke bilego le tšona tša go leboga Jehofa bakeng sa go šegofatša go gata ga rena mogato wa pele le kganyogo ya rena ya go abelana therešo le ba bangwe.” Mosadi yo o ile a dira tšwelopele gomme a kolobetšwa gore e be Hlatse kopanong ya selete ya kua Mexico City. Åke le Ing-Mari ba nea kakaretšo ya bodiredi bja bona ka tsela ye: “Re tloga re tšeela godimo dikabelo tša rena medirong e fapa-fapanego ya go aga, eupša ga go na selo seo se fetago lethabo le kgotsofalo ya go thuša motho go amogela therešo.”

Go Bontšha Moya wa Boikgafo

Ke therešo gore baithapi bao ba tlogelago malapa le bagwera ba dira boikgafo bja go hlankela bana babo bona dinageng dišele, eupša gape ba ba le mathabo a sa lekanywego. Ke afe?

Howard yo a ilego a hlankela le mosadi wa gagwe e lego Pamela kua Angola, Colombia, Ecuador, El Salvador, Guyana, Mexico le Puerto Rico o hlalosa gore: “Ke tokelo go tsebana le bana babo rena le dikgaetšedi dinageng tše di fapa-fapanego le go iponela ka mahlo tlamo ya lerato yeo e lego gona borwarreng bja rena bja ditšhaba-tšhaba. Gantši re bala ka bjona, eupša ge o dula e bile o hlankela le ba bangwe bao ba tšwago ditšong le ditlogong tše di fapa-fapanego, o tšeela godimo kudu borwarre bja rena bja bohlokwa.”

Gary yo a ilego a thuša medirong ya go aga kua Colombia, Costa Rica, Ecuador, Mexico le Zambia, le yena o ikwa gore lenaneo le le mo hotše kudu. O laodiša gore: “Tlwaetšo yeo ke e hweditšego go theoša le nywaga ka go dirišana le bana babo rena bao ba godilego tsebong bao ba hlankelago makaleng a dinageng tšeo ke ilego ka abelwa go tšona e nthušitše go ba yo a hlamilwego kaone bakeng sa ditlhohlo tšeo ke lebanago le tšona dikabelong tša-ka. E bile mo go matlafatšago tumelo ka gobane go nea sebaka sa go bona botee bjo bo hlaolago mokgatlo wa Jehofa wa lefaseng ka bophara​—botee bjo bo fenyago go fapana ka maleme, morafo goba setšo.”

Go sa dutše go le bjalo, modiro wa go aga kua Mexico o ile wa phethwa, gomme meago e katološitšwego ya lekala e neetšwe lenyaga. Ba tutueditšwe ke lerato la bona la go rata Modimo, bahlanka ba ditšhaba-tšhaba le baithapi ba ditšhaba-tšhaba ba tsentše letsogo kudu go katološweng ga borapedi bja therešo kua Mexico le mafelong a mangwe. Moya wa bona wa go rata le wa boikgafo wa go hlankela bana babo bona ba Bakriste dinageng di šele o lebogwa kudu ke Dihlatse tša Jehofa lefaseng ka bophara.

[Caption on page 25]

Ecuador

Colombia

Angola

Serapa sa lekaleng

[Caption on page 26]

Go thoma ga mošomo meagong e mefsa ya lekala la kua Mexico

[Caption on page 26]

Ka tlase: Ditho tše dingwe tša Lefapha la go Aga di ka pele ga karolo ya meago e mefsa

[Caption on page 27]

Baithapi ba go aga ba thabela go thekga modiro wa boboledi le diphuthego tša moo ba abetšwego gona