Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Re ka holega bjang ka go ithuta ka lapa la Safane?

Safane e be e le mongwalolodi le mongwaledi wa Kgoši Josia wa Juda. E le monna yo a nago le tutuetšo mmušong, Safane o ile a thekga lesolo la kgoši la go tsošološa borapedi bja therešo. Barwa ba babedi ba Safane ba ile ba thekga moporofeta Jeremia. Le gona morwa yo mongwe le ditlogolo tše pedi tša gagwe ka mo go swanago ba ile ba diriša maemo a bona a go ba le tutuetšo bakeng sa go thekga borapedi bja therešo. Ka mo go swanago, re swanetše go diriša mahumo a rena le tutuetšo ya rena go thekga borapedi bja therešo.​—12/15, matlakala 19-⁠22.

• Irene Hochstenbach o ile a kgona bjang go fenya bogole gomme a kgona go hlankela Jehofa?

Ge a be a e-⁠na le nywaga e šupago, o ile a ba sefoa. Go sa šetšwe go ba ga gagwe sefoa, o ile a ithuta go boledišana le ba bangwe gomme ga bjale o sepela gotee le monna wa gagwe (yo e lego molebeledi wa mosepedi) ge a hlankela diphuthego tša kua Netherlands.​—1/1, matlakala 23-⁠6.

• Ke dithušo dife tše pedi tša go ithuta tšeo di lokolotšwego Dikopanong tša Selete tša “Bagoeledi ba Mmušo ba Fišegago”?

Lefaseng ka bophara Bakriste ba thabetše go amogela puku ya Rapela Modimo a Nnoši wa Therešo, yeo e hlametšwego go ithutwa le bao ba sa tšwago go thoma go kopanela ka morago ga ge ba feditše go ithuta puku ya Tsebo e Išago Bophelong bjo bo sa Felego; puku e nngwe e mpsha ke Batamela Kgaufsi le Jehofa, yeo e lebišago tlhokomelo go dika le ditirišano tša Jehofa. Le gona e bontšha kamoo re ka mo ekišago go bontšheng dika tša gagwe.​—1/15, matlakala 23-⁠4.

• Moko wa Diema 12:⁠5 e rego: “Mexopolô ya baloki ké molaô” ke ofe?

Dikgopolo tša baloki ke tšeo di kwagalago boitshwarong gomme di dirwa ka go se bebe sefahlego le ka toka. Ka ge baloki ba tutuetšwa ke lerato la go rata Modimo le go rata magagabo bona, maikemišetšo a bona ke a mabotse.​—1/15, letlakala 30.

• Ke’ng seo se ka thušago motho go hlagolela pono e leka-lekanego ka mošomo?

Ke mo go holago go tlwaetšwa go rata mošomo go tloga bjaneng. Beibele e re kgothaletša go ba le pono e botse le e leka-lekanego ka mošomo, re pheme bobodu. (Diema 20:⁠4) Le gona e kgothaletša Bakriste gore ba se swarege kudu ka mošomo. Re swanetše go lemoga gore tirelo ya go direla Modimo e tla pele maphelong a rena. (1 Ba-Korinthe 7:​29-31) Go feta moo, Bakriste ba therešo ba kgodišegile gore Modimo a ka se ke a ba lahla.​—2/1, matlakala 4-⁠6.

• Ke kae la mathomo ka Beibeleng moo go bolelwago ka aletare?

Ke go Genesi 8:​20, ge e bolela ka aletare yeo Noage a e agilego ge a e-⁠tšwa ka arekeng ka morago ga Meetse-fula. Lega go le bjalo, mohlomongwe Kaine le Abele ba ile ba diriša dialetare ge ba be ba neela dibego tša bona. (Genesi 4:​3, 4)​—2/15, letlakala 28.

• Bakriste ba bangwe ba ka diriša bjang ka bohlale maemo a fetogago?

Ba bangwe ba amogetše​—goba ba kgopetše​—diphetogo mešomong ya bona tšeo di ba neilego nako e oketšegilego bodireding. Ba bangwe ba ile ba oketša nako le dibaka tša bona tirelong ya Modimo ge boikarabelo bja lapa bo fokotšega, go swana le ge bana ba bona ba gola gomme ba tsena lenyalong.​—3/1, matlakala 19-⁠22.

• Mohlala wa Jona le wa moapostola Petro o re thuša bjang go bona ba bangwe ka tsela yeo Jehofa a ba lebelelago ka yona?

Bobedi Jona le Petro ba be ba na le diphošo tše di bego di tsebja gabotse ka tsela ya bona ya go nagana le kamoo ba ilego ba arabela ditekong tša tumelo le go kwa. Lega go le bjalo, Jehofa o ile a bona gabotse dika tše botse go bona gomme a tšwela pele a ba diriša tirelong ya gagwe. Ge ba bangwe ba re kgopiša goba ba re nyamiša, re ka lebiša tlhokomelo dikeng tša bona tše dibotse tšeo re ka bago re ile ra hwetša e le tše di gogelago nakong e fetilego gotee le go dika tše dibotse tšeo Modimo a di bonago ka go bona.​—3/15, matlakala 16-⁠19.

• Ke ka baka la’ng dinomoro tša dikgaolo le ditemana tša ka pukung ya Dipsalme di sa swane diphetolelong tša Beibele tše di fapa-fapanego?

Go na le go fapana dinomorong tša dikgaolo le ditemana magareng ga puku ye e lego ka leleme la mathomong la Sehebere le phetolelong ya yona ya Segerika ka go Septuagint. Diphetolelo tše dintši tša morago bjale di ka fapana, go ithekgile ka gore di be di theilwe mongwalong wa Sehebere goba go Septuagint.​—4/1, letlakala 31.