Selalelo Sa Mafelelo Ke’ng?

E’NG seo se tlago ka kgopolong ya gago ge o e-⁠kwa polelwana “selalelo sa mafelelo”? Batho ba bantši ba tla nagana ka seswantšho sa fresco (e lego seswantšho seo se swanago le se se lego letlakaleng la ka ntle) seo se rategago kudu sa kua Milan, Italy, seo se thadilwego ke mothadi Leonardo da Vinci (1452-1519). Ntlha ke gore Selalelo sa Mafelelo e be e dutše e le sehlogo seo se ratwago ke bathadi, bangwadi le bo-rammino go theoša le nywaga-kgolo.

Lega go le bjalo, Selalelo sa Mafelelo ke’ng, gomme se bolela’ng go batho bao ba phelago lekgolong la bo-21 la nywaga? Di-encylopedia le dipukuntšu di tla go botša gore Selalelo sa Mafelelo, seo gape se bitšwago Selalelo sa Morena, ke dijo tšeo Jesu Kriste a ilego a di ja gotee le baapostola ba gagwe mantšiboeng a pele ga lehu la gagwe la sehlabelo. Ka ge e be e le dijo tša mantšiboa tša mafelelo tšeo Jesu a ilego a di ja le balatedi ba gagwe ba botegago, ka tlwaelo di bitšwa gore ke Selalelo sa Mafelelo. Le gona ka ge se theilwe ke Morena Jesu Kriste ka boyena, leina la Selalelo sa Morena le a swanelega.

Go theoša le nywaga-kgolo, batho ba bantši ba ile ba gafa maphelo a bona ka maikemišetšo ao ba bego ba a lebelela e le a mabotse le ao a sepedišanago le boineelo gotee le phišego. A mangwe a mahu a a ile a hola batho ba itšego ka lebakanyana. Lega go le bjalo, ge a bapišwa le lehu la Jesu Kriste, ga go le letee la mahu ao a go ikgafa, leo le ka bolelago seo lehu la Jesu Kriste le se bolelago le ge e ka ba e le leo le tumišwago kudu. Go feta moo, ga go na lehu leo historing ya batho yeo e tletšego ka mathata leo go ka kgonegago gore le kgome lefase ka bophara go swana le lona. Ka baka la’ng?

E le gore re arabe potšišo yeo le go go thuša go tseba seo se bolelwago ke Selalelo sa Morena, re go laletša gore o bale sehlogo se se latelago.