Bafsa Na le Dira Tšwelopele ya Moya?

HIDEO ge a gopola matšatšing a gagwe ge a be a sa le sekolong se se phagamego o re: “Gaešita le ge ke be ke e-⁠ba gona dibokeng tša Bokriste, ke be ke se na kganyogo e matla ya go hlankela Jehofa. Gantši ke be ke inagana ke ratwa ke bao ke tsenago le bona ka klaseng e bile ke gatela godimo ge ke sepela le lekgarebe la-ka setarateng. Dipakane tša-ka di be di sa kwagale, gomme ke be ke se na kganyogo ya go dira tšwelopele le ge e le efe ya moya.” Ka go swana le Hideo, bafsa ba bantši ba bonagala ba fo sepela ka go hloka boikemišetšo, ba se na kganyogo ya go fihlelela dipakane le ge e le dife tša bohlokwa goba go dira tšwelopele le ge e le efe.

Ge e ba o le mofsa, mohlomongwe o kgahlišwa ke go tšea karolo dipapading goba modirong wa go itloša bodutu. Lega go le bjalo, ge go tliwa medirong ya moya o ka fo se ikwe ka tsela yeo. Na go a kgonega gore o kgahlišwe ke dipakane tša moya? Ela hloko mantšu a a mopsalme: “Bohlatse bya Morêna bo a bôtêxa, bo hlalefiša [e] a se naxo maanô. . . . Ditayô tša Morêna di sekile, di boniša mahlô.” (Psalme 19:​7, 8) Lentšu la Modimo le ka hlahla e “a se naxo maanô” go dira dilo ka bohlale, la ‘boniša mahlo a gagwe.’ Ee, o ka thabišwa ke dilo tša moya. Eupša ke’ng seo se nyakegago go wena gore o ikwe ka tsela yeo? O swanetše go thoma kae?

Tutueletšega go Hlankela Modimo

Sa pele, o swanetše go tutuetšwa. Nagana ka taba ya Kgoši Josia yo monyenyane wa kua Juda. Ge puku ya Molao wa Jehofa e be e hwetšwa kua tempeleng, Josia o ile a laela gore e balwe gomme o ile a kgongwa ka mo go tseneletšego ke seo a se kwelego. Ka baka leo, “Josia [o ile] a fediša makxapha ka moka dinaxeng tša Ba-Isiraele bohle.” (2 Koronika 34:​14-21, 33) Go bala Lentšu la Modimo go ile gwa tutueletša Josia go dira mo go oketšegilego go godišeng borapedi bjo bo sekilego.

Le wena ka mo go swanago o ka hlagolela kganyogo ya go hlankela Jehofa ge e ba o bala Beibele ka mehla gomme o naganišiša ka seo o se badilego. Se ke seo se ilego sa tutueletša Hideo. O ile a thoma go gwerana kgaufsi le mmulamadibogo yo a godilego, modiredi wa nako e tletšego wa Dihlatse tša Jehofa. Mmulamadibogo e be e le morutwana yo mafolofolo wa Beibele gomme a katanela go diriša dithuto tša yona bophelong bja gagwe. A kgothaditšwe kudu ke mohlala wa mmulamadibogo, Hideo o ile a thoma go dira se se swanago gomme a hlagolela kganyogo e matla ya go hlankela Modimo le batho ba bangwe. Tšwelopele ya gagwe ya moya e ile ya feleletša ka bophelo bjo bo nago le morero.

Go bala Beibele letšatši le letšatši go ka tutuetša bafsa. Takahiro o hlalosa gore: “Nako e nngwe le e nngwe ge ke be ke re ke a robala gomme ka lemoga  gore ga se ka dira mmalo wa-ka wa Beibele wa letšatši leo, ke be ke tla tsoga gomme ka o dira. Ka baka leo, ke ile ka kwa tlhahlo ya Jehofa. Go bala Beibele letšatši le letšatši go ile gwa tlaleletša go direng ga-ka tšwelopele ya moya. Ke ikemišeditše go ba le karolo e kgolwanyana tirelong ya Jehofa, ke ile ka tšea bobulamadibogo bja ka mehla kapejana ka morago ga go aloga sekolong se se phagamego. Le gona ke bo thabela kudu.”

Go tlaleletša go go bala Beibele, ke’ng se sengwe gape seo se ka go thušago go matlafatša boikemišetšo bja gago bja go tumiša Jehofa? Tomohiro o ile a rutwa therešo ya Beibele ke mmagwe. O re: “Ke feela ka morago ga ge ke ile ka ithuta ka mo go tseneletšego puku ya Life Does Have a Purpose ge ke be ke e-⁠na le nywaga e 19 moo ke ilego ka kwa ke kgomilwe ka mo go tseneletšego ke lerato la Jehofa le sehlabelo sa Jesu sa topollo. Go leboga lerato la Modimo go ile gwa ntutueletša go dira mo go oketšegilego tirelong ya Jehofa.” (2 Ba-Korinthe 5:​14, 15) Ka go swana le Tomohiro, bafsa ba bantši ba kgothaletšega go dira tšwelopele ya moya ka go phegelela thuto ya motho ka noši ya Beibele.

Lega go le bjalo, go thwe’ng ge e ba o sa dutše o se na kganyogo e tšwago pelong ya go hlankela Jehofa? Na go na le motho yo o ka retologelago go yena bakeng sa thušo? Moapostola Paulo o ngwadile gore: “Xobane Modimo ké Yêna a diraxô tšohle mo xo lena, ké Yêna a Le ratišaxo, ’me ké Yêna a Le dirišaxo.” (Ba-Filipi 2:​13) Ge e ba o rapelela thušo ya Jehofa, o tla go nea moya o mokgethwa ka bolokologi, woo o tla go matlafaletšago e sego feela go ‘dira’ eupša gape le go ‘rata.’ Se se bolela gore moya o mokgethwa wa Modimo o tla oketša kganyogo ya gago ya go dira seo o ka se kgonago tirelong ya Jehofa gomme o tla go thuša go gola moyeng. Bota matla a Jehofa ka mo o ka kgonago ka gona gomme o tiiše pelo ya gago!

Ipeele Dipakane tša Gago ka Noši

Ge o šetše o ikemišeditše go hlankela Jehofa ka mo go tletšego, o swanetše go bea dipakane tša motho ka noši e le gore o dire tšwelopele ya moya. Mana e lego mosetsana yo mofsa wa Mokriste o itše: “Go bea dipakane go nthušitše kudu. Go e na le go boela morago, ke ile ka kgona go tšwela pele ka sebete. Ke naganne ka dipakane tša-ka, ke ile ka rapela Jehofa ka go tšwa pelong bakeng sa tlhahlo, gomme ke ile ka kgona go dira tšwelopele ka ntle le tšhitišo.”

Dipakane tša gago e swanetše go ba tša kgonthe le tšeo di fihlelegago. Go bala kgaolo ya Beibele ka letšatši e ka ba pakane e botse. O ka ba wa thoma le go dira nyakišišo. Go bontšha se ka selo se itšego seo se hwetšagalago ka Seisemane, mohlomongwe o ka ithuta ka dika tša Jehofa tšeo di lokeleditšwego ka tlase ga sehlogwana sa “Qualities by Name” (Dika ka Maina a Tšona) ka tlase ga “Jehovah” (Jehofa) ka go Watch Tower Publication Index. [Ka mohlala, o ka ithuta dika tša Jehofa bjalo ka ge di ahla-ahlilwe ka pukung ya Batamela Kgaufsi le Jehofa. Go ithuta dikgaolo tše di lego ka pukung yeo ka ntle le pelaelo go tla go batametša kgaufsi le Jehofa gomme gwa go tutueletša go mo direla mo gontši.] Go na le dikarolwana tše ka bago 40 tšeo o ka di ahla-ahlago, gomme ka ntle le pelaelo nyakišišo e tla go batametša kgaufsi le Jehofa le go go tutueletša go mo direla ka mo go oketšegilego. Dipakane tše dingwe tše di ka fihlelelwago di akaretša go araba bonyenyane gatee sebokeng se sengwe le se sengwe sa Bokriste seo go sona batheetši ba tšeago karolo, go tseba kaone bonyenyane setho setee sa phuthego sebokeng se sengwe le se sengwe le go dira gore letšatši le se fete o se wa rapela Jehofa le go bolela le ba bangwe ka yena.

Ge e ba o se wa tšwa o ingwadiša Sekolong sa Bodiredi sa Pušo ya Modimo, yeo e tla ba pakane e botse. Na o be o dutše o tšea karolo bodireding bja phatlalatša? Ge e ba go se bjalo, o ka nyaka go šomela go ba mogoeledi yo a sa kolobetšwago. Go naganišiša ka tswalano ya gago le Jehofa le go ineela go yena e tla ba mogato wo o tlago go fo itlela.  Bafsa ba bantši ba katanela go phelela boineelo bja bona ka go fihlelela go ba bodireding bja nako e tletšego.

Gaešita le ge e le mo gobotse go ba le dipakane bophelong bja gago, hlokomela gore o se be le moya wa phadišano. O tla hwetša lethabo le legolo go seo o se dirago ge e ba o sa ipapetše le ba bangwe.​—Ba-Galatia 5:​26; 6:⁠4.

Mohlomongwe o nagana gore ga o na phihlelo gomme o thatafalelwa ke go ipeela dipakane tše di kwagalago. Gona latela keletšo ya Beibele e rego: “Hlwaya tsêbê, O theetšê mantšu a bahlale.” (Diema 22:​17) Nyaka thušo ya batswadi ba gago goba ya Bakriste ba bangwe bao ba godilego tsebong. Go ba gona, batswadi le batho ba bangwe ba swanetše go ba bao ba leka-lekanego le bao ba kgothatšago tabeng ye. Go ikwa ba gateletšegile ge ba katanela go fihlelela pakane yeo ba bangwe ba ba beetšego yona go ka amoga bafsa lethabo gomme go ka ba gwa senya morero wa go bea dipakane. Seo se ile sa diragalela ngwanenyana yo mongwe yo a itšego: “Batswadi ba-ka ba ile ba mpeela dipakane tše dintši, tše bjalo ka go ingwadiša Sekolong sa Bodiredi sa Pušo ya Modimo, go tšea karolo tirelong ya tšhemo, go kolobetšwa le go ba mmulamadibogo. Ke ile ka dira maiteko a magolo a go fihlelela e nngwe le e nngwe ya tšona. Ge ke fihleletše pakane e tee, batswadi ba-ka ba be ba sa nthete, eupša go e na le moo ba be ba mpeela pakane e nngwe yeo ke swanetšego go e fihlelela. Ka baka leo, ka mehla ke be ke ikwa ke gapeletšwa go fihlelela dipakane. Ke be ke nolegile moko gomme ke sa kgotsofala.” Go be go senyegile kae? Dipakane ka moka e be e le tše botse, eupša e be e se tšeo a ipeetšego tšona. E le gore o atlege, o swanetše go tutueletšega go gata mogato wa pele go ipeeleng pakane!

Nagana ka Jesu Kriste. Ge a be a e-⁠tla lefaseng, o be a tseba seo Tatagwe e lego Jehofa a bego a se letetše go yena. Go dira thato ya Jehofa e be e se feela pakane go Jesu, eupša e be e le thomo yeo e swanetšego go phethwa. Jesu o ile a lebelela kabelo ya gagwe bjang? O itše: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.” (Johane 4:​34) Jesu o ile a kgahlišwa ke go dira thato ya Jehofa gomme o ile a phela ka go dumelelana le ditebelelo tša Tatagwe. E be e le bjalo ka dijo go Jesu​—o ile a thabišwa le go kgotsofatšwa ke go phetha modiro woo go bego go letetšwe gore a o dire. (Ba-Hebere 10:​5-10) Le wena ka mo go swanago o ka thaba ge e ba o tutueditšwe gabotse go dira seo batswadi ba gago ba go kgothaletšago go se dira.

O se ke wa Lapa go Dira se Sebotse

Ge o šetše o naganne ka pakane e itšego, šoma ka thata gore o e fihlelele. Ba-Galatia 6:⁠9 e re: “A re se kê ra lapa xo dira botse; xobane xe re sa lesetše, re tlo buna ka lebaka la xôna.” O se ke wa ithekga feela ka matla a gago goba bokgoni bja gago. O tla lebeletšana le mapheko gomme ka dinako tše dingwe o tla ba wa lebeletšana le go ikwa o palelwa ka nakwana. Eupša Beibele e re kgonthišetša gore: “Ditseleng tša xaxo tšohle tseba [Modimo]; ké mo Yêna a tl’o xo Xo thulêla tsela.” (Diema 3:⁠6) Jehofa o tla go thekga ge o šoma ka thata go fihlelela dipakane tša gago tša moya.

Ee, ka go hlagolela kganyogo ya go hlankela Jehofa le ka go fihlelela dipakane tša moya, o tla kgona go dira gore ‘tšwelopele ya gago e bonagale go batho bohle.’ (1 Timotheo 4:​15, bapiša le NW.) Ke moka o tla thabela bophelo bjo bo nago le morero tirelong ya Modimo.

[Caption on page 9]

Go bala Beibele le go naganišiša ka seo o se badilego go tla go tutueletša go hlankela Jehofa

[Caption on page 10]

Jesu o ile a phethagatša ditebelelo tša Tatagwe