“Batamelang Kgaufsi Le Modimo, Gomme O Tla Batamela Kgaufsi Le Lena”

Pele le ka Morago—Lentšu la Modimo le a Šoma

GE E ba o ile wa kopana le Tony nywageng ya gagwe ya mathomong a mahlalagadi, o be o tla ba o bone mošemane yo a se nago bogwera le yo šoro yoo gantši a etelago dikarolo tše di senyegilego tša kua Sydney, Australia. Gare ga bagwera ba gagwe go be go e na le dikebekwa. Gantši ba be ba thuba, ba e-⁠lwa le dikebekwa tše dingwe le go thuntšhana.

Tony o thomile go kgoga a e-⁠na le nywaga e senyane. Ge a e-⁠na le nywaga e 14, o be a kgoga patše ka mehla gomme o be a phela bophelo bjo bo gobogilego boitshwarong. Ka nako ya ge a e-⁠na le nywaga e 16, o be a lemaletše heroin, gomme se se ile sa mo lebiša go dirišeng cocaine le LSD​—Tony o bolela ka tsela ye: “Ge e le gabotse ke be ke diriša selo se sengwe le se sengwe seo se bego se tla ntaga.” Ke moka o ile a thea ditirišano tša dihlare-tagi le dihlopha tše pedi tša disenyi tšeo di tumilego. Go se go ye kae Tony o ile a thoma go tsebja e le yo mongwe wa barekiši ba dihlare-tagi yoo a ka botwago ka lebopong la ka bohlabela bja Australia.

Mokgwa wa Tony wa go kgoga heroin le patše o be o mo jela tšhelete ya magareng ga $160 (U.S.) le $320 (U.S.) ka letšatši. Eupša o be o jela lapa la gagwe seo se fetago seo. O re: “Nna le mosadi wa-ka re ile ra šupša ka dithunya le dithipa difahlegong ka makga a mmalwa ke disenyi tšeo di bego di nyaka dihlare-tagi le tšhelete yeo re bego re e-⁠na le yona ka ngwakong wa rena.” Ka morago ga go ba kgolegong ka makga a mararo, Tony o ile a ikwa a swanelwa ke go hlahloba gore bophelo bja gagwe bo lebile kae.

Gaešita le ge a be a tlwaetše go ya kerekeng, Tony o ile a ikwa a arogile go Modimo yoo a bego a nagana gore o otla badiradibe ka go ba fiša diheleng ka mo go sa felego. Lega go le bjalo, ge a be a etelwa ke Dihlatse tša Jehofa tše pedi, Tony o ile a makatšwa ke go ithuta gore Modimo ga a bjalo. Le gona Tony o ile a thabišwa ke gore ruri o be a ka lokiša bophelo bja gagwe gomme a amogela ditšhegofatšo tša Modimo. Tony o ile a tutuetšwa ke mantšu a Jesu Kriste a rego: “Xo Modimo ké mo xo kxônêxaxo tšohle.” (Mareka 10:​27) Tony o ile a kgothatšwa ka mo go kgethegilego ke mantšu a rego: “Batamelang kgaufsi le Modimo, gomme o tla batamela kgaufsi le lena.”​—Jakobo 4:⁠8, NW.

Tony ga bjale o be a lebeletšane le tlhohlo ya go dira gore bophelo bja gagwe bo dumelelane le ditekanyetšo tša Beibele. O re: “Selo sa mathomo seo ke ilego ka tlogela go se dira e bile go kgoga, selo seo ke bego nka se kgone go se dira le ka mohla, gaešita le ge ke lekile ka makga a mantši. Ka matla a Jehofa, ke ile ka kgona go tlogela go kgoga heroin le patše, mekgwa ya dihlare-tagi yeo e bego e ntaola ka nywaga e 15 e fetilego. Ga se ka ka ka nagana gore go be go tla kgonega go kgaotša mekgwa ye.”

Go e na le go boifa Modimo yo a tlaišago batho ka mo go sa felego diheleng​—thuto yeo e sego gona ka Beibeleng​—Tony le mosadi wa gagwe ba ile ba amogela kholofelo ya go phela ka mo go sa felego paradeiseng mo lefaseng. (Psalme 37:​10, 11; Diema 2:​21) Tony o dumela gore: “Go ntšere nako e ntši le maiteko go dira gore bophelo bja-ka bo dumelelane le ditekanyetšo tša Modimo, eupša ka thušo ya Jehofa ke ile ka atlega.”

 Ee, motho yo a bego a lemaletše dihlare-tagi o fetogile Mokriste. Ba neela nako ya bona le dilo tša bona tše di bonagalago, yena le mosadi wa gagwe ba dirišitše diiri tše dikete modirong wa go ruta wa Beibele. Le gona ba swaregile ka go godiša bana ba babedi bao ba boifago Modimo. Phetogo ye e kgolo e ile ya fihlelelwa ka matla a magolo a Lentšu la Modimo, Beibele. Ka kgonthe, bjalo ka ge moapostola Paulo a bolela, “Lentšu la Modimo ké le le phelaxo, ké le matla.”​—Ba-Hebere 4:⁠12.

Go sa šetšwe mehlala e bjalo e mebotse, ba bangwe ba bolela ka go hloka toka gore modiro wa thuto yeo e theilwego Beibeleng wa Dihlatse tša Jehofa o thuba malapa le go senya mekgwa e mebotse go bafsa. Ka ntle le pelaelo taba ya Tony e ganetša tatofatšo yeo.

Ka go swana le Tony, ba bantši ba ithutile gore mekgwa e mebe e lemaletšwego e ka fenywa. Bjang? Ka go ba le tumelo go Modimo le ka go ithekga ka yena le ka Lentšu la gagwe gotee le ka thekgo ya bagwera bao ba nago le taba le ba lerato ba Bakriste. Ka lethabo Tony o phetha ka gore: “Ke bone kamoo melao ya motheo ya Beibele e šireleditšego bana ba-ka ka gona. Dithuto tša Beibele di phološitše lenyalo la-ka. Le gona baagišani ba-ka ba robala boroko ka baka la gore ga ke sa le tšhošetšo go bona.”

[Ntlhakgolo go letlakala 9]

‘Ka matla a Jehofa, ke ile ka kgona go tlogela mokgwa wa go diriša dihlare-tagi woo o bego o ntaola ka nywaga e 15’

[Lepokisi go letlakala 9]

Melao ya Motheo ya Beibele e a Šoma

Melao ya motheo e fapa-fapanego ya Beibele e thušitše ba bantši bao ba lemaletšego dihlare-tagi go tlogela mokgwa wo o senyago. Gare ga melao ye ya motheo go na le ye e latelago:

“A re hlapeng re tšwê thšila tšohle tša nama le tša môya, re phêthê kxêthêxô ya rena rè boifa Modimo.” (2 Ba-Korinthe 7:⁠1) Go kgoga dihlare-tagi go thulana le molao wa Modimo.

“Mathômô a bohlale ké xo boifa Morêna; thlaloxanyô ké xo tseba Yêna Mokxêthwa.” (Diema 9:​10) Tlhompho ya go hlompha Jehofa yeo e theilwego tsebong e nepagetšego ya go mo tseba le ditseleng tša gagwe e thušitše ba bantši go tlogela tutuetšo ya dihlare-tagi.

“Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” (Diema 3:​5, 6) Mekgwa e senyago e ka kgaotšwa ka go bota Modimo ka pelo ka moka le ka go ithekga ka yena ka mo go feletšego.