Tsela le Lebaka Leo ka Lona

Matswal o a Jesu a Diragetšego

“GA GO kgonege!” Batho ba bantši bao e sego Bakriste ba tla bolela se ka morago ga go kwa kanegelo ya matswalo a Jesu. Ba nagana gore ke mo go sa dumelelanego le thutamahlale gore ngwanenyana wa kgarebe a ka ima gomme a belega morwa ka ntle le go ba le dikopano tša botona le botshadi le monna. O nagana’ng?

Ka 1984, The Times ya London e gatišitše lengwalo leo le ilego la nea mabaka tabeng ye, le bolela gore: “Ga se ga tlhaologanyo go diriša thutamahlale e le lebaka la go ganetša mehlolo. Go dumela gore mehlolo e ka se direge go swana le tiro ya tumelo ya go dumela gore e ka direga.” Lengwalo le ile la saenwa ke baprofesara ba thutamahlale ba 14 diyunibesithing tša Brithania. Ba itše: “Re amogela ka lethabo go belega ga kgarebe, mehlolo ya Ebangedi le tsogo ya Kriste e le ditiragalo tša histori.”

Lega go le bjalo, ke mo go kwešišegago gore motho a makale ge a thoma go kwa ka pego ya go belegwa ga Jesu ke kgarebe. Mmago Jesu wa kgarebe ka boyena o ile a makala ge morongwa wa Modimo a re: “Tseba; O tlo ima mmeleng wa xaxo, wa tlo bêlêxa morwa wa tlo mo rêa leina la Jesu.” Maria o ile a araba ka go botšiša gore: “Tšeo di ka dirêxa bya’ng, etšwe kè sa tsebe monna?” Ke moka morongwa o ile a hlalosa gore Modimo o tlo dira mohlolo ka moya wa Gagwe o mokgethwa, a oketša ka gore: “Xobane Modimo, xa xo se se sa kxônexexo xo Yêna.” (Luka 1:​31, 34-37) Ka ntle le pelaelo, Yo a bopilego mosepelo o makatšago wa go ikatiša ga batho a ka baka gape le go ingwa gotee le go belegwa ga Jesu ke kgarebe e hlwekilego. Ge e ba Modimo a bopile legohle le melao ya lona e lebanyago, gona a ka kgona go diriša sele ya lee go tšwa popelong ya Maria go tšweletša Morwa yo a phethagetšego yo e lego motho.

Lebaka Leo ka Lona a Bego a le Bohlokwa

Monna yo a boifago Modimo e lego Josefa o be a beeleditše Maria nakong ya ge a ima. Morongwa wa Modimo o ile a hlalosetša Josefa torong lebaka le le kgahlišago leo ka lona mmeeletšwa wa gagwe wa kgarebe a bego a imile. Morongwa o itše: “Se boifê xo beka Maria mosadi wa xaxo, xobane se a se imilexo ké se se tšwaxo xo Môya-mokxêthwa. Ó tlo bêlêxa morwa, wa tlo mo rea leina la Jesu, xobane ké Yêna a tl’o xo phološa sethšaba sa xaxwe dibeng tša sôna.” (Mateo 1:​20, 21) Leina Jesu ka Sehebere le bolela gore “Jehofa ke Phološo.” Le re gopotša ka go nyakega ga phološo sebeng le lehung le ka tokišetšo ya Jehofa Modimo bakeng sa phološo e bjalo ka Jesu.

 Ka baka la ge motho wa pele Adama a dirile sebe, bana ba gagwe ka moka ba belegwe ba sa phethagala, ba na le tshekamelo ya go roba melao ya Modimo. (Ba-Roma 5:​12) Ditlogolo tša Adama di be di ka phološwa bjang sebeng gomme tša fihlelela phethego? Bophelo bjo bongwe bjo bo phethagetšego bja motho, bjo bo lekanago le bja Adama bo be bo swanetše go lefša go lekanya sekala sa toka. Ke ka baka leo Modimo a ilego a dira go belegwa ka mohlolo ga motho yo a phethagetšego Jesu, gomme ke ka baka leo Jesu a ilego a dumelela manaba a gagwe go mmolaya. (Johane 10:​17, 18; 1 Timotheo 2:​5, 6) Ka morago ga tsogo ya Jesu le go rotogela ga gagwe bophelong bja legodimong, o be a ka bolela ka kgodišego gore: “Nkile ka ba mohu; byale ké Nna é, ke wa xo phela xo iša mehleng ya neng le neng; ’me ke swere dikxonyu tša bo-dula-bahu [lebitla la batho le le tlwaelegilego] le tša lehu.”​—⁠Kutollo 1:⁠18.

Ka dinotlelo tša seswantšhetšo tša lehu le Bodula-bahu, Jesu o bulela batho ba sebe tsela ya go hwetša gape seo Adama a se lahlilego. Jesu o hlalositše gore: “Ké Nna tsoxô le bophelô. E a ntumetšexo ó tlo phela le xe a ka hwa. Xomme e a phelaxo à ntumêla, a ka se kê a bá a hwa xo iša xo sa felexo.” (Johane 11:​25, 26) A kholofetšo e kgahlišago gakaakang! Lega go le bjalo, go sa na le lebaka le lengwe le legolo kudu la matswalo a Jesu.

Lebaka la Bohlokwa Kudu

Go ingwa ga Jesu ka popelong ya Maria e be e se mathomo a bophelo bja gagwe. O boletše ka mo go kwagalago gore: “Ke foloxile kwa lexodimong.” (Johane 6:​38) Jesu o be a phetše lefelong la moya le Tatagwe wa legodimong go tloga mathomong a tlholo. Ge e le gabotse, Beibele e mo hlalosa e le “Yêna Mo-thôma-hlôlô-ya-Modimo.” (Kutollo 3:​14) A le legodimong, Jesu o ile a hlatsela borabele bja morongwa yo kgopo yo a ilego a dira gore batho ba pele ba hlanogele pušo ya Modimo. Se se neile Jesu lebaka la bohlokwa kudu la go nyaka gore a belegwe e le Morwa wa Modimo yo e lego motho yo a phethagetšego. Lebaka e be e le lefe?

E be e le go hlatsela gore Tatagwe wa legodimong o na le tshwanelo ya go buša legohle. Ka go dula a botega go tloga matswalong a gagwe go fihla lehung la gagwe lefaseng, Jesu o bontšhitše go rata ga gagwe go ikokobeletša tsela ya Jehofa ya go buša dibopiwa tša Gagwe. Pele ga lehu la gagwe ka diatleng tša manaba a Modimo, Jesu o boletše ka mo go kwagalago lebaka la go rata ga gagwe go neela bophelo bja gagwe go ba sehlabelo. O itše e be e le gore lefase le tsebe gore o ratile Tatagwe. (Johane 14:​31) Ge nkabe batho ba babedi ba mathomo e lego Adama le Efa ba ile ba hlagolela lerato le le bjalo, ba ka be ba ile ba itlhatsela ba botega ka tlase ga teko ya bona e bonolo kudu.​—⁠Genesi 2:​15-⁠17.

Le gona go botega ga Jesu go pepentšhitše morongwa yo kgopo e lego Sathane, e le moaketši. Sathane o ile a thomeletša Modimo le motho ka  go bolela ka pele ga barongwa legodimong gore: “Motho tše a naxo natšô’ a ka di nthša tšohle xe a hlêkêlêla bophelo bya xaxwe.” (Jobo 2:​1, 4) Sathane o ile a bolela ka mo go fošagetšego gore batho ka moka ba be ba tla se kwe Modimo e le gore ba boloke maphelo a bona.

Ditaba tše di lego ka mo godimo di ile tša hlohla toko le go swanelega ga pušo ya Modimo. E le gore di rarollwe, Jesu o be a ikemišeditše go belegwa e le motho gomme a itlhatsele a botega go fihla lehung.

Ka gona, lebaka le legolo la matswalo a Jesu mo lefaseng e be e le ‘gore a hlatsele therešo,’ bjalo ka ge yena ka noši a boletše. (Johane 18:​37) O dirile bjalo ka go bontšha ka mantšu le ka ditiro gore bobuši bja Modimo ke bja go loka ka mo go feletšego le gore go ikokobeletša bjona go feleletša ka lethabo le le sa felego. Le gona Jesu o hlalositše gore o be a tlile lefaseng go tla go neela bophelo bja gagwe e le motho go ba “topollô ya ba bantši,” a bulela batho ba sebe tsela ya go fihlelela phethego le bophelo bjo bo sa felego. (Mareka 10:​45) E le gore batho ba kwešiše ditaba tše tša bohlokwa, e be e le ga bohlokwa go ba le pego ya matswalo a Jesu. Go oketša moo, ditiragalo tše di dikologilego matswalo a Jesu di na le dithuto tše dingwe tša bohlokwa, bjalo ka ge sehlogo se se latelago se tla bontšha.

Ditlogolo tša Adama di be di tla phološwa bjang sebeng?