Lebelela Ditaba ka Pono ya Modimo

KUA NEW YORK, U.S.A., September 14, 2002, e be e le letšatši le borutho leo le se nago maru. Letšatšing leo, lešaba la ditšhaba-tšhaba la ba 6 521 le ile la bokana kua Lefelong la Thuto la Pat­ter­son le mafelong a mangwe a mabedi a Dihlatse tša Jehofa tikologong yeo. Lešaba le be le bokanetše go hlatsela go aloga ga sehlopha sa bo-113 sa Sekolo sa Beibele sa Watchtower sa Gilead. Barutwana ba be ba e-⁠tšwa dinageng tše 14 gomme ba feditše dikgwedi tše hlano tše di sa tšwago go feta ba itokišeletša tirelo ya boromiwa dinageng tše 19 tšeo ba abetšwego go tšona.

Carey Barber yo a lego ngwageng wa gagwe wa bo-98 e bile e le setho sa Sehlopha se Bušago sa Dihlatse tša Jehofa, e be e le modula-setulo wa lenaneo. O ile a lebiša tlhokomelo go bohwa bja nywaga e nyakilego e e-⁠ba e 60 bja Sekolo sa Gilead, seo se hlametšego ba dikete go ya bodireding bja boromiwa. Ngwanabo rena Barber o boletše gore: “Ga se pheteletšo go bolela gore ditla-morago tše kgolo di tšweleditšwe ke tlwaetšo ya bona e oketšegilego. Batho ba dikete tše makgolo bao ba lokilego lefaseng ka bophara ba neetše maphelo a bona go Jehofa gomme ba amogetše borapedi bja gagwe bja therešo le tirelo e kgethwa ka baka la thušo yeo baromiwa bao ba tlwaeditšwego ba ba neilego yona.”

Pele ga go tla Gilead, bontši bja barutwana ba ile ba bontšha go ba le kgahlego ya go katološa bodiredi bja bona. Banyalani ba bangwe ba feditše lebaka la ka godimo ga ngwaga ba tsenela dithuto tša se-China ka maiteko a go fihlelela badudi ba bantši ba morafo wa ma-China tikologong ya gabo bona kua Canada. Banyalani ba bangwe ba ile ba thoma go ithuta se-Albania gomme mafelelong ba ile ba hudugela kua Albania bakeng sa go hlokomela go kgahlegela Beibele mo go golago ga batho lefelong leo. Ba bangwe sehlopheng ba tlile Gilead ba e-⁠tšwa Hungary, Guatemala le Dominican Re­pub­lic, e lego dinaga tšeo ba bego ba hudugetše go tšona bakeng sa go hlankela moo go bego go nyakega thušo e kgolo ya barutiši ba Lentšu la Modimo.

Ga bjale, pele ga ge ba ka ya dikabelong tša bona kua Afrika, Bohlabela bja Yuropa, Amerika Bogare le Amerika Borwa gotee le Bohlabela bja Kgole, barutwana ka moka bao ba alogago ba ile ba kgothaletšwa go nagana ka Modimo dilong ka moka tšeo ba di dirago.

Lebelela Ditaba ka Pono ya Modimo

Ka morago ga mantšu a gagwe a go bula, Ngwanabo rena Barber o ile a rola Maxwell Lloyd, setho sa Komiti ya Lekala United States. O ile a gatelela sehlogo se se rego “Lebelela Ditaba ka Moka ka Pono ya Modimo.” Ngwanabo rena Lloyd o ile a lebiša tlhokomelo mohlaleng wa Dafida le wa Morwa wa Modimo, Jesu. (1 Samuele 24:⁠7; 26:​11; Luka 22:​42) Ka morago ga go gopotša barutwana gore thuto ya bona ya dikgwedi tše hlano ya Beibele e ba neile tlwaetšo ya go lebelela dilo ka pono ya Modimo, seboledi se ile sa botšiša gore: “Ge le swara dithuto tša Beibele le batho kabelong ya lena e mpsha, na le tla ba thuša go nea mabaka ditabeng go ya ka pono ya Modimo?” Le gona ge e le mabapi le go eletša ba bangwe, o eleditše barutwana gore: “Le se ke la re, ‘Go ya ka nna ke nagana gore . . . ’ Go e na le moo, ba thuše go kwešiša seo e lego pono ya Modimo.  Ka go latela tsela ye, le tla itlhatsela le le tšhegofatšo ya kgonthe go bao le gweranago le bona kabelong ya lena.”

Yo a latetšego lenaneong e bile Gerrit Lösch, setho sa Sehlopa se Bušago. Ge a bolela ka sehlogo se se rego “Ke na le Lena,” o ile a lebiša tlhokomelo mabakeng a mantši a ge Jehofa a be a botša bahlanka ba gagwe ba botegago gore “Nna ke na le wena.” (Genesi 26:​23, 24; 28:​15; Jošua 1:⁠5; Jeremia 1:​7, 8) Re ka ba le kgodišego e swanago ka Jehofa mehleng ya rena ge e ba re dula re botega. Ngwanabo rena Lösch o bontšhitše gore: “Na le tshwenyegile ka gore le tla hwetša batho bao le tla ithutago Beibele le bona? Gopolang gore Jehofa o itše ‘Nna ke na le wena.’ Na le tshwenyegile ka gore le tla ba le dilo tše di bonagalago tše di lekanego? Jehofa o itše: ‘Nka se kê ka Xo lahla; nka se kê ka Xo tloxêla.’” (Ba-Hebere 13:⁠5) Ngwanabo rena Lösch o ile a phetha ka go gopotša barutwana gore Jesu o holofeditše gore o tla ba le balatedi ba gagwe ba botegago modirong wa go dira barutiwa.​—⁠Mateo 28:⁠20.

Sehlogo sa polelo ya mohlahli wa Gilead e lego Lawrence Bowen se be se re “Na le tla Hwetša Tšhireletšego Ditekong tše Šoro?” O ile a bontšha gore ka baka la dikgang tšeo di tsošitšwego kua Edene, ka moka bao ba kganyogago go nea Jehofa boineelo bjo bo feletšego ba ile ba lebeletšana le mathata gomme ka dinako tše dingwe ba ile ba lebeletšana le diteko tše šoro. O ile a kgothaletša  barutwana ba ba alogago go latela mohlala wa Jesu yoo a ilego a hwetša tšhireletšego ya kgonthe ka go ithekga ka mo go feletšego ka Jehofa le ka go amogela diteko tše šoro tšeo Jehofa a di dumeletšego go dira gore go kwa ga Morwa wa gagwe e be mo go phethagetšego. (Ba-Hebere 5:​8, 9) Jehofa a ka bapišwa le mosekiši wa gauta, yo a dirišago tekanyo e lekanego ya mollo go tloša dilo tše di sa sekago. Go ba gona, tumelo yeo e lekilwego mollong e nea tšhireletšego e kgolo kudu go feta gauta e sekišitšwego. Ka baka la’ng? Ngwanabo rena Bowen o itše: “Ke ka gobane tumelo yeo e sekišitšwego e ka kgona go lebeletšana le teko le ge e le efe, gomme e re hlamela go kgotlelela dilo ka moka go fihla ‘bofelong.’”​—⁠Mateo 24:⁠13.

Mohlahli yo mongwe wa Gilead e lego Mark Noumair o botšišitše gore: “Na le tla Ratega?” Sehlogo sa gagwe se be se theilwe mantšung a 1 Samuele 2:​26 yeo e hlalosago Samuele e le yo a ‘ratwago ke Jehofa le batho.’ Ka morago ga go ahla-ahla mohlala wa Samuele, Ngwanabo rena Noumair, yo a feditšego nywaga ya ka godimo ga e lesome a le tirelong ya boromiwa kua Afrika o itše: “Le lena le ka ba bao ba rategago mahlong a Modimo ka go kgomarela ka potego e sa kwanantšhego modiro woo Modimo a le neilego wona gore le o dire. O le file kabelo e bohlokwa ya boromiwa.” Ka morago ga moo Ngwanabo rena ­Noumair o ile a kgothaletša sehlopha se se alogago go lebelela dikabelo tša bona e le boikarabelo bjo bokgethwa go tšwa go Modimo gomme ba be le kgopolo ya Modimo ge ba phethagatša dikabelo tša bona.

Nakong ya sekolo, barutwana ba bile le dibaka tše dintši mafelo-bekeng tša go abelana le batho tikologong yeo “matete a Modimo” ao a boletšwego ka Beibeleng. (Ditiro 2:​11) Ge e le gabotse, ba ile ba kgona go bolela matete a ka maleme a lesome a fapanego. Mohlahli yo mongwe wa sekolo sa Gilead e lego Wallace Liverance o ile a boledišana le sehlopha sa barutwana bao ba ilego ba anega diphihlelo tša bona ka tlase ga sehlogo se se rego “ ‘Matete a Modimo’ a Tutueletša Batho go Gata Mogato.” O itše: “Moya o ile wa tutueletša bao ba bego ba le ka phapošing ya ka godimo ka Pentekoste go bolela ka ‘matete a Modimo.’ Lehono moya woo o sa dutše o šoma go bahlanka ba Modimo ka moka bao ba botegago.” Ba bangwe e bile ba tutueletšegile go ithuta leleme le lefsa ka kgopolo ya go nea bohlatse go batho ba bantši ba oketšegilego.

Keletšo e Šomago Tabeng ya go Lebelela Ditaba ka Pono ya Modimo

Ka morago ga dipolelo tša go bula, Gary ­Breaux le William Young, ditho tša lapa la Bethele kua United States, ba ile ba boledišana le ditho tše fapa-fapanego tša dikomiti tša makala a dinaga tšeo go tšona go nago le baromiwa bao ba hlankelago fao gotee le banyalani bao ba feditšego nywaga e 41 ba le tirelong ya boromiwa. Se sengwe seo se lemogilwego e bile gore: “Bao ba sa nyakego mo gontši ba dula nako e telele. Ba lebiša tlhokomelo go lebaka leo ba tlilego ka lona. Ba a tseba gore ba tletše go bolela ditaba tše dibotse le go thuša batho go tseba Jehofa.”

Setho se sengwe sa Sehlopha se Bušago e lego David Splane, se phethile lenaneo ka polelo e nago le sehlogo se se rego “Ga le ye Kgole!” O be a bolela’ng ka seo, mabapi le taba ya gore dialoga tše 46 ga bjale di be di romelwa dinageng tša lefaseng ka bophara? O hlalositše gore: “Go sa šetšwe gore le karolong efe ya lefase, ka mehla le tla dula le le ngwakong wa Modimo ge feela le botega.” Ee, Bakriste ka moka bao ba botegago, go sa šetšwe gore ba kae, ba hlankela karolong ya tempele e kgolo ya Modimo ya moya, goba ngwakong woo o bilego gona nakong ya kolobetšo ya Jesu lekgolong la pele la nywaga. (Ba-Hebere 9:⁠9) E bile mo go kgothatšago gakaakang go bao ba lego gona go tseba gore Jehofa o kgaufsi le bahlanka ba gagwe ka moka ba botegago ba mo lefaseng! Go fo swana le ge Jehofa a be a na le kgahlego ka Jesu nakong ya ge a be a le mo lefaseng, O na le kgahlego ka rena ka moka le tirelo ya rena go Yena, go sa šetšwe gore re ka ba re le kae. Ka gona, ge go tliwa ditabeng tša borapedi le ka mohla ga re kgole seng sa rena e bile ga re kgole le Jehofa gotee le Jesu.

Ka morago ga go amogela ditumedišo tše di tšwago lefaseng ka bophara, go tsebišwa ga dikabelo le go bala lengwalo le le tšwago sehlopheng leo le bego le bontšha ditebogo ka tlwaetšo yeo e hweditšwego Gilead, modula-setulo o ile a phetha lenaneo ka katlego. O ile a kgothaletša baromiwa ba bafsa go tšwela pele ka modiro wa bona o mobotse le go thaba tirelong ya Jehofa.​—⁠Ba-Filipi 3:⁠1.

[Lepokisi go letlakala 23]

DIPALO-PALO TŠA SEHLOPHA

Palo ya dinaga tše di emetšwego: 14

Palo ya dinaga tšeo ba abetšwego go tšona: 19

Palo ya barutwana: 46

Palo-gare ya nywaga: 35,0

Palo-gare ya nywaga therešong: 17,2

Palo-gare ya nywaga bodireding bja nako e tletšego: 13,7

[Seswantšho go letlakala 24]

Sehlopha se se Alogago sa bo-113 sa Sekolo sa Beibele sa Watchtower sa Gilead

Lelokelelong leo le lego ka mo tlase, methaladi e balwa go tloga ka pele go ya ka morago gomme maina a lokeleditšwego go tloga go le letshadi go ya go le letona mothalading o mongwe le o mongwe.

(1) Ligthart, M. Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.