“O Hlalefêlê tša ka Mosô”

“Bontši bja batho ba diriša nywaga ya bona ya pele gore e dire gore nywaga ya bona ya mafelelo e be e nyamišago.” Ke kamoo go boletšego Jean de La Bruyère e lego mongwadi wa ditaodišo wa mo-Fora wa lekgolong la bo-17 la nywaga. Ka kgonthe, mofsa yo a sa kgonego go tšea phetho a ka dika-dika, a lebeletšana le go se kgotsofale le manyami. Ka lehlakoreng le lengwe, mofsa wa senganga a ka phegelela tseleng e sego bohlale, ya mo amoga lethabo ka moragonyana bophelong. Ka tsela le ge e le efe, dibe tša go se dire se se lokilego le seo se swanetšego goba go senya di ka lebiša manyaming a magolo.

Mafelelo a bjalo a ka phengwa bjang? Ge le lemoša mabapi le go dika-dika bofseng, Lentšu la Modimo le eletša bafsa gore: “Xopola Mmopi wa xaxo Ò sa le yo mofsa, xò sešo xwa fihla matšatši a mabe, xò sešo xwa tla nywaxa ye O tl’o xo re: Xa e na tše di nthabišaxo!” (Mmoledi 12:1) Ge e ba o le mofsa, gata megato e nepagetšego go ithuta ka “Mmopi wa xaxo” o sa le yo mofsa.

Ka gona, Beibele e thuša bafsa bjang go phema bošilo bja bofsa? E re: “Kwaa keletšô, O êlêtšêxê, O hlalefêlê tša ka mosô.” (Diema 19:​20) Beibele gape e bontšha gabotse gore go gana bohlale bja Modimo e le mafelelo a go se šetše goba borabele bofseng goba nywageng le ge e le efe, go tšweletša mafelelo a bohloko. (Diema 13:​18) Ka lehlakoreng le lengwe, go ela hloko ditaelo tša Modimo go feleletša ka “bontši bya matšatši, le nywaxa ya bophelô, le têtlêxô,” bophelo bjo bo kgotsofatšago.—Diema 3:2.