Na Bakriste ba Swanetše go ba le Lehufa?

NA LEHUFA ke seka seo Bakriste ba swanetšego go se hlagolela? Bjalo ka Bakriste, re kgothaletšwa go ‘phegelela lerato,’ gomme re botšwa gore “leratô xa le tsebe moná.” (1 Ba-Korinthe 13:4; 14:1) Ka lehlakoreng le lengwe, re botšwa gape gore ‘Jehofa ke Modimo wa lehufa’ gomme re laelwa gore re be “baetši ba Modimo.” (Ekisodo 34:​14, PK; Ba-Efeso 5:1) Ke ka baka la’ng go bonala go na le thulano?

Ke ka gobane mantšu a Sehebere le Segerika ao a fetoletšwego e le “moná” le “lehufa” ka Beibeleng a na le ditlhaloso tše di fapa-fapanego. A ka ba le tlhaloso e lokilego goba e sa lokago, go ithekgilwe ka tsela yeo mantšu a dirišwago ka yona. Ka mohlala, lentšu la Sehebere leo le fetoletšwego e le “lehufa” le ka bolela “go phegelela borapedi bjo bo feletšego; go se kgotlelele phadišano; phišego; mafolofolo; lehufa goba mona le tseba.” Lentšu le le sepedišanago le lona la Segerika le na le tlhaloso e swanago. Mantšu a a ka šupa maikwelo a kgopamišitšwego le a sa leka-lekanago malebana le yo go belaelwago gore go phadišanwa le yena goba yo go dumelwago gore o thabela mehola. (Diema 14:​30) Le gona a ka šupa go go bontšha seka se sebotse seo se neilwego ke Modimogo nyaka go šireletša yo o mo ratago kotsing.—2 Ba-Korinthe 11:2.

Mohlala o Mogolo

Jehofa o bea mohlala o mogolo go bontšheng lehufa le le swanetšego. Maikemišetšo a gagwe ke a sekilego le a hlwekilego, a tutuetšwa ke kganyogo ya go šireletša batho ba gagwe tshenyegong ya moya le ya boitshwaro. O ile a bolela mabapi le batho ba gagwe ba bogologolo, bao ka seswantšhetšo ba bolelwago e le Tsione gore: “Ke be ke hufega ka baka la Tsione ka lehufa le legolo; ke be ke hufega ka baka la yona ka kgalefo e kgolo.” (Sakaria 8:2; PK) Bjalo ka ge tate yo lerato a dula a phafogetše go šireletša bana ba gagwe kotsing, Jehofa o phafogetše go šireletša bahlanka ba gagwe kotsing ya nama le ya moya.

E le gore a šireletše batho ba gagwe, Jehofa o neile Lentšu la gagwe, Beibele. Le na le kgothatšo e kgolo ya gore ba sepele ka bohlale, gomme le tletše ka mehlala ya bao ba ilego ba dira bjalo. Go Jesaya 48:​17 re bala gore: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” Ke mo go kgothatšago gakaakang go tseba gore lehufa la gagwe le mo tutuetša go re hlokomela le go re šetša! Ge e ba a be a se na lehufa ka tsela ye e swanetšego, re be re tla tlaišwa ke mehuta ka moka ya dikotsi ka baka la go hloka ga rena phihlelo. Dipontšho tša Jehofa tša go bontšha lehufa e tloga e se tša boithati.

Ka gona, ke eng seo se dirago phapano magareng ga lehufa le mona? Bakeng sa go hwetša karabo, anke re hlahlobeng mohlala wa Miryama le wa Finease. Lemoga seo se ilego sa ba tutuetša.

Miryama le Finease

Miryama e be e le kgaetšedi yo mogolo wa Moše le Arone, baetapele ba ba-Isiraele nakong ya Khudugo. Ge ba-Isiraele ba be ba le lešokeng, Miryama o ile a tsebafela kgaetšedi ya gagwe Moše. Pego ya Beibele e balega ka gore: “Miryama, à na le Arone, ó be a fêla a tsôta Mošê ka ’baka la mosadi wa Mo-Kuše yo a bexo a mo tšere  . . . le xôna ba re: Afa Morêna ó bolêla ka Mošê fêla? A xa a bolêle le ka rena?” Go molaleng gore Miryama o ile a etelela pele mogato wo wa go lwantšhana le Moše, ka gobane Jehofa o ile a otla Miryama e sego Arone, ka lephera leo le tšerego beke ka moka ka baka la boitshwaro bja gagwe bja go se hlomphe.Numeri 12:​1-15.

Ke eng seo se ilego sa šušumeletša Miryama go tsogela Moše? Na e be e le go tshwenyega ka borapedi bja therešo le kganyogo ya go šireletša ba-Isiraele gotee kotsing? Go tloga go se bjalo. Go bonala Miryama a ile a dumelela kganyogo e sa swanelago ya go nyaka maemo a oketšegilego le bolaodi e šwahlela ka pelong ya gagwe. Ka ge e be e le moporofeta wa mosadi kua Isiraeleng, o ile a thabela tlhompho e kgolo go tšwa bathong, go basadi ka mo go kgethegilego. O ile a ba etelela pele ka mmino le ka koša ka morago ga go phološwa ga ba-Isiraele ka mohlolo Lewatleng le Lehwibidu. Lega go le bjalo, nako ka morago Miryama a ka be a ile a thoma go tshwenyega ka mo go sa swanelago ka go lahlegelwa ke bjo bongwe bja botumo bja gagwe go ya go yo a bego a belaelwa go ba mophenkgišani, mosadi wa Moše. A tutuetšwa ke tseba, o ile a fehla phadišano malebana le Moše, yo a kgethilwego ke Jehofa.—Ekisodo 15:​1, 20, 21.

Ka lehlakoreng le lengwe, Finease o be a na le boikemišetšo bjo bo fapanego ka ditiro tša gagwe. Nakwana pele ba tsena Nageng ya Kholofetšo, ge Isiraele e be e hlomile mešaša Melaleng ya Moaba, basadi ba ba-Moaba le ba-Midiane ba ile ba gogela banna ba ba-Isiraele boitshwarong bjo bo gobogilego le borapeding bja medimo ya diswantšho. E le gore ba hlwekiše mešaša le go fediša kgalefo e tukago ya Jehofa, baahlodi ba Isiraele ba be ba laetšwe go bolaya banna ka moka bao ba ilego ba aroga. Ka mabaka a boitshwaro bjo bo gobogilego, letona la moloko wa Simeone e lego Simiri ka sebete o ile a tliša mosadi wa mo-Midiane e lego Kosibi mešašeng pele ga “phuthêxô ka moka ya Isiraele.” Finease o ile a gata mogato ka sebete. A tutuetšwa ke maikwelo a lehufa, goba go fišegela borapedi bja Jehofa, le kganyogo ya go boloka boitshwaro bjo bo sekilego mešašeng, o ile a bolaya diotswa ka moka ka mošašeng wa bona. O ile a retwa ka baka la go ‘hufegela ga gagwe’ Jehofa. Kgato ya kapejana ya Finease e ile ya emiša kotlo yeo e bego e šetše e fetile ka maphelo a 24 000, gomme Jehofa o ile a mo putsa ka kgwerano ya boperisita gore bo dule bo le lelokong la gagwe ka mo go sa felego.—Numeri 25:​4-13, PK.

Phapano e be e le efe magareng ga dipontšho tše tše pedi tša lehufa? Miryama o ile a tsebafela kgaetšedi ya gagwe mola Finease a ile a ahlola motheong wa lehufa. Ka go swana le Finease, go na le dinako tšeo ka tšona re swanetšego go ikwa re gapeletšega go bolela goba go gata mogato wa go lwela leina la Jehofa, borapedi bja gagwe le batho ba gagwe.

Lehufa le le sa Swanelago

Lega go le bjalo, na go a kgonega go ba le maikwelo a sa swanelago a lehufa? Ee, go a kgonega. Se se bile bjalo ka ba-Juda ba lekgolong la pele la nywaga. Ba ile ba šireletša Molao o neilwego ke Modimo le ditšo tša bona ka lehufa. Maitekong a bona a go šireletša Molao, ba ile ba bea melawana e tseneletšego e sa balegego le dithibelo tšeo di ilego tša fetoga morwalo o boima bathong. (Mateo 23:4) Ka go se kgone goba ka go se rate go lemoga gore Modimo bjale o  tšeetše Molao wa Moše legato ka selo sa kgonthe seo o bego o se swantšhetša, lehufa la bona le sa swanelago le ile la ba tutuetša go galefela balatedi ba Jesu Kriste ka mo go sa laolegego. Moapostola Paulo, yoo le yena ka nako e nngwe a bego a hufegela Molao ka mo go sa kwanatšhego ka tsela e sa swanelago, o ile a bolela gore batho bao ba bego ba lwela Molao ba be ba “fišexetšwe [hufegetše] Modimo; fêla, ba hlôka temoxô.”—Ba-Roma 10:2; Ba-Galatia 1:14.

Gaešita le ba-Juda ba bantši bao ba ilego ba fetoga Bakriste ba ile ba hwetša go le thata go itokolla lehufeng le le sa swanelago la go hufegela Molao. Ka morago ga leeto la gagwe la boraro la boromiwa, Paulo o neile sehlopha se bušago sa lekgolong la pele la nywaga pego ya mabapi le go sokologa ga ditšhaba. Ka nako yeo, Bakriste ba ba-Juda ba dikete ba ‘ka moka ga bona ba be ba fišegetše Molao.’ (Ditiro 21:​20, PK) E be e le nywaga ka morago ga ge sehlopha se bušago se be se laetše gore Bakriste ba ba-Ntle ba be ba sa swanela go bolotšwa. Ditaba tše di lego mabapi le go kwa Molao di be di tsošitše phapano ka phuthegong. (Ditiro 15:​1, 2, 28, 29; Ba-Galatia 4:​9, 10; 5:​7-12) Ba hloka kwešišo e feletšego ya kamoo Jehofa ga bjale a bego a dirišana le batho ba gagwe, ba-Juda ba bangwe ba Bakriste ba ile ba gapeletša dipono tša bona, ba ganetša ba bangwe.—Ba-Kolose 2:​17; Ba-Hebere 10:1.

Ka gona, re swanetše go phema moreo wa lehufa la go leka go šireletša dikgopolo tša rena tšeo re di ratago goba ditsela tšeo di sa thewago ka go tia ka Lentšung la Modimo. Re dira gabotse go amogela seetša se sefsa sa Lentšu la Modimo seo se hlabišwago ka mokero woo Jehofa a o dirišago lehono.

Hufegela Jehofa

Lega go le bjalo, lehufa ke leo le swanetšego borapeding bja therešo ge e ba le bontšhwa gabotse. Ge re tshwenyega ka mo go sa swanelago ka botumo bja rena goba ditshwanelo, lehufa le lebiša tlhokomelo ya rena go Jehofa. Le re tutueletša go nyaka ditsela tše di fapa-fapanego tša go tsebatša therešo ka yena, re lwela ditsela tša gagwe le batho ba gagwe.

Akiko yo e lego modiredi wa nako e tletšego wa Dihlatse tša Jehofa, o ile a ganetšwa o šoro ke mong wa ntlo yo a bego a sa kwešiše molao wa Modimo ka madi. Akiko o ile a lwela Lentšu la Modimo ka bohlale, gaešita le go bolela go raragana ga tša kalafo le mathata ao a sepedišanago le ditšhelo tša madi. A tutuetšwa ke kganyogo e tseneletšego ya go bolela ka Jehofa, o ile a fetošetša poledišano go seo a bego a lemogile gore ke motheo wa kgonthe wa dikganetšo tša mosadi yoogo hlaelelwa ga gagwe ke tumelo ya go ba gona ga Mmopi. Akiko o ile a boledišana le mong wa ntlo mabapi le kamoo tlholo e thekgago go dumela go Mmopi. Go lwela ga gagwe ka sebete Lentšu la Modimo ga se gwa lebiša feela go tlošeng dikganetšo tšeo di bego di se na motheo eupša go lebišitše gape le thutong ya legae ya Beibele le mosadi yoo. Lehono mong wa ntlo yo a bego a le bogale ke moreti wa Jehofa.

Lehufa le le swanetšego goba phišego ya go fišegela borapedi bja therešo e re tutueletša go phafogela le go diriša dibaka tša go bolela le go lwela tumelo ya rena mošomong, sekolong, lebenkeleng le ge re le maetong. Ka mohlala, Midori o ikemišeditše go bolela ka tumelo ya gagwe  go bašomi-gotee le yena. Mošomi-gotee le yena yo a bego a le nywageng ya gagwe ya bo-40 o ile a bolela gore o be a sa nyake go kwa selo ka Dihlatse tša Jehofa. Ka morago, ge ba be ba boledišana gape, mosadi o ile a lla ka mathata a semelo sa morwedi wa gagwe. Midori o ile a mo laetša puku ya Dipotšišo tša Bafsa le Dikarabo tše di Šomago, * gomme o ile a rulaganya go swara thuto ka puku yeo le morwedi wa mošomi-gotee le yena. Thuto e ile ya thongwa, eupša mmagwe ga se a ka a ba gona poledišanong. Midori o ile a phetha ka go bontšha mosadi bidio ya Jehovah’s WitnessesThe Organization Behind the Name.* Se se ile sa rarolla dilo tše dintši tšeo a bego a sa di kwešiše. A tutueditšwe ke seo a se bonego, o itše: “Ke nyaka go ba bjalo ka Dihlatse tša Jehofa.” O ile a tlatša morwedi wa gagwe go ithuteng Beibele.

Le gona lehufa le le swanetšego le a amogelega ka phuthegong ya Bokriste. Le godiša moya wa lerato le go tshwenyega gomme le re tutueletša go lebeletšana le ditutuetšo tšeo di šitišago tšeo di ka gobatšago bana babo rena ba moya, tše bjalo ka lesebo le le senyago le monagano wa bohlanogi. Lehufa le re tutueletša go thekga diphetho tša bagolo bao ka dinako tše dingwe ba hwetšago go le bohlokwa go sola badiri ba bobe. (1 Ba-Korinthe 5:​11-13; 1 Timotheo 5:​20) Ge a be a ngwala ka maikwelo a gagwe a go hufegela badumedi-gotee le yena kua phuthegong ya Korinthe, Paulo o itše: “Xe ke Le hufexetše ke dirêla Modimo. Xobane ke Le beeleleditše monna o tee, xore ke Le išê xo Kriste bo-ka mosetsana e a se naxo bosodi.” (2 Ba-Korinthe 11:2) Ka gona, lehufa la rena le re tutueletša go dira sohle seo re ka se kgonago go šireletša thuto, moya le tshekego ya boitshwaro ya bohle ka phuthegong.

Ee, lehufa leo le nago le maikemišetšo a mabotselehufa le le nepagetšegole na le tutuetšo e botse go ba bangwe. Le re dira gore re amogelwe ke Jehofa gomme e swanetše go ba e nngwe ya dika tšeo di bonwago go Bakriste lehono.—Johane 2:17.

[Mengwalo ya ka tlase]

[Diswantšho go letlakala 29]

Ditiro tša Finease di be di theilwe lehufeng

[Diswantšho go letlakala 30]

Phema moreo wa lehufa le sa swanelago

[Diswantšho go letlakala 31]

Lehufa le re tutuetša go abelana tumelo ya rena le go rata borwarre bja rena