Mathata le Meputso ya go Godišetša Bana Nageng e Šele

BATHO ba dimilione ba hudugela nageng e mpsha ba holofetše go thoma lefsa. Yuropa e na le badiiledi ba ka godimo ga dimilione tše 20, United States ke legae la batho ba ka godimo ga dimilione tše 26 bao ba belegetšwego dinageng tše dingwe, mola ba ka godimo ga 21 lekgolong ba badudi ba Australia ba belegetšwe dinageng tše dingwe. Gantši malapa a a badiiledi a swanetše go katana le go ithuta leleme le lefsa gomme a swanetše go tlwaelana le setšo se sefsa.

Gantši bana ba ithuta leleme la naga ya gabo bona e mpsha kapejana gomme ba tla thoma go nagana ka leleme le lefsa. Batswadi ba bona ba ka tšea nako e teletšana go ithuta. Ge bana ba golela nageng e sego ya batswadi ba bona, bothata bja leleme bo ka hlola mathata a poledišano ao a ka se rarolegego gabonolo gare ga bana le batswadi.

Leleme le lefsa le ka se kgome feela tsela yeo bana ba naganago ka yona eupša le setšo sa naga e mpsha se ka tutuetša tsela yeo ba ikwago ka yona. Batswadi ba ka hwetša go le thata go kwešiša tsela yeo bana ba bona ba arabelago ka yona. Ka gona, batswadi ba badiiledi bao ba lekago go godiša bana ba bona “ka tayo le tlhahlo ya monagano ya Jehofa” ba lebeletšana le mathata a sa tlwaelegago.—Ba-Efeso 6:4, NW.

Tlhohlo ya go Fihlelela Monagano le Pelo

Batswadi ba Bakriste ba na le kganyogo le boikarabelo bja go ruta bana ba bona “leleme le le sekilego” la therešo ya Beibele. (Tsefanya 3:9, NW) Lega go le bjalo, ge e ba bana ba na le tsebo e lekanyeditšwego ka leleme la batswadi ba bona le gona batswadi ba sa kgone go ntšha sa mafahleng a bona ka tsela e atlegilego ka polelo yeo bana ba bona ba tlwaelanego le yona, batswadi ba ka kgona bjang go tsenya molao wa Jehofa ka dipelong tša bana ba bona? (Doiteronomio 6:7) Bana ba ka kwešiša mantšu ao batswadi ba bona ba a bolelago, eupša ge e ba seo se bolelwago se sa fihlelele pelo, bana ba ka fetoga batho bao ba sa tsebjego ka magaeng a bona.

Pedro le Sandra ba ile ba huduga Amerika Leboa ba ya Australia, gomme ba ile ba lebeletšana le bothata bjo ge ba be ba godiša bašemane ba bona ba babedi ba nywageng ya mahlalagading. * Pedro o re: “Ge o bolela ka ditaba tša moya, go nyakega pelo le maikwelo. O swanetše go bolela dikgopolo tše di tseneletšego le tšeo di nago le morero kudu, ka gona go nyakega tlotlontšu e kgolwanyane.” Sandra o oketša ka gore: “Ge e ba bana ba rena ba sa kwešiše leleme la gabo rena gabotse, gona ba ka fokola moyeng. Ba ka fo se sa hlwa ba kgahlegela therešo, ba se kwešiše molao wa motheo wa seo ba ithutago sona. Kwešišo ya bona ya moya e ka fo šitišwa, gomme tswalano ya bona le Jehofa e ka fokola.”

Gnanapirakasam le Helen ba ile ba huduga Sri Lanka ba ya Jeremane gomme ga bjale ba na le bana ba babedi. Ba dumela ka gore: “Re nagana gore go bohlokwa kudu gore bana ba rena ba bolele segagabo rena ge ba dutše ba ithuta se-Jeremane. Go bohlokwa go bona gore ba kgone go boledišana le rena ka maikwelo a bona, re ntšhetšane sa mafahleng.”

Miguel le Carmen, bao ba hudugilego Uruguay go ya Australia ba re: “Batswadi bao ba lego boemong bja rena ba swanetše go šoma ka thata kudu. Ba swanetše go ithuta leleme le lefsa gabotse e le gore ba ka kgona go kwešiša le go hlalosa ditaba tša moya ka leleme leo goba go ruta bana ba bona go tseba segagabo bona gabotse.”

Phetho ya Lapa

Selo sa bohlokwa kudu bophelong bjo bobotse bja moya bja lapa le ge e le lefe la badiiledi ke go tšea phetho ya gore lapa le tla diriša leleme lefe go “rutwa ke Morêna.” (Jesaya 54:​13) Ge e ba phuthego yeo e bolelago leleme la setlogo la lapa e le kgaufsi, lapa le ka kgetha go kopanela phuthegong ye. Ka lehlakoreng le lengwe, ba ka kgetha go kopanela le phuthego yeo e bolelago leleme le le bolelwago kudu nageng yeo ba hudugetšego go yona. Ke mabaka afe ao a tla tutuetšago phetho ye?

Demetrios le Patroulla, bao ba hudugilego Cyprus go ya Engelane gomme ba godišeditšego bana ba bahlano fao, ba hlalosa seo se tutueditšego phetho ya bona ka gore: “Mathomong, lapa la rena le be le kopanela le phuthego e dirišago Segerika. Gaešita le ge se se re thušitše kudu, se ile sa bonagala se šitiša kgolo ya moya ya bana ba rena. Gaešita le ge ba be ba na le kwešišo ya motheo ya leleme la Segerika, ba be ba sa kwešiše Segerika se se tseneletšego. Se se bile molaleng kgolong ya bona ya moya yeo e bego e bonagala e nanya. Lapa la rena le ile la hudugela phuthegong yeo e dirišago Seisemane, gomme ditla-morago tše dibotse go bana ba rena di ile tša bonagala le semeetseng. Ba ile ba matlafatšwa moyeng. Phetho ya go huduga e be e se bonolo, eupša e ile ya itlhatsela e le ya bohlale tabeng ya rena.”

Lapa le sa dutše le kwešiša leleme la setlogo la batswadi gomme le bunne meputso e mentši. Bana ba bona ba re: “Go a hola go tseba maleme. Gaešita le ge Seisemane e le leleme leo re le dirišago, re hweditše gore go tseba ga rena Segerika go dirile gore go be le ditswalano tše di tiilego le tša kgaufsi tša lapa, kudu-kudu le bo-rakgolo le bo-makgolo ba rena. Gape go dirile gore re be le kwelobohloko kudu go badiiledi, e bile go re neile kgodišego ya gore re ka ithuta leleme le lengwe. Ka gona ge re dutše re gola, lapa la gabo rena le ile la hudugela go ya go thuša phuthego yeo e dirišago se-Albania.”

Christopher le Margarita le bona ba ile ba hudugela Engelane ba e-tšwa Cyprus, gomme ba godišeditše bana ba bararo fao. Ba ile ba kgetha go kopanela le phuthego ya Segerika. Morwa wa bona Nikos, yoo ga bjale a hlankelago e le mogolo phuthegong ya Segerika o gopola ka gore:  “Re ile ra kgothatšwa ke go kopanela le phuthego yeo e bego e sa tšwa go hlongwa ya Segerika. Lapa la gešo le ile la e lebelela e le kabelo ya pušo ya Modimo.”

Margarita o bolela gore: “Ge yo mongwe wa bašemane a be a na le nywaga e šupago gomme yo mongwe a na le e seswai, ba ile ba ingwadiša Sekolong sa Bodiredi sa Pušo ya Modimo. Rena batswadi re be re tshwenyegile ka tsela e itšego ka kwešišo ya bona e lekanyeditšwego ya Segerika. Lega go le bjalo, re be re dira kabelo e nngwe le e nngwe re le lapa, gomme re be re fetša diiri tše dintši re ba thuša go lokišetša dipolelo tša bona.”

Morwedi wa bona Joanna o re: “Ke gopola tate a re ruta Segerika ka go ngwala ditlhaka letlapeng ka gae, gomme re be re swanetše go ithuta tšona gabotse. Batho ba bantši ba fetša nywaga ba ithuta leleme, eupša ka thušo ya mma le tate re ithutile Segerika ka nakwana.”

Malapa a mangwe a kopanela le phuthego yeo e bolelago segagabo bona ka gobane batswadi ba nagana gore bakeng sa go gola ‘tlhaologanyong ya moya’ le go tšwela pele, ba swanetše go rutwa ka segagabo bona. (Ba-Kolose 1:​9, 10; 1 Timotheo 4:​13, 15) Goba lapa le ka lebelela go tseba ga lona leleme e le thušo ya go thuša badiiledi ba bangwe go ithuta therešo.

Ka lehlakoreng le lengwe, lapa le ka nagana gore ke mo go holago kudu go lona go kopanela le phuthego yeo e dirišago leleme leo le bolelwago kudu nageng yeo le hudugetšego go yona. (Ba-Filipi 2:4; 1 Timotheo 3:5) Ka morago ga go ahla-ahla boemo le lapa, go tla tšwa go hlogo ya lapa go dira phetho ka morago ga go kgopela Modimo tlhahlo ka thapelo. (Ba-Roma  14:4; 1 Ba-Korinthe 11:3; Ba-Filipi 4:​6, 7) Ke ditšhišinyo dife tšeo di ka thušago malapa a?

Ditšhišinyo tše Dingwe Tšeo di Šomago

Pedro le Sandra, bao go boletšwego ka bona pejana ba re: “Re beile molao wa gore go bolelwa Sepaniši feela ka gae e le go kgonthišetša gore ga re lebale segagabo rena. Ke molao o thata go ka o latela, ka ge bašemane ba rena ba tseba gore re kwešiša Seisemane. Eupša ge nkabe re sa latela molao wo, go se go ye kae ba ka fo se sa kwešiša Sepaniši.”

Miguel le Carmen, bao le bona ba tsopotšwego pejana ba eleditše ka gore: “Ge e ba batswadi ba swara thuto ya lapa ka mehla le poledišano e nngwe le e nngwe ya temana ya letšatši ka segagabo bona, gona bana ba ka se ithute feela motheo wa lelemeba tla ithuta go bolela dikgopolo tša moya ka leleme leo.”

Le gona Miguel o šišinya gore: “Dira gore go nea bohlatse e be mo go thabišago. Tšhemo ya rena e akaretša karolo e kgolo ya motse o mogolo, gomme re fetša nako e ntši re sepela ka koloi gore re hwetše batho bao ba bolelago segagabo rena. Re diriša nako ye go bapala dipapadi tša Beibele le go bolela ka ditaba tša bohlokwa. Ke leka go rulaganya maeto a go ya go nea bohlatse e le gore re dire maeto a go boela a sego kae ao a enywago dienywa. Ka gona, mafelelong a letšatši, bana ba tla be ba akareditšwe go bonyenyane poledišanong e tee yeo e nago le mohola.”

Go Lebeletšana ka Katlego le go Fapana ga Ditšo

Lentšu la Modimo le kgothaletša bafsa gore: “Ngwan’a-ka! Theetša tayô ya tat’axo; O se nyatšê thutô ya mm’axo.” (Diema 1:8) Lega go le bjalo, mathata a ka tšwelela ge e ba tekanyetšo ya tate ya go laya le “thutô” ya mma di tutuetšwa ke setšo seo se fapanego le seo bana ba bona ba ikhwetšago ba le go sona.

Go ba gona, ke phetho ya hlogo e nngwe le e nngwe ya lapa gore e tla ruta bjang lapa la yona, gomme ga se ya swanela go tutuetšwa ka mo go sa swanelago ke malapa a mangwe. (Ba-Galatia 6:​4, 5) Lega go le bjalo, poledišano e botse gare ga batswadi le bana e ka bula tsela ya go amogela metlwae e mefsa.

Lega go le bjalo, metlwae e mentši goba mekgwa yeo e lego dinageng tšeo di hlabologilego ke yeo e gobatšago bophelo bjo bobotse bja  moya bja Bakriste. Boitshwaro bjo bo gobogilego bja botona le botshadi, megabaru le borabele gantši di godišwa kudu ka mmino o tumilego le boithabišo. (Ba-Roma 1:​26-32) Batswadi ba Bakriste ga se ba swanela go tlogelela boikarabelo bja bona bja go laola kgetho ya bana ba bona ya mmino le boithabišo e le feela ka baka la gore batswadi ba na le bothata bja go kwešiša leleme. Ba swanetše go bea tlhahlo e tsepamego. Lega go le bjalo, se se ka tšweletša tlhohlo.

Carmen o re: “Gantši ga re kwešiše mantšu a mmino woo bana ba rena ba o theetšago. Modumo wa wona o ka fo kwagala e le o amogelegago, eupša re ka se tsebe ge e ba mantšu a na le tlhaloso yeo e lego gabedi goba e le a polelo ya setarateng yeo e gobogilego.” Ba ile ba lebeletšana bjang ka katlego le boemo bjo? Miguel o re: “Re fetša nako e ntši re ruta bana ba rena ka dikotsi tša mmino o gobogilego, gomme re leka go ba thuša go kgetha mmino woo o tla amogelwago ke Jehofa.” Ee, bohlale le go leka-lekana di a nyakega bakeng sa go lebeletšana ka katlego le go fapana ga ditšo.—Doiteronomio 11:​18, 19; Ba-Filipi 4:5.

Go Buna Meputso

Go godišetša bana nageng e šele go nyaka nako e oketšegilego le boiteko. Ga go na pelaelo ka seo. Eupša bobedi batswadi le bana ba ka buna meputso e oketšegilego ka baka la boiteko bja bona.

Azzam le mosadi wa gagwe Sara, ba ile ba hudugela Jeremane ba e-tšwa Turkey moo ba ilego ba godišetša bana ba bararo gona. Ga bjale morwa wa bona yo mogolo o hlankela ofising ya lekala ya Dihlatse tša Jehofa kua Selters, Jeremane. Azzam o re: “Seo se holago bana kudu ke gore ba ka kgona go hlagolela dika tšeo e lego mehola ya bohlokwa ditšong ka bobedi.”

Antonio le Lutonadio ba ile ba tloga Angola ba hudugela Jeremane gomme ba godišetša bana ba senyane fao. Lapa le bolela se-Lingala, se-Fora le Sejeremane. Antonio o re: “Bokgoni bja go bolela maleme a fapa-fapanego bo thuša lapa la rena go nea bohlatse go batho bao ba tšwago dinageng tše dintši. Se se tloga se re thabiša e le ruri.”

Bana ba babedi ba banyalani ba ma-Japane bao ba hudugetšego Engelane ba nagana gore go tloga go ba hola kudu go tseba Sejapane gotee le Seisemane. Yo monyenyane o re: “Go tseba maleme a mabedi go re thušitše go hwetša mošomo. Re holegile dikopanong tše dikgolo tša Seisemane. Ka nako e swanago, re na le tokelo ya go hlankela phuthegong ya Sejapane, moo go nyakegago thušo e kgolo.”

O ka Atlega

Go godiša bana o dula gare ga batho bao ba sa abelanego ditekanyetšo tšeo di swanago tša setšo ke tlhohlo yeo bahlanka ba Modimo ba bego ba dutše ba lebeletšane le yona ga e sa le go tloga mehleng ya Beibele. Batswadi ba Moše ba ile ba atlega, gaešita le ge a godišeditšwe Egipita. (Ekisodo 2:​9, 10) Ba-Juda ba mmalwa bao ba bego ba le bothopša Babele ba ile ba godiša bana bao ba bego ba ikemišeditše go boela Jerusalema go ya go tsošološa borapedi bja therešo.​—Esera 2:​1, 2, 64-70.

Ka mo go swanago lehono, batswadi ba Bakriste ba ka atlega. Ba ka ba le moputso wa go kwa bana ba bona ba bolela seo banyalani ba bangwe ba ilego ba kwa bana ba bona ba se bolela: “Re lapa leo le momaganego kudu ka baka la tlhokomelo e lerato ya mma le tate, bao ka mehla re thabetšego poledišano e botse le bona. Re thabela go ba karolo ya lapa la lefaseng ka bophara leo le hlankelago Jehofa.”

[Mengwalo ya ka tlase]

[Seswantšho go letlakala 24]

Go bolela segageno feela ge o le ka gae go nea bana ba gago tsebo ya motheo ya leleme leo

[Seswantšho go letlakala 24]

Go bolela leleme leo le swanago go boloka tlamo magareng ga bo-rakgolo le bo-makgolo le ditlogolo

[Seswantšho go letlakala 25]

Go ithuta Beibele le bana ba gago go godiša ‘tlhaologanyo ya bona ya moya’