Dipotšišo tše Tšwago go Babadi

• Na Lucifer ke leina leo Beibele e le dirišago bakeng sa Sathane?

Leina Lucifer le tšwelela gatee ka Mangwalong le gona ka diphetolelong tše dingwe tša Beibele. Ka mohlala, King James Version e fetolela Jesaya 14:​12 ka gore: “Wa tla wa wa legodimong, joo Lucifer, morwa wa meso!”

Lentšu la Sehebere leo le fetoletšwego e le “Lucifer” le bolela gore “yo a phadimago.” Septuagint e diriša lentšu la Segerika leo le bolelago gore “motliši wa meso.” Ka baka leo, diphetolelo tše dingwe di fetolela lentšu la mathomong la Sehebere e le “naledi ya meso” goba “Naledi ya mosegare.” Eupša Jerome’s Latin Vulgate e diriša “Lucifer” (morwadi wa seetša), gomme se se hlalosa lebaka leo ka lona lentšu le le tšwelelago ka diphetolelong tše di fapa-fapanego tša Beibele.

Lucifer yo ke mang? Polelwana “yo a phadimago,” goba “Lucifer,” e hwetšwa ka go seo Jesaya ka boporofeta a laetšego ba-Isiraele go se tsebatša e le “sefela sa kxoši ya Babele.” Ka gona, ke karolo ya sefela seo se bego se lebišitšwe kudu go lešika la dikgoši la Babele. Taba ya gore tlhaloso ya “yo a phadimago” e neilwe motho e sego sebopiwa sa moya e bonwa ka mo go tšwelago pele polelwaneng e rego: “O kxoromeleditšwe mono xo dulaxo bahu [‘heleng,’ PK].” Hele ke lebitla le le tlwaelegilego la bathoe sego lefelo leo Sathane Diabolo a dulago go lona. Go feta moo, bao ba bonago Lucifer a tlišwa boemong bjo ba botšiša gore: “A xa se yêna monna yola mo-šišinya-šakô [“lefase,” PK]?” (Mongwalo o sekamego ke wa rena.) Ka mo go kwagalago, “Lucifer” e šupa go motho, e sego sebopiwa sa moya.—Jesaya 14:​4, 15, 16.

Ke ka baka la’ng tlhaloso e bohlokwa bjalo e newa lešika la dikgoši la Babele? Re swanetše go lemoga gore kgoši ya Babele e be e swanetše go bitšwa yo a phadimago feela ka morago ga ge e wele bogošing le gona ka tsela ya sekwero. (Jesaya 14:3) Boikgogomošo bja boithati bo ile bja hlohleletša dikgoši tša Babele go ikgodišetša ka godimo ga bao ba ba dikologilego. Boikgogomošo bja ba lešika la bogoši e be e le bjo bogolo kudu moo bo bontšhwago e le go ikgantšha: “Ke tlo rotoxêla kwa lexodimong, ke y’o phaxamiša ’dulô sa-ka sa boxoši kwa xodimo xa dinaledi tša Modimo, wa re ke y’o dula Thaba ’a molaka [“phuthego,” PK], morumô wa Leboa. . . . Ke y’o etša Yo-xodimo-dimo.”—Jesaya 14:​13, 14.

“Dinaledi tša Modimo” ke dikgoši tša lešika la bogoši la Dafida. (Numeri 24:​17) Go tloga ka Dafida go ya pele, “dinaledi” tše di bušitše di le Thabeng ya Tsione. Ka morago ga ge Salomo a agile tempele kua Jerusalema, leina Tsione le ile la šoma go motse ka moka. Ka tlase ga kgwerano ya Molao, batho ba batona ka moka ba ba-Isiraele ba be ba laetšwe go ya Tsione gararo ka ngwaga. Ka gona, e bile ‘thaba ya phuthego.’ Ka go ikemišetša go ba ka godimo ga dikgoši tša Juda gomme a di tloše thabeng yeo, Nebukadinetsara o tsebatša boikemišetšo bja gagwe bja go ipea ka godimo ga “dinaledi” tšeo. Go e na le go nea Jehofa tebogo ka go di fenya, ka boikgogomošo o ipea boemong bja Jehofa. Ka gona ke ka morago ga go wa ga mmušo wa gagwe moo lešika la dikgoši la Babele ka tsela ya go kwerwa le bitšwago “yo a phadimago.”

Go ikgogomoša ga babuši ba Babele ka kgonthe go bontšhitše boemo bja kgopolo bja “modimo wa lefase lé”Sathane Diabolo. (2 Ba-Korinthe 4:4) Le yena ka mo go swanago o kganyoga matla gomme o duma go ipea ka godimo ga Jehofa Modimo. Eupša Lucifer ga se leina leo le neilwego Sathane go ya ka Mangwalo.

 • Ke ka baka la’ng 1 Koronika 2:​13-15 e re Dafida ke morwa wa bošupa wa Isai, mola 1 Samuele 16:​10, 11 e bontšha gore e be e le wa boseswai?

Ka morago ga ge Kgoši Saulo wa Isiraele ya bogologolo a hlanogetše borapedi bja therešo, Jehofa Modimo o ile a romela moporofeta Samuele go tlotša yo mongwe wa barwa ba Isai go ba kgoši. Pego e buduletšwego ya tiragalo ye ya histori yeo e ngwadilwego ke Samuele ka boyena lekgolong la bo-11 la nywaga B.C.E., e bontšha Dafida e le morwa wa boseswai wa Isai. (1 Samuele 16:​10-13) Lega go le bjalo, pego e ngwadilwego ke moperisita Esera nywaga e 600 ka morago e re: “Isai a tswala Eliaba morwa wa nthla wa xaxwe; wa bobedi ké Abinadaba; wa boraro ké Simei; wa bonê ké Nethaniele; wa bohlano ké Radai; wa xo selêla ké Otsema; wa xo šupa ké Dafida.” (1 Koronika 2:​13-15) Go diragetše’ng ka yo mongwe wa bana babo Dafida, gomme ke ka baka la’ng Esera a tshetše leina la gagwe?

Mangwalo a bolela gore Isai ‘o be a na le barwa ba seswai.’ (1 Samuele 17:​12) Go bonagala yo mongwe wa barwa ba gagwe a se a ka a phela lebaka le letelele ka mo go lekanego go ka nyala gomme a be le bana. Ka ge a be a se na bana, o be a ka se be le karolo bohweng bja moloko goba go bolelelwa dipegong tša lelokelelo la lešika la lapa la Isai.

Bjale anke re nagane ka mehla ya Esera. Nagana ka boemo bjoo a ilego a bokanya Dikoronika ka tlase ga bjona. Bothopša kua Babele bo fedile mo e ka bago nywaga e 77 pejana, gomme ba-Juda ba be ba dudišegile gape naganeng ya gabo bona. Kgoši ya Peresia e be e dumeletše Esera go hloma baahlodi le barutiši ba Molao wa Modimo le go kgabiša ngwako wa Jehofa. Go be go nyakega malokelelo a nepagetšego a mašika go kgonthišetša bohwa bja moloko le go kgonthišetša gore ke feela batho ba dumeletšwego bao ba bego ba hlankela e le baperisita. Ka gona Esera o ile a lokišetša pego e feletšego ya histori ya setšhaba, go akaretša pego e lebanyago le yeo go ka ithekgwago ka yona ya lapa la Juda le la Dafida. Leina la morwa wa Isai yo a hwilego a se na bana e be e tla ba le sa swanelego. Ka gona, Esera o ile a tshela leina la gagwe.