Phema go Forwa

BOFORA bo nyakile bo na le nako e lekanago le ya batho. E nngwe ya ditiragalo tša mathomo tšeo di lego historing e begilwego e be e le tiro ya bofora. Yeo e be e le nako ya ge Sathane a be a fora Efa kua tšhemong ya Edene.Genesi 3:​13; 1 Timotheo 2:14.

Gaešita le ge go tloga ka nako yeo go sa ka gwa ba le nako yeo ka yona bofora bo bego bo sa phatlalala lefaseng, ke bjo bo atilego ka mo go kgethegilego lehono. Ge e be e lebelelela pele mehleng ya lehono, Beibele e lemošitše gore: “Batho ba babe le baaroši, bobe bya bôná bo tlo fêla bò xola bò e-ya, bà fora ba bangwê, le bôná bà forwa.”—2 Timotheo 3:13.

Batho ba forwa ka mabaka a mantši a fapa-fapanego. Baradia le batho bao ba hlalefetšago ba bangwe ka dikholofetšo tša maaka ba fora bahlaselwa e le gore ba hwetše tšhelete ya bona. Bo-radipolitiki ba bangwe ba fora ditho tša mekgatlo ya bona, ba ikemišeditše go dula ba le matleng a bona a bopolitiki go sa šetšwe seo se ka diregago. Batho e bile ba a iphora. Go e na le go lebeletšana le ditherešo tšeo di sa thabišego, ba ikgodiša ka gore ga go na selo seo se gobatšago go phegeleleng mekgwa e kotsi e bjalo ka go kgoga, go diriša dihlare-tagi gampe goba boitshwaro bjo bo gobogilego bja botona le botshadi.Le gona go na le bofora ditabeng tša bodumedi. Baetapele ba bodumedi ba mehleng ya Jesu ba ile ba fora batho. Jesu o boletše ka bafori bao gore: “Ké difofu dihlahla-difofu; xomme xe sefofu se hlahla sefofu, di tlo wêla moleteng ka dipedi.” (Mateo 15:​14) Go feta moo, batho ba a iphora ditabeng tša bodumedi. Diema 14:​12 e re: “Xo na le ditsela tše O rexo di lokile; ’me kwa pele ya tlo ba tša lehu.”

Bjalo ka mehleng ya Jesu, ba bantši lehono ba a forwa ditabeng tša bodumedi gomme ga se mo go makatšago! Moapostola Paulo o itše Sathane ‘o foufaditše dipelo tša ba ba sa dumelego gore ba se bonegelwe ke lebone la Ebangedi ya letago la Kriste, yena seswantšho sa Modimo.’—2 Ba-Korinthe 4:4.

Ge e ba re forwa ke mohlalefetši, re lahlegelwa ke tšhelete. Ge e ba re forwa ke radipolitiki, re ka feleletša ka go lahlegelwa ke tokologo ya rena e itšego. Eupša ge e ba Sathane a re fora e le gore re gane therešo mabapi le Jesu Kriste, re tla lahlegelwa ke bophelo bjo bo sa felego! Ka gona phema go forwa. Hlahloba ka go se bebe sefahlego mothopo o sa ganetšwego wa therešo ya bodumedi, Beibele. Re tla lahlegelwa ke mo gontši kudu ge e ba re dira ka mo go fapanego.—Johane 17:3.