Na go Ruta ga Gago ke mo go Atlegago?

BATSWADI, bagolo le bagoeledi ba ditaba tše dibotseka moka e swanetše go ba barutiši. Batswadi ba ruta bana ba bona, bagolo ba ruta ditho tša phuthego ya Bokriste gomme bagoeledi ba ruta ditaba tše dibotse go ba bafsa bao ba nago le kgahlego. (Doiteronomio 6:​6, 7; Mateo 28:​19, 20; 1 Timotheo 4:​13, 16) O ka dira’ng bakeng sa gore thuto ya gago e be e atlegago kudu? Tsela e nngwe ke go ekiša mohlala le mokgwa wa barutiši bao ba nago le bokgoni bao go boletšwego ka bona ka Lentšung la Modimo. Esera e be e le morutiši yo bjalo.

Go Ithuta go tšwa Mohlaleng wa Esera

Esera e be e le moperisita wa leloko la Arone yoo a phetšego nywageng e 2 500 e fetilego kua Babele. Ka ngwaga wa 468 B.C.E., o ile a ya Jerusalema bakeng sa go tšwetša pele borapedi bjo bo sekilego gare ga ba-Juda bao ba bego ba dula moo. (Esera 7:​1, 6, 12, 13) Modiro wo o be o nyaka gore a rute batho Molao wa Modimo. Ke’ng seo Esera a ilego a se dira go kgonthišetša gore thuto ya gagwe e be e atlega? O ile a gata megato e sego kae ya bohlokwa. Ela hloko megato ye bjalo ka ge e ngwadilwe go Esera 7:10:

“Esera pelo ya xaxwe e be [1] [e lokišeletšwa, NW] e sa lese xo hlwa è [2] nyaka molaô wa Morêna, le [3] xo dira se se bolêlwaxo ke wôna, le [4] xo ruta Isiraele melaô le dithswanêlô.” A re hlahlobeng ka boripana o mongwe le o mongwe wa megato ye gomme re bone gore re ka ithutang go tšwa go yona.

“Esera Pelo ya Xaxwe e be e [Lokišeletšwa, NW]”

Go swana le ge molemi a thoma pele ka go lokiša mmu a diriša mogoma pele a bjala peu, Esera ka thapelo o ile a lokišeletša pelo ya gagwe bakeng sa go amogela lentšu la Modimo. (Esera 10:1) Ka mantšu a mangwe, o be a ‘lebišitše pelo ya gagwe’ dithutong tša Jehofa.—Diema 2:2.

Ka mo go swanago, Beibele e bolela gore Kgoši Josefate o ile a “tiiša [lokišeletša, NW] pelo ya xaxo [gagwe] xo nyaka Modimo.” (2 Koronika 19:3) Ka mo go fapanego, moloko wa Isiraele “wa dipelo tša xo se tiiše [lokišetšwe, NW]” o hlaloswa e le “wa bonganga le wa lonya.” (Psalme 78:8) Jehofa o bona “motho wa xo ikuta wa pelong.” (1 Petro 3:4) Ee, “babôtlana ó ba ruta tsela y’axwe.” (Psalme 25:9) Ka gona, ke ga bohlokwa gakaakang gore barutiši lehono ba latele mohlala wa Esera ka gore sa pele ba bee dipelo  tša bona boemong bjo bo swanetšego ka go rapela!

‘Go Nyaka Molao wa Morena’

Gore e be morutiši yo a nago le bokgoni, Esera o ile a nyaka Lentšu la Modimo. Ge e ba o be o swanetše go bona ngaka, na o be o ka se theetše ka kelohloko le go kgonthišetša gore o kwešišitše dilo ka moka tšeo a di bolelago goba tšeo a di laelago? Ga go pelaelo gore o be o tla dira bjalo, ka gobane bophelo bja gago bjo bobotse bo kotsing. Ka gona, re swanetše go nea tlhokomelo e ntši gakaakang dilong tšeo Jehofa a re botšago tšona goba a di laelago, ka Lentšu la gagwe, Beibele le ka “molaki e a bôtêxaxo yo bohlale.” Go feta moo, dikeletšo tša gagwe di mabapi le bophelo bja rena ka noši! (Mateo 4:4; 24:​45-47) Ke therešo gore ngaka e ka dira phošo, eupša “Molaô wa Morêna xa o na bosodi.” (Psalme 19:7) Le ka mohla re ka se ke ra nyaka kakanyo ya bobedi.

Dipuku tša Beibele tša Koronika (tšeo mathomong di ngwadilwego ke Esera e le bolumo e tee) di bontšha gore Esera e be e tloga e le seithuti sa kgonthe. Bakeng sa go ngwala dipuku tšeo, o ile a bolela ka methopo e mentšinyana. * Ba-Juda, bao ba sa tšwago go boa Babele, ba be ba nyaka kakaretšo ya histori ya setšhaba sa bona. Ba be ba se na tsebo e lekanego ka menyanya ya bodumedi bja bona, ditirelo tša ka tempeleng le mediro ya ba-Lefi. Lelokelelo la lešika e be e le la bohlokwa bjo bogolo go bona. Esera o ile a bea tlhokomelo e kgethegilego ditabeng tšeo. Go ba go fihla nakong ya go tla ga Mesia, ba-Juda ba ile ba dula e le setšhaba seo se bego se na le naga ya sona, tempele, baperisita le mmuši. Ka baka la tsebišo yeo Esera a e kgobokeditšego, botee le borapedi bja therešo di be di tla bolokwa.

Mekgwa ya gago ya go ithuta e bjang ge e bapišwa le ya Esera? Go ithuta Bibele ka phišego go tla go thuša go ruteng Beibele ka tsela e atlegago.

Go “Nyaka Molaô wa Morêna” Bjalo ka Lapa

Go nyaka molao wa Jehofa ga go a thibelwa thutong ya motho ka noši. Thuto ya lapa ke sebaka se sebotse kudu bakeng sa go dira se gabotse.

Jan le Julia, e lego balekane kua Netherlands, ba ile ba balela barwa ba bona ba babedi ka go hlaboša go tloga letšatšing leo bana ba belegwego ka lona. Lehono, Ivo o na le nywaga e 15 gomme Edo o na le e 14. Ba sa dutše ba swara thuto ya bona ya lapa gatee ka beke. Jan o a hlalosa: “Pakane ya rena e kgolo ga se go ahla-ahla dilo tše dintši nakong ya thuto eupša ke go dira gore bašemane ba kwišiše seo se ahla-ahlilwego.” O oketša ka gore: “Bašemane ba dira dinyakišišo kudu. Ba lekola mantšu ao a sa tlwaelegago le batho ba ka Beibelengmehla yeo ba phetšego go yona, gore e be e le bomang, gore mešomo ya bona e be e le efe, bjalo-bjalo. Go tloga ga e sa le ba ithutile go bala, ba ahla-ahlile dipuku tšeo di swanago le Insight on the Scriptures, dipukuntšu le di-encyclopedia. Se se dira gore thuto ya lapa e be yeo e thabišago kudu. Bašemane ka dinako tšohle ba dula ba letile ka phišego bakeng sa thuto ya lapa.” Bjalo ka mohola wa tlaleletšo, ga bjale bašemane ka bobedi ga bona ba phala barutwana-gotee le bona ka bokgoni bja polelo.

John le Tini, e lego balekane ba bangwe kua Netherlands, ba ithutile le morwa wa bona, Esli (yo ga bjale a nago le nywaga e 24 gomme e le mmulamadibogo phuthegong e nngwe), gotee le morwedi wa bona, Linda (yo ga bjale a nago le nywaga e 20 gomme a nyalanego le ngwanabo rena yo mobotse). Lega go le bjalo, go e na le go ithuta puku e itšego ka mokgwa wo o tlwaelegilego wa dipotšišo le dikarabo, ba ile ba dumelelanya thuto ya lapa le nywaga le dinyakwa tša bana. Ke mokgwa ofe wo ba o dirišitšego?

John o hlalosa gore morwa wa gagwe le morwedi ba kgetha taba yeo e kgahlišago go tšwa go “Dipotšišo tše Tšwago go Babadi” (go tšwa go Morokami wa seisemane) le “Pono ya Beibele” (go tšwa go Phafoga!). Ka morago, ba ile ba anega seo ba se lokišeditšego, seo gantši se feleleditšego ka dipoledišano tše di kgahlišago tša lapa. Ka tsela ye ba banyenyane ba ile ba hwetša phihlelo ka go dira dinyakišišo le go ahla-ahla mafelelo a go ithuta ga bona. Na o “nyaka molao wa Morena” le bana ba gago? Se se ka se godiše feela bokgoni bja gago bja motho ka noši bja go  ruta eupša se tla thuša bana ba gago gore e be barutiši bao ba atlegago.

“Xo Dira se se Bolêlwaxo ke wôna”

Esera o ile a diriša seo a ithutilego sona. Ka mohlala, ge a be a le Babele, a ka ba a ile a phela bophelo bjo bo rulagantšwego gabotse. Lega go le bjalo, ge a lemoga gore o be a ka thuša batho babo ka ntle ga naga, o ile a hlanogela boiketlo bja Babele bakeng sa motse wa kgole wa Jerusalema, gotee le mathata le dikotsi tša wona. Go molaleng gore Esera o be a sa kgoboketše feela tsebo ya Beibele eupša o be a ikemišeditše go diriša seo a ithutilego sona.—1 Timotheo 3:13.

Ka morago, ge a dula Jerusalema, Esera o ile a bontšha gape gore o diriša seo a ithutilego sona le go se ruta. Se se ile sa bonagala ge a e-kwa ka manyalo a banna ba ba-Isiraele go basadi ba baheitene. Pego ya Beibele e re botša gore o ile a ‘gagola seaparo sa gagwe le kobo ya gagwe gomme a ubarela meriri ya hlogo ya gagwe le maledu a gagwe, a ba a dula fase a gakanegile go fihla mantšiboa.’ O ile a ‘šia le go emišetša sefahlogo sa gagwe’ go Jehofa.—Esera 9:​1-6.

Ruri go ithuta ga gagwe Molao wa Modimo go ilego gwa mo kgoma ka tekanyo e kgolo! Esera o be a na le pono e botse ka mafelelo a šoro a go se kwe ga batho. Palo ya mašaledi a ba-Juda e be e le e nyenyane. Ge e ba ba be ba tsene manyalong a mohlakanelwa, mafelelong ba be ba ka tswakana le ditšhaba tša baheitene tšeo di ba dikologilego gomme borapedi bjo bo hlwekilego bo be bo ka timelela gabonolo godimo ga lefase!

Ka mo go thabišago, mohlala wa Esera wa poifo e tiilego le phišego o ile wa tutuetša ba-Isiraele go lokiša ditsela tša bona. Ba ile ba lahla basadi ba bona ba šele. Ka dikgwedi tše tharo dilo ka moka di be di lokišitšwe. Potego ya Esera ka noši ya go botegela Molao wa Modimo ka go se kwanantšhe e ile ya dira mo gogolo bakeng sa go dira thuto ya gagwe gore e atlege.

Selo se se swanago ke sa therešo lehono. Tate yo mongwe wa Mokriste o itše: “Bana ga ba dire seo o se bolelago; ba dira seo o se dirago!” Molao o swanago wa motheo o sa dutše o šoma ka gare ga phuthego ya Bokriste. Bagolo bao ba beago mohlala o mobotse ba ka lebelela gore phuthego e arabele dithutong tša bona.

“Xo Ruta Isiraele Melaô le Dithswanêlô”

Go na le lebaka le lengwe gape leo ka lona dithuto tša Esera di bego di atlega. O be a sa rute dikgopolo tša gagwe, eupša o be a ruta “melaô le dithswanêlô.” E lego melao ya motheo goba melao ya Jehofa. Se e be e le boikarabelo bja gagwe bja boperisita. (Maleaki 2:7) O rutile gape le ditshwanelo gomme a nea mohlala wa seo a se rutilego ka go kgomarela se se lokilego ka tsela ya toka le ya go se bebe sefahlego, ka go dumelelana le tekanyetšo. Ge bao ba nago le matla a taolo ba bontšha toka, go tla ba le go tsepama gomme mafelelo a sa ruri a a tšweletšwa. (Diema 29:4) Ka mo go swanago, bagolo ba Bakriste, batswadi le bagoeledi ba Mmušo bao ba tlwaelanego le Lentšu la Modimo ba tla godiša go tsepama moyeng ge ba ruta ka melao ya motheo ya Jehofa le ditshwanelo ka phuthegong, ka malapeng a bona gotee le go bao ba thabelago.

Na ga o dumele gore thuto ya gago e ka ba e atlegago ge o ekiša ka botlalo mohlala wa Esera yo a botegago? Ka gona, ‘lokišeletša pelo ya gago, nyaka molao wa Jehofa, o diriše gomme o rute ka melao le ditshwanelo tša Jehofa.’—Esera 7:10.

[Mengwalo ya ka tlase]

[Lepokisi/Seswantšho go letlakala 22]

KE’NG SEO SE DIRILEGO GORE THUTO YA ESERA E ATLEGE?

1. O ile a bea pelo ya gagwe boemong bjo bo swanetšego

2. O ile a nyaka Molao wa Jehofa

3. O ile a bea mohlala o mobotse ka go diriša seo a ithutilego sona

4. O ile a ikemišetša go ruta pono ya Mangwalo