Tšhireletšego ya Gago e Theilwe Kae?

Motsaneng wa kua Afrika Bodikela, Josué yo mofsa o laela ba lapa la gabo le bagwera. Ke moka o ile a hudugela motseng o mogolo bakeng sa go tsoma tšhireletšego ya tša ditšhelete. Lega go le bjalo, kapejana ka morago ga ge a fihlile kholofelo ya gagwe e ile ya nyamelela ge a lemoga gore motse o mogolo ga se lefelo leo go lona go lego bonolo go huma.

A KATANA le go tlwaelana le bophelo bja motseng o mogolo, Josué o ile a nyama kudu. Motse o mogolo o be o le kgole kudu le seo a bego a nagana gore o tla ba sona. Go sa dutše go le bjalo, maikwelong a gagwe a ka gare-gare, Josué o be a hlologela go boela lapeng la gabo le go bagwera ba gagwe motsaneng wa gabo wo o diilago wo a o tlogetšego. Eupša o boifa gore batho ba bangwe ba motseng ba tla mo kwera. O tshwenyega ka gore: ‘Ba tla re ke motho yo a paletšwego ka ge ke sa kgona go atlega motseng o mogolo.’

Selo seo se bego se mo imela kudu le go feta ke go nyama moo batswadi ba gagwe ba bego ba tla go kwa. Ba ithekgile ka yena bakeng sa thušo ya tša ditšhelete. Ge a dutše a leka go lebeletšana le morwalo wo wa maikwelo, Josué o šoma diiri tše telele mošomong wa maemo a tlase gomme o gola feela karolwana ya seo a bego a nagana gore o tla se hwetša. O lapišitšwe ke go šoma ka mo go feteletšego. Gomme nako e šetšego bakeng sa mediro ya Bokriste, yeo a e tšeelago godimo kudu e dutše e fokotšega beke e nngwe le e nngwe. A le kgole kudu le borutho bja lapa la gabo le bagwera ba gagwe ba kgale, o ikwa a nyamile e bile a le noši. O hwetša gore motse o mogolo ga se wa mo nea tšhireletšego yeo a bego a e nyaka kudu.

Gaešita le ge maina le mafelo di fapana, phihlelo ya Josué e nyamišago ke yeo e diregago leboelela. Ga se gore Josué o be a e-na le boithati ge a be a kganyoga go hudugao be a fo tsoma tšhireletšego. O be a ikwa gore dibaka tša gagwe motseng o mogolo di be di le kaone go feta motseng o monyenyane. Go ba gona, ka dinako tše dingwe motho a ka kaonefatša maemo a gagwe a dilo tše di bonagalago, eupša seo ga se bolele tšhireletšego ya kgonthe. Ka ntle le pelaelo ga se ya ba ya kgonthe go Josué, e bile se se ka se be bjalo le go ba bangwe ba bantši bao ba lekago selo se swanago. Se se dira gore re botšiše gore, ‘Tšhireletšego ke eng?’

Tšhireletšego e lebelelwa ka mo go fapanego ke batho ba fapanego. Pukuntšu e nngwe e re tšhireletšego ke “go lokologa kotsing” goba “go lokologa poifong goba pelaelong.” Batho ba bantši ba lemoga gore “go lokologa kotsing” ka mo go feletšego ga go gona lehono. Ba kgotsofaletše feela ge ba ikwa ba šireletšegile, go sa šetšwe maemo a tšhošetšago ao a ka ba dikologago.

Go thwe’ng ka wena? O lebelela kae bakeng sa tšhireletšego? Na e hwetšwa motseng o mogolo e sego o monyenyane bjalo ka ge Josué a be a nagana bjalo? Goba na e hwetšwa tšheleteng, go sa šetšwe gore o ka e hwetša kae goba bjang? Na mohlomongwe e hwetšwa ka go ba le maemo a phagamego setšhabeng? Go sa šetšwe gore o dumela gore tšhireletšego ya gago e theilwe kae, tšhireletšego yeo e tla tšea lebaka le le kae go wena gotee le go lapa la gago?

Anke re ahla-ahleng ditsela tše tharo tšeo ka tšona batho ba bantši ba tsomago tšhireletšegolefelo; tšhelete goba maemo. Ke moka re tla ahla-ahla gore tšhireletšego ya kgonthe le ya ka mo go sa felego e theilwe kae.

[Mongwalo wa ka tlase]

Leina le fetotšwe.